၁. ဝိဘင်္ဂဝါရော

ဟေတုပစ္စယော

၁၀. ကိလေသံ ဓမ္မံ ပစ္စယာ ကိလေသော ဓမ္မော ဥပ္ပဇ္ဇတိ ဟေတုပစ္စယာ။ တီဏိ (ပဋိစ္စသဒိသာ).

နောကိလေသံ ဓမ္မံ ပစ္စယာ နောကိလေသော ဓမ္မော ဥပ္ပဇ္ဇတိ ဟေတုပစ္စယာ – နောကိလေသံ ဧကံ ခန္ဓံ ပစ္စယာ တယော ခန္ဓာ။ပေ။ (ယာဝ အဇ္ဈတ္တိကာ မဟာဘူတာ) ဝတ္ထုံ ပစ္စယာ နောကိလေသာ ခန္ဓာ. (၁)

နောကိလေသံ ဓမ္မံ ပစ္စယာ ကိလေသော ဓမ္မော ဥပ္ပဇ္ဇတိ ဟေတုပစ္စယာ – နောကိလေသေ ခန္ဓေ ပစ္စယာ ကိလေသာ၊ ဝတ္ထုံ ပစ္စယာ ကိလေသာ. (၂)

နောကိလေသံ ဓမ္မံ ပစ္စယာ ကိလေသော စ နောကိလေသော စ ဓမ္မာ ဥပ္ပဇ္ဇန္တိ ဟေတုပစ္စယာ – နောကိလေသံ ဧကံ ခန္ဓံ ပစ္စယာ တယော ခန္ဓာ ကိလေသာ စ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။ ဝတ္ထုံ ပစ္စယာ ကိလေသာ၊ မဟာဘူတေ ပစ္စယာ စိတ္တသမုဋ္ဌာနံ ရူပံ၊ ဝတ္ထုံ ပစ္စယာ ကိလေသာ စ သမ္ပယုတ္တကာ စ ခန္ဓာ. (၃)

၁၁. ကိလေသဉ္စ နောကိလေသဉ္စ ဓမ္မံ ပစ္စယာ ကိလေသော ဓမ္မော ဥပ္ပဇ္ဇတိ ဟေတုပစ္စယာ – လောဘဉ္စ သမ္ပယုတ္တကေ စ ခန္ဓေ ပစ္စယာ မောဟော ဒိဋ္ဌိ ထိနံ ဥဒ္ဓစ္စံ အဟိရိကံ အနောတ္တပ္ပံ (စက္ကံ). လောဘဉ္စ ဝတ္ထုဉ္စ ပစ္စယာ ကိလေသာ. (၁)

ကိလေသဉ္စ နောကိလေသဉ္စ ဓမ္မံ ပစ္စယာ နောကိလေသော ဓမ္မော ဥပ္ပဇ္ဇတိ ဟေတုပစ္စယာ – နောကိလေသံ ဧကံ ခန္ဓဉ္စ ကိလေသဉ္စ ပစ္စယာ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ စ။ပေ။ ကိလေသေ စ မဟာဘူတေ စ ပစ္စယာ စိတ္တသမုဋ္ဌာနံ ရူပံ၊ ကိလေသေ စ ဝတ္ထုဉ္စ ပစ္စယာ နောကိလေသာ ခန္ဓာ. (၂)

ကိလေသဉ္စ နောကိလေသဉ္စ ဓမ္မံ ပစ္စယာ ကိလေသော စ နောကိလေသော စ ဓမ္မာ ဥပ္ပဇ္ဇန္တိ ဟေတုပစ္စယာ – နောကိလေသံ ဧကံ ခန္ဓဉ္စ လောဘဉ္စ ပစ္စယာ တယော ခန္ဓာ မောဟော ဒိဋ္ဌိ ထိနံ ဥဒ္ဓစ္စံ အဟိရိကံ အနောတ္တပ္ပံ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ စ။ပေ။ (စက္ကံ). လောဘဉ္စ ဝတ္ထုဉ္စ ပစ္စယာ မောဟော ဒိဋ္ဌိ ထိနံ ဥဒ္ဓစ္စံ အဟိရိကံ အနောတ္တပ္ပံ သမ္ပယုတ္တကာ စ ခန္ဓာ (စက္ကံ). (၃)

(အာရမ္မဏပစ္စယေ နောကိလေသမူလေ ပဉ္စ ဝိညာဏာ ကာတဗ္ဗာ.)