၂. သင်္ချာဝါရော

သုဒ္ဓံ

၁၃၄. ဟေတုယာ စတ္တာရိ၊ အာရမ္မဏေ နဝ၊ အဓိပတိယာ နဝ၊ အနန္တရေ နဝ၊ သမနန္တရေ နဝ၊ သဟဇာတေ နဝ၊ အညမညေ နဝ၊ နိဿယေ နဝ၊ ဥပနိဿယေ နဝ၊ ပုရေဇာတေ တီဏိ၊ ပစ္ဆာဇာတေ တီဏိ၊ အာသေဝနေ နဝ၊ ကမ္မေ စတ္တာရိ၊ ဝိပါကေ နဝ၊ အာဟာရေ စတ္တာရိ၊ ဣန္ဒြိယေ စတ္တာရိ၊ ဈာနေ နဝ၊ မဂ္ဂေ နဝ၊ သမ္ပယုတ္တေ ဆ၊ ဝိပ္ပယုတ္တေ ပဉ္စ၊ အတ္ထိယာ နဝ၊ နတ္ထိယာ နဝ၊ ဝိဂတေ နဝ၊ အဝိဂတေ နဝ.

အနုလောမံ.

ပစ္စနီယုဒ္ဓါရော

၁၃၅. သဝိတက္ကော ဓမ္မော သဝိတက္ကဿ ဓမ္မဿ အာရမ္မဏပစ္စယေန ပစ္စယော ။ သဟဇာတပစ္စယေန ပစ္စယော။ ဥပနိဿယပစ္စယေန ပစ္စယော။ ကမ္မပစ္စယေန ပစ္စယော. သဝိတက္ကော ဓမ္မော အဝိတက္ကဿ ဓမ္မဿ အာရမ္မဏပစ္စယေန ပစ္စယော။ သဟဇာတပစ္စယေန ပစ္စယော။ ဥပနိဿယပစ္စယေန ပစ္စယော။ ပစ္ဆာဇာတပစ္စယေန ပစ္စယော။ ကမ္မပစ္စယေန ပစ္စယော. သဝိတက္ကော ဓမ္မော သဝိတက္ကဿ စ အဝိတက္ကဿ စ ဓမ္မဿ အာရမ္မဏပစ္စယေန ပစ္စယော။ သဟဇာတပစ္စယေန ပစ္စယော။ ဥပနိဿယပစ္စယေန ပစ္စယော။ ကမ္မပစ္စယေန ပစ္စယော. (၃)

၁၃၆. အဝိတက္ကော ဓမ္မော အဝိတက္ကဿ ဓမ္မဿ အာရမ္မဏပစ္စယေန ပစ္စယော။ သဟဇာတပစ္စယေန ပစ္စယော။ ဥပနိဿယပစ္စယေန ပစ္စယော။ ပုရေဇာတပစ္စယေန ပစ္စယော။ ပစ္ဆာဇာတပစ္စယေန ပစ္စယော။ ကမ္မပစ္စယေန ပစ္စယော။ အာဟာရပစ္စယေန ပစ္စယော။ ဣန္ဒြိယပစ္စယေန ပစ္စယော. အဝိတက္ကော ဓမ္မော သဝိတက္ကဿ ဓမ္မဿ အာရမ္မဏပစ္စယေန ပစ္စယော။ သဟဇာတပစ္စယေန ပစ္စယော။ ဥပနိဿယပစ္စယေန ပစ္စယော။ ပုရေဇာတပစ္စယေန ပစ္စယော. အဝိတက္ကော ဓမ္မော သဝိတက္ကဿ စ အဝိတက္ကဿ စ ဓမ္မဿ အာရမ္မဏပစ္စယေန ပစ္စယော။ သဟဇာတပစ္စယေန ပစ္စယော။ ဥပနိဿယပစ္စယေန ပစ္စယော။ ပုရေဇာတပစ္စယေန ပစ္စယော. (၃)

၁၃၇. သဝိတက္ကော စ အဝိတက္ကော စ ဓမ္မာ သဝိတက္ကဿ ဓမ္မဿ အာရမ္မဏပစ္စယေန ပစ္စယော။ သဟဇာတပစ္စယေန ပစ္စယော။ ဥပနိဿယပစ္စယေန ပစ္စယော. သဝိတက္ကော စ အဝိတက္ကော စ ဓမ္မာ အဝိတက္ကဿ ဓမ္မဿ အာရမ္မဏပစ္စယေန ပစ္စယော။ သဟဇာတပစ္စယေန ပစ္စယော ။ ဥပနိဿယပစ္စယေန ပစ္စယော ။ ပစ္ဆာဇာတပစ္စယေန ပစ္စယော. သဝိတက္ကော စ အဝိတက္ကော စ ဓမ္မာ သဝိတက္ကဿ စ အဝိတက္ကဿ စ ဓမ္မဿ အာရမ္မဏပစ္စယေန ပစ္စယော။ သဟဇာတပစ္စယေန ပစ္စယော။ ဥပနိဿယပစ္စယေန ပစ္စယော. (၃)