၁-၇. ပဋိစ္စဝါရာဒိ

ပစ္စယစတုက္ကံ

ဟေတုပစ္စယော

၁၉. စေတသိကံ ကုသလံ ဓမ္မံ ပဋိစ္စ စေတသိကော ကုသလော ဓမ္မော ဥပ္ပဇ္ဇတိ ဟေတုပစ္စယာ. စေတသိကံ ကုသလံ ဓမ္မံ ပဋိစ္စ အစေတသိကော ကုသလော ဓမ္မော ဥပ္ပဇ္ဇတိ ဟေတုပစ္စယာ. စေတသိကံ ကုသလံ ဓမ္မံ ပဋိစ္စ စေတသိကော ကုသလော စ အစေတသိကော ကုသလော စ ဓမ္မာ ဥပ္ပဇ္ဇန္တိ ဟေတုပစ္စယာ. (၃)

အစေတသိကံ ကုသလံ ဓမ္မံ ပဋိစ္စ စေတသိကော ကုသလော ဓမ္မော ဥပ္ပဇ္ဇတိ ဟေတုပစ္စယာ. (၁)

စေတသိကံ ကုသလဉ္စ အစေတသိကံ ကုသလဉ္စ ဓမ္မံ ပဋိစ္စ စေတသိကော ကုသလော ဓမ္မော ဥပ္ပဇ္ဇတိ ဟေတုပစ္စယာ. (၁) (သံခိတ္တံ.)

၂၀. ဟေတုယာ ပဉ္စ၊ အာရမ္မဏေ ပဉ္စ၊ အဓိပတိယာ ပဉ္စ။ပေ။ အဝိဂတေ ပဉ္စ.

နအဓိပတိယာ ပဉ္စ၊ နပုရေဇာတေ ပဉ္စ။ပေ။ နကမ္မေ တီဏိ၊ နဝိပါကေ ပဉ္စ။ပေ။ နဝိပ္ပယုတ္တေ ပဉ္စ (သံခိတ္တံ၊ သဟဇာတဝါရာဒိ ဝိတ္ထာရေတဗ္ဗော).

၂၁. စေတသိကော ကုသလော ဓမ္မော စေတသိကဿ ကုသလဿ ဓမ္မဿ ဟေတုပစ္စယေန ပစ္စယော (သံခိတ္တံ).

၂၂. ဟေတုယာ တီဏိ၊ အာရမ္မဏေ နဝ၊ အဓိပတိယာ နဝ (အာဒိမှိ တီဏိ၊ သဟဇာတာဓိပတိ၊ မဇ္ဈိမေသု တီသု မဇ္ဈိမာနုလောမိကာယေဝ ပဉှာ၊ သဟဇာတာဓိပတိ၊) အနန္တရေ နဝ။ပေ။ သဟဇာတေ ပဉ္စ။ပေ။ ဥပနိဿယေ နဝ၊ အာသေဝနေ နဝ၊ ကမ္မေ တီဏိ၊ အာဟာရေ ပဉ္စ၊ ဣန္ဒြိယေ ပဉ္စ၊ ဈာနေ တီဏိ၊ မဂ္ဂေ တီဏိ၊ သမ္ပယုတ္တေ ပဉ္စ၊ အတ္ထိယာ ပဉ္စ၊ နတ္ထိယာ နဝ။ပေ။ အဝိဂတေ ပဉ္စ (သံခိတ္တံ).

၂၃. စေတသိကံ အကုသလံ ဓမ္မံ ပဋိစ္စ စေတသိကော အကုသလော ဓမ္မော ဥပ္ပဇ္ဇတိ ဟေတုပစ္စယာ. စေတသိကံ အကုသလံ ဓမ္မံ ပဋိစ္စ အစေတသိကော အကုသလော ဓမ္မော ဥပ္ပဇ္ဇတိ ဟေတုပစ္စယာ. စေတသိကံ အကုသလံ ဓမ္မံ ပဋိစ္စ စေတသိကော အကုသလော စ အစေတသိကော အကုသလော စ ဓမ္မာ ဥပ္ပဇ္ဇန္တိ ဟေတုပစ္စယာ. (၃)

အစေတသိကံ အကုသလံ ဓမ္မံ ပဋိစ္စ စေတသိကော အကုသလော ဓမ္မော ဥပ္ပဇ္ဇတိ ဟေတုပစ္စယာ. (၁)

စေတသိကံ အကုသလဉ္စ အစေတသိကံ အကုသလဉ္စ ဓမ္မံ ပဋိစ္စ စေတသိကော အကုသလော ဓမ္မော ဥပ္ပဇ္ဇတိ ဟေတုပစ္စယာ. (၁) (သံခိတ္တံ.)

၂၄. ဟေတုယာ ပဉ္စ၊ အာရမ္မဏေ ပဉ္စ။ပေ။ အဝိဂတေ ပဉ္စ (သံခိတ္တံ၊ ယထာ ကုသလနယံ ဧဝံ နဟေတုပစ္စယမ္ပိ ကာတဗ္ဗံ). (သဟဇာတဝါရမ္ပိ။ပေ။ ပဉှာဝါရမ္ပိ ဝိတ္ထာရေတဗ္ဗံ).

၂၅. စေတသိကံ အဗျာကတံ ဓမ္မံ ပဋိစ္စ စေတသိကော အဗျာကတော ဓမ္မော ဥပ္ပဇ္ဇတိ ဟေတုပစ္စယာ. စေတသိကံ အဗျာကတံ ဓမ္မံ ပဋိစ္စ အစေတသိကော အဗျာကတော ဓမ္မော ဥပ္ပဇ္ဇတိ ဟေတုပစ္စယာ. စေတသိကံ အဗျာကတံ ဓမ္မံ ပဋိစ္စ စေတသိကော အဗျာကတော စ အစေတသိကော အဗျာကတော စ ဓမ္မာ ဥပ္ပဇ္ဇန္တိ ဟေတုပစ္စယာ. (၃)

အစေတသိကံ အဗျာကတံ ဓမ္မံ ပဋိစ္စ အစေတသိကော အဗျာကတော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

စေတသိကံ အဗျာကတဉ္စ အစေတသိကံ အဗျာကတဉ္စ ဓမ္မံ ပဋိစ္စ စေတသိကော အဗျာကတော ဓမ္မော ဥပ္ပဇ္ဇတိ ဟေတုပစ္စယာ။ တီဏိ (သံခိတ္တံ).

၂၆. ဟေတုယာ နဝ၊ အာရမ္မဏေ နဝ၊ အဓိပတိယာ နဝ။ပေ။ ပုရေဇာတေ အာသေဝနေ ပဉ္စ၊ ကမ္မေ နဝ၊ ဝိပါကေ နဝ။ပေ။ အဝိဂတေ နဝ (သံခိတ္တံ).

နဟေတုယာ နဝ၊ နအာရမ္မဏေ တီဏိ၊ နအဓိပတိယာ နဝ (သဗ္ဗေ ကာတဗ္ဗာ)။ပေ။ နကမ္မေ စတ္တာရိ၊ နဝိပါကေ နဝ၊ နအာဟာရေ ဧကံ၊ နဣန္ဒြိယေ ဧကံ၊ နဈာနေ ဆ၊ နမဂ္ဂေ နဝ၊ နသမ္ပယုတ္တေ တီဏိ၊ နဝိပ္ပယုတ္တေ ဆ။ပေ။ နောဝိဂတေ တီဏိ. (သံခိတ္တံ၊ သဟဇာတဝါရာဒိ ဝိတ္ထာရေတဗ္ဗော).

၂၇. စေတသိကော အဗျာကတော ဓမ္မော စေတသိကဿ အဗျာကတဿ ဓမ္မဿ ဟေတုပစ္စယေန ပစ္စယော (သံခိတ္တံ).

၂၈. ဟေတုယာ တီဏိ၊ အာရမ္မဏေ နဝ၊ အဓိပတိယာ နဝ (ဧတ္ထ ဆသု သဟဇာတာဓိပတိ)၊ အနန္တရေ နဝ။ပေ။ သဟဇာတေ နဝ၊ အညမညေ နဝ၊ နိဿယေ နဝ၊ ဥပနိဿယေ နဝ၊ ပုရေဇာတေ တီဏိ၊ အာသေဝနေ နဝ၊ ကမ္မေ တီဏိ၊ ဝိပါကေ နဝ၊ အာဟာရေ နဝ၊ ဣန္ဒြိယေ နဝ၊ ဈာနေ တီဏိ၊ မဂ္ဂေ တီဏိ၊ သမ္ပယုတ္တေ ပဉ္စ၊ ဝိပ္ပယုတ္တေ ပဉ္စ၊ အတ္ထိယာ နဝ။ပေ။ အဝိဂတေ နဝ (သံခိတ္တံ).