၁-၇. ပဋိစ္စဝါရာဒိ

၉. သံကိလေသိကံ ကုသလံ ဓမ္မံ ပဋိစ္စ သံကိလေသိကော ကုသလော ဓမ္မော ဥပ္ပဇ္ဇတိ ဟေတုပစ္စယာ. (၁)

အသံကိလေသိကံ ကုသလံ ဓမ္မံ ပဋိစ္စ အသံကိလေသိကော ကုသလော ဓမ္မော ဥပ္ပဇ္ဇတိ ဟေတုပစ္စယာ. (၁) (သံခိတ္တံ.)

၁၀. ဟေတုယာ ဒွေ၊ အာရမ္မဏေ ဒွေ။ပေ။ အဝိဂတေ ဒွေ (သံခိတ္တံ. လောကိယဒုကကုသလသဒိသံ. သဟဇာတဝါရမ္ပိ။ပေ။ ပဉှာဝါရမ္ပိ ဝိတ္ထာရေတဗ္ဗံ).

၁၁. သံကိလေသိကံ အကုသလံ ဓမ္မံ ပဋိစ္စ သံကိလေသိကော အကုသလော ဓမ္မော ဥပ္ပဇ္ဇတိ ဟေတုပစ္စယာ (သံခိတ္တံ).

ဟေတုယာ ဧကံ၊ အာရမ္မဏေ ဧကံ။ပေ။ အဝိဂတေ ဧကံ (သံခိတ္တံ).

(သဟဇာတဝါရေပိ။ပေ။ ပဉှာဝါရေပိ သဗ္ဗတ္ထ ဧကံ.)

၁၂. သံကိလေသိကံ အဗျာကတံ ဓမ္မံ ပဋိစ္စ သံကိလေသိကော အဗျာကတော ဓမ္မော ဥပ္ပဇ္ဇတိ ဟေတုပစ္စယာ. (၁)

အသံကိလေသိကံ အဗျာကတံ ဓမ္မံ ပဋိစ္စ အသံကိလေသိကော အဗျာကတော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

သံကိလေသိကံ အဗျာကတဉ္စ အသံကိလေသိကံ အဗျာကတဉ္စ ဓမ္မံ ပဋိစ္စ သံကိလေသိကော အဗျာကတော ဓမ္မော ဥပ္ပဇ္ဇတိ ဟေတုပစ္စယာ (သံခိတ္တံ).

၁၃. ဟေတုယာ ပဉ္စ၊ အာရမ္မဏေ ဒွေ။ပေ။ အဝိဂတေ ပဉ္စ (သံခိတ္တံ. လောကိယဒုကအဗျာကတသဒိသံ. သဟဇာတဝါရေပိ။ပေ။ ပဉှာဝါရေပိ သဗ္ဗတ္ထ ဝိတ္ထာရေတဗ္ဗံ).