၁-၇. ပဋိစ္စဝါရာဒိ

ပစ္စယစတုက္ကံ

ဟေတုပစ္စယော

၅၃. စိတ္တသဟဘုံ ကုသလံ ဓမ္မံ ပဋိစ္စ စိတ္တသဟဘူ ကုသလော ဓမ္မော ဥပ္ပဇ္ဇတိ ဟေတုပစ္စယာ. စိတ္တသဟဘုံ ကုသလံ ဓမ္မံ ပဋိစ္စ နောစိတ္တသဟဘူ ကုသလော ဓမ္မော ဥပ္ပဇ္ဇတိ ဟေတုပစ္စယာ. စိတ္တသဟဘုံ ကုသလံ ဓမ္မံ ပဋိစ္စ စိတ္တသဟဘူ ကုသလော စ နောစိတ္တသဟဘူ ကုသလော စ ဓမ္မာ ဥပ္ပဇ္ဇန္တိ ဟေတုပစ္စယာ. (၃)

နောစိတ္တသဟဘုံ ကုသလံ ဓမ္မံ ပဋိစ္စ စိတ္တသဟဘူ ကုသလော ဓမ္မော ဥပ္ပဇ္ဇတိ ဟေတုပစ္စယာ. (၁)

စိတ္တသဟဘုံ ကုသလဉ္စ နောစိတ္တသဟဘုံ ကုသလဉ္စ ဓမ္မံ ပဋိစ္စ စိတ္တသဟဘူ ကုသလော ဓမ္မော ဥပ္ပဇ္ဇတိ ဟေတုပစ္စယာ. (၁) (သံခိတ္တံ.)

၅၄. ဟေတုယာ ပဉ္စ၊ အာရမ္မဏေ ပဉ္စ။ပေ။ အဝိဂတေ ပဉ္စ (သံခိတ္တံ). (သဟဇာတဝါရမ္ပိ။ပေ။ ပဉှာဝါရမ္ပိ ဝိတ္ထာရေတဗ္ဗံ).

၅၅. စိတ္တသဟဘုံ အကုသလံ ဓမ္မံ ပဋိစ္စ စိတ္တသဟဘူ အကုသလော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

နောစိတ္တသဟဘုံ အကုသလံ ဓမ္မံ ပဋိစ္စ စိတ္တသဟဘူ အကုသလော ဓမ္မော ဥပ္ပဇ္ဇတိ ဟေတုပစ္စယာ. (၁)

စိတ္တသဟဘုံ အကုသလဉ္စ နောစိတ္တသဟဘုံ အကုသလဉ္စ ဓမ္မံ ပဋိစ္စ စိတ္တသဟဘူ အကုသလော ဓမ္မော ဥပ္ပဇ္ဇတိ ဟေတုပစ္စယာ. (၁) (သံခိတ္တံ.)

၅၆. ဟေတုယာ ပဉ္စ၊ အာရမ္မဏေ ပဉ္စ။ပေ။ အဝိဂတေ ပဉ္စ (သံခိတ္တံ).

(သဟဇာတဝါရမ္ပိ။ပေ။ ပဉှာဝါရမ္ပိ ဝိတ္ထာရေတဗ္ဗံ.)

၅၇. စိတ္တသဟဘုံ အဗျာကတံ ဓမ္မံ ပဋိစ္စ စိတ္တသဟဘူ အဗျာကတော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

နောစိတ္တသဟဘုံ အဗျာကတံ ဓမ္မံ ပဋိစ္စ နောစိတ္တသဟဘူ အဗျာကတော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

စိတ္တသဟဘုံ အဗျာကတဉ္စ နောစိတ္တသဟဘုံ အဗျာကတဉ္စ ဓမ္မံ ပဋိစ္စ စိတ္တသဟဘူ အဗျာကတော ဓမ္မော ဥပ္ပဇ္ဇတိ ဟေတုပစ္စယာ။ တီဏိ (သံခိတ္တံ).

၅၈. ဟေတုယာ နဝ၊ အာရမ္မဏေ နဝ။ပေ။ အဝိဂတေ နဝ. (သံခိတ္တံ. ယထာ စေတသိကဒုကမူလာ တီဏိ ဂမနာ၊ ဧဝံ ဣမေပိ တီဏိ ဂမနာ ကာတဗ္ဗာ. သဟဇာတဝါရမ္ပိ။ပေ။ ပဉှာဝါရမ္ပိ ဝိတ္ထာရေတဗ္ဗံ.)