၁-၇. ပဋိစ္စဝါရာဒိ
ပစ္စယစတုက္ကံ
ဟေတုပစ္စယော
၉၈. အနုပါဒိန္နံ ကုသလံ ဓမ္မံ ပဋိစ္စ အနုပါဒိန္နော ကုသလော ဓမ္မော ဥပ္ပဇ္ဇတိ ဟေတုပစ္စယာ (သံခိတ္တံ).
ဟေတုယာ ဧကံ၊ အာရမ္မဏေ ဧကံ။ပေ။ အဝိဂတေ ဧကံ (သဗ္ဗတ္ထ ဧကံ. သံခိတ္တံ. သဟဇာတဝါရေပိ။ပေ။ ပဉှာဝါရေပိ ဧကံ သပ္ပစ္စယကုသလသဒိသံ).
၉၉. အနုပါဒိန္နံ အကုသလံ ဓမ္မံ ပဋိစ္စ အနုပါဒိန္နော အကုသလော ဓမ္မော ဥပ္ပဇ္ဇတိ ဟေတုပစ္စယာ (သံခိတ္တံ).
ဟေတုယာ ဧကံ။ပေ။ အဝိဂတေ ဧကံ (သံခိတ္တံ. သဟဇာတဝါရေပိ။ပေ။ ပဉှာဝါရေပိ သဗ္ဗတ္ထ ဧကံ).
၁၀၀. ဥပါဒိန္နံ အဗျာကတံ ဓမ္မံ ပဋိစ္စ ဥပါဒိန္နော အဗျာကတော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.
အနုပါဒိန္နံ အဗျာကတံ ဓမ္မံ ပဋိစ္စ အနုပါဒိန္နော အဗျာကတော ဓမ္မော ဥပ္ပဇ္ဇတိ ဟေတုပစ္စယာ. (၁)
ဥပါဒိန္နံ အဗျာကတဉ္စ အနုပါဒိန္နံ အဗျာကတဉ္စ ဓမ္မံ ပဋိစ္စ အနုပါဒိန္နော အဗျာကတော ဓမ္မော ဥပ္ပဇ္ဇတိ ဟေတုပစ္စယာ – ဥပါဒိန္နေ ခန္ဓေ စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ. (၁) (သံခိတ္တံ.)
၁၀၁. ဟေတုယာ ပဉ္စ၊ အာရမ္မဏေ ဒွေ၊ အဓိပတိယာ ဧကံ။ပေ။ ပုရေဇာတေ ဒွေ၊ အာသေဝနေ ဧကံ၊ ကမ္မေ ပဉ္စ၊ ဝိပါကေ ပဉ္စ။ပေ။ အဝိဂတေ ပဉ္စ (သံခိတ္တံ).
နဟေတုယာ ပဉ္စ၊ နအာရမ္မဏေ စတ္တာရိ၊ နအဓိပတိယာ ပဉ္စ။ပေ။ နပုရေဇာတေ စတ္တာရိ၊ နပစ္ဆာဇာတေ နအာသေဝနေ ပဉ္စ၊ နကမ္မေ ဧကံ၊ နဝိပါကေ ဒွေ၊ နအာဟာရေ ဒွေ၊ နဣန္ဒြိယေ ဒွေ၊ နဈာနေ ဒွေ၊ နမဂ္ဂေ ပဉ္စ၊ နသမ္ပယုတ္တေ စတ္တာရိ၊ နဝိပ္ပယုတ္တေ ဒွေ၊ နောနတ္ထိယာ စတ္တာရိ၊ နောဝိဂတေ စတ္တာရိ (သံခိတ္တံ. သဟဇာတဝါရာဒိ ဝိတ္ထာရေတဗ္ဗော).
ဟေတု-ပုရေဇာတပစ္စယာ
၁၀၂. ဥပါဒိန္နော အဗျာကတော ဓမ္မော ဥပါဒိန္နဿ အဗျာကတဿ ဓမ္မဿ ဟေတုပစ္စယေန ပစ္စယော။ တီဏိ.
အနုပါဒိန္နော အဗျာကတော ဓမ္မော အနုပါဒိန္နဿ အဗျာကတဿ ဓမ္မဿ ဟေတုပစ္စယေန ပစ္စယော. (၁)
အနုပါဒိန္နော အဗျာကတော ဓမ္မော အနုပါဒိန္နဿ အဗျာကတဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ။ ဧကံ.
ဥပါဒိန္နော အဗျာကတော ဓမ္မော ဥပါဒိန္နဿ အဗျာကတဿ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ (ဒွေ ပဉှာ).
အနုပါဒိန္နော အဗျာကတော ဓမ္မော အနုပါဒိန္နဿ အဗျာကတဿ ဓမ္မဿ ပုရေဇာတပစ္စယေန ပစ္စယော။ ဒွေ (အာရမ္မဏပုရေဇာတံယေဝ၊ ဃဋနာ ဒွေ၊ အာရမ္မဏပုရေဇာတမ္ပိ ဝတ္ထုပုရေဇာတမ္ပိ).
၁၀၃. ဟေတုယာ စတ္တာရိ၊ အာရမ္မဏေ စတ္တာရိ (ဥပါဒိန္နမူလကေ ဒွေ၊ အနုပါဒိန္နမူလကေ ဒွေ)၊ အဓိပတိယာ ဧကံ၊ အနန္တရေ သမနန္တရေ စတ္တာရိ၊ သဟဇာတေ ပဉ္စ၊ အညမညေ ဒွေ၊ နိဿယေ ပဉ္စ၊ ဥပနိဿယေ စတ္တာရိ၊ ပုရေဇာတေ ဆ၊ ပစ္ဆာဇာတေ ဆ၊ အာသေဝနေ ဧကံ၊ ကမ္မေ စတ္တာရိ၊ ဝိပါကေ စတ္တာရိ၊ အာဟာရေ နဝ၊ ဣန္ဒြိယေ စတ္တာရိ၊ ဈာနေ စတ္တာရိ၊ မဂ္ဂေ စတ္တာရိ၊ သမ္ပယုတ္တေ ဒွေ၊ ဝိပ္ပယုတ္တေ ဆ၊ အတ္ထိယာ နဝ၊ နတ္ထိယာ စတ္တာရိ၊ ဝိဂတေ စတ္တာရိ၊ အဝိဂတေ နဝ (သံခိတ္တံ).
နဟေတုယာ နဝ၊ နအာရမ္မဏေ နဝ (သံခိတ္တံ).
ဟေတုပစ္စယာ နအာရမ္မဏေ စတ္တာရိ (သံခိတ္တံ).
နဟေတုပစ္စယာ အာရမ္မဏေ စတ္တာရိ (သံခိတ္တံ).
မဟန္တရဒုကကုသလတ္တိကံ နိဋ္ဌိတံ.