၁-၇. ပဋိစ္စဝါရာဒိ

ပစ္စယစတုက္ကံ

၂၀. သံကိလေသိကဉ္စေဝ နော စ ကိလေသံ ကုသလံ ဓမ္မံ ပဋိစ္စ သံကိလေသိကော စေဝ နော စ ကိလေသော ကုသလော ဓမ္မော ဥပ္ပဇ္ဇတိ ဟေတုပစ္စယာ (သံခိတ္တံ).

ဟေတုယာ ဧကံ၊ အာရမ္မဏေ ဧကံ။ပေ။ အဝိဂတေ ဧကံ (သံခိတ္တံ).

(သဟဇာတဝါရေပိ။ပေ။ ပဉှာဝါရေပိ သဗ္ဗတ္ထ ဧကံ.)

၂၁. ကိလေသဉ္စေဝ သံကိလေသိကဉ္စ အကုသလံ ဓမ္မံ ပဋိစ္စ ကိလေသော စေဝ သံကိလေသိကော စ အကုသလော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

သံကိလေသိကဉ္စေဝ နော စ ကိလေသံ အကုသလံ ဓမ္မံ ပဋိစ္စ သံကိလေသိကော စေဝ နော စ ကိလေသော အကုသလော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

ကိလေသဉ္စေဝ သံကိလေသိကံ အကုသလဉ္စ သံကိလေသိကဉ္စေဝ နော စ ကိလေသံ အကုသလဉ္စ ဓမ္မံ ပဋိစ္စ ကိလေသော စေဝ သံကိလေသိကော စ အကုသလော ဓမ္မော ဥပ္ပဇ္ဇတိ ဟေတုပစ္စယာ။ တီဏိ (သံခိတ္တံ).

၂၂. ဟေတုယာ နဝ၊ အာရမ္မဏေ နဝ။ပေ။ အဝိဂတေ နဝ (သံခိတ္တံ၊ ကိလေသဒုကအကုသလသဒိသံ. သဟဇာတဝါရေပိ။ပေ။ ပဉှာဝါရေပိ သဗ္ဗတ္ထ ဝိတ္ထာရေတဗ္ဗံ).

၂၃. သံကိလေသိကဉ္စေဝ နော စ ကိလေသံ အဗျာကတံ ဓမ္မံ ပဋိစ္စ သံကိလေသိကော စေဝ နော စ ကိလေသော အဗျာကတော ဓမ္မော ဥပ္ပဇ္ဇတိ ဟေတုပစ္စယာ (သံခိတ္တံ).

ဟေတုယာ ဧကံ၊ အာရမ္မဏေ ဧကံ။ပေ။ အဝိဂတေ ဧကံ (သံခိတ္တံ).

(သဟဇာတဝါရေပိ ။ပေ။ ပဉှာဝါရေပိ သဗ္ဗတ္ထ ဧကံ.)