၁-၇. ပဋိစ္စဝါရာဒိ

ပစ္စယစတုက္ကံ

၂၄. ကိလေသဉ္စေဝ သံကိလိဋ္ဌဉ္စ အကုသလံ ဓမ္မံ ပဋိစ္စ ကိလေသော စေဝ သံကိလိဋ္ဌော စ အကုသလော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

သံကိလိဋ္ဌဉ္စေဝ နော စ ကိလေသံ အကုသလံ ဓမ္မံ ပဋိစ္စ သံကိလိဋ္ဌော စေဝ နော စ ကိလေသော အကုသလော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

ကိလေသဉ္စေဝ သံကိလိဋ္ဌံ အကုသလဉ္စ သံကိလိဋ္ဌဉ္စေဝ နော စ ကိလေသံ အကုသလဉ္စ ဓမ္မံ ပဋိစ္စ ကိလေသော စေဝ သံကိလိဋ္ဌော စ အကုသလော ဓမ္မော ဥပ္ပဇ္ဇတိ ဟေတုပစ္စယာ။ တီဏိ (သံခိတ္တံ).

၂၅. ဟေတုယာ နဝ၊ အာရမ္မဏေ နဝ။ပေ။ အဝိဂတေ နဝ (သံခိတ္တံ. ကိလေသဒုကအကုသလသဒိသံ. သဟဇာတဝါရမ္ပိ။ပေ။ ပဉှာဝါရမ္ပိ သဗ္ဗတ္ထ ဝိတ္ထာရေတဗ္ဗံ).