၁. ဝိဘင်္ဂဝါရော

ဟေတုပစ္စယော

၁၁၀. သဝိတက္ကံ ဓမ္မံ ပစ္စယာ သဝိတက္ကော ဓမ္မော ဥပ္ပဇ္ဇတိ ဟေတုပစ္စယာ။ တီဏိ (ပဋိစ္စဝါရသဒိသာ).

အဝိတက္ကံ ဓမ္မံ ပစ္စယာ အဝိတက္ကော ဓမ္မော ဥပ္ပဇ္ဇတိ ဟေတုပစ္စယာ – အဝိတက္ကံ ဧကံ ခန္ဓံ ပစ္စယာ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။ ဝိတက္ကံ ပစ္စယာ စိတ္တသမုဋ္ဌာနံ ရူပံ၊ ပဋိသန္ဓိက္ခဏေ အဝိတက္ကံ ဧကံ ခန္ဓံ ပစ္စယာ တယော ခန္ဓာ ကဋတ္တာ စ ရူပံ။ပေ။ ဒွေ ခန္ဓေ။ပေ။ ပဋိသန္ဓိက္ခဏေ ဝိတက္ကံ ပစ္စယာ ကဋတ္တာရူပံ၊ ခန္ဓေ ပစ္စယာ ဝတ္ထု၊ ဝတ္ထုံ ပစ္စယာ ခန္ဓာ၊ ဝိတက္ကံ ပစ္စယာ ဝတ္ထု၊ ဝတ္ထုံ ပစ္စယာ ဝိတက္ကော၊ ဧကံ မဟာဘူတံ ပစ္စယာ တယော မဟာဘူတာ။ပေ။ ဝတ္ထုံ ပစ္စယာ အဝိတက္ကာ ခန္ဓာ၊ ဝတ္ထုံ ပစ္စယာ ဝိတက္ကော.

အဝိတက္ကံ ဓမ္မံ ပစ္စယာ သဝိတက္ကော ဓမ္မော ဥပ္ပဇ္ဇတိ ဟေတုပစ္စယာ – ဝိတက္ကံ ပစ္စယာ သမ္ပယုတ္တကာ ခန္ဓာ၊ ဝတ္ထုံ ပစ္စယာ သဝိတက္ကာ ခန္ဓာ (ပဋိသန္ဓိယာပိ ဒွေ).

အဝိတက္ကံ ဓမ္မံ ပစ္စယာ သဝိတက္ကော စ အဝိတက္ကော စ ဓမ္မာ ဥပ္ပဇ္ဇန္တိ ဟေတုပစ္စယာ – ဝိတက္ကံ ပစ္စယာ သမ္ပယုတ္တကာ ခန္ဓာ စိတ္တသမုဋ္ဌာနဉ္စ ရူပံ၊ ဝိတက္ကံ ပစ္စယာ သမ္ပယုတ္တကာ ခန္ဓာ၊ မဟာဘူတေ ပစ္စယာ စိတ္တသမုဋ္ဌာနံ ရူပံ၊ ဝတ္ထုံ ပစ္စယာ သဝိတက္ကာ ခန္ဓာ၊ မဟာဘူတေ ပစ္စယာ စိတ္တသမုဋ္ဌာနံ ရူပံ၊ ဝတ္ထုံ ပစ္စယာ ဝိတက္ကော သမ္ပယုတ္တကာ စ ခန္ဓာ၊ ပဋိသန္ဓိက္ခဏေ။ပေ။ (ပဋိသန္ဓိယာပိ ပဝတ္တိသဒိသာယေဝ). (၃)

၁၁၁. သဝိတက္ကဉ္စ အဝိတက္ကဉ္စ ဓမ္မံ ပစ္စယာ သဝိတက္ကော ဓမ္မော ဥပ္ပဇ္ဇတိ ဟေတုပစ္စယာ – သဝိတက္ကံ ဧကံ ခန္ဓဉ္စ ဝိတက္ကဉ္စ ပစ္စယာ တယော ခန္ဓာ။ပေ။ ဒွေ ခန္ဓေ။ပေ။ သဝိတက္ကံ ဧကံ ခန္ဓဉ္စ ဝတ္ထုဉ္စ ပစ္စယာ တယော ခန္ဓာ။ပေ။ ဒွေ ခန္ဓေ။ပေ။ (ပဋိသန္ဓိက္ခဏေ ဒွေ ကာတဗ္ဗာ). (၁)

သဝိတက္ကဉ္စ အဝိတက္ကဉ္စ ဓမ္မံ ပစ္စယာ အဝိတက္ကော ဓမ္မော ဥပ္ပဇ္ဇတိ ဟေတုပစ္စယာ – သဝိတက္ကေ ခန္ဓေ စ ဝိတက္ကဉ္စ ပစ္စယာ စိတ္တသမုဋ္ဌာနံ ရူပံ၊ သဝိတက္ကေ ခန္ဓေ စ ဝိတက္ကဉ္စ မဟာဘူတေ စ ပစ္စယာ စိတ္တသမုဋ္ဌာနံ ရူပံ၊ သဝိတက္ကေ ခန္ဓေ စ ဝတ္ထုဉ္စ ပစ္စယာ ဝိတက္ကော၊ ပဋိသန္ဓိက္ခဏေ။ပေ။ (တီဏိ၊ ပဋိသန္ဓိယာပိ). (၂)

သဝိတက္ကဉ္စ အဝိတက္ကဉ္စ ဓမ္မံ ပစ္စယာ သဝိတက္ကော စ အဝိတက္ကော စ ဓမ္မာ ဥပ္ပဇ္ဇန္တိ ဟေတုပစ္စယာ – သဝိတက္ကံ ဧကံ ခန္ဓဉ္စ ဝိတက္ကဉ္စ ပစ္စယာ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။ သဝိတက္ကံ ဧကံ ခန္ဓဉ္စ ဝိတက္ကဉ္စ ဝတ္ထုဉ္စ ပစ္စယာ တယော ခန္ဓာ။ပေ။ ဒွေ ခန္ဓေ။ပေ။ သဝိတက္ကေ ခန္ဓေ စ ဝိတက္ကဉ္စ မဟာဘူတေ စ ပစ္စယာ စိတ္တသမုဋ္ဌာနံ ရူပံ၊ သဝိတက္ကံ ဧကံ ခန္ဓဉ္စ ဝတ္ထုဉ္စ ပစ္စယာ တယော ခန္ဓာ ဝိတက္ကော စ။ပေ။ ဒွေ ခန္ဓေ။ပေ။ ပဋိသန္ဓိက္ခဏေ။ပေ။. (၃)