၁-၇. ပဋိစ္စဝါရာဒိ

ပစ္စယစတုက္ကံ

၁. ကုသလံ သာရမ္မဏံ ဓမ္မံ ပဋိစ္စ ကုသလော သာရမ္မဏော ဓမ္မော ဥပ္ပဇ္ဇတိ ဟေတုပစ္စယာ. (၁)

အကုသလံ သာရမ္မဏံ ဓမ္မံ ပဋိစ္စ အကုသလော သာရမ္မဏော ဓမ္မော ဥပ္ပဇ္ဇတိ ဟေတုပစ္စယာ. (၁)

အဗျာကတံ သာရမ္မဏံ ဓမ္မံ ပဋိစ္စ အဗျာကတော သာရမ္မဏော ဓမ္မော ဥပ္ပဇ္ဇတိ ဟေတုပစ္စယာ. (၁) (သံခိတ္တံ.)

၂. ဟေတုယာ တီဏိ၊ အာရမ္မဏေ တီဏိ။ပေ။ အဝိဂတေ တီဏိ (သံခိတ္တံ. သဟဇာတဝါရမ္ပိ။ပေ။ သမ္ပယုတ္တဝါရမ္ပိ ပဋိစ္စဝါရသဒိသံ).

ဟေတု-အာရမ္မဏပစ္စယာ

၃. ကုသလော သာရမ္မဏော ဓမ္မော ကုသလဿ သာရမ္မဏဿ ဓမ္မဿ ဟေတုပစ္စယေန ပစ္စယော. (၁)

အကုသလော သာရမ္မဏော ဓမ္မော အကုသလဿ သာရမ္မဏဿ ဓမ္မဿ ဟေတုပစ္စယေန ပစ္စယော. (၁)

အဗျာကတော သာရမ္မဏော ဓမ္မော အဗျာကတဿ သာရမ္မဏဿ ဓမ္မဿ ဟေတုပစ္စယေန ပစ္စယော. (၁)

ကုသလော သာရမ္မဏော ဓမ္မော ကုသလဿ သာရမ္မဏဿ ဓမ္မဿ အာရမ္မဏပစ္စယေန ပစ္စယော (သံခိတ္တံ).

၄. ဟေတုယာ တီဏိ၊ အာရမ္မဏေ နဝ၊ အဓိပတိယာ သတ္တ။ပေ။ အဝိဂတေ တီဏိ (သံခိတ္တံ).

(ယထာ ကုသလတ္တိကေ ပဉှာဝါရံ၊ ဧဝံ ဝိတ္ထာရေတဗ္ဗံ.)

ဟေတုသဟဇာတပစ္စယာဒိ

၅. အဗျာကတံ အနာရမ္မဏံ ဓမ္မံ ပဋိစ္စ အဗျာကတော အနာရမ္မဏော ဓမ္မော ဥပ္ပဇ္ဇတိ ဟေတုပစ္စယာ (သံခိတ္တံ).

ဟေတုယာ ဧကံ။ပေ။ အဝိဂတေ ဧကံ (သံခိတ္တံ).

နဟေတုယာ ဧကံ။ပေ။ (သံခိတ္တံ).

(သဟဇာတဝါရမ္ပိ။ပေ။ သမ္ပယုတ္တဝါရမ္ပိ ပဋိစ္စဝါရသဒိသံ.)

၆. အဗျာကတော အနာရမ္မဏော ဓမ္မော အဗျာကတဿ အနာရမ္မဏဿ ဓမ္မဿ သဟဇာတပစ္စယေန ပစ္စယော။ အညမညပစ္စယေန ပစ္စယော။ နိဿယပစ္စယေန ပစ္စယော။ အာဟာရပစ္စယေန ပစ္စယော။ ဣန္ဒြိယပစ္စယေန ပစ္စယော။ အတ္ထိပစ္စယေန ပစ္စယော။ အဝိဂတပစ္စယေန ပစ္စယော (သဗ္ဗတ္ထ ဧကံ. သံခိတ္တံ.)