၁. ဝိဘင်္ဂဝါရော

ဟေတုပစ္စယော

၁၁၆. သဝိတက္ကော ဓမ္မော သဝိတက္ကဿ ဓမ္မဿ ဟေတုပစ္စယေန ပစ္စယော – သဝိတက္ကာ ဟေတူ သမ္ပယုတ္တကာနံ ခန္ဓာနံ ဟေတုပစ္စယေန ပစ္စယော၊ ပဋိသန္ဓိက္ခဏေ။ပေ။. သဝိတက္ကော ဓမ္မော အဝိတက္ကဿ ဓမ္မဿ ဟေတုပစ္စယေန ပစ္စယော – သဝိတက္ကာ ဟေတူ ဝိတက္ကဿ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော၊ ပဋိသန္ဓိက္ခဏေ။ပေ။. (မူလံ ကာတဗ္ဗံ.) သဝိတက္ကာ ဟေတူ သမ္ပယုတ္တကာနံ ခန္ဓာနံ ဝိတက္ကဿ စ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော၊ ပဋိသန္ဓိက္ခဏေ။ပေ။ (၃)

အဝိတက္ကော ဓမ္မော အဝိတက္ကဿ ဓမ္မဿ ဟေတုပစ္စယေန ပစ္စယော – အဝိတက္ကာ ဟေတူ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော၊ ပဋိသန္ဓိက္ခဏေ။ပေ။. (၁)

အာရမ္မဏပစ္စယော

၁၁၇. သဝိတက္ကော ဓမ္မော သဝိတက္ကဿ ဓမ္မဿ အာရမ္မဏပစ္စယေန ပစ္စယော – သဝိတက္ကေ ခန္ဓေ အာရဗ္ဘ သဝိတက္ကာ ခန္ဓာ ဥပ္ပဇ္ဇန္တိ. (မူလံ ကာတဗ္ဗံ.) သဝိတက္ကေ ခန္ဓေ အာရဗ္ဘ အဝိတက္ကာ ခန္ဓာ စ ဝိတက္ကော စ ဥပ္ပဇ္ဇန္တိ. (မူလံ ကာတဗ္ဗံ.) သဝိတက္ကေ ခန္ဓေ အာရဗ္ဘ သဝိတက္ကာ ခန္ဓာ စ ဝိတက္ကော စ ဥပ္ပဇ္ဇန္တိ. (၃)

၁၁၈. အဝိတက္ကော ဓမ္မော အဝိတက္ကဿ ဓမ္မဿ အာရမ္မဏပစ္စယေန ပစ္စယော – အရိယာ အဝိတက္ကာ ဈာနာ ဝုဋ္ဌဟိတွာ အဝိတက္ကံ ဈာနံ ပစ္စဝေက္ခန္တိ၊ မဂ္ဂါ ဝုဋ္ဌဟိတွာ မဂ္ဂံ ပစ္စဝေက္ခန္တိ၊ ဖလာ ဝုဋ္ဌဟိတွာ ဖလံ ပစ္စဝေက္ခန္တိ၊ နိဗ္ဗာနံ ပစ္စဝေက္ခန္တိ၊ နိဗ္ဗာနံ အဝိတက္ကဿ မဂ္ဂဿ၊ ဖလဿ၊ ဝိတက္ကဿ စ အာရမ္မဏပစ္စယေန ပစ္စယော၊ စက္ခုံ။ပေ။ ဝတ္ထုံ အဝိတက္ကေ ခန္ဓေ စ ဝိတက္ကဉ္စ အနိစ္စတော။ပေ။ ဝိပဿတိ အဿာဒေတိ အဘိနန္ဒတိ၊ တံ အာရဗ္ဘ ဝိတက္ကော ဥပ္ပဇ္ဇတိ၊ ဒိဗ္ဗေန စက္ခုနာ ရူပံ ပဿတိ၊ ဒိဗ္ဗာယ သောတဓာတုယာ သဒ္ဒံ သုဏာတိ၊ စေတောပရိယဉာဏေန အဝိတက္ကစိတ္တသမင်္ဂိဿ စိတ္တံ ဇာနာတိ၊ အာကာသာနဉ္စာယတနံ။ပေ။ အာကိဉ္စညာယတနံ။ပေ။ ရူပါယတနံ စက္ခုဝိညာဏဿ။ပေ။ ဖောဋ္ဌဗ္ဗာယတနံ။ပေ။ အဝိတက္ကာ ခန္ဓာ ဣဒ္ဓိဝိဓဉာဏဿ၊ စေတောပရိယဉာဏဿ၊ ပုဗ္ဗေနိဝါသာနုဿတိဉာဏဿ ယထာကမ္မူပဂဉာဏဿ၊ အနာဂတံသဉာဏဿ၊ ဝိတက္ကဿ စ အာရမ္မဏပစ္စယေန ပစ္စယော၊ အဝိတက္ကေ ခန္ဓေ စ ဝိတက္ကဉ္စ အာရဗ္ဘ အဝိတက္ကာ ခန္ဓာ စ ဝိတက္ကော စ ဥပ္ပဇ္ဇန္တိ. (၁)

အဝိတက္ကော ဓမ္မော သဝိတက္ကဿ ဓမ္မဿ အာရမ္မဏပစ္စယေန ပစ္စယော – အရိယာ အဝိတက္ကာ ဈာနာ ဝုဋ္ဌဟိတွာ။ပေ။ မဂ္ဂါ ဝုဋ္ဌဟိတွာ။ပေ။ ဖလာ ဝုဋ္ဌဟိတွာ ဖလံ ပစ္စဝေက္ခန္တိ၊ နိဗ္ဗာနံ ပစ္စဝေက္ခန္တိ၊ နိဗ္ဗာနံ ဂေါတြဘုဿ၊ ဝေါဒါနဿ၊ သဝိတက္ကဿ မဂ္ဂဿ၊ ဖလဿ၊ အာဝဇ္ဇနာယ အာရမ္မဏပစ္စယေန ပစ္စယော၊ စက္ခုံ။ပေ။ ဝတ္ထုံ အဝိတက္ကေ ခန္ဓေ စ ဝိတက္ကဉ္စ အနိစ္စတော။ပေ။ ဝိပဿတိ အဿာဒေတိ အဘိနန္ဒတိ၊ တံ အာရဗ္ဘ ရာဂေါ ဥပ္ပဇ္ဇတိ။ပေ။ ဒေါမနဿံ ဥပ္ပဇ္ဇတိ၊ အဝိတက္ကေ ခန္ဓေ စ ဝိတက္ကဉ္စ အာရဗ္ဘ သဝိတက္ကာ ခန္ဓာ ဥပ္ပဇ္ဇန္တိ. (၂)

အဝိတက္ကော ဓမ္မော သဝိတက္ကဿ စ အဝိတက္ကဿ စ ဓမ္မဿ အာရမ္မဏပစ္စယေန ပစ္စယော – အရိယာ အဝိတက္ကာ ဈာနာ ဝုဋ္ဌဟိတွာ။ပေ။ မဂ္ဂါ ဝုဋ္ဌဟိတွာ။ပေ။ ဖလာ ဝုဋ္ဌဟိတွာ ဖလံ ပစ္စဝေက္ခန္တိ၊ နိဗ္ဗာနံ ပစ္စဝေက္ခန္တိ၊ နိဗ္ဗာနံ ဂေါတြဘုဿ၊ ဝေါဒါနဿ၊ သဝိတက္ကဿ မဂ္ဂဿ၊ ဖလဿ၊ အာဝဇ္ဇနာယ၊ ဝိတက္ကဿ စ အာရမ္မဏပစ္စယေန ပစ္စယော၊ စက္ခုံ။ပေ။ ဝတ္ထုံ အဝိတက္ကေ ခန္ဓေ စ ဝိတက္ကဉ္စ အနိစ္စတော။ပေ။ ဝိပဿတိ အဿာဒေတိ အဘိနန္ဒတိ၊ တံ အာရဗ္ဘ သဝိတက္ကာ ခန္ဓာ စ ဝိတက္ကော စ ဥပ္ပဇ္ဇန္တိ၊ အဝိတက္ကေ ခန္ဓေ စ ဝိတက္ကဉ္စ အာရဗ္ဘ သဝိတက္ကာ ခန္ဓာ စ ဝိတက္ကော စ ဥပ္ပဇ္ဇန္တိ. (၃)

၁၁၉. သဝိတက္ကော စ အဝိတက္ကော စ ဓမ္မာ သဝိတက္ကဿ ဓမ္မဿ အာရမ္မဏပစ္စယေန ပစ္စယော – သဝိတက္ကေ ခန္ဓေ စ ဝိတက္ကဉ္စ အာရဗ္ဘ သဝိတက္ကာ ခန္ဓာ ဥပ္ပဇ္ဇန္တိ. (မူလံ ကာတဗ္ဗံ.) သဝိတက္ကေ ခန္ဓေ စ ဝိတက္ကဉ္စ အာရဗ္ဘ အဝိတက္ကာ ခန္ဓာ စ ဝိတက္ကော စ ဥပ္ပဇ္ဇန္တိ. (မူလံ ကာတဗ္ဗံ.) သဝိတက္ကေ ခန္ဓေ စ ဝိတက္ကဉ္စ အာရဗ္ဘ သဝိတက္ကာ ခန္ဓာ စ ဝိတက္ကော စ ဥပ္ပဇ္ဇန္တိ. (၃)

အဓိပတိပစ္စယော

၁၂၀. သဝိတက္ကော ဓမ္မော သဝိတက္ကဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ. အာရမ္မဏာဓိပတိ – သဝိတက္ကေ ခန္ဓေ ဂရုံ ကတွာ သဝိတက္ကာ ခန္ဓာ ဥပ္ပဇ္ဇန္တိ. သဟဇာတာဓိပတိ – သဝိတက္ကာဓိပတိ သမ္ပယုတ္တကာနံ ခန္ဓာနံ အဓိပတိပစ္စယေန ပစ္စယော. (၁)

သဝိတက္ကော ဓမ္မော အဝိတက္ကဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ. အာရမ္မဏာဓိပတိ – သဝိတက္ကေ ခန္ဓေ ဂရုံ ကတွာ ဝိတက္ကော ဥပ္ပဇ္ဇတိ. သဟဇာတာဓိပတိ – သဝိတက္ကာဓိပတိ ဝိတက္ကဿ စ စိတ္တသမုဋ္ဌာနာနဉ္စ ရူပါနံ အဓိပတိပစ္စယေန ပစ္စယော. (၂)

သဝိတက္ကော ဓမ္မော သဝိတက္ကဿ စ အဝိတက္ကဿ စ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ. အာရမ္မဏာဓိပတိ – သဝိတက္ကေ ခန္ဓေ ဂရုံ ကတွာ သဝိတက္ကာ ခန္ဓာ စ ဝိတက္ကော စ ဥပ္ပဇ္ဇန္တိ. သဟဇာတာဓိပတိ – သဝိတက္ကာဓိပတိ သမ္ပယုတ္တကာနံ ခန္ဓာနံ ဝိတက္ကဿ စ စိတ္တသမုဋ္ဌာနာနဉ္စ ရူပါနံ အဓိပတိပစ္စယေန ပစ္စယော. (၃)

၁၂၁. အဝိတက္ကော ဓမ္မော အဝိတက္ကဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ. အာရမ္မဏာဓိပတိ – အရိယာ အဝိတက္ကာ ဈာနာ ဝုဋ္ဌဟိတွာ။ပေ။ မဂ္ဂါ ဝုဋ္ဌဟိတွာ။ပေ။ ဖလာ ဝုဋ္ဌဟိတွာ ဖလံ ဂရုံ ကတွာ ပစ္စဝေက္ခန္တိ၊ နိဗ္ဗာနံ ဂရုံ ကတွာ ပစ္စဝေက္ခန္တိ၊ နိဗ္ဗာနံ အဝိတက္ကဿ မဂ္ဂဿ၊ ဖလဿ၊ ဝိတက္ကဿ စ အဓိပတိပစ္စယေန ပစ္စယော၊ စက္ခုံ။ပေ။ ဝတ္ထုံ အဝိတက္ကေ ခန္ဓေ စ ဝိတက္ကဉ္စ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ ဝိတက္ကော ဥပ္ပဇ္ဇတိ. သဟဇာတာဓိပတိ – အဝိတက္ကာဓိပတိ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ အဓိပတိပစ္စယေန ပစ္စယော. (၁)

အဝိတက္ကော ဓမ္မော သဝိတက္ကဿ ဓမ္မဿ အဓိပတိပစ္စယေန ပစ္စယော. အာရမ္မဏာဓိပတိ – အရိယာ အဝိတက္ကာ ဈာနာ ဝုဋ္ဌဟိတွာ။ပေ။ မဂ္ဂါ ဝုဋ္ဌဟိတွာ။ပေ။ ဖလာ ဝုဋ္ဌဟိတွာ ဖလံ ဂရုံ ကတွာ ပစ္စဝေက္ခန္တိ၊ နိဗ္ဗာနံ ဂရုံ ကတွာ ပစ္စဝေက္ခန္တိ၊ နိဗ္ဗာနံ ဂေါတြဘုဿ၊ ဝေါဒါနဿ၊ သဝိတက္ကဿ မဂ္ဂဿ၊ ဖလဿ အဓိပတိပစ္စယေန ပစ္စယော၊ စက္ခုံ။ပေ။ ဝတ္ထုံ အဝိတက္ကေ ခန္ဓေ စ ဝိတက္ကဉ္စ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ၊ အဝိတက္ကေ ခန္ဓေ စ ဝိတက္ကဉ္စ ဂရုံ ကတွာ သဝိတက္ကာ ခန္ဓာ ဥပ္ပဇ္ဇန္တိ. (၂)

အဝိတက္ကော ဓမ္မော သဝိတက္ကဿ စ အဝိတက္ကဿ စ ဓမ္မဿ အဓိပတိပစ္စယေန ပစ္စယော. အာရမ္မဏာဓိပတိ – အရိယာ အဝိတက္ကာ ဈာနာ ဝုဋ္ဌဟိတွာ။ပေ။ မဂ္ဂါ ဝုဋ္ဌဟိတွာ။ပေ။ ဖလာ ဝုဋ္ဌဟိတွာ ဖလံ ဂရုံ ကတွာ ပစ္စဝေက္ခန္တိ၊ နိဗ္ဗာနံ ဂရုံ ကတွာ ပစ္စဝေက္ခန္တိ၊ နိဗ္ဗာနံ ဂေါတြဘုဿ၊ ဝေါဒါနဿ၊ သဝိတက္ကဿ မဂ္ဂဿ၊ ဖလဿ၊ ဝိတက္ကဿ စ အဓိပတိပစ္စယေန ပစ္စယော၊ စက္ခုံ။ပေ။ ဝတ္ထုံ အဝိတက္ကေ ခန္ဓေ စ ဝိတက္ကဉ္စ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ၊ အဝိတက္ကေ ခန္ဓေ စ ဝိတက္ကဉ္စ ဂရုံ ကတွာ သဝိတက္ကာ ခန္ဓာ စ ဝိတက္ကော စ ဥပ္ပဇ္ဇန္တိ. (၃)

သဝိတက္ကော စ အဝိတက္ကော စ ဓမ္မာ သဝိတက္ကဿ ဓမ္မဿ အဓိပတိပစ္စယေန ပစ္စယော. အာရမ္မဏာဓိပတိ – သဝိတက္ကေ ခန္ဓေ စ ဝိတက္ကဉ္စ ဂရုံ ကတွာ သဝိတက္ကာ ခန္ဓာ ဥပ္ပဇ္ဇန္တိ. (မူလံ ကာတဗ္ဗံ.) သဝိတက္ကေ ခန္ဓေ စ ဝိတက္ကဉ္စ ဂရုံ ကတွာ ဝိတက္ကော ဥပ္ပဇ္ဇတိ. (မူလံ ကာတဗ္ဗံ.) သဝိတက္ကေ ခန္ဓေ စ ဝိတက္ကဉ္စ ဂရုံ ကတွာ သဝိတက္ကာ ခန္ဓာ စ ဝိတက္ကော စ ဥပ္ပဇ္ဇန္တိ. (၃)

အနန္တရပစ္စယာဒိ

၁၂၂. သဝိတက္ကော ဓမ္မော သဝိတက္ကဿ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ သဝိတက္ကာ ခန္ဓာ ပစ္ဆိမာနံ ပစ္ဆိမာနံ သဝိတက္ကာနံ ခန္ဓာနံ အနန္တရပစ္စယေန ပစ္စယော. (၁)

သဝိတက္ကော ဓမ္မော အဝိတက္ကဿ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ သဝိတက္ကာ ခန္ဓာ ပစ္ဆိမဿ ပစ္ဆိမဿ ဝိတက္ကဿ အနန္တရပစ္စယေန ပစ္စယော၊ သဝိတက္ကံ စုတိစိတ္တံ အဝိတက္ကဿ ဥပပတ္တိစိတ္တဿ အနန္တရပစ္စယေန ပစ္စယော၊ အာဝဇ္ဇနာ ပဉ္စန္နံ ဝိညာဏာနံ အနန္တရပစ္စယေန ပစ္စယော၊ သဝိတက္ကာ ခန္ဓာ အဝိတက္ကဿ ဝုဋ္ဌာနဿ အနန္တရပစ္စယေန ပစ္စယော၊ ဒုတိယဿ ဈာနဿ ပရိကမ္မံ ဒုတိယဿ ဈာနဿ အနန္တရပစ္စယေန ပစ္စယော၊ တတိယဿ ဈာနဿ ပရိကမ္မံ။ပေ။ နေဝသညာနာသညာယတနဿ ပရိကမ္မံ နေဝသညာနာသညာယတနဿ။ပေ။ ဒိဗ္ဗဿ စက္ခုဿ ပရိကမ္မံ။ပေ။ ဒိဗ္ဗာယ သောတဓာတုယာ ပရိကမ္မံ။ပေ။ ဣဒ္ဓိဝိဓဉာဏဿ ပရိကမ္မံ။ပေ။ စေတောပရိယဉာဏဿ ပရိကမ္မံ။ပေ။ ပုဗ္ဗေနိဝါသာနုဿတိဉာဏဿ ပရိကမ္မံ။ပေ။ ယထာကမ္မူပဂဉာဏဿ ပရိကမ္မံ ယထာကမ္မူပဂဉာဏဿ။ပေ။ အနာဂတံသဉာဏဿ ပရိကမ္မံ အနာဂတံသဉာဏဿ အနန္တရပစ္စယေန ပစ္စယော. ဂေါတြဘု အဝိတက္ကဿ မဂ္ဂဿ။ ဝေါဒါနံ အဝိတက္ကဿ မဂ္ဂဿ။ အနုလောမံ အဝိတက္ကာယ ဖလသမာပတ္တိယာ အနန္တရပစ္စယေန ပစ္စယော. (၂)

သဝိတက္ကော ဓမ္မော သဝိတက္ကဿ စ အဝိတက္ကဿ စ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ သဝိတက္ကာ ခန္ဓာ ပစ္ဆိမာနံ ပစ္ဆိမာနံ သဝိတက္ကာနံ ခန္ဓာနံ ဝိတက္ကဿ စ အနန္တရပစ္စယေန ပစ္စယော. (၃)

၁၂၃. အဝိတက္ကော ဓမ္မော အဝိတက္ကဿ ဓမ္မဿ အနန္တရပစ္စယေန ပစ္စယော – ပုရိမော ပုရိမော ဝိတက္ကော ပစ္ဆိမဿ ပစ္ဆိမဿ ဝိတက္ကဿ အနန္တရပစ္စယေန ပစ္စယော၊ ပုရိမာ ပုရိမာ အဝိတက္ကာ ခန္ဓာ ပစ္ဆိမာနံ ပစ္ဆိမာနံ အဝိတက္ကာနံ ခန္ဓာနံ အနန္တရပစ္စယေန ပစ္စယော၊ အဝိတက္ကော မဂ္ဂေါ အဝိတက္ကဿ ဖလဿ။ပေ။ အဝိတက္ကံ ဖလံ အဝိတက္ကဿ ဖလဿ ။ပေ။ နိရောဓာ ဝုဋ္ဌဟန္တဿ နေဝသညာနာသညာယတနံ အဝိတက္ကာယ ဖလသမာပတ္တိယာ အနန္တရပစ္စယေန ပစ္စယော. (၁)

အဝိတက္ကော ဓမ္မော သဝိတက္ကဿ ဓမ္မဿ အနန္တရပစ္စယေန ပစ္စယော – ပုရိမော ပုရိမော ဝိတက္ကော ပစ္ဆိမာနံ ပစ္ဆိမာနံ သဝိတက္ကာနံ ခန္ဓာနံ အနန္တရပစ္စယေန ပစ္စယော၊ အဝိတက္ကံ စုတိစိတ္တံ သဝိတက္ကဿ ဥပပတ္တိစိတ္တဿ၊ အဝိတက္ကံ ဘဝင်္ဂံ အာဝဇ္ဇနာယ၊ အဝိတက္ကာ ခန္ဓာ သဝိတက္ကဿ ဝုဋ္ဌာနဿ အနန္တရပစ္စယေန ပစ္စယော. (၂)

အဝိတက္ကော ဓမ္မော သဝိတက္ကဿ စ အဝိတက္ကဿ စ ဓမ္မဿ အနန္တရပစ္စယေန ပစ္စယော – ပုရိမော ပုရိမော ဝိတက္ကော ပစ္ဆိမာနံ ပစ္ဆိမာနံ သဝိတက္ကာနံ ခန္ဓာနံ ဝိတက္ကဿ စ အနန္တရပစ္စယေန ပစ္စယော. (၃)

၁၂၄. သဝိတက္ကော စ အဝိတက္ကော စ ဓမ္မာ သဝိတက္ကဿ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ သဝိတက္ကာ ခန္ဓာ စ ဝိတက္ကော စ ပစ္ဆိမာနံ ပစ္ဆိမာနံ သဝိတက္ကာနံ ခန္ဓာနံ အနန္တရပစ္စယေန ပစ္စယော. (၁)

သဝိတက္ကော စ အဝိတက္ကော စ ဓမ္မာ အဝိတက္ကဿ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ သဝိတက္ကာ ခန္ဓာ စ ဝိတက္ကော စ ပစ္ဆိမဿ ပစ္ဆိမဿ ဝိတက္ကဿ အနန္တရပစ္စယေန ပစ္စယော၊ သဝိတက္ကံ စုတိစိတ္တဉ္စ ဝိတက္ကော စ အဝိတက္ကဿ ဥပပတ္တိစိတ္တဿ။ပေ။ အာဝဇ္ဇနာ စ ဝိတက္ကော စ ပဉ္စန္နံ ဝိညာဏာနံ။ပေ။ သဝိတက္ကာ ခန္ဓာ စ ဝိတက္ကော စ အဝိတက္ကဿ ဝုဋ္ဌာနဿ အနန္တရပစ္စယေန ပစ္စယော၊ ဒုတိယဿ ဈာနဿ ပရိကမ္မဉ္စ ဝိတက္ကော စ။ပေ။ (ဟေဋ္ဌာ လိခိတံ လေခံ ဣမိနာ ကာရဏေန ဒဋ္ဌဗ္ဗံ)၊ အနုလောမဉ္စ ဝိတက္ကော စ အဝိတက္ကာယ ဖလသမာပတ္တိယာ အနန္တရပစ္စယေန ပစ္စယော. (၂)

သဝိတက္ကော စ အဝိတက္ကော စ ဓမ္မာ သဝိတက္ကဿ စ အဝိတက္ကဿ စ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ သဝိတက္ကာ ခန္ဓာ စ ဝိတက္ကော စ ပစ္ဆိမာနံ ပစ္ဆိမာနံ သဝိတက္ကာနံ ခန္ဓာနံ ဝိတက္ကဿ စ အနန္တရပစ္စယေန ပစ္စယော. (၃)

သမနန္တရပစ္စယေန ပစ္စယော။ သဟဇာတပစ္စယေန ပစ္စယော။ နဝ။ အညမညပစ္စယေန ပစ္စယော။ နဝ။ နိဿယပစ္စယေန ပစ္စယော။ နဝ.

ဥပနိဿယပစ္စယော

၁၂၅. သဝိတက္ကော ဓမ္မော သဝိတက္ကဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ပေ။. ပကတူပနိဿယော – သဝိတက္ကာ ခန္ဓာ သဝိတက္ကာနံ ခန္ဓာနံ ဥပနိဿယပစ္စယေန ပစ္စယော. (မူလံ ကာတဗ္ဗံ.) သဝိတက္ကာ ခန္ဓာ အဝိတက္ကာနံ ခန္ဓာနံ ဝိတက္ကဿ စ ဥပနိဿယပစ္စယေန ပစ္စယော. (မူလံ ကာတဗ္ဗံ.) သဝိတက္ကာ ခန္ဓာ သဝိတက္ကာနံ ခန္ဓာနံ ဝိတက္ကဿ စ ဥပနိဿယပစ္စယေန ပစ္စယော. (၃)

၁၂၆. အဝိတက္ကော ဓမ္မော အဝိတက္ကဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ပေ။. ပကတူပနိဿယော – အဝိတက္ကံ သဒ္ဓံ ဥပနိဿာယ အဝိတက္ကံ ဈာနံ ဥပ္ပါဒေတိ၊ မဂ္ဂံ ဥပ္ပါဒေတိ၊ အဘိညံ ဥပ္ပါဒေတိ၊ သမာပတ္တိံ ဥပ္ပါဒေတိ၊ အဝိတက္ကံ သီလံ။ပေ။ ပညံ။ ကာယိကံ သုခံ။ ကာယိကံ ဒုက္ခံ။ ဥတုံ။ ဘောဇနံ။ သေနာသနံ ဝိတက္ကံ ဥပနိဿာယ အဝိတက္ကံ ဈာနံ ဥပ္ပါဒေတိ၊ မဂ္ဂံ။ပေ။ အဘိညံ။ပေ။ သမာပတ္တိံ ဥပ္ပါဒေတိ၊ အဝိတက္ကာ သဒ္ဓါ။ပေ။ သေနာသနံ ဝိတက္ကော စ အဝိတက္ကာယ သဒ္ဓါယ။ပေ။ ပညာယ။ ကာယိကဿ သုခဿ။ ကာယိကဿ ဒုက္ခဿ။ အဝိတက္ကဿ မဂ္ဂဿ။ ဖလသမာပတ္တိယာ ဥပနိဿယပစ္စယေန ပစ္စယော. (၁)

အဝိတက္ကော ဓမ္မော သဝိတက္ကဿ ဓမ္မဿ ဥပနိဿယပစ္စယေန ပစ္စယော (တီဏိပိ ဥပနိဿယာ သဗ္ဗတ္ထ ကာတဗ္ဗာ). အဝိတက္ကံ သဒ္ဓံ ဥပနိဿာယ ဒါနံ ဒေတိ၊ သီလံ သမာဒိယတိ၊ ဥပေါသထကမ္မံ ကရောတိ၊ သဝိတက္ကံ ဈာနံ ဥပ္ပါဒေတိ၊ ဝိပဿနံ။ပေ။ မဂ္ဂံ။ပေ။ သမာပတ္တိံ ဥပ္ပါဒေတိ၊ မာနံ ဇပ္ပေတိ၊ ဒိဋ္ဌိံ ဂဏှာတိ၊ အဝိတက္ကံ သီလံ။ပေ။ သေနာသနံ ဝိတက္ကံ ဥပနိဿာယ ဒါနံ ဒေတိ။ပေ။ သမာပတ္တိံ ဥပ္ပါဒေတိ၊ ပါဏံ ဟနတိ။ပေ။ သံဃံ ဘိန္ဒတိ၊ အဝိတက္ကာ သဒ္ဓါ။ပေ။ သေနာသနံ ဝိတက္ကော စ သဝိတက္ကာယ သဒ္ဓါယ။ပေ။ ပညာယ။ ရာဂဿ။ပေ။ ပတ္ထနာယ သဝိတက္ကဿ မဂ္ဂဿ၊ ဖလသမာပတ္တိယာ ဥပနိဿယပစ္စယေန ပစ္စယော. (၂)

အဝိတက္ကော ဓမ္မော သဝိတက္ကဿ စ အဝိတက္ကဿ စ ဓမ္မဿ ဥပနိဿယပစ္စယေန ပစ္စယော – အဝိတက္ကံ သဒ္ဓံ ဥပနိဿာယ ဒါနံ ဒေတိ။ပေ။ (ဒုတိယဝါရေ လိခိတပဒါ သဗ္ဗေ ကာတဗ္ဗာ) သမာပတ္တိံ ဥပ္ပါဒေတိ၊ မာနံ ဇပ္ပေတိ၊ ဒိဋ္ဌိံ ဂဏှာတိ၊ သီလံ။ပေ။ ပညံ။ပေ။ သေနာသနံ ဝိတက္ကံ ဥပနိဿာယ ဒါနံ ဒေတိ။ပေ။ ပါဏံ ဟနတိ။ပေ။ သံဃံ ဘိန္ဒတိ၊ အဝိတက္ကာ သဒ္ဓါ။ပေ။ သေနာသနံ ဝိတက္ကော စ သဝိတက္ကာယ သဒ္ဓါယ။ပေ။ ပညာယ။ ရာဂဿ ။ပေ။ ပတ္ထနာယ သဝိတက္ကဿ မဂ္ဂဿ၊ ဖလသမာပတ္တိယာ ဝိတက္ကဿ စ ဥပနိဿယပစ္စယေန ပစ္စယော. (၃)

၁၂၇. သဝိတက္ကော စ အဝိတက္ကော စ ဓမ္မာ သဝိတက္ကဿ ဓမ္မဿ ဥပနိဿယပစ္စယေန ပစ္စယော – သဝိတက္ကာ ခန္ဓာ စ ဝိတက္ကော စ သဝိတက္ကာနံ ခန္ဓာနံ ဥပနိဿယပစ္စယေန ပစ္စယော. (မူလံ ကာတဗ္ဗံ.) သဝိတက္ကာ ခန္ဓာ စ ဝိတက္ကော စ အဝိတက္ကာနံ ခန္ဓာနံ ဝိတက္ကဿ စ ဥပနိဿယပစ္စယေန ပစ္စယော. (မူလံ ကာတဗ္ဗံ.) သဝိတက္ကာ ခန္ဓာ စ ဝိတက္ကော စ သဝိတက္ကာနံ ခန္ဓာနံ ဝိတက္ကဿ စ ဥပနိဿယပစ္စယေန ပစ္စယော. (၃)

ပုရေဇာတပစ္စယော

၁၂၈. အဝိတက္ကော ဓမ္မော အဝိတက္ကဿ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ. အာရမ္မဏပုရေဇာတံ – စက္ခုံ။ပေ။ ဝတ္ထုံ အနိစ္စတော။ပေ။ ဝိပဿတိ အဿာဒေတိ အဘိနန္ဒတိ၊ တံ အာရဗ္ဘ ဝိတက္ကော ဥပ္ပဇ္ဇတိ၊ ဒိဗ္ဗေန စက္ခုနာ ရူပံ ပဿတိ။ပေ။ ဖောဋ္ဌဗ္ဗာယတနံ ကာယဝိညာဏဿ။ပေ။. ဝတ္ထုပုရေဇာတံ – စက္ခာယတနံ စက္ခုဝိညာဏဿ။ပေ။ ကာယာယတနံ ကာယဝိညာဏဿ။ပေ။ ဝတ္ထု အဝိတက္ကာနံ ခန္ဓာနံ ဝိတက္ကဿ စ ပုရေဇာတပစ္စယေန ပစ္စယော.

အဝိတက္ကော ဓမ္မော သဝိတက္ကဿ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ. အာရမ္မဏပုရေဇာတံ – စက္ခုံ။ပေ။ ဝတ္ထုံ အနိစ္စတော။ပေ။ ဝိပဿတိ အဿာဒေတိ အဘိနန္ဒတိ၊ တံ အာရဗ္ဘ သဝိတက္ကာ ခန္ဓာ ဥပ္ပဇ္ဇန္တိ. ဝတ္ထုပုရေဇာတံ – ဝတ္ထု သဝိတက္ကာနံ ခန္ဓာနံ ပုရေဇာတပစ္စယေန ပစ္စယော.

အဝိတက္ကော ဓမ္မော သဝိတက္ကဿ စ အဝိတက္ကဿ စ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ. အာရမ္မဏပုရေဇာတံ – စက္ခုံ။ပေ။ ဝတ္ထုံ အနိစ္စတော။ပေ။ ဝိပဿတိ၊ အဿာဒေတိ အဘိနန္ဒတိ၊ တံ အာရဗ္ဘ သဝိတက္ကာ ခန္ဓာ စ ဝိတက္ကော စ ဥပ္ပဇ္ဇန္တိ. ဝတ္ထုပုရေဇာတံ – ဝတ္ထု သဝိတက္ကာနံ ခန္ဓာနံ ဝိတက္ကဿ စ ပုရေဇာတပစ္စယေန ပစ္စယော. (၃)

ပစ္ဆာဇာတာသေဝနပစ္စယာ

၁၂၉. သဝိတက္ကော ဓမ္မော အဝိတက္ကဿ ဓမ္မဿ ပစ္ဆာဇာတပစ္စယေန ပစ္စယော (တီဏိ၊ ပစ္ဆာဇာတာ)။ အာသေဝနပစ္စယေန ပစ္စယော။ နဝ.

ကမ္မပစ္စယာဒိ

၁၃၀. သဝိတက္ကော ဓမ္မော သဝိတက္ကဿ ဓမ္မဿ ကမ္မပစ္စယေန ပစ္စယော – သဟဇာတာ၊ နာနာက္ခဏိကာ. သဟဇာတာ – သဝိတက္ကာ စေတနာ သမ္ပယုတ္တကာနံ ခန္ဓာနံ ကမ္မပစ္စယေန ပစ္စယော၊ ပဋိသန္ဓိက္ခဏေ။ပေ။. နာနာက္ခဏိကာ – သဝိတက္ကာ စေတနာ ဝိပါကာနံ သဝိတက္ကာနံ ခန္ဓာနံ ကမ္မပစ္စယေန ပစ္စယော. (ဧဝံ စတ္တာရိ၊ သဟဇာတာပိ နာနာက္ခဏိကာပိ ကာတဗ္ဗာ.)

ဝိပါကပစ္စယေန ပစ္စယော။ နဝ။ အာဟာရပစ္စယေန ပစ္စယော။ စတ္တာရိ။ ဣန္ဒြိယပစ္စယေန ပစ္စယော။ စတ္တာရိ။ ဈာနပစ္စယေန ပစ္စယော။ နဝ။ မဂ္ဂပစ္စယေန ပစ္စယော။ နဝ။ သမ္ပယုတ္တပစ္စယေန ပစ္စယော။ ဆ.

၁၃၁. သဝိတက္ကော ဓမ္မော သဝိတက္ကဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပစ္ဆာဇာတံ (သံခိတ္တံ). (၁)

အဝိတက္ကော ဓမ္မော အဝိတက္ကဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ (သံခိတ္တံ). အဝိတက္ကော ဓမ္မော သဝိတက္ကဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပုရေဇာတံ (သံခိတ္တံ). အဝိတက္ကော ဓမ္မော သဝိတက္ကဿ စ အဝိတက္ကဿ စ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပုရေဇာတံ. သဟဇာတံ – ပဋိသန္ဓိက္ခဏေ ဝတ္ထု ဝိတက္ကဿ သမ္ပယုတ္တကာနဉ္စ ခန္ဓာနံ ဝိပ္ပယုတ္တပစ္စယေန ပစ္စယော. ပုရေဇာတံ – ဝတ္ထု ဝိတက္ကဿ သမ္ပယုတ္တကာနဉ္စ ခန္ဓာနံ ဝိပ္ပယုတ္တပစ္စယေန ပစ္စယော. (၃)

သဝိတက္ကော စ အဝိတက္ကော စ ဓမ္မာ အဝိတက္ကဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပစ္ဆာဇာတံ (သံခိတ္တံ).

အတ္ထိပစ္စယာဒိ

၁၃၂. သဝိတက္ကော ဓမ္မော သဝိတက္ကဿ ဓမ္မဿ အတ္ထိပစ္စယေန ပစ္စယော (ဧကံ၊ ပဋိစ္စသဒိသံ). သဝိတက္ကော ဓမ္မော အဝိတက္ကဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပစ္ဆာဇာတံ (သံခိတ္တံ). သဝိတက္ကော ဓမ္မော သဝိတက္ကဿ စ အဝိတက္ကဿ စ ဓမ္မဿ အတ္ထိပစ္စယေန ပစ္စယော (ပဋိစ္စသဒိသံ). (၃)

အဝိတက္ကော ဓမ္မော အဝိတက္ကဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ၊ အာဟာရံ၊ ဣန္ဒြိယံ (သံခိတ္တံ). အဝိတက္ကော ဓမ္မော သဝိတက္ကဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ (သံခိတ္တံ). အဝိတက္ကော ဓမ္မော သဝိတက္ကဿ စ အဝိတက္ကဿ စ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ. သဟဇာတော – ဝိတက္ကော သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ အတ္ထိပစ္စယေန ပစ္စယော၊ ပဋိသန္ဓိက္ခဏေ ဝိတက္ကော သမ္ပယုတ္တကာနံ ခန္ဓာနံ ကဋတ္တာ စ ရူပါနံ အတ္ထိပစ္စယေန ပစ္စယော၊ ပဋိသန္ဓိက္ခဏေ ဝတ္ထု ဝိတက္ကဿ သမ္ပယုတ္တကာနဉ္စ ခန္ဓာနံ အတ္ထိပစ္စယေန ပစ္စယော. ပုရေဇာတံ – စက္ခုံ။ပေ။ ဝတ္ထုံ အနိစ္စတော။ပေ။ ဝိပဿတိ အဿာဒေတိ အဘိနန္ဒတိ၊ တံ အာရဗ္ဘ ဝိတက္ကော စ သမ္ပယုတ္တကာ စ ခန္ဓာ ဥပ္ပဇ္ဇန္တိ၊ ဝတ္ထု ဝိတက္ကဿ သမ္ပယုတ္တကာနဉ္စ ခန္ဓာနံ အတ္ထိပစ္စယေန ပစ္စယော. (၃)

၁၃၃. သဝိတက္ကော စ အဝိတက္ကော စ ဓမ္မာ သဝိတက္ကဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ. သဟဇာတော – သဝိတက္ကော ဧကော ခန္ဓော စ ဝိတက္ကော စ တိဏ္ဏန္နံ ခန္ဓာနံ အတ္ထိပစ္စယေန ပစ္စယော။ပေ။ ဒွေ ခန္ဓာ စ။ပေ။. သဟဇာတော – သဝိတက္ကော ဧကော ခန္ဓော စ ဝတ္ထု စ တိဏ္ဏန္နံ ခန္ဓာနံ အတ္ထိပစ္စယေန ပစ္စယော။ပေ။ ဒွေ ခန္ဓာ စ။ပေ။ (ပဋိသန္ဓိက္ခဏေ သဟဇာတာပိ ဒွေပိ ကာတဗ္ဗာ). (၁)

သဝိတက္ကော စ အဝိတက္ကော စ ဓမ္မာ အဝိတက္ကဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ၊ အာဟာရံ၊ ဣန္ဒြိယံ. သဟဇာတာ – သဝိတက္ကာ ခန္ဓာ စ ဝိတက္ကော စ စိတ္တသမုဋ္ဌာနာနံ ရူပါနံ အတ္ထိပစ္စယေန ပစ္စယော. သဟဇာတာ – သဝိတက္ကာ ခန္ဓာ စ ဝတ္ထု စ ဝိတက္ကဿ အတ္ထိပစ္စယေန ပစ္စယော (ပဋိသန္ဓိက္ခဏေ၊ တီဏိ). ပစ္ဆာဇာတာ – သဝိတက္ကာ ခန္ဓာ စ ဝိတက္ကော စ ပုရေဇာတဿ ဣမဿ ကာယဿ အတ္ထိပစ္စယေန ပစ္စယော. ပစ္ဆာဇာတာ – သဝိတက္ကာ ခန္ဓာ စ ဝိတက္ကော စ ကဗဠီကာရော အာဟာရော စ ဣမဿ ကာယဿ အတ္ထိပစ္စယေန ပစ္စယော. ပစ္ဆာဇာတာ – သဝိတက္ကာ ခန္ဓာ စ ဝိတက္ကော စ ရူပဇီဝိတိန္ဒြိယဉ္စ ကဋတ္တာရူပါနံ အတ္ထိပစ္စယေန ပစ္စယော. (၃)

သဝိတက္ကော စ အဝိတက္ကော စ ဓမ္မာ သဝိတက္ကဿ စ အဝိတက္ကဿ စ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ. သဟဇာတော – သဝိတက္ကော ဧကော ခန္ဓော စ ဝိတက္ကော စ တိဏ္ဏန္နံ ခန္ဓာနံ စိတ္တသမုဋ္ဌာနာနဉ္စ ရူပါနံ အတ္ထိပစ္စယေန ပစ္စယော။ပေ။ ဒွေ ခန္ဓာ စ။ပေ။. သဟဇာတော – သဝိတက္ကော ဧကော ခန္ဓော စ ဝတ္ထု စ တိဏ္ဏန္နံ ခန္ဓာနံ ဝိတက္ကဿ စ အတ္ထိပစ္စယေန ပစ္စယော။ပေ။ ဒွေ ခန္ဓာ စ။ပေ။ (ပဋိသန္ဓိယာပိ ဒွေ). (၃)

နတ္ထိပစ္စယေန ပစ္စယော။ ဝိဂတပစ္စယေန ပစ္စယော။ အဝိဂတပစ္စယေန ပစ္စယော.