၁. ဝိဘင်္ဂဝါရော

ဟေတုပစ္စယော

၁၀၆. စေတသိကံ ဓမ္မံ ပစ္စယာ စေတသိကော ဓမ္မော ဥပ္ပဇ္ဇတိ ဟေတုပစ္စယာ။ တီဏိ (ပဋိစ္စသဒိသာ).

အစေတသိကံ ဓမ္မံ ပစ္စယာ အစေတသိကော ဓမ္မော ဥပ္ပဇ္ဇတိ ဟေတုပစ္စယာ – စိတ္တံ ပစ္စယာ စိတ္တသမုဋ္ဌာနံ ရူပံ၊ ဝတ္ထုံ ပစ္စယာ စိတ္တံ၊ ပဋိသန္ဓိက္ခဏေ စိတ္တံ ပစ္စယာ ကဋတ္တာရူပံ၊ စိတ္တံ ပစ္စယာ ဝတ္ထု၊ ဝတ္ထုံ ပစ္စယာ စိတ္တံ၊ ဧကံ မဟာဘူတံ။ပေ။. (၁)

အစေတသိကံ ဓမ္မံ ပစ္စယာ စေတသိကော ဓမ္မော ဥပ္ပဇ္ဇတိ ဟေတုပစ္စယာ – စိတ္တံ ပစ္စယာ သမ္ပယုတ္တကာ ခန္ဓာ၊ ဝတ္ထုံ ပစ္စယာ စေတသိကာ ခန္ဓာ (ပဋိသန္ဓိက္ခဏေ ဒွေပိ ကာတဗ္ဗာ). (၂)

အစေတသိကံ ဓမ္မံ ပစ္စယာ စေတသိကော စ အစေတသိကော စ ဓမ္မာ ဥပ္ပဇ္ဇန္တိ ဟေတုပစ္စယာ – စိတ္တံ ပစ္စယာ သမ္ပယုတ္တကာ ခန္ဓာ စိတ္တသမုဋ္ဌာနဉ္စ ရူပံ၊ ဝတ္ထုံ ပစ္စယာ စိတ္တဉ္စ သမ္ပယုတ္တကာ စ ခန္ဓာ (ပဋိသန္ဓိက္ခဏေ ဒွေပိ ကာတဗ္ဗာ). (၃)

၁၀၇. စေတသိကဉ္စ အစေတသိကဉ္စ ဓမ္မံ ပစ္စယာ စေတသိကော ဓမ္မော ဥပ္ပဇ္ဇတိ ဟေတုပစ္စယာ – စေတသိကံ ဧကံ ခန္ဓဉ္စ စိတ္တဉ္စ ပစ္စယာ ဒွေ ခန္ဓာ၊ ဒွေ ခန္ဓေ စ။ပေ။ စေတသိကံ ဧကံ ခန္ဓဉ္စ ဝတ္ထုဉ္စ ပစ္စယာ ဒွေ ခန္ဓာ၊ ဒွေ ခန္ဓေ စ။ပေ။ (ပဋိသန္ဓိက္ခဏေ ဒွေပိ ကာတဗ္ဗာ). (၁)

စေတသိကဉ္စ အစေတသိကဉ္စ ဓမ္မံ ပစ္စယာ အစေတသိကော ဓမ္မော ဥပ္ပဇ္ဇတိ ဟေတုပစ္စယာ – စေတသိကေ ခန္ဓေ စ စိတ္တဉ္စ ပစ္စယာ စိတ္တသမုဋ္ဌာနံ ရူပံ၊ စေတသိကေ ခန္ဓေ စ မဟာဘူတေ စ ပစ္စယာ စိတ္တသမုဋ္ဌာနံ ရူပံ၊ စေတသိကေ ခန္ဓေ စ ဝတ္ထုဉ္စ ပစ္စယာ စိတ္တံ (ပဋိသန္ဓိက္ခဏေ တီဏိပိ ကာတဗ္ဗာ). (၂)

စေတသိကဉ္စ အစေတသိကဉ္စ ဓမ္မံ ပစ္စယာ စေတသိကော စ အစေတသိကော စ ဓမ္မာ ဥပ္ပဇ္ဇန္တိ ဟေတုပစ္စယာ – စေတသိကံ ဧကံ ခန္ဓဉ္စ စိတ္တဉ္စ ပစ္စယာ ဒွေ ခန္ဓာ စိတ္တသမုဋ္ဌာနဉ္စ ရူပံ၊ ဒွေ ခန္ဓေ စ။ပေ။ စေတသိကံ ဧကံ ခန္ဓဉ္စ ဝတ္ထုဉ္စ ပစ္စယာ ဒွေ ခန္ဓာ စိတ္တဉ္စ၊ ဒွေ ခန္ဓေ စ။ပေ။ (ပဋိသန္ဓိက္ခဏေ ဒွေပိ ကာတဗ္ဗာ). (၃)

အာရမ္မဏပစ္စယော

၁၀၈. စေတသိကံ ဓမ္မံ ပစ္စယာ စေတသိကော ဓမ္မော ဥပ္ပဇ္ဇတိ အာရမ္မဏပစ္စယာ။ တီဏိ (ပဋိစ္စသဒိသာ).

အစေတသိကံ ဓမ္မံ ပစ္စယာ အစေတသိကော ဓမ္မော ဥပ္ပဇ္ဇတိ အာရမ္မဏပစ္စယာ – စက္ခာယတနံ ပစ္စယာ စက္ခုဝိညာဏံ။ပေ။ ကာယာယတနံ ပစ္စယာ ကာယဝိညာဏံ၊ ဝတ္ထုံ ပစ္စယာ စိတ္တံ၊ ပဋိသန္ဓိက္ခဏေ။ပေ။. (၁)

အစေတသိကံ ဓမ္မံ ပစ္စယာ စေတသိကော ဓမ္မော ဥပ္ပဇ္ဇတိ အာရမ္မဏပစ္စယာ – စက္ခာယတနံ ပစ္စယာ စက္ခုဝိညာဏသဟဂတာ ခန္ဓာ။ပေ။ ကာယာယတနံ ပစ္စယာ။ပေ။ စိတ္တံ ပစ္စယာ သမ္ပယုတ္တကာ ခန္ဓာ၊ ဝတ္ထုံ ပစ္စယာ စေတသိကာ ခန္ဓာ (ပဋိသန္ဓိက္ခဏေ ဒွေပိ ကာတဗ္ဗာ). (၂)

အစေတသိကံ ဓမ္မံ ပစ္စယာ စေတသိကော စ အစေတသိကော စ ဓမ္မာ ဥပ္ပဇ္ဇန္တိ အာရမ္မဏပစ္စယာ – စက္ခာယတနံ ပစ္စယာ စက္ခုဝိညာဏံ သမ္ပယုတ္တကာ စ ခန္ဓာ။ပေ။ ကာယာယတနံ ပစ္စယာ။ပေ။ ဝတ္ထုံ ပစ္စယာ စိတ္တံ သမ္ပယုတ္တကာ စ ခန္ဓာ (ပဋိသန္ဓိက္ခဏေ ဧကံ). (၃)

၁၀၉. စေတသိကဉ္စ အစေတသိကဉ္စ ဓမ္မံ ပစ္စယာ စေတသိကော ဓမ္မော ဥပ္ပဇ္ဇတိ အာရမ္မဏပစ္စယာ – စက္ခုဝိညာဏသဟဂတံ ဧကံ ခန္ဓဉ္စ စက္ခုဝိညာဏဉ္စ ပစ္စယာ ဒွေ ခန္ဓာ၊ ဒွေ ခန္ဓေ စ။ပေ။ စက္ခုဝိညာဏသဟဂတံ ဧကံ ခန္ဓဉ္စ စက္ခာယတနဉ္စ ပစ္စယာ ဒွေ ခန္ဓာ၊ ဒွေ ခန္ဓေ စ။ပေ။ ကာယဝိညာဏသဟဂတံ။ပေ။ စေတသိကံ ဧကံ ခန္ဓဉ္စ စိတ္တဉ္စ ပစ္စယာ ဒွေ ခန္ဓာ၊ ဒွေ ခန္ဓေ စ။ပေ။ စေတသိကံ ဧကံ ခန္ဓဉ္စ ဝတ္ထုဉ္စ ပစ္စယာ ဒွေ ခန္ဓာ၊ ဒွေ ခန္ဓေ စ။ပေ။ (ပဋိသန္ဓိက္ခဏေ ဒွေ). (၁)

စေတသိကဉ္စ အစေတသိကဉ္စ ဓမ္မံ ပစ္စယာ အစေတသိကော ဓမ္မော ဥပ္ပဇ္ဇတိ အာရမ္မဏပစ္စယာ – စက္ခုဝိညာဏသဟဂတေ ခန္ဓေ စ စက္ခာယတနဉ္စ ပစ္စယာ စက္ခုဝိညာဏံ။ပေ။ ကာယဝိညာဏသဟဂတေ။ပေ။ စေတသိကေ ခန္ဓေ စ ဝတ္ထုဉ္စ ပစ္စယာ စိတ္တံ (ပဋိသန္ဓိက္ခဏေ ဧကံ). (၂)

စေတသိကဉ္စ အစေတသိကဉ္စ ဓမ္မံ ပစ္စယာ စေတသိကော စ အစေတသိကော စ ဓမ္မာ ဥပ္ပဇ္ဇန္တိ အာရမ္မဏပစ္စယာ – စက္ခုဝိညာဏသဟဂတံ ဧကံ ခန္ဓဉ္စ စက္ခာယတနဉ္စ ပစ္စယာ ဒွေ ခန္ဓာ စက္ခုဝိညာဏဉ္စ၊ ဒွေ ခန္ဓေ စ။ပေ။ စေတသိကံ ဧကံ ခန္ဓဉ္စ ဝတ္ထုဉ္စ ပစ္စယာ ဒွေ ခန္ဓာ စိတ္တဉ္စ၊ ဒွေ ခန္ဓေ စ။ပေ။ (ပဋိသန္ဓိက္ခဏေ ဧကံ၊ သံခိတ္တံ). (၃)