၁. ဝိဘင်္ဂဝါရော

နဟေတုပစ္စယော

၆၂. ဒဿနေန ပဟာတဗ္ဗဟေတုကံ ဓမ္မံ ပစ္စယာ နဒဿနေန ပဟာတဗ္ဗဟေတုကော ဓမ္မော ဥပ္ပဇ္ဇတိ နဟေတုပစ္စယာ – ဝိစိကိစ္ဆာသဟဂတေ ခန္ဓေ ပစ္စယာ ဝိစိကိစ္ဆာသဟဂတော မောဟော. (၁)

နဒဿနေန ပဟာတဗ္ဗဟေတုကံ ဓမ္မံ ပစ္စယာ နဒဿနေန ပဟာတဗ္ဗဟေတုကော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ နဒဿနေန ပဟာတဗ္ဗဟေတုကံ။ပေ။ (ယာဝ အသညသတ္တာ) စက္ခာယတနံ ပစ္စယာ စက္ခုဝိညာဏံ။ပေ။ ကာယာယတနံ ပစ္စယာ ကာယဝိညာဏံ၊ ဝတ္ထုံ ပစ္စယာ အဟေတုကာ နဒဿနေန ပဟာတဗ္ဗဟေတုကာ ခန္ဓာ၊ ဥဒ္ဓစ္စသဟဂတေ ခန္ဓေ စ ဝတ္ထုဉ္စ ပစ္စယာ ဥဒ္ဓစ္စသဟဂတော မောဟော. (၁)

ဒဿနေန ပဟာတဗ္ဗဟေတုကဉ္စ နဒဿနေန ပဟာတဗ္ဗဟေတုကဉ္စ ဓမ္မံ ပစ္စယာ နဒဿနေန ပဟာတဗ္ဗဟေတုကော ဓမ္မော ဥပ္ပဇ္ဇတိ နဟေတုပစ္စယာ – ဝိစိကိစ္ဆာသဟဂတေ ခန္ဓေ စ ဝတ္ထုဉ္စ ပစ္စယာ ဝိစိကိစ္ဆာသဟဂတော မောဟော (သံခိတ္တံ). (၁)