၁-၇. ပဋိစ္စဝါရာဒိ

ပစ္စယစတုက္ကံ

၂၄. အကုသလံ အာသဝဉ္စေဝ အာသဝသမ္ပယုတ္တဉ္စ ဓမ္မံ ပဋိစ္စ အကုသလော အာသဝေါ စေဝ အာသဝသမ္ပယုတ္တော စ ဓမ္မော ဥပ္ပဇ္ဇတိ ဟေတုပစ္စယာ (သံခိတ္တံ).

ဟေတုယာ ဧကံ၊ အာရမ္မဏေ ဧကံ။ပေ။ အဝိဂတေ ဧကံ (သံခိတ္တံ).

(သဟဇာတဝါရေပိ။ပေ။ သမ္ပယုတ္တဝါရေပိ ပဉှာဝါရေပိ သဗ္ဗတ္ထ ဧကံ).

၂၅. အကုသလံ အာသဝသမ္ပယုတ္တဉ္စေဝ နော စ အာသဝံ ဓမ္မံ ပဋိစ္စ အကုသလော အာသဝသမ္ပယုတ္တော စေဝ နော စ အာသဝေါ ဓမ္မော ဥပ္ပဇ္ဇတိ ဟေတုပစ္စယာ (သံခိတ္တံ).

ဟေတုယာ ဧကံ၊ အာရမ္မဏေ ဧကံ။ပေ။ အဝိဂတေ ဧကံ (သံခိတ္တံ).

(သဟဇာတဝါရေပိ။ပေ။ သမ္ပယုတ္တဝါရေပိ ပဉှာဝါရေပိ သဗ္ဗတ္ထ ဧကံ.)

၂၆. ကုသလံ အာသဝဝိပ္ပယုတ္တံ သာသဝံ ဓမ္မံ ပဋိစ္စ ကုသလော အာသဝဝိပ္ပယုတ္တော သာသဝေါ ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

အကုသလံ အာသဝဝိပ္ပယုတ္တံ သာသဝံ ဓမ္မံ ပဋိစ္စ အဗျာကတော အာသဝဝိပ္ပယုတ္တော သာသဝေါ ဓမ္မော ဥပ္ပဇ္ဇတိ ဟေတုပစ္စယာ. (၁)

အဗျာကတံ အာသဝဝိပ္ပယုတ္တံ သာသဝံ ဓမ္မံ ပဋိစ္စ အဗျာကတော အာသဝဝိပ္ပယုတ္တော သာသဝေါ ဓမ္မော ဥပ္ပဇ္ဇတိ ဟေတုပစ္စယာ. (၁)

ကုသလံ အာသဝဝိပ္ပယုတ္တံ သာသဝဉ္စ အဗျာကတံ အာသဝဝိပ္ပယုတ္တံ သာသဝဉ္စ ဓမ္မံ ပဋိစ္စ အဗျာကတော အာသဝဝိပ္ပယုတ္တော သာသဝေါ ဓမ္မော ဥပ္ပဇ္ဇတိ ဟေတုပစ္စယာ. (၁)

အကုသလံ အာသဝဝိပ္ပယုတ္တံ သာသဝဉ္စ အဗျာကတံ အာသဝဝိပ္ပယုတ္တံ သာသဝဉ္စ ဓမ္မံ ပဋိစ္စ အဗျာကတော အာသဝဝိပ္ပယုတ္တော သာသဝေါ ဓမ္မော ဥပ္ပဇ္ဇတိ ဟေတုပစ္စယာ. (၁) (သံခိတ္တံ.)

၂၇. ဟေတုယာ သတ္တ၊ အာရမ္မဏေ ဒွေ။ပေ။ အဝိဂတေ သတ္တ (သံခိတ္တံ. သဟဇာတဝါရမ္ပိ။ပေ။ သမ္ပယုတ္တဝါရမ္ပိ ပဋိစ္စဝါရသဒိသံ).

၂၈. ကုသလော အာသဝဝိပ္ပယုတ္တော သာသဝေါ ဓမ္မော ကုသလဿ အာသဝဝိပ္ပယုတ္တဿ သာသဝဿ ဓမ္မဿ ဟေတုပစ္စယေန ပစ္စယော။ တီဏိ.

အကုသလော အာသဝဝိပ္ပယုတ္တော သာသဝေါ ဓမ္မော အဗျာကတဿ အာသဝဝိပ္ပယုတ္တဿ သာသဝဿ ဓမ္မဿ ဟေတုပစ္စယေန ပစ္စယော. (၁)

အဗျာကတော အာသဝဝိပ္ပယုတ္တော သာသဝေါ ဓမ္မော အဗျာကတဿ အာသဝဝိပ္ပယုတ္တဿ သာသဝဿ ဓမ္မဿ ဟေတုပစ္စယေန ပစ္စယော (သံခိတ္တံ).

၂၉. ဟေတုယာ ပဉ္စ၊ အာရမ္မဏေ နဝ၊ အဓိပတိယာ စတ္တာရိ။ပေ။ အဝိဂတေ ဒသ (သံခိတ္တံ. ယထာ ကုသလတ္တိကေ ပဉှာဝါရံ၊ ဧဝံ ဝိတ္ထာရေတဗ္ဗံ).