၁-၇. ပဋိစ္စဝါရာဒိ

ပစ္စယစတုက္ကံ

၁၁. နဒဿနေန ပဟာတဗ္ဗဟေတုကံ ကုသလံ ဓမ္မ ပဋိစ္စ နဒဿနေန ပဟာတဗ္ဗဟေတုကော ကုသလော ဓမ္မော ဥပ္ပဇ္ဇတိ ဟေတုပစ္စယာ (သံခိတ္တံ).

ဟေတုယာ ဧကံ၊ အာရမ္မဏေ ဧကံ။ပေ။ အဝိဂတေ ဧကံ (သံခိတ္တံ).

(သဟဇာတဝါရေပိ။ပေ။ ပဉှာဝါရေပိ သဗ္ဗတ္ထ ဧကံ.)

၁၂. ဒဿနေန ပဟာတဗ္ဗဟေတုကံ အကုသလံ ဓမ္မံ ပဋိစ္စ ဒဿနေန ပဟာတဗ္ဗဟေတုကော အကုသလော ဓမ္မော ဥပ္ပဇ္ဇတိ ဟေတုပစ္စယာ. (၁)

နဒဿနေန ပဟာတဗ္ဗဟေတုကံ အကုသလံ ဓမ္မံ ပဋိစ္စ နဒဿနေန ပဟာတဗ္ဗဟေတုကော အကုသလော ဓမ္မော ဥပ္ပဇ္ဇတိ ဟေတုပစ္စယာ. နဒဿနေန ပဟာတဗ္ဗဟေတုကံ အကုသလံ ဓမ္မံ ပဋိစ္စ ဒဿနေန ပဟာတဗ္ဗဟေတုကော အကုသလော ဓမ္မော ဥပ္ပဇ္ဇတိ ဟေတုပစ္စယာ. (၂)

ဒဿနေန ပဟာတဗ္ဗဟေတုကံ အကုသလဉ္စ နဒဿနေန ပဟာတဗ္ဗဟေတုကံ အကုသလဉ္စ ဓမ္မံ ပဋိစ္စ ဒဿနေန ပဟာတဗ္ဗဟေတုကော အကုသလော ဓမ္မော ဥပ္ပဇ္ဇတိ ဟေတုပစ္စယာ. (၁)

ဒဿနေန ပဟာတဗ္ဗဟေတုကံ အကုသလံ ဓမ္မံ ပဋိစ္စ ဒဿနေန ပဟာတဗ္ဗဟေတုကော အကုသလော ဓမ္မော ဥပ္ပဇ္ဇတိ အာရမ္မဏပစ္စယာ။ တီဏိ (နဒဿနေ ဒွေ၊ ဃဋနေ ဧကံ၊ သံခိတ္တံ).

၁၃. ဟေတုယာ စတ္တာရိ၊ အာရမ္မဏေ ဆ၊ အဓိပတိယာ ဒွေ (သဗ္ဗတ္ထ ဆ)၊ အဝိဂတေ ဆ (သံခိတ္တံ).

၁၄. ဒဿနေန ပဟာတဗ္ဗဟေတုကံ အကုသလံ ဓမ္မံ ပဋိစ္စ နဒဿနေန ပဟာတဗ္ဗဟေတုကော အကုသလော ဓမ္မော ဥပ္ပဇ္ဇတိ နဟေတုပစ္စယာ.

နဒဿနေန ပဟာတဗ္ဗဟေတုကံ အကုသလံ ဓမ္မံ ပဋိစ္စ နဒဿနေန ပဟာတဗ္ဗဟေတုကော အကုသလော ဓမ္မော ဥပ္ပဇ္ဇတိ နဟေတုပစ္စယာ (သံခိတ္တံ).

၁၅. နဟေတုယာ ဒွေ၊ နအဓိပတိယာ ဆ။ပေ။ နကမ္မေ စတ္တာရိ၊ နဝိပါကေ ဆ၊ နဝိပ္ပယုတ္တေ ဆ (သံခိတ္တံ. သဟဇာတဝါရာဒိ ဝိတ္ထာရေတဗ္ဗော).

၁၆. ဒဿနေန ပဟာတဗ္ဗဟေတုကော အကုသလော ဓမ္မော ဒဿနေန ပဟာတဗ္ဗဟေတုကဿ အကုသလဿ ဓမ္မဿ ဟေတုပစ္စယေန ပစ္စယော (သံခိတ္တံ).

၁၇. ဟေတုယာ တီဏိ၊ အာရမ္မဏေ နဝ၊ အဓိပတိယာ တီဏိ (ဒဿနေ ဧကံ၊ နဒဿနေ ဒွေ)၊ အနန္တရေ နဝ၊ သမနန္တရေ နဝ၊ သဟဇာတေ ဆ။ပေ။ ဥပနိဿယေ နဝ၊ အာသေဝနေ နဝ၊ ကမ္မေ စတ္တာရိ၊ အာဟာရေ စတ္တာရိ၊ ဣန္ဒြိယေ စတ္တာရိ။ပေ။ သမ္ပယုတ္တေ ဆ၊ အတ္ထိယာ ဆ၊ နတ္ထိယာ နဝ။ပေ။ အဝိဂတေ ဆ (သံခိတ္တံ).

၁၈. နဒဿနေန ပဟာတဗ္ဗဟေတုကံ အဗျာကတံ ဓမ္မံ ပဋိစ္စ နဒဿနေန ပဟာတဗ္ဗဟေတုကော အဗျာကတော ဓမ္မော ဥပ္ပဇ္ဇတိ ဟေတုပစ္စယာ (သံခိတ္တံ).

ဟေတုယာ ဧကံ၊ အာရမ္မဏေ ဧကံ။ပေ။ အဝိဂတေ ဧကံ (သံခိတ္တံ).

(သဟဇာတဝါရေပိ။ပေ။ ပဉှာဝါရေပိ သဗ္ဗတ္ထ ဧကံ.)