၁-၇. ပဋိစ္စဝါရာဒိ

ပစ္စယစတုက္ကံ

ဟေတုပစ္စယော

၁. အကုသလံ အာသဝံ ဓမ္မံ ပဋိစ္စ အကုသလော အာသဝေါ ဓမ္မော ဥပ္ပဇ္ဇတိ ဟေတုပစ္စယာ (သံခိတ္တံ).

ဟေတုယာ ဧကံ။ပေ။ အဝိဂတေ ဧကံ (သံခိတ္တံ).

(သဟဇာတဝါရေပိ။ပေ။ သမ္ပယုတ္တဝါရေပိ ပဉှာဝါရေပိ သဗ္ဗတ္ထ ဧကံ).

၂. ကုသလံ နောအာသဝံ ဓမ္မံ ပဋိစ္စ ကုသလော နောအာသဝေါ ဓမ္မော ဥပ္ပဇ္ဇတိ ဟေတုပစ္စယာ. ကုသလံ နောအာသဝံ ဓမ္မံ ပဋိစ္စ အဗျာကတော နောအာသဝေါ ဓမ္မော ဥပ္ပဇ္ဇတိ ဟေတုပစ္စယာ. ကုသလံ နောအာသဝံ ဓမ္မံ ပဋိစ္စ ကုသလော နောအာသဝေါ စ အဗျာကတော နောအာသဝေါ စ ဓမ္မာ ဥပ္ပဇ္ဇန္တိ ဟေတုပစ္စယာ. (၃)

အကုသလံ နောအာသဝံ ဓမ္မံ ပဋိစ္စ အကုသလော နောအာသဝေါ ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

အဗျာကတံ နောအာသဝံ ဓမ္မံ ပဋိစ္စ အဗျာကတော နောအာသဝေါ ဓမ္မော ဥပ္ပဇ္ဇတိ ဟေတုပစ္စယာ. (၁)

ကုသလံ နောအာသဝဉ္စ အဗျာကတံ နောအာသဝဉ္စ ဓမ္မံ ပဋိစ္စ အဗျာကတော နောအာသဝေါ ဓမ္မော ဥပ္ပဇ္ဇတိ ဟေတုပစ္စယာ. (၁)

အကုသလံ နောအာသဝဉ္စ အဗျာကတံ နောအာသဝဉ္စ ဓမ္မံ ပဋိစ္စ အဗျာကတော နောအာသဝေါ ဓမ္မော ဥပ္ပဇ္ဇတိ ဟေတုပစ္စယာ. (၁)

အာရမ္မဏပစ္စယော

၃. ကုသလံ နောအာသဝံ ဓမ္မံ ပဋိစ္စ ကုသလော နောအာသဝေါ ဓမ္မော ဥပ္ပဇ္ဇတိ အာရမ္မဏပစ္စယာ. (၁)

အကုသလံ နောအာသဝံ ဓမ္မံ ပဋိစ္စ အကုသလော နောအာသဝေါ ဓမ္မော ဥပ္ပဇ္ဇတိ အာရမ္မဏပစ္စယာ. (၁)

အဗျာကတံ နောအာသဝံ ဓမ္မံ ပဋိစ္စ အဗျာကတော နောအာသဝေါ ဓမ္မော ဥပ္ပဇ္ဇတိ အာရမ္မဏပစ္စယာ. (၁) (သံခိတ္တံ.)

၄. ဟေတုယာ နဝ၊ အာရမ္မဏေ တီဏိ၊ အဓိပတိယာ နဝ။ပေ။ အဝိဂတေ နဝ (သံခိတ္တံ).

နဟေတုယာ ဧကံ၊ နအာရမ္မဏေ ပဉ္စ၊ နအဓိပတိယာ နဝ။ပေ။ နောဝိဂတေ ပဉ္စ (သံခိတ္တံ. သဟဇာတဝါရမ္ပိ။ပေ။ သမ္ပယုတ္တဝါရမ္ပိ ပဋိစ္စဝါရသဒိသံ).

ဟေတု-အာရမ္မဏပစ္စယာ

၅. ကုသလော နောအာသဝေါ ဓမ္မော ကုသလဿ နောအာသဝဿ ဓမ္မဿ ဟေတုပစ္စယေန ပစ္စယော။ တီဏိ.

အကုသလော နောအာသဝေါ ဓမ္မော အကုသလဿ နောအာသဝဿ ဓမ္မဿ ဟေတုပစ္စယေန ပစ္စယော။ တီဏိ.

အဗျာကတော နောအာသဝေါ ဓမ္မော အဗျာကတဿ နောအာသဝဿ ဓမ္မဿ ဟေတုပစ္စယေန ပစ္စယော. (၁)

ကုသလော နောအာသဝေါ ဓမ္မော ကုသလဿ နောအာသဝဿ ဓမ္မဿ အာရမ္မဏပစ္စယေန ပစ္စယော (သံခိတ္တံ).

၆. ဟေတုယာ သတ္တ၊ အာရမ္မဏေ နဝ၊ အဓိပတိယာ ဒသ။ပေ။ အဝိဂတေ တေရသ (သံခိတ္တံ. ယထာ ကုသလတ္တိကေ ပဉှာဝါရံ၊ ဧဝံ ဝိတ္ထာရေတဗ္ဗံ).