၁-၇. ပဋိစ္စဝါရာဒိ

ပစ္စယစတုက္ကံ

၂၆. ကိလေသဉ္စေဝ ကိလေသသမ္ပယုတ္တဉ္စ အကုသလံ ဓမ္မံ ပဋိစ္စ ကိလေသော စေဝ ကိလေသသမ္ပယုတ္တော စ အကုသလော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

ကိလေသသမ္ပယုတ္တဉ္စေဝ နော စ ကိလေသံ အကုသလံ ဓမ္မံ ပဋိစ္စ ကိလေသသမ္ပယုတ္တော စေဝ နော စ ကိလေသော အကုသလော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

ကိလေသဉ္စေဝ ကိလေသသမ္ပယုတ္တံ အကုသလဉ္စ ကိလေသသမ္ပယုတ္တဉ္စေဝ နော စ ကိလေသံ အကုသလဉ္စ ဓမ္မံ ပဋိစ္စ ကိလေသော စေဝ ကိလေသသမ္ပယုတ္တော စ အကုသလော ဓမ္မော ဥပ္ပဇ္ဇတိ ဟေတုပစ္စယာ။ တီဏိ (သံခိတ္တံ).

၂၇. ဟေတုယာ နဝ၊ အာရမ္မဏေ နဝ။ပေ။ အဝိဂတေ နဝ (သံခိတ္တံ. ကိလေသဒုကအကုသလသဒိသံ. သဟဇာတဝါရေပိ။ပေ။ ပဉှာဝါရေပိ သဗ္ဗတ္ထ ဝိတ္ထာရေတဗ္ဗံ).