၁-၇. ပဋိစ္စဝါရာဒိ

ပစ္စယစတုက္ကံ

ဟေတုပစ္စယော

၈၄. အဇ္ဈတ္တိကံ ကုသလံ ဓမ္မံ ပဋိစ္စ ဗာဟိရော ကုသလော ဓမ္မော ဥပ္ပဇ္ဇတိ ဟေတုပစ္စယာ. (၁)

ဗာဟိရံ ကုသလံ ဓမ္မံ ပဋိစ္စ ဗာဟိရော ကုသလော ဓမ္မော ဥပ္ပဇ္ဇတိ ဟေတုပစ္စယာ. ဗာဟိရံ ကုသလံ ဓမ္မံ ပဋိစ္စ အဇ္ဈတ္တိကော ကုသလော ဓမ္မော ဥပ္ပဇ္ဇတိ ဟေတုပစ္စယာ. ဗာဟိရံ ကုသလံ ဓမ္မံ ပဋိစ္စ အဇ္ဈတ္တိကော ကုသလော စ ဗာဟိရော ကုသလော စ ဓမ္မာ ဥပ္ပဇ္ဇန္တိ ဟေတုပစ္စယာ. (၃)

အဇ္ဈတ္တိကံ ကုသလဉ္စ ဗာဟိရံ ကုသလဉ္စ ဓမ္မံ ပဋိစ္စ ဗာဟိရော ကုသလော ဓမ္မော ဥပ္ပဇ္ဇတိ ဟေတုပစ္စယာ. (၁) (သံခိတ္တံ.)

၈၅. ဟေတုယာ ပဉ္စ၊ အာရမ္မဏေ ပဉ္စ။ပေ။ အဝိဂတေ ပဉ္စ. (သံခိတ္တံ. စိတ္တဒုကသဒိသံ. သဟဇာတဝါရမ္ပိ။ပေ။ ပဉှာဝါရမ္ပိ ဝိတ္ထာရေတဗ္ဗံ).

၈၆. အဇ္ဈတ္တိကံ အကုသလံ ဓမ္မံ ပဋိစ္စ ဗာဟိရော အကုသလော ဓမ္မော ဥပ္ပဇ္ဇတိ ဟေတုပစ္စယာ. (၁)

ဗာဟိရံ အကုသလံ ဓမ္မံ ပဋိစ္စ ဗာဟိရော အကုသလော ဓမ္မော ဥပ္ပဇ္ဇတိ ဟေတုပစ္စယာ. ဗာဟိရံ အကုသလံ ဓမ္မံ ပဋိစ္စ အဇ္ဈတ္တိကော အကုသလော ဓမ္မော ဥပ္ပဇ္ဇတိ ဟေတုပစ္စယာ. ဗာဟိရံ အကုသလံ ဓမ္မံ ပဋိစ္စ အဇ္ဈတ္တိကော အကုသလော စ ဗာဟိရော အကုသလော စ ဓမ္မာ ဥပ္ပဇ္ဇန္တိ ဟေတုပစ္စယာ. (၃)

အဇ္ဈတ္တိကံ အကုသလဉ္စ ဗာဟိရံ အကုသလဉ္စ ဓမ္မံ ပဋိစ္စ ဗာဟိရော အကုသလော ဓမ္မော ဥပ္ပဇ္ဇတိ ဟေတုပစ္စယာ. (၁) (သံခိတ္တံ.)

၈၇. ဟေတုယာ ပဉ္စ၊ အာရမ္မဏေ ပဉ္စ။ပေ။ အဝိဂတေ ပဉ္စ. (သံခိတ္တံ. စိတ္တဒုကသဒိသံ. သဟဇာတဝါရမ္ပိ။ပေ။ ပဉှာဝါရမ္ပိ ဝိတ္ထာရေတဗ္ဗံ.)

၈၈. အဇ္ဈတ္တိကံ အဗျာကတံ ဓမ္မံ ပဋိစ္စ အဇ္ဈတ္တိကော အဗျာကတော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

ဗာဟိရံ အဗျာကတံ ဓမ္မံ ပဋိစ္စ ဗာဟိရော အဗျာကတော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

အဇ္ဈတ္တိကံ အဗျာကတဉ္စ ဗာဟိရံ အဗျာကတဉ္စ ဓမ္မံ ပဋိစ္စ အဇ္ဈတ္တိကော အဗျာကတော ဓမ္မော ဥပ္ပဇ္ဇတိ ဟေတုပစ္စယာ။ တီဏိ (သံခိတ္တံ).

၈၉. ဟေတုယာ နဝ၊ အာရမ္မဏေ ပဉ္စ၊ အဓိပတိယာ ပဉ္စ။ပေ။ အညမညေ ပဉ္စ၊ နိဿယေ နဝ၊ ဥပနိဿယေ ပဉ္စ၊ ပုရေဇာတေ ပဉ္စ၊ အာသေဝနေ ပဉ္စ၊ ကမ္မေ။ပေ။ မဂ္ဂေ နဝ၊ သမ္ပယုတ္တေ ပဉ္စ၊ ဝိပ္ပယုတ္တေ နဝ။ပေ။ အဝိဂတေ နဝ (သံခိတ္တံ).

နဟေတုယာ နဝ၊ နအာရမ္မဏေ နဝ၊ နအဓိပတိယာ နဝ။ပေ။ နကမ္မေ တီဏိ၊ နဝိပါကေ ပဉ္စ၊ နအာဟာရေ ဧကံ၊ နဣန္ဒြိယေ ဧကံ၊ နဈာနေ ပဉ္စ၊ နမဂ္ဂေ နဝ၊ နသမ္ပယုတ္တေ နဝ၊ နဝိပ္ပယုတ္တေ ပဉ္စ၊ နောနတ္ထိယာ နဝ၊ နောဝိဂတေ နဝ (သံခိတ္တံ. သဟဇာတဝါရမ္ပိ။ပေ။ သမ္ပယုတ္တဝါရမ္ပိ ဝိတ္ထာရေတဗ္ဗံ.)

၉၀. ဗာဟိရော အဗျာကတော ဓမ္မော ဗာဟိရဿ အဗျာကတဿ ဓမ္မဿ ဟေတုပစ္စယေန ပစ္စယော (သံခိတ္တံ).

ဗာဟိရော အဗျာကတော ဓမ္မော ဗာဟိရဿ အဗျာကတဿ ဓမ္မဿ ကမ္မပစ္စယေန ပစ္စယော။ တီဏိ.

၉၁. ဟေတုယာ တီဏိ၊ အာရမ္မဏေ နဝ၊ အဓိပတိယာ နဝ (အဇ္ဈတ္တိကော ဗာဟိရဿ ဂမနကာလေ သဟဇာတာဓိပတိ၊ မဇ္ဈေ တီသုပိ သဟဇာတာဓိပတိ)၊ အနန္တရေ နဝ၊ သဟဇာတေ နဝ၊ အညမညေ ပဉ္စ၊ နိဿယေ နဝ၊ ဥပနိဿယေ နဝ၊ ပုရေဇာတေ နဝ (အာရမ္မဏပုရေဇာတမ္ပိ ဝတ္ထုပုရေဇာတမ္ပိ)၊ ပစ္ဆာဇာတေ နဝ၊ အာသေဝနေ နဝ၊ ကမ္မေ တီဏိ၊ ဝိပါကေ နဝ၊ အာဟာရေ နဝ (တိဏ္ဏန္နံ ကဗဠီကာရော အာဟာရော)၊ ဣန္ဒြိယေ နဝ (တိဏ္ဏန္နံ ရူပဇီဝိတိန္ဒြိယံ)၊ ဈာနေ မဂ္ဂေ တီဏိ၊ သမ္ပယုတ္တေ ပဉ္စ၊ ဝိပ္ပယုတ္တေ နဝ၊ အတ္ထိယာ နဝ။ပေ။ အဝိဂတေ နဝ (သံခိတ္တံ).