၁-၇. ပဋိစ္စဝါရာဒိ
ပစ္စယစတုက္ကံ
ဟေတုပစ္စယော
၇. ကုသလံ သာသဝံ ဓမ္မံ ပဋိစ္စ ကုသလော သာသဝေါ ဓမ္မော ဥပ္ပဇ္ဇတိ ဟေတုပစ္စယာ။ တီဏိ.
အကုသလံ သာသဝံ ဓမ္မံ ပဋိစ္စ အကုသလော သာသဝေါ ဓမ္မော ဥပ္ပဇ္ဇတိ ဟေတုပစ္စယာ။ တီဏိ.
အဗျာကတံ သာသဝံ ဓမ္မံ ပဋိစ္စ အဗျာကတော သာသဝေါ ဓမ္မော ဥပ္ပဇ္ဇတိ ဟေတုပစ္စယာ. (၁)
ကုသလံ သာသဝဉ္စ အဗျာကတံ သာသဝဉ္စ ဓမ္မံ ပဋိစ္စ အဗျာကတော သာသဝေါ ဓမ္မော ဥပ္ပဇ္ဇတိ ဟေတုပစ္စယာ. (၁)
အကုသလံ သာသဝဉ္စ အဗျာကတံ သာသဝဉ္စ ဓမ္မံ ပဋိစ္စ အဗျာကတော သာသဝေါ ဓမ္မော ဥပ္ပဇ္ဇတိ ဟေတုပစ္စယာ. (၁) (သံခိတ္တံ.)
၈. ဟေတုယာ နဝ၊ အာရမ္မဏေ တီဏိ။ပေ။ အဝိဂတေ နဝ (သံခိတ္တံ).
နဟေတုယာ ဒွေ၊ နအာရမ္မဏေ ပဉ္စ၊ နအဓိပတိယာ နဝ (သံခိတ္တံ. သဟဇာတဝါရမ္ပိ။ပေ။ သမ္ပယုတ္တဝါရမ္ပိ ပဋိစ္စဝါရသဒိသံ).
၉. ကုသလော သာသဝေါ ဓမ္မော ကုသလဿ သာသဝဿ ဓမ္မဿ ဟေတုပစ္စယေန ပစ္စယော။ တီဏိ.
အကုသလော သာသဝေါ ဓမ္မော အကုသလဿ သာသဝဿ ဓမ္မဿ ဟေတုပစ္စယေန ပစ္စယော။ တီဏိ.
အဗျာကတော သာသဝေါ ဓမ္မော အဗျာကတဿ သာသဝဿ ဓမ္မဿ ဟေတုပစ္စယေန ပစ္စယော. (၁) (သံခိတ္တံ.)
ဟေတုယာ သတ္တ၊ အာရမ္မဏေ နဝ။ပေ။ အဝိဂတေ တေရသ (သံခိတ္တံ).
(ယထာ ကုသလတ္တိကေ ပဉှာဝါရံ၊ ဧဝံ ဝိတ္ထာရေတဗ္ဗံ.)