၁-၇. ပဋိစ္စဝါရာဒိ

ပစ္စယစတုက္ကံ

ဟေတုပစ္စယော

၁၀. ဥပါဒါနိယံ ကုသလံ ဓမ္မံ ပဋိစ္စ ဥပါဒါနိယော ကုသလော ဓမ္မော ဥပ္ပဇ္ဇတိ ဟေတုပစ္စယာ. (၁)

အနုပါဒါနိယံ ကုသလံ ဓမ္မံ ပဋိစ္စ အနုပါဒါနိယော ကုသလော ဓမ္မော ဥပ္ပဇ္ဇတိ ဟေတုပစ္စယာ. (၁) (သံခိတ္တံ.)

၁၁. ဟေတုယာ ဒွေ၊ အာရမ္မဏေ ဒွေ။ပေ။ အဝိဂတေ ဒွေ (သံခိတ္တံ. လောကိယလောကုတ္တရဒုကကုသလသဒိသံ. သဟဇာတဝါရမ္ပိ။ပေ။ ပဉှာဝါရမ္ပိ ဝိတ္ထာရေတဗ္ဗံ.)

၁၂. ဥပါဒါနိယံ အကုသလံ ဓမ္မံ ပဋိစ္စ ဥပါဒါနိယော အကုသလော ဓမ္မော ဥပ္ပဇ္ဇတိ ဟေတုပစ္စယာ (သံခိတ္တံ).

ဟေတုယာ ဧကံ၊ အာရမ္မဏေ ဧကံ။ပေ။ အဝိဂတေ ဧကံ (သံခိတ္တံ).

(သဟဇာတဝါရေပိ။ပေ။ ပဉှာဝါရေပိ သဗ္ဗတ္ထ ဧကံ.)

၁၃. ဥပါဒါနိယံ အဗျာကတံ ဓမ္မံ ပဋိစ္စ ဥပါဒါနိယော အဗျာကတော ဓမ္မော ဥပ္ပဇ္ဇတိ ဟေတုပစ္စယာ. (၁)

အနုပါဒါနိယံ အဗျာကတံ ဓမ္မံ ပဋိစ္စ အနုပါဒါနိယော အဗျာကတော ဓမ္မော ဥပ္ပဇ္ဇတိ ဟေတုပစ္စယာ. အနုပါဒါနိယံ အဗျာကတံ ဓမ္မံ ပဋိစ္စ ဥပါဒါနိယော အဗျာကတော ဓမ္မော ဥပ္ပဇ္ဇတိ ဟေတုပစ္စယာ. အနုပါဒါနိယံ အဗျာကတံ ဓမ္မံ ပဋိစ္စ ဥပါဒါနိယော အဗျာကတော စ အနုပါဒါနိယော အဗျာကတော စ ဓမ္မာ ဥပ္ပဇ္ဇန္တိ ဟေတုပစ္စယာ. (၃)

ဥပါဒါနိယံ အဗျာကတဉ္စ အနုပါဒါနိယံ အဗျာကတဉ္စ ဓမ္မံ ပဋိစ္စ ဥပါဒါနိယော အဗျာကတော ဓမ္မော ဥပ္ပဇ္ဇတိ ဟေတုပစ္စယာ. (၁) (သံခိတ္တံ.)

၁၄. ဟေတုယာ ပဉ္စ၊ အာရမ္မဏေ ဒွေ။ပေ။ အာသေဝနေ ဧကံ။ပေ။ အဝိဂတေ ပဉ္စ (သံခိတ္တံ. လောကိယဒုကအဗျာကတသဒိသံ. သဟဇာတဝါရမ္ပိ။ပေ။ ပဉှာဝါရမ္ပိ ဝိတ္ထာရေတဗ္ဗံ).