၁-၇. ပဋိစ္စဝါရာဒိ

ပစ္စယစတုက္ကံ

၁. နောဥပါဒါနံ ကုသလံ ဓမ္မံ ပဋိစ္စ နောဥပါဒါနော ကုသလော ဓမ္မော ဥပ္ပဇ္ဇတိ ဟေတုပစ္စယာ (သံခိတ္တံ).

ဟေတုယာ ဧကံ၊ အာရမ္မဏေ ဧကံ။ပေ။ အဝိဂတေ ဧကံ (သံခိတ္တံ).

(သဟဇာတဝါရေပိ။ပေ။ ပဉှာဝါရေပိ သဗ္ဗတ္ထ ဧကံ.)

၂. ဥပါဒါနံ အကုသလံ ဓမ္မံ ပဋိစ္စ ဥပါဒါနော အကုသလော ဓမ္မော ဥပ္ပဇ္ဇတိ ဟေတုပစ္စယာ. ဥပါဒါနံ အကုသလံ ဓမ္မံ ပဋိစ္စ နောဥပါဒါနော အကုသလော ဓမ္မော ဥပ္ပဇ္ဇတိ ဟေတုပစ္စယာ. ဥပါဒါနံ အကုသလံ ဓမ္မံ ပဋိစ္စ ဥပါဒါနော အကုသလော စ နောဥပါဒါနော အကုသလော စ ဓမ္မာ ဥပ္ပဇ္ဇန္တိ ဟေတုပစ္စယာ. (၃)

နောဥပါဒါနံ အကုသလံ ဓမ္မံ ပဋိစ္စ နောဥပါဒါနော အကုသလော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

ဥပါဒါနံ အကုသလဉ္စ နောဥပါဒါနံ အကုသလဉ္စ ဓမ္မံ ပဋိစ္စ ဥပါဒါနော အကုသလော ဓမ္မော ဥပ္ပဇ္ဇတိ ဟေတုပစ္စယာ။ တီဏိ (သံခိတ္တံ).

၃. ဟေတုယာ နဝ၊ အာရမ္မဏေ နဝ (သဗ္ဗတ္ထ နဝ)၊ အဝိဂတေ နဝ (သံခိတ္တံ).

၄. နောဥပါဒါနံ အကုသလံ ဓမ္မံ ပဋိစ္စ နောဥပါဒါနော အကုသလော ဓမ္မော ဥပ္ပဇ္ဇတိ နဟေတုပစ္စယာ (သံခိတ္တံ).

၅. နဟေတုယာ ဧကံ၊ နအဓိပတိယာ နဝ၊ နပုရေဇာတေ နဝ။ပေ။ နကမ္မေ တီဏိ၊ နဝိပါကေ နဝ၊ နဝိပ္ပယုတ္တေ နဝ (သံခိတ္တံ. သဟဇာတဝါရာဒိ ဝိတ္ထာရေတဗ္ဗော).

၆. ဥပါဒါနော အကုသလော ဓမ္မော ဥပါဒါနဿ အကုသလဿ ဓမ္မဿ ဟေတုပစ္စယေန ပစ္စယော (သံခိတ္တံ).

၇. ဟေတုယာ နဝ၊ အာရမ္မဏေ နဝ၊ အဓိပတိယာ နဝ (နောဥပါဒါနမူလကေ တီဏိ၊ သဟဇာတာဓိပတိ)၊ အနန္တရေ နဝ။ပေ။ နိဿယေ နဝ၊ ဥပနိဿယေ နဝ၊ အာသေဝနေ နဝ၊ ကမ္မေ တီဏိ (နောဥပါဒါနမူလကေ)၊ အာဟာရေ တီဏိ၊ ဣန္ဒြိယေ တီဏိ၊ ဈာနေ တီဏိ၊ မဂ္ဂေ နဝ၊ သမ္ပယုတ္တေ နဝ၊ အတ္ထိယာ နဝ။ပေ။ အဝိဂတေ နဝ (သံခိတ္တံ).

၈. နောဥပါဒါနံ အဗျာကတံ ဓမ္မံ ပဋိစ္စ နောဥပါဒါနော အဗျာကတော ဓမ္မော ဥပ္ပဇ္ဇတိ ဟေတုပစ္စယာ (သံခိတ္တံ).

၉. ဟေတုယာ ဧကံ၊ အာရမ္မဏေ ဧကံ။ပေ။ အဝိဂတေ ဧကံ (သံခိတ္တံ).

(သဟဇာတဝါရေပိ။ပေ။ ပဉှာဝါရေပိ သဗ္ဗတ္ထ ဧကံ.)