၁-၇. ပဋိစ္စဝါရာဒိ

၁၀၅. အရဏံ ကုသလံ ဓမ္မံ ပဋိစ္စ အရဏော ကုသလော ဓမ္မော ဥပ္ပဇ္ဇတိ ဟေတုပစ္စယာ (သံခိတ္တံ).

ဟေတုယာ ဧကံ၊ အာရမ္မဏေ ဧကံ။ပေ။ အဝိဂတေ ဧကံ (သံခိတ္တံ. သဟဇာတဝါရေပိ။ပေ။ ပဉှာဝါရေပိ သဗ္ဗတ္ထ ဧကံ).

၁၀၆. သရဏံ အကုသလံ ဓမ္မံ ပဋိစ္စ သရဏော အကုသလော ဓမ္မော ဥပ္ပဇ္ဇတိ ဟေတုပစ္စယာ (သံခိတ္တံ).

၁၀၇. အရဏံ အဗျာကတံ ဓမ္မံ ပဋိစ္စ အရဏော အဗျာကတော ဓမ္မော ဥပ္ပဇ္ဇတိ ဟေတုပစ္စယာ (သံခိတ္တံ).

ဟေတုယာ ဧကံ၊ အာရမ္မဏေ ဧကံ။ပေ။ အဝိဂတေ ဧကံ (သံခိတ္တံ. သဟဇာတဝါရေပိ။ပေ။ သမ္ပယုတ္တဝါရေပိ သဗ္ဗတ္ထ ဧကံ).

၁၀၈. အရဏော အဗျာကတော ဓမ္မော အရဏဿ အဗျာကတဿ ဓမ္မဿ ဟေတုပစ္စယေန ပစ္စယော (သံခိတ္တံ).

ဟေတုယာ ဧကံ၊ အာရမ္မဏေ ဧကံ။ပေ။ အဝိဂတေ ဧကံ (သံခိတ္တံ).

(ယထာ ကုသလတ္တိကေ ပဉှာဝါရံ ဧဝံ ဝိတ္ထာရေတဗ္ဗံ.)

ပိဋ္ဌိဒုကကုသလတ္တိကံ နိဋ္ဌိတံ.