၁-၇. ပဋိစ္စဝါရာဒိ
ပစ္စယစတုက္ကံ
ဟေတုပစ္စယော
၁၇. အဗျာကတံ သပ္ပဋိဃံ ဓမ္မံ ပဋိစ္စ အဗျာကတော သပ္ပဋိဃော ဓမ္မော ဥပ္ပဇ္ဇတိ ဟေတုပစ္စယာ (သံခိတ္တံ).
ဟေတုယာ ဧကံ။ပေ။ အဝိဂတေ ဧကံ (သံခိတ္တံ).
(သဟဇာတဝါရေပိ။ပေ။ ပဉှာဝါရေပိ သဗ္ဗတ္ထ ဧကံ.)
၁၈. ကုသလံ အပ္ပဋိဃံ ဓမ္မံ ပဋိစ္စ ကုသလော အပ္ပဋိဃော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.
အကုသလံ အပ္ပဋိဃံ ဓမ္မံ ပဋိစ္စ အကုသလော အပ္ပဋိဃော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.
အဗျာကတံ အပ္ပဋိဃံ ဓမ္မံ ပဋိစ္စ အဗျာကတော အပ္ပဋိဃော ဓမ္မော ဥပ္ပဇ္ဇတိ ဟေတုပစ္စယာ. (၁)
ကုသလံ အပ္ပဋိဃဉ္စ အဗျာကတံ အပ္ပဋိဃဉ္စ ဓမ္မံ ပဋိစ္စ အဗျာကတော အပ္ပဋိဃော ဓမ္မော ဥပ္ပဇ္ဇတိ ဟေတုပစ္စယာ. (၁)
အကုသလံ အပ္ပဋိဃဉ္စ အဗျာကတံ အပ္ပဋိဃဉ္စ ဓမ္မံ ပဋိစ္စ အဗျာကတော အပ္ပဋိဃော ဓမ္မော ဥပ္ပဇ္ဇတိ ဟေတုပစ္စယာ. (၁)
အာရမ္မဏပစ္စယော
၁၉. ကုသလံ အပ္ပဋိဃံ ဓမ္မံ ပဋိစ္စ ကုသလော အပ္ပဋိဃော ဓမ္မော ဥပ္ပဇ္ဇတိ အာရမ္မဏပစ္စယာ. (၁)
အကုသလံ အပ္ပဋိဃံ ဓမ္မံ ပဋိစ္စ အကုသလော အပ္ပဋိဃော ဓမ္မော ဥပ္ပဇ္ဇတိ အာရမ္မဏပစ္စယာ. (၁)
အဗျာကတံ အပ္ပဋိဃံ ဓမ္မံ ပဋိစ္စ အဗျာကတော အပ္ပဋိဃော ဓမ္မော ဥပ္ပဇ္ဇတိ အာရမ္မဏပစ္စယာ. (၁) (သံခိတ္တံ.)
၂၀. ဟေတုယာ နဝ၊ အာရမ္မဏေ တီဏိ၊ အဓိပတိယာ နဝ။ပေ။ အဝိဂတေ နဝ (သံခိတ္တံ).
ပစ္စနီယံ
နဟေတုပစ္စယော
၂၁. အကုသလံ အပ္ပဋိဃံ ဓမ္မံ ပဋိစ္စ အကုသလော အပ္ပဋိဃော ဓမ္မော ဥပ္ပဇ္ဇတိ နဟေတုပစ္စယာ. (၁)
အဗျာကတံ အပ္ပဋိဃံ ဓမ္မံ ပဋိစ္စ အဗျာကတော အပ္ပဋိဃော ဓမ္မော ဥပ္ပဇ္ဇတိ နဟေတုပစ္စယာ. (၁) (သံခိတ္တံ.)
၂၂. နဟေတုယာ ဒွေ၊ နအာရမ္မဏေ ပဉ္စ၊ နအဓိပတိယာ နဝ။ပေ။ နောဝိဂတေ ပဉ္စ (သံခိတ္တံ. သဟဇာတဝါရမ္ပိ။ပေ။ သမ္ပယုတ္တဝါရမ္ပိ ပဋိစ္စဝါရသဒိသံ).
ဟေတုပစ္စယော
၂၃. ကုသလော အပ္ပဋိဃော ဓမ္မော ကုသလဿ အပ္ပဋိဃဿ ဓမ္မဿ ဟေတုပစ္စယေန ပစ္စယော။ တီဏိ.
အကုသလော အပ္ပဋိဃော ဓမ္မော အကုသလဿ အပ္ပဋိဃဿ ဓမ္မဿ ဟေတုပစ္စယေန ပစ္စယော။ တီဏိ.
အဗျာကတော အပ္ပဋိဃော ဓမ္မော အဗျာကတဿ အပ္ပဋိဃဿ ဓမ္မဿ ဟေတုပစ္စယေန ပစ္စယော. (၁) (သံခိတ္တံ.)
၂၄. ဟေတုယာ သတ္တ၊ အာရမ္မဏေ နဝ၊ အဓိပတိယာ ဒသ။ပေ။ အဝိဂတေ တေရသ (သံခိတ္တံ. ယထာ ကုသလတ္တိကေ ပဉှာဝါရံ၊ ဧဝံ ဝိတ္ထာရေတဗ္ဗံ).