၁-၇. ပဋိစ္စဝါရာဒိ

ပစ္စယစတုက္ကံ

ဟေတုပစ္စယော

၉. စိတ္တံ ကုသလံ ဓမ္မံ ပဋိစ္စ နောစိတ္တော ကုသလော ဓမ္မော ဥပ္ပဇ္ဇတိ ဟေတုပစ္စယာ. (၁)

နောစိတ္တံ ကုသလံ ဓမ္မံ ပဋိစ္စ နောစိတ္တော ကုသလော ဓမ္မော ဥပ္ပဇ္ဇတိ ဟေတုပစ္စယာ. နောစိတ္တံ ကုသလံ ဓမ္မံ ပဋိစ္စ စိတ္တော ကုသလော ဓမ္မော ဥပ္ပဇ္ဇတိ ဟေတုပစ္စယာ. နောစိတ္တံ ကုသလံ ဓမ္မံ ပဋိစ္စ စိတ္တော ကုသလော စ နောစိတ္တော ကုသလော စ ဓမ္မာ ဥပ္ပဇ္ဇန္တိ ဟေတုပစ္စယာ. (၃)

စိတ္တံ ကုသလဉ္စ နောစိတ္တံ ကုသလဉ္စ ဓမ္မံ ပဋိစ္စ နောစိတ္တော ကုသလော ဓမ္မော ဥပ္ပဇ္ဇတိ ဟေတုပစ္စယာ. (၁) (သံခိတ္တံ.)

၁၀. ဟေတုယာ ပဉ္စ၊ အာရမ္မဏေ ပဉ္စ (သဗ္ဗတ္ထ ပဉ္စ)၊ အဝိဂတေ ပဉ္စ (သံခိတ္တံ).

နအဓိပတိယာ ပဉ္စ၊ နပုရေဇာတေ ပဉ္စ၊ နပစ္ဆာဇာတေ ပဉ္စ၊ နအာသေဝနေ ပဉ္စ၊ နကမ္မေ တီဏိ၊ နဝိပါကေ ပဉ္စ၊ နဝိပ္ပယုတ္တေ ပဉ္စ (သံခိတ္တံ).

(သဟဇာတဝါရမ္ပိ။ပေ။ သမ္ပယုတ္တဝါရမ္ပိ ဝိတ္ထာရေတဗ္ဗံ.)

၁၁. နောစိတ္တော ကုသလော ဓမ္မော နောစိတ္တဿ ကုသလဿ ဓမ္မဿ ဟေတုပစ္စယေန ပစ္စယော. နောစိတ္တော ကုသလော ဓမ္မော စိတ္တဿ ကုသလဿ ဓမ္မဿ ဟေတုပစ္စယေန ပစ္စယော. နောစိတ္တော ကုသလော ဓမ္မော စိတ္တဿ ကုသလဿ စ နောစိတ္တဿ ကုသလဿ စ ဓမ္မဿ ဟေတုပစ္စယေန ပစ္စယော. (၃) (သံခိတ္တံ.)

၁၂. ဟေတုယာ တီဏိ၊ အာရမ္မဏေ နဝ၊ အဓိပတိယာ နဝ၊ အနန္တရေ နဝ။ပေ။ သဟဇာတေ အညမညေ နိဿယေ ပဉ္စ၊ ဥပနိဿယေ အာသေဝနေ နဝ၊ ကမ္မေ တီဏိ၊ အာဟာရေ ဣန္ဒြိယေ ပဉ္စ၊ ဈာနေ မဂ္ဂေ တီဏိ၊ သမ္ပယုတ္တေ ပဉ္စ။ပေ။ အဝိဂတေ ပဉ္စ (သံခိတ္တံ).

နဟေတုယာ နဝ၊ နအာရမ္မဏေ နဝ (သံခိတ္တံ).

ဟေတုပစ္စယာ နအာရမ္မဏေ တီဏိ (သံခိတ္တံ).

နဟေတုပစ္စယာ အာရမ္မဏေ နဝ (သံခိတ္တံ).

(ယထာ ကုသလတ္တိကေ ပဉှာဝါရဿ အနုလောမမ္ပိ ပစ္စနီယမ္ပိ အနုလောမပစ္စနီယမ္ပိ ပစ္စနီယာနုလောမမ္ပိ ဂဏိတံ၊ ဧဝံ ဂဏေတဗ္ဗံ.)

၁၃. စိတ္တံ အကုသလံ ဓမ္မံ ပဋိစ္စ နောစိတ္တော အကုသလော ဓမ္မော ဥပ္ပဇ္ဇတိ ဟေတုပစ္စယာ. (၁)

နောစိတ္တံ အကုသလံ ဓမ္မံ ပဋိစ္စ နောစိတ္တော အကုသလော ဓမ္မော ဥပ္ပဇ္ဇတိ ဟေတုပစ္စယာ. နောစိတ္တံ အကုသလံ ဓမ္မံ ပဋိစ္စ စိတ္တော အကုသလော ဓမ္မော ဥပ္ပဇ္ဇတိ ဟေတုပစ္စယာ. နောစိတ္တံ အကုသလံ ဓမ္မံ ပဋိစ္စ စိတ္တော အကုသလော စ နောစိတ္တော အကုသလော စ ဓမ္မာ ဥပ္ပဇ္ဇန္တိ ဟေတုပစ္စယာ. (၃)

စိတ္တံ အကုသလဉ္စ နောစိတ္တံ အကုသလဉ္စ ဓမ္မံ ပဋိစ္စ နောစိတ္တော အကုသလော ဓမ္မော ဥပ္ပဇ္ဇတိ ဟေတုပစ္စယာ. (၁) (သံခိတ္တံ.)

၁၄. ဟေတုယာ ပဉ္စ၊ အာရမ္မဏေ ပဉ္စ။ပေ။ အဝိဂတေ ပဉ္စ. (သံခိတ္တံ. စိတ္တဒုကကုသလသဒိသံ၊ နဟေတုယာပိ ကတ္တဗ္ဗံ. သဟဇာတဝါရမ္ပိ။ပေ။ ပဉှာဝါရမ္ပိ ကာတဗ္ဗံ).

၁၅. စိတ္တံ အဗျာကတံ ဓမ္မံ ပဋိစ္စ နောစိတ္တော အဗျာကတော ဓမ္မော ဥပ္ပဇ္ဇတိ ဟေတုပစ္စယာ. (၁)

နောစိတ္တံ အဗျာကတံ ဓမ္မံ ပဋိစ္စ နောစိတ္တော အဗျာကတော ဓမ္မော ဥပ္ပဇ္ဇတိ ဟေတုပစ္စယာ. နောစိတ္တံ အဗျာကတံ ဓမ္မံ ပဋိစ္စ စိတ္တော အဗျာကတော ဓမ္မော ဥပ္ပဇ္ဇတိ ဟေတုပစ္စယာ. နောစိတ္တံ အဗျာကတံ ဓမ္မံ ပဋိစ္စ စိတ္တော အဗျာကတော စ နောစိတ္တော အဗျာကတော စ ဓမ္မာ ဥပ္ပဇ္ဇန္တိ ဟေတုပစ္စယာ. (၃)

စိတ္တံ အဗျာကတဉ္စ နောစိတ္တံ အဗျာကတဉ္စ ဓမ္မံ ပဋိစ္စ နောစိတ္တော အဗျာကတော ဓမ္မော ဥပ္ပဇ္ဇတိ ဟေတုပစ္စယာ. (၁) (သံခိတ္တံ.)

၁၆. ဟေတုယာ ပဉ္စ၊ အာရမ္မဏေ ပဉ္စ။ပေ။ ဝိပါကေ ပဉ္စ။ပေ။ အဝိဂတေ ပဉ္စ (သံခိတ္တံ).

နဟေတုယာ ပဉ္စ၊ နအာရမ္မဏေ တီဏိ၊ နအဓိပတိယာ ပဉ္စ။ပေ။ နပုရေဇာတေ နပစ္ဆာဇာတေ နအာသေဝနေ ပဉ္စ၊ နကမ္မေ တီဏိ၊ နဝိပါကေ ပဉ္စ၊ နအာဟာရေ ဧကံ၊ နဣန္ဒြိယေ ဧကံ၊ နဈာနေ ပဉ္စ၊ နမဂ္ဂေ ပဉ္စ၊ နသမ္ပယုတ္တေ တီဏိ၊ နဝိပ္ပယုတ္တေ ပဉ္စ။ပေ။ နောဝိဂတေ တီဏိ (သံခိတ္တံ).

(သဟဇာတဝါရမ္ပိ။ပေ။ သမ္ပယုတ္တဝါရမ္ပိ ဝိတ္ထာရေတဗ္ဗံ.)

၁၇. နောစိတ္တော အဗျာကတော ဓမ္မော နောစိတ္တဿ အဗျာကတဿ ဓမ္မဿ ဟေတုပစ္စယေန ပစ္စယော။ တီဏိ (စိတ္တဒုကကုသလသဒိသံ ဝိတ္ထာရေတဗ္ဗံ).

၁၈. ဟေတုယာ တီဏိ၊ အာရမ္မဏေ နဝ၊ အဓိပတိယာ နဝ၊ အနန္တရေ နဝ။ပေ။ သဟဇာတေ ပဉ္စ၊ ပုရေဇာတေ တီဏိ၊ အာသေဝနေ နဝ၊ ကမ္မေ တီဏိ၊ ဝိပါကေ ပဉ္စ၊ ဝိပ္ပယုတ္တေ ပဉ္စ၊ အတ္ထိယာ ပဉ္စ၊ နတ္ထိယာ နဝ။ပေ။ အဝိဂတေ ပဉ္စ (သံခိတ္တံ).