၁၀. မဟန္တရဒုကံ

၅၅. သာရမ္မဏဒုကံ

၁. ပဋိစ္စဝါရော

၁. ပစ္စယာနုလောမံ

၁. ဝိဘင်္ဂဝါရော

ဟေတုပစ္စယော

၁. သာရမ္မဏံ ဓမ္မံ ပဋိစ္စ သာရမ္မဏော ဓမ္မော ဥပ္ပဇ္ဇတိ ဟေတုပစ္စယာ – သာရမ္မဏံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓေ။ပေ။ ပဋိသန္ဓိက္ခဏေ။ပေ။. (၁)

သာရမ္မဏံ ဓမ္မံ ပဋိစ္စ အနာရမ္မဏော ဓမ္မော ဥပ္ပဇ္ဇတိ ဟေတုပစ္စယာ – သာရမ္မဏေ ခန္ဓေ ပဋိစ္စ စိတ္တသမုဋ္ဌာနံ ရူပံ၊ ပဋိသန္ဓိက္ခဏေ။ပေ။. (၂)

သာရမ္မဏံ ဓမ္မံ ပဋိစ္စ သာရမ္မဏော စ အနာရမ္မဏော စ ဓမ္မာ ဥပ္ပဇ္ဇန္တိ ဟေတုပစ္စယာ – သာရမ္မဏံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။ ပဋိသန္ဓိက္ခဏေ။ပေ။. (၃)

၂. အနာရမ္မဏံ ဓမ္မံ ပဋိစ္စ အနာရမ္မဏော ဓမ္မော ဥပ္ပဇ္ဇတိ ဟေတုပစ္စယာ – ဧကံ မဟာဘူတံ။ပေ။ မဟာဘူတေ ပဋိစ္စ စိတ္တသမုဋ္ဌာနံ ရူပံ ကဋတ္တာရူပံ ဥပါဒါရူပံ. (၁)

အနာရမ္မဏံ ဓမ္မံ ပဋိစ္စ သာရမ္မဏော ဓမ္မော ဥပ္ပဇ္ဇတိ ဟေတုပစ္စယာ – ပဋိသန္ဓိက္ခဏေ ဝတ္ထုံ ပဋိစ္စ သာရမ္မဏာ ခန္ဓာ. (၂)

အနာရမ္မဏံ ဓမ္မံ ပဋိစ္စ သာရမ္မဏော စ အနာရမ္မဏော စ ဓမ္မော ဥပ္ပဇ္ဇန္တိ ဟေတုပစ္စယာ – ပဋိသန္ဓိက္ခဏေ ဝတ္ထုံ ပဋိစ္စ သာရမ္မဏာ ခန္ဓာ၊ မဟာဘူတေ ပဋိစ္စ ကဋတ္တာရူပံ. (၃)

၃. သာရမ္မဏဉ္စ အနာရမ္မဏဉ္စ ဓမ္မံ ပဋိစ္စ သာရမ္မဏော ဓမ္မော ဥပ္ပဇ္ဇတိ ဟေတုပစ္စယာ – ပဋိသန္ဓိက္ခဏေ သာရမ္မဏံ ဧကံ ခန္ဓဉ္စ ဝတ္ထုဉ္စ ပဋိစ္စ တယော ခန္ဓာ။ပေ။ ဒွေ ခန္ဓေ စ။ပေ။. (၁)

သာရမ္မဏဉ္စ အနာရမ္မဏဉ္စ ဓမ္မံ ပဋိစ္စ အနာရမ္မဏော ဓမ္မော ဥပ္ပဇ္ဇတိ ဟေတုပစ္စယာ – သာရမ္မဏေ ခန္ဓေ စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ၊ ပဋိသန္ဓိက္ခဏေ။ပေ။. (၂)

သာရမ္မဏဉ္စ အနာရမ္မဏဉ္စ ဓမ္မံ ပဋိစ္စ သာရမ္မဏော စ အနာရမ္မဏော စ ဓမ္မာ ဥပ္ပဇ္ဇန္တိ ဟေတုပစ္စယာ – ပဋိသန္ဓိက္ခဏေ သာရမ္မဏံ ဧကံ ခန္ဓဉ္စ ဝတ္ထုဉ္စ ပဋိစ္စ တယော ခန္ဓာ။ပေ။ ဒွေ ခန္ဓေ စ။ပေ။ သာရမ္မဏေ ခန္ဓေ စ မဟာဘူတေ စ ပဋိစ္စ ကဋတ္တာရူပံ. (၃)

အာရမ္မဏပစ္စယော

၄. သာရမ္မဏံ ဓမ္မံ ပဋိစ္စ သာရမ္မဏော ဓမ္မော ဥပ္ပဇ္ဇတိ အာရမ္မဏပစ္စယာ – သာရမ္မဏံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓေ။ပေ။ ပဋိသန္ဓိက္ခဏေ။ပေ။.

အနာရမ္မဏံ ဓမ္မံ ပဋိစ္စ သာရမ္မဏော ဓမ္မော ဥပ္ပဇ္ဇတိ အာရမ္မဏပစ္စယာ – ပဋိသန္ဓိက္ခဏေ ဝတ္ထုံ ပဋိစ္စ သာရမ္မဏာ ခန္ဓာ.

သာရမ္မဏဉ္စ အနာရမ္မဏဉ္စ ဓမ္မံ ပဋိစ္စ သာရမ္မဏော ဓမ္မော ဥပ္ပဇ္ဇတိ အာရမ္မဏပစ္စယာ – ပဋိသန္ဓိက္ခဏေ သာရမ္မဏံ ဧကံ ခန္ဓဉ္စ ဝတ္ထုဉ္စ ပဋိစ္စ တယော ခန္ဓာ။ပေ။ ဒွေ ခန္ဓေ စ။ပေ။ (သံခိတ္တံ).

၁. ပစ္စယာနုလောမံ

၂. သင်္ချာဝါရော

သုဒ္ဓံ

၅. ဟေတုယာ နဝ၊ အာရမ္မဏေ တီဏိ၊ အဓိပတိယာ ပဉ္စ၊ အနန္တရေ တီဏိ၊ သမနန္တရေ တီဏိ၊ သဟဇာတေ နဝ၊ အညမညေ ဆ၊ နိဿယေ နဝ၊ ဥပနိဿယေ တီဏိ၊ ပုရေဇာတေ ဧကံ၊ အာသေဝနေ ဧကံ၊ ကမ္မေ နဝ၊ ဝိပါကေ နဝ၊ အာဟာရေ နဝ၊ ဣန္ဒြိယေ နဝ၊ ဈာနေ နဝ၊ မဂ္ဂေ နဝ၊ သမ္ပယုတ္တေ တီဏိ၊ ဝိပ္ပယုတ္တေ နဝ၊ အတ္ထိယာ နဝ၊ နတ္ထိယာ တီဏိ၊ ဝိဂတေ တီဏိ၊ အဝိဂတေ နဝ.

၂. ပစ္စယပစ္စနီယံ

၁. ဝိဘင်္ဂဝါရော

နဟေတုပစ္စယော

၆. သာရမ္မဏံ ဓမ္မံ ပဋိစ္စ သာရမ္မဏော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ သာရမ္မဏံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓေ။ပေ။ အဟေတုကပဋိသန္ဓိက္ခဏေ။ပေ။ ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ ပဋိစ္စ ဝိစိကိစ္ဆာသဟဂတော ဥဒ္ဓစ္စသဟဂတော မောဟော. (၁)

သာရမ္မဏံ ဓမ္မံ ပဋိစ္စ အနာရမ္မဏော ဓမ္မော ဥပ္ပဇ္ဇတိ နဟေတုပစ္စယာ – အဟေတုကေ သာရမ္မဏေ ခန္ဓေ ပဋိစ္စ စိတ္တသမုဋ္ဌာနံ ရူပံ၊ အဟေတုကပဋိသန္ဓိက္ခဏေ။ပေ။. (၂)

သာရမ္မဏံ ဓမ္မံ ပဋိစ္စ သာရမ္မဏော စ အနာရမ္မဏော စ ဓမ္မာ ဥပ္ပဇ္ဇန္တိ နဟေတုပစ္စယာ – အဟေတုကံ သာရမ္မဏံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။ အဟေတုကပဋိသန္ဓိက္ခဏေ။ပေ။. (၃)

၇. အနာရမ္မဏံ ဓမ္မံ ပဋိစ္စ အနာရမ္မဏော ဓမ္မော ဥပ္ပဇ္ဇတိ နဟေတုပစ္စယာ – ဧကံ မဟာဘူတံ။ပေ။ အသညသတ္တာနံ ဧကံ မဟာဘူတံ။ပေ။. (၁)

အနာရမ္မဏံ ဓမ္မံ ပဋိစ္စ သာရမ္မဏော ဓမ္မော ဥပ္ပဇ္ဇတိ နဟေတုပစ္စယာ – အဟေတုကပဋိသန္ဓိက္ခဏေ ဝတ္ထုံ ပဋိစ္စ သာရမ္မဏာ ခန္ဓာ. (၂)

အနာရမ္မဏံ ဓမ္မံ ပဋိစ္စ သာရမ္မဏော စ အနာရမ္မဏော စ ဓမ္မာ ဥပ္ပဇ္ဇန္တိ နဟေတုပစ္စယာ – အဟေတုကပဋိသန္ဓိက္ခဏေ ဝတ္ထုံ ပဋိစ္စ သာရမ္မဏာ ခန္ဓာ၊ မဟာဘူတေ ပဋိစ္စ ကဋတ္တာရူပံ. (၃)

၈. သာရမ္မဏဉ္စ အနာရမ္မဏဉ္စ ဓမ္မံ ပဋိစ္စ သာရမ္မဏော ဓမ္မော ဥပ္ပဇ္ဇတိ နဟေတုပစ္စယာ – အဟေတုကပဋိသန္ဓိက္ခဏေ သာရမ္မဏံ ဧကံ ခန္ဓဉ္စ ဝတ္ထုဉ္စ ပဋိစ္စ တယော ခန္ဓာ။ပေ။ ဒွေ ခန္ဓေ စ။ပေ။. (၁)

သာရမ္မဏဉ္စ အနာရမ္မဏဉ္စ ဓမ္မံ ပဋိစ္စ အနာရမ္မဏော ဓမ္မော ဥပ္ပဇ္ဇတိ နဟေတုပစ္စယာ – အဟေတုကေ သာရမ္မဏေ ခန္ဓေ စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ၊ အဟေတုကပဋိသန္ဓိက္ခဏေ။ပေ။. (၂)

သာရမ္မဏဉ္စ အနာရမ္မဏဉ္စ ဓမ္မံ ပဋိစ္စ သာရမ္မဏော စ အနာရမ္မဏော စ ဓမ္မာ ဥပ္ပဇ္ဇန္တိ နဟေတုပစ္စယာ – အဟေတုကပဋိသန္ဓိက္ခဏေ သာရမ္မဏံ ဧကံ ခန္ဓဉ္စ ဝတ္ထုဉ္စ ပဋိစ္စ တယော ခန္ဓာ။ပေ။ ဒွေ ခန္ဓေ စ။ပေ။ သာရမ္မဏေ ခန္ဓေ စ မဟာဘူတေ စ ပဋိစ္စ ကဋတ္တာရူပံ. (၃)

နအာရမ္မဏပစ္စယော

၉. သာရမ္မဏံ ဓမ္မံ ပဋိစ္စ အနာရမ္မဏော ဓမ္မော ဥပ္ပဇ္ဇတိ နအာရမ္မဏပစ္စယာ – သာရမ္မဏေ ခန္ဓေ ပဋိစ္စ စိတ္တသမုဋ္ဌာနံ ရူပံ၊ ပဋိသန္ဓိက္ခဏေ။ပေ။. (၁)

အနာရမ္မဏံ ဓမ္မံ ပဋိစ္စ အနာရမ္မဏော ဓမ္မော ဥပ္ပဇ္ဇတိ နအာရမ္မဏပစ္စယာ (ယာဝ အသညသတ္တာ). (၁)

သာရမ္မဏဉ္စ အနာရမ္မဏဉ္စ ဓမ္မံ ပဋိစ္စ အနာရမ္မဏော ဓမ္မော ဥပ္ပဇ္ဇတိ နအာရမ္မဏပစ္စယာ – သာရမ္မဏေ ခန္ဓေ စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ၊ ပဋိသန္ဓိက္ခဏေ။ပေ။ (သံခိတ္တံ). (၁)

၂. ပစ္စယပစ္စနီယံ

၂. သင်္ချာဝါရော

သုဒ္ဓံ

၁၀. နဟေတုယာ နဝ၊ နအာရမ္မဏေ တီဏိ၊ နအဓိပတိယာ နဝ၊ နအနန္တရေ တီဏိ၊ နသမနန္တရေ တီဏိ၊ နအညမညေ တီဏိ၊ နဥပနိဿယေ တီဏိ၊ နပုရေဇာတေ နဝ၊ နပစ္ဆာဇာတေ နဝ၊ နအာသေဝနေ နဝ၊ နကမ္မေ ဒွေ၊ နဝိပါကေ ပဉ္စ၊ နအာဟာရေ ဧကံ၊ နဣန္ဒြိယေ ဧကံ၊ နဈာနေ ဒွေ၊ နမဂ္ဂေ နဝ၊ နသမ္ပယုတ္တေ တီဏိ၊ နဝိပ္ပယုတ္တေ ဒွေ၊ နောနတ္ထိယာ တီဏိ၊ နောဝိဂတေ တီဏိ.

၃. ပစ္စယာနုလောမပစ္စနီယံ

၁၁. ဟေတုပစ္စယာ နအာရမ္မဏေ တီဏိ၊ နအဓိပတိယာ နဝ။ပေ။ နကမ္မေ ဧကံ။ပေ။ နဝိပ္ပယုတ္တေ ဧကံ (သံခိတ္တံ).

၄. ပစ္စယပစ္စနီယာနုလောမံ

၁၂. နဟေတုပစ္စယာ အာရမ္မဏေ တီဏိ။ပေ။ သဟဇာတေ နဝ။ပေ။ မဂ္ဂေ ဧကံ။ပေ။ အဝိဂတေ နဝ.

၂. သဟဇာတဝါရော

(သဟဇာတဝါရောပိ ပဋိစ္စဝါရသဒိသော.)

၃. ပစ္စယဝါရော

၁. ပစ္စယာနုလောမံ

၁. ဝိဘင်္ဂဝါရော

ဟေတုပစ္စယော

၁၃. သာရမ္မဏံ ဓမ္မံ ပစ္စယာ သာရမ္မဏော ဓမ္မော ဥပ္ပဇ္ဇတိ ဟေတုပစ္စယာ။ တီဏိ (ပဋိစ္စသဒိသာ).

၁၄. အနာရမ္မဏံ ဓမ္မံ ပစ္စယာ အနာရမ္မဏော ဓမ္မော ဥပ္ပဇ္ဇတိ ဟေတုပစ္စယာ – ဧကံ မဟာဘူတံ။ပေ။ မဟာဘူတေ ပစ္စယာ စိတ္တသမုဋ္ဌာနံ ရူပံ ကဋတ္တာရူပံ ဥပါဒါရူပံ. (၁)

အနာရမ္မဏံ ဓမ္မံ ပစ္စယာ သာရမ္မဏော ဓမ္မော ဥပ္ပဇ္ဇတိ ဟေတုပစ္စယာ – ဝတ္ထုံ ပစ္စယာ သာရမ္မဏာ ခန္ဓာ၊ ပဋိသန္ဓိက္ခဏေ ဝတ္ထုံ ပစ္စယာ သာရမ္မဏာ ခန္ဓာ. (၂)

အနာရမ္မဏံ ဓမ္မံ ပစ္စယာ သာရမ္မဏော စ အနာရမ္မဏော စ ဓမ္မာ ဥပ္ပဇ္ဇန္တိ ဟေတုပစ္စယာ – ဝတ္ထုံ ပစ္စယာ သာရမ္မဏာ ခန္ဓာ၊ မဟာဘူတေ ပစ္စယာ စိတ္တသမုဋ္ဌာနံ ရူပံ၊ ပဋိသန္ဓိက္ခဏေ ။ပေ။. (၃)

၁၅. သာရမ္မဏဉ္စ အနာရမ္မဏဉ္စ ဓမ္မံ ပစ္စယာ သာရမ္မဏော ဓမ္မော ဥပ္ပဇ္ဇတိ ဟေတုပစ္စယာ – သာရမ္မဏံ ဧကံ ခန္ဓဉ္စ ဝတ္ထုဉ္စ ပစ္စယာ တယော ခန္ဓာ။ပေ။ ဒွေ ခန္ဓေ စ။ပေ။ ပဋိသန္ဓိက္ခဏေ။ပေ။. (၁)

သာရမ္မဏဉ္စ အနာရမ္မဏဉ္စ ဓမ္မံ ပစ္စယာ အနာရမ္မဏော ဓမ္မော ဥပ္ပဇ္ဇတိ ဟေတုပစ္စယာ – သာရမ္မဏေ ခန္ဓေ စ မဟာဘူတေ စ ပစ္စယာ စိတ္တသမုဋ္ဌာနံ ရူပံ၊ ပဋိသန္ဓိက္ခဏေ။ပေ။. (၂)

သာရမ္မဏဉ္စ အနာရမ္မဏဉ္စ ဓမ္မံ ပစ္စယာ သာရမ္မဏော စ အနာရမ္မဏော စ ဓမ္မာ ဥပ္ပဇ္ဇန္တိ ဟေတုပစ္စယာ – သာရမ္မဏံ ဧကံ ခန္ဓဉ္စ ဝတ္ထုဉ္စ ပစ္စယာ တယော ခန္ဓာ။ပေ။ ဒွေ ခန္ဓေ စ။ပေ။ သာရမ္မဏေ ခန္ဓေ စ မဟာဘူတေ စ ပစ္စယာ စိတ္တသမုဋ္ဌာနံ ရူပံ၊ ပဋိသန္ဓိက္ခဏေ။ပေ။. (၃)

အာရမ္မဏပစ္စယော

၁၆. သာရမ္မဏံ ဓမ္မံ ပစ္စယာ သာရမ္မဏော ဓမ္မော ဥပ္ပဇ္ဇတိ အာရမ္မဏပစ္စယာ – သာရမ္မဏံ ဧကံ ခန္ဓံ ပစ္စယာ တယော ခန္ဓာ။ပေ။ ဒွေ ခန္ဓေ။ပေ။ ပဋိသန္ဓိက္ခဏေ။ပေ။. (၁)

အနာရမ္မဏံ ဓမ္မံ ပစ္စယာ သာရမ္မဏော ဓမ္မော ဥပ္ပဇ္ဇတိ အာရမ္မဏပစ္စယာ – စက္ခာယတနံ ပစ္စယာ စက္ခုဝိညာဏံ။ပေ။ ကာယာယတနံ ပစ္စယာ ကာယဝိညာဏံ၊ ဝတ္ထုံ ပစ္စယာ သာရမ္မဏာ ခန္ဓာ၊ ပဋိသန္ဓိက္ခဏေ။ပေ။. (၁)

သာရမ္မဏဉ္စ အနာရမ္မဏဉ္စ ဓမ္မံ ပစ္စယာ သာရမ္မဏော ဓမ္မော ဥပ္ပဇ္ဇတိ အာရမ္မဏပစ္စယာ – စက္ခုဝိညာဏသဟဂတံ ဧကံ ခန္ဓဉ္စ စက္ခာယတနဉ္စ ပစ္စယာ တယော ခန္ဓာ။ပေ။ ဒွေ ခန္ဓေ စ။ပေ။ ကာယဝိညာဏသဟဂတံ။ပေ။ သာရမ္မဏံ ဧကံ ခန္ဓဉ္စ ဝတ္ထုဉ္စ ပစ္စယာ တယော ခန္ဓာ။ပေ။ ဒွေ ခန္ဓေ စ။ပေ။ ပဋိသန္ဓိက္ခဏေ။ပေ။ (သံခိတ္တံ). (၁)

၁. ပစ္စယာနုလောမံ

၂. သင်္ချာဝါရော

သုဒ္ဓံ

၁၇. ဟေတုယာ နဝ၊ အာရမ္မဏေ တီဏိ၊ အဓိပတိယာ နဝ၊ အနန္တရေ တီဏိ၊ သမနန္တရေ တီဏိ၊ သဟဇာတေ နဝ၊ အညမညေ ဆ၊ နိဿယေ နဝ၊ ဥပနိဿယေ တီဏိ၊ ပုရေဇာတေ တီဏိ၊ အာသေဝနေ တီဏိ၊ ကမ္မေ နဝ၊ ဝိပါကေ နဝ၊ အာဟာရေ နဝ၊ ဣန္ဒြိယေ နဝ၊ ဈာနေ နဝ၊ မဂ္ဂေ နဝ၊ သမ္ပယုတ္တေ တီဏိ၊ ဝိပ္ပယုတ္တေ နဝ၊ အတ္ထိယာ နဝ၊ နတ္ထိယာ တီဏိ၊ ဝိဂတေ တီဏိ၊ အဝိဂတေ နဝ.

၂. ပစ္စယပစ္စနီယံ

၁. ဝိဘင်္ဂဝါရော

နဟေတုပစ္စယော

၁၈. သာရမ္မဏံ ဓမ္မံ ပစ္စယာ သာရမ္မဏော ဓမ္မော ဥပ္ပဇ္ဇတိ နဟေတုပစ္စယာ။ တီဏိ (ပဋိစ္စဝါရသဒိသံ).

အနာရမ္မဏံ ဓမ္မံ ပစ္စယာ အနာရမ္မဏော ဓမ္မော ဥပ္ပဇ္ဇတိ နဟေတုပစ္စယာ – ဧကံ မဟာဘူတံ။ပေ။ အသညသတ္တာနံ ဧကံ မဟာဘူတံ။ပေ။. (၁)

အနာရမ္မဏံ ဓမ္မံ ပစ္စယာ သာရမ္မဏော ဓမ္မော ဥပ္ပဇ္ဇတိ နဟေတုပစ္စယာ – စက္ခာယတနံ ပစ္စယာ စက္ခုဝိညာဏံ။ပေ။ ကာယာယတနံ ပစ္စယာ ကာယဝိညာဏံ၊ ဝတ္ထုံ ပစ္စယာ အဟေတုကာ သာရမ္မဏာ ခန္ဓာ၊ ပဋိသန္ဓိက္ခဏေ။ပေ။ ဝတ္ထုံ ပစ္စယာ ဝိစိကိစ္ဆာသဟဂတော ဥဒ္ဓစ္စသဟဂတော မောဟော. (၂)

အနာရမ္မဏံ ဓမ္မံ ပစ္စယာ သာရမ္မဏော စ အနာရမ္မဏော စ ဓမ္မာ ဥပ္ပဇ္ဇန္တိ နဟေတုပစ္စယာ – ဝတ္ထုံ ပစ္စယာ အဟေတုကာ သာရမ္မဏာ ခန္ဓာ၊ မဟာဘူတေ ပစ္စယာ စိတ္တသမုဋ္ဌာနံ ရူပံ၊ ပဋိသန္ဓိက္ခဏေ။ပေ။. (၃)

၁၉. သာရမ္မဏဉ္စ အနာရမ္မဏဉ္စ ဓမ္မံ ပစ္စယာ သာရမ္မဏော ဓမ္မော ဥပ္ပဇ္ဇတိ နဟေတုပစ္စယာ – စက္ခုဝိညာဏသဟဂတံ ဧကံ ခန္ဓဉ္စ စက္ခာယတနဉ္စ ပစ္စယာ တယော ခန္ဓာ။ပေ။ ဒွေ ခန္ဓေ စ။ပေ။ ကာယဝိညာဏသဟဂတံ။ပေ။ အဟေတုကံ သာရမ္မဏံ ဧကံ ခန္ဓဉ္စ ဝတ္ထုဉ္စ ပစ္စယာ တယော ခန္ဓာ။ပေ။ ဒွေ ခန္ဓေ စ။ပေ။ အဟေတုကပဋိသန္ဓိက္ခဏေ။ပေ။ ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ စ ဝတ္ထုဉ္စ ပစ္စယာ ဝိစိကိစ္ဆာသဟဂတော ဥဒ္ဓစ္စသဟဂတော မောဟော. (၁)

သာရမ္မဏဉ္စ အနာရမ္မဏဉ္စ ဓမ္မံ ပစ္စယာ အနာရမ္မဏော ဓမ္မော ဥပ္ပဇ္ဇတိ နဟေတုပစ္စယာ – အဟေတုကေ သာရမ္မဏေ ခန္ဓေ စ မဟာဘူတေ စ ပစ္စယာ စိတ္တသမုဋ္ဌာနံ ရူပံ၊ ပဋိသန္ဓိက္ခဏေ။ပေ။. (၂)

သာရမ္မဏဉ္စ အနာရမ္မဏဉ္စ ဓမ္မံ ပစ္စယာ သာရမ္မဏော စ အနာရမ္မဏော စ ဓမ္မာ ဥပ္ပဇ္ဇန္တိ နဟေတုပစ္စယာ – အဟေတုကံ သာရမ္မဏံ ဧကံ ခန္ဓဉ္စ ဝတ္ထုဉ္စ ပစ္စယာ တယော ခန္ဓာ။ပေ။ ဒွေ ခန္ဓေ စ။ပေ။ အဟေတုကေ သာရမ္မဏေ ခန္ဓေ စ မဟာဘူတေ စ ပစ္စယာ စိတ္တသမုဋ္ဌာနံ ရူပံ၊ အဟေတုကပဋိသန္ဓိက္ခဏေ အဟေတုကံ သာရမ္မဏံ ဧကံ ခန္ဓဉ္စ ဝတ္ထုဉ္စ ပစ္စယာ တယော ခန္ဓာ။ပေ။ ဒွေ ခန္ဓေ စ။ပေ။ အဟေတုကေ သာရမ္မဏေ ခန္ဓေ စ မဟာဘူတေ စ ပစ္စယာ ကဋတ္တာရူပံ။ပေ။ (သံခိတ္တံ). (၃)

၂. ပစ္စယပစ္စနီယံ

၂. သင်္ချာဝါရော

သုဒ္ဓံ

၂၀. နဟေတုယာ နဝ၊ နအာရမ္မဏေ တီဏိ၊ နအဓိပတိယာ နဝ၊ နအနန္တရေ တီဏိ၊ နသမနန္တရေ တီဏိ၊ နအညမညေ တီဏိ၊ နဥပနိဿယေ တီဏိ၊ နပုရေဇာတေ နဝ၊ နပစ္ဆာဇာတေ နဝ၊ နအာသေဝနေ နဝ၊ နကမ္မေ စတ္တာရိ၊ နဝိပါကေ နဝ၊ နအာဟာရေ ဧကံ၊ နဣန္ဒြိယေ ဧကံ၊ နဈာနေ စတ္တာရိ၊ နမဂ္ဂေ နဝ၊ နသမ္ပယုတ္တေ တီဏိ၊ နဝိပ္ပယုတ္တေ ဒွေ၊ နောနတ္ထိယာ တီဏိ၊ နောဝိဂတေ တီဏိ.

၃. ပစ္စယာနုလောမပစ္စနီယံ

၂၁. ဟေတုပစ္စယာ နအာရမ္မဏေ တီဏိ၊ နအဓိပတိယာ နဝ။ပေ။ နကမ္မေ ဧကံ။ပေ။ နဝိပ္ပယုတ္တေ ဧကံ (သံခိတ္တံ).

၄. ပစ္စယပစ္စနီယာနုလောမံ

၂၂. နဟေတုပစ္စယာ အာရမ္မဏေ တီဏိ၊ အနန္တရေ တီဏိ၊ သမနန္တရေ တီဏိ၊ သဟဇာတေ နဝ။ပေ။ မဂ္ဂေ တီဏိ။ပေ။ အဝိဂတေ နဝ.

၄. နိဿယဝါရော

(နိဿယဝါရော ပစ္စယဝါရသဒိသော.)

၅. သံသဋ္ဌဝါရော

၁-၄. ပစ္စယာနုလောမာဒိ

၂၃. သာရမ္မဏံ ဓမ္မံ သံသဋ္ဌော သာရမ္မဏော ဓမ္မော ဥပ္ပဇ္ဇတိ ဟေတုပစ္စယာ – သာရမ္မဏံ ဧကံ ခန္ဓံ သံသဋ္ဌာ တယော ခန္ဓာ။ပေ။ ဒွေ ခန္ဓေ သံသဋ္ဌာ ဒွေ ခန္ဓာ၊ ပဋိသန္ဓိက္ခဏေ။ပေ။.

၂၄. ဟေတုယာ ဧကံ၊ အာရမ္မဏေ ဧကံ၊ အဓိပတိယာ ဧကံ (သဗ္ဗတ္ထ ဧကံ)၊ အဝိဂတေ ဧကံ.

အနုလောမံ.

၂၅. သာရမ္မဏံ ဓမ္မံ သံသဋ္ဌော သာရမ္မဏော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ သာရမ္မဏံ ဧကံ ခန္ဓံ သံသဋ္ဌာ တယော ခန္ဓာ။ပေ။ ဒွေ ခန္ဓေ။ပေ။ ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ သံသဋ္ဌော ဝိစိကိစ္ဆာသဟဂတော ဥဒ္ဓစ္စသဟဂတော မောဟော (သံခိတ္တံ).

၂၆. နဟေတုယာ ဧကံ၊ နအဓိပတိယာ ဧကံ၊ နပုရေဇာတေ ဧကံ၊ နပစ္ဆာဇာတေ ဧကံ၊ နအာသေဝနေ ဧကံ၊ နကမ္မေ ဧကံ၊ နဝိပါကေ ဧကံ၊ နဈာနေ ဧကံ၊ နမဂ္ဂေ ဧကံ၊ နဝိပ္ပယုတ္တေ ဧကံ.

ပစ္စနီယံ.

၆. သမ္ပယုတ္တဝါရော

(ဧဝံ ဣတရေ ဒွေ ဂဏနာပိ သမ္ပယုတ္တဝါရာပိ ကာတဗ္ဗာ.)

၇. ပဉှာဝါရော

၁. ပစ္စယာနုလောမံ

၁. ဝိဘင်္ဂဝါရော

ဟေတုပစ္စယော

၂၇. သာရမ္မဏော ဓမ္မော သာရမ္မဏဿ ဓမ္မဿ ဟေတုပစ္စယေန ပစ္စယော – သာရမ္မဏာ ဟေတူ သမ္ပယုတ္တကာနံ ခန္ဓာနံ ဟေတုပစ္စယေန ပစ္စယော၊ ပဋိသန္ဓိက္ခဏေ။ပေ။. (၁)

သာရမ္မဏော ဓမ္မော အနာရမ္မဏဿ ဓမ္မဿ ဟေတုပစ္စယေန ပစ္စယော – သာရမ္မဏာ ဟေတူ စိတ္တသမုဋ္ဌာနာနံ ရူပါနံ ဟေတုပစ္စယေန ပစ္စယော၊ ပဋိသန္ဓိက္ခဏေ။ပေ။. (၂)

သာရမ္မဏော ဓမ္မော သာရမ္မဏဿ စ အနာရမ္မဏဿ စ ဓမ္မဿ ဟေတုပစ္စယေန ပစ္စယော – သာရမ္မဏာ ဟေတူ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော၊ ပဋိသန္ဓိက္ခဏေ။ပေ။. (၃)

အာရမ္မဏပစ္စယော

၂၈. သာရမ္မဏော ဓမ္မော သာရမ္မဏဿ ဓမ္မဿ အာရမ္မဏပစ္စယေန ပစ္စယော – ဒါနံ။ပေ။ သီလံ။ပေ။ ဥပေါသထကမ္မံ ကတွာ တံ ပစ္စဝေက္ခတိ အဿာဒေတိ အဘိနန္ဒတိ၊ တံ အာရဗ္ဘ ရာဂေါ ဥပ္ပဇ္ဇတိ။ပေ။ ဒေါမနဿံ ဥပ္ပဇ္ဇတိ၊ ပုဗ္ဗေ သုစိဏ္ဏာနိ။ပေ။ ဈာနာ။ပေ။ အရိယာ မဂ္ဂါ ဝုဋ္ဌဟိတွာ မဂ္ဂံ ပစ္စဝေက္ခန္တိ၊ ဖလံ ပစ္စဝေက္ခန္တိ၊ ပဟီနေ ကိလေသေ။ပေ။ ဝိက္ခမ္ဘိတေ ကိလေသေ။ပေ။ ပုဗ္ဗေ သမုဒါစိဏ္ဏေ ကိလေသေ ဇာနန္တိ၊ သာရမ္မဏေ ခန္ဓေ အနိစ္စတော။ပေ။ ဒေါမနဿံ ဥပ္ပဇ္ဇတိ၊ စေတောပရိယဉာဏေန သာရမ္မဏစိတ္တသမင်္ဂိဿ စိတ္တံ ဇာနာတိ၊ အာကာသာနဉ္စာယတနံ ဝိညာဏဉ္စာယတနဿ။ပေ။ အာကိဉ္စညာယတနံ နေဝသညာနာသညာယတနဿ။ပေ။ သာရမ္မဏာ ခန္ဓာ ဣဒ္ဓိဝိဓဉာဏဿ၊ စေတောပရိယဉာဏဿ၊ ပုဗ္ဗေနိဝါသာနုဿတိဉာဏဿ၊ ယထာကမ္မူပဂဉာဏဿ၊ အနာဂတံသဉာဏဿ၊ အာဝဇ္ဇနာယ အာရမ္မဏပစ္စယေန ပစ္စယော. (၁)

၂၉. အနာရမ္မဏော ဓမ္မော သာရမ္မဏဿ ဓမ္မဿ အာရမ္မဏပစ္စယေန ပစ္စယော – အရိယာ နိဗ္ဗာနံ ပစ္စဝေက္ခန္တိ၊ နိဗ္ဗာနံ ဂေါတြဘုဿ၊ ဝေါဒါနဿ၊ မဂ္ဂဿ၊ ဖလဿ၊ အာဝဇ္ဇနာယ အာရမ္မဏပစ္စယေန ပစ္စယော၊ စက္ခုံ။ပေ။ ဝတ္ထုံ အနိစ္စတော။ပေ။ ဒေါမနဿံ ဥပ္ပဇ္ဇတိ၊ ဒိဗ္ဗေန စက္ခုနာ ရူပံ ပဿတိ၊ ဒိဗ္ဗာယ သောတဓာတုယာ သဒ္ဒံ သုဏာတိ. ရူပါယတနံ စက္ခုဝိညာဏဿ။ပေ။ ဖောဋ္ဌဗ္ဗာယတနံ ကာယဝိညာဏဿ။ပေ။ အနာရမ္မဏာ ခန္ဓာ ဣဒ္ဓိဝိဓဉာဏဿ၊ ပုဗ္ဗေနိဝါသာနုဿတိဉာဏဿ၊ အနာဂတံသဉာဏဿ၊ အာဝဇ္ဇနာယ အာရမ္မဏပစ္စယေန ပစ္စယော. (၁)

အဓိပတိပစ္စယော

၃၀. သာရမ္မဏော ဓမ္မော သာရမ္မဏဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ. အာရမ္မဏာဓိပတိ – ဒါနံ။ပေ။ သီလံ။ပေ။ ဥပေါသထကမ္မံ ကတွာ တံ ဂရုံ ကတွာ ပစ္စဝေက္ခတိ အဿာဒေတိ အဘိနန္ဒတိ၊ တံ ဂရုံ ကတွာ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ၊ ပုဗ္ဗေ သုစိဏ္ဏာနိ။ပေ။ ဈာနာ ဝုဋ္ဌဟိတွာ ဈာနံ။ပေ။ အရိယာ မဂ္ဂါ ဝုဋ္ဌဟိတွာ မဂ္ဂံ ဂရုံ။ပေ။ ဖလံ ဂရုံ။ပေ။ သာရမ္မဏေ ခန္ဓေ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ. သဟဇာတာဓိပတိ – သာရမ္မဏာဓိပတိ သမ္ပယုတ္တကာနံ ခန္ဓာနံ အဓိပတိပစ္စယေန ပစ္စယော. (၁)

သာရမ္မဏော ဓမ္မော အနာရမ္မဏဿ ဓမ္မဿ အဓိပတိပစ္စယေန ပစ္စယော. သဟဇာတာဓိပတိ – သာရမ္မဏာဓိပတိ စိတ္တသမုဋ္ဌာနာနံ ရူပါနံ အဓိပတိပစ္စယေန ပစ္စယော. (၂)

သာရမ္မဏော ဓမ္မော သာရမ္မဏဿ စ အနာရမ္မဏဿ စ ဓမ္မဿ အဓိပတိပစ္စယေန ပစ္စယော. သဟဇာတာဓိပတိ – သာရမ္မဏာဓိပတိ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ အဓိပတိပစ္စယေန ပစ္စယော. (၃)

၃၁. အနာရမ္မဏော ဓမ္မော သာရမ္မဏဿ ဓမ္မဿ အဓိပတိပစ္စယေန ပစ္စယော. အာရမ္မဏာဓိပတိ – အရိယာ နိဗ္ဗာနံ ဂရုံ ကတွာ ပစ္စဝေက္ခန္တိ၊ နိဗ္ဗာနံ ဂေါတြဘုဿ၊ ဝေါဒါနဿ၊ မဂ္ဂဿ၊ ဖလဿ၊ အဓိပတိပစ္စယေန ပစ္စယော၊ စက္ခုံ။ပေ။ ဝတ္ထုံ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ. (၁)

အနန္တရပစ္စယာဒိ

၃၂. သာရမ္မဏော ဓမ္မော သာရမ္မဏဿ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ သာရမ္မဏာ။ပေ။ ဖလသမာပတ္တိယာ အနန္တရပစ္စယေန ပစ္စယော။ သမနန္တရပစ္စယေန ပစ္စယော။ ဧကံ။ သဟဇာတပစ္စယေန ပစ္စယော။ သတ္တ (ပဋိစ္စဝါရေ သဟဇာတသဒိသာ)။ အညမညပစ္စယေန ပစ္စယော။ ဆ (ပဋိစ္စဝါရေ အညမညသဒိသံ)။ နိဿယပစ္စယေန ပစ္စယော။ သတ္တ (ပစ္စယဝါရေ နိဿယသဒိသော).

ဥပနိဿယပစ္စယော

၃၃. သာရမ္မဏော ဓမ္မော သာရမ္မဏဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ပေ။. ပကတူပနိဿယော – သဒ္ဓံ ဥပနိဿာယ ဒါနံ ဒေတိ။ပေ။ မာနံ ဇပ္ပေတိ၊ ဒိဋ္ဌိံ ဂဏှာတိ. သီလံ။ပေ။ ပညံ၊ ရာဂံ။ပေ။ ပတ္ထနံ၊ ကာယိကံ သုခံ။ ကာယိကံ ဒုက္ခံ ဥပနိဿာယ ဒါနံ ဒေတိ။ပေ။ သမာပတ္တိံ ဥပ္ပါဒေတိ၊ ပါဏံ ဟနတိ။ပေ။ သံဃံ ဘိန္ဒတိ. သဒ္ဓါ။ပေ။ ပညာ၊ ရာဂေါ။ပေ။ ပတ္ထနာ၊ ကာယိကံ သုခံ။ ကာယိကံ ဒုက္ခံ သဒ္ဓါယ။ပေ။ ပညာယ၊ ရာဂဿ။ပေ။ ပတ္ထနာယ၊ ကာယိကဿ သုခဿ၊ ကာယိကဿ ဒုက္ခဿ၊ မဂ္ဂဿ၊ ဖလသမာပတ္တိယာ ဥပနိဿယပစ္စယေန ပစ္စယော. (၁)

အနာရမ္မဏော ဓမ္မော သာရမ္မဏဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ ပကတူပနိဿယော။ပေ။. ပကတူပနိဿယော – ဥတုံ၊ ဘောဇနံ၊ သေနာသနံ ဥပနိဿာယ ဒါနံ ဒေတိ။ပေ။ သမာပတ္တိံ ဥပ္ပါဒေတိ၊ ပါဏံ ဟနတိ။ပေ။ သံဃံ ဘိန္ဒတိ. ဥတု။ ဘောဇနံ။ သေနာသနံ သဒ္ဓါယ။ပေ။ ပတ္ထနာယ၊ ကာယိကဿ သုခဿ၊ ကာယိကဿ ဒုက္ခဿ၊ မဂ္ဂဿ၊ ဖလသမာပတ္တိယာ ဥပနိဿယပစ္စယေန ပစ္စယော. (၁)

ပုရေဇာတပစ္စယော

၃၄. အနာရမ္မဏော ဓမ္မော သာရမ္မဏဿ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ. အာရမ္မဏပုရေဇာတံ – စက္ခုံ။ပေ။ ဝတ္ထုံ အနိစ္စတော။ပေ။ ဒေါမနဿံ ဥပ္ပဇ္ဇတိ၊ ဒိဗ္ဗေန စက္ခုနာ ရူပံ ပဿတိ၊ ဒိဗ္ဗာယ သောတဓာတုယာ သဒ္ဒံ သုဏာတိ. ရူပါယတနံ စက္ခုဝိညာဏဿ။ပေ။ ဖောဋ္ဌဗ္ဗာယတနံ ကာယဝိညာဏဿ။ပေ။. ဝတ္ထုပုရေဇာတံ – စက္ခာယတနံ စက္ခုဝိညာဏဿ။ပေ။ ကာယာယတနံ ကာယဝိညာဏဿ။ပေ။ ဝတ္ထု သာရမ္မဏာနံ ခန္ဓာနံ ပုရေဇာတပစ္စယေန ပစ္စယော. (၁)

ပစ္ဆာဇာတာသေဝနပစ္စယာ

၃၅. သာရမ္မဏော ဓမ္မော အနာရမ္မဏဿ ဓမ္မဿ ပစ္ဆာဇာတပစ္စယေန ပစ္စယော။ ဧကံ.

သာရမ္မဏော ဓမ္မော သာရမ္မဏဿ ဓမ္မဿ အာသေဝနပစ္စယေန ပစ္စယော။ ဧကံ.

ကမ္မပစ္စယော

၃၆. သာရမ္မဏော ဓမ္မော သာရမ္မဏဿ ဓမ္မဿ ကမ္မပစ္စယေန ပစ္စယော – သဟဇာတာ၊ နာနာက္ခဏိကာ. သဟဇာတာ – သာရမ္မဏာ စေတနာ သမ္ပယုတ္တကာနံ ခန္ဓာနံ ကမ္မပစ္စယေန ပစ္စယော၊ ပဋိသန္ဓိက္ခဏေ။ပေ။. နာနာက္ခဏိကာ – သာရမ္မဏာ စေတနာ ဝိပါကာနံ ခန္ဓာနံ ကမ္မပစ္စယေန ပစ္စယော. (၁)

သာရမ္မဏော ဓမ္မော အနာရမ္မဏဿ ဓမ္မဿ ကမ္မပစ္စယေန ပစ္စယော – သဟဇာတာ၊ နာနာက္ခဏိကာ. သဟဇာတာ – သာရမ္မဏာ စေတနာ စိတ္တသမုဋ္ဌာနာနံ ရူပါနံ ကမ္မပစ္စယေန ပစ္စယော၊ ပဋိသန္ဓိက္ခဏေ။ပေ။. နာနာက္ခဏိကာ – သာရမ္မဏာ စေတနာ ကဋတ္တာရူပါနံ ကမ္မပစ္စယေန ပစ္စယော. (၂)

သာရမ္မဏော ဓမ္မော သာရမ္မဏဿ စ အနာရမ္မဏဿ စ ဓမ္မဿ ကမ္မပစ္စယေန ပစ္စယော – သဟဇာတာ၊ နာနာက္ခဏိကာ. သဟဇာတာ – သာရမ္မဏာ စေတနာ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ကမ္မပစ္စယေန ပစ္စယော၊ ပဋိသန္ဓိက္ခဏေ။ပေ။. နာနာက္ခဏိကာ – သာရမ္မဏာ စေတနာ ဝိပါကာနံ ခန္ဓာနံ ကဋတ္တာ စ ရူပါနံ ကမ္မပစ္စယေန ပစ္စယော. (၃)

ဝိပါက-အာဟာရပစ္စယာ

၃၇. သာရမ္မဏော ဓမ္မော သာရမ္မဏဿ ဓမ္မဿ ဝိပါကပစ္စယေန ပစ္စယော။ တီဏိ.

သာရမ္မဏော ဓမ္မော သာရမ္မဏဿ ဓမ္မဿ အာဟာရပစ္စယေန ပစ္စယော။ တီဏိ.

အနာရမ္မဏော ဓမ္မော အနာရမ္မဏဿ ဓမ္မဿ အာဟာရပစ္စယေန ပစ္စယော – ကဗဠီကာရော အာဟာရော ဣမဿ ကာယဿ အာဟာရပစ္စယေန ပစ္စယော. (၁)

ဣန္ဒြိယပစ္စယော

၃၈. သာရမ္မဏော ဓမ္မော သာရမ္မဏဿ ဓမ္မဿ ဣန္ဒြိယပစ္စယေန ပစ္စယော။ တီဏိ.

အနာရမ္မဏော ဓမ္မော အနာရမ္မဏဿ ဓမ္မဿ ဣန္ဒြိယပစ္စယေန ပစ္စယော – ရူပဇီဝိတိန္ဒြိယံ ကဋတ္တာရူပါနံ ဣန္ဒြိယပစ္စယေန ပစ္စယော. (၁)

အနာရမ္မဏော ဓမ္မော သာရမ္မဏဿ ဓမ္မဿ ဣန္ဒြိယပစ္စယေန ပစ္စယော – စက္ခုန္ဒြိယံ စက္ခုဝိညာဏဿ။ပေ။ ကာယိန္ဒြိယံ ကာယဝိညာဏဿ ဣန္ဒြိယပစ္စယေန ပစ္စယော. (၁)

သာရမ္မဏော စ အနာရမ္မဏော စ ဓမ္မာ သာရမ္မဏဿ ဓမ္မဿ ဣန္ဒြိယပစ္စယေန ပစ္စယော – စက္ခုန္ဒြိယဉ္စ စက္ခုဝိညာဏဉ္စ စက္ခုဝိညာဏသဟဂတာနံ ခန္ဓာနံ ဣန္ဒြိယပစ္စယေန ပစ္စယော။ပေ။ ကာယိန္ဒြိယဉ္စ ကာယဝိညာဏဉ္စ ကာယဝိညာဏသဟဂတာနံ ခန္ဓာနံ ဣန္ဒြိယပစ္စယေန ပစ္စယော. (၁)

ဈာနပစ္စယာဒိ

၃၉. သာရမ္မဏော ဓမ္မော သာရမ္မဏဿ ဓမ္မဿ ဈာနပစ္စယေန ပစ္စယော။ တီဏိ၊ မဂ္ဂပစ္စယေန ပစ္စယော။ တီဏိ၊ သမ္ပယုတ္တပစ္စယေန ပစ္စယော။ ဧကံ.

ဝိပ္ပယုတ္တပစ္စယော

၄၀. သာရမ္မဏော ဓမ္မော အနာရမ္မဏဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပစ္ဆာဇာတံ (သံခိတ္တံ). (၁)

အနာရမ္မဏော ဓမ္မော သာရမ္မဏဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပုရေဇာတံ. သဟဇာတံ – ပဋိသန္ဓိက္ခဏေ ဝတ္ထု သာရမ္မဏာနံ ခန္ဓာနံ ဝိပ္ပယုတ္တပစ္စယေန ပစ္စယော. ပုရေဇာတံ စက္ခာယတနံ စက္ခုဝိညာဏဿ။ပေ။ ကာယာယတနံ ကာယဝိညာဏဿ ဝိပ္ပယုတ္တပစ္စယေန ပစ္စယော၊ ဝတ္ထု သာရမ္မဏာနံ ခန္ဓာနံ ဝိပ္ပယုတ္တပစ္စယေန ပစ္စယော. (၁)

အတ္ထိပစ္စယော

၄၁. သာရမ္မဏော ဓမ္မော သာရမ္မဏဿ ဓမ္မဿ အတ္ထိပစ္စယေန ပစ္စယော – သာရမ္မဏော ဧကော ခန္ဓော တိဏ္ဏန္နံ ခန္ဓာနံ အတ္ထိပစ္စယေန ပစ္စယော။ပေ။ ဒွေ ခန္ဓာ။ပေ။ ပဋိသန္ဓိက္ခဏေ။ပေ။. (၁)

သာရမ္မဏော ဓမ္မော အနာရမ္မဏဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပစ္ဆာဇာတံ (သံခိတ္တံ). (၂)

သာရမ္မဏော ဓမ္မော သာရမ္မဏဿ စ အနာရမ္မဏဿ စ ဓမ္မဿ အတ္ထိပစ္စယေန ပစ္စယော (ပဋိစ္စသဒိသံ). (၃)

၄၂. အနာရမ္မဏော ဓမ္မော အနာရမ္မဏဿ ဓမ္မဿ အတ္ထိပစ္စယေန ပစ္စယော – သဟဇာတံ၊ အာဟာရံ၊ ဣန္ဒြိယံ. သဟဇာတံ – ဧကံ မဟာဘူတံ။ပေ။ (ယာဝ အသညသတ္တာ). (၁)

အနာရမ္မဏော ဓမ္မော သာရမ္မဏဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ. သဟဇာတံ – ပဋိသန္ဓိက္ခဏေ ဝတ္ထု သာရမ္မဏာနံ ခန္ဓာနံ အတ္ထိပစ္စယေန ပစ္စယော. ပုရေဇာတံ – စက္ခုံ။ပေ။ ဝတ္ထုံ အနိစ္စတော။ပေ။ ဒေါမနဿံ ဥပ္ပဇ္ဇတိ၊ ဒိဗ္ဗေန စက္ခုနာ ရူပံ ပဿတိ၊ ဒိဗ္ဗာယ သောတဓာတုယာ သဒ္ဒံ သုဏာတိ. ရူပါယတနံ စက္ခုဝိညာဏဿ။ပေ။ ဖောဋ္ဌဗ္ဗာယတနံ ကာယဝိညာဏဿ။ပေ။ စက္ခာယတနံ စက္ခုဝိညာဏဿ။ပေ။ ကာယာယတနံ ကာယဝိညာဏဿ။ပေ။ ဝတ္ထု သာရမ္မဏာနံ ခန္ဓာနံ အတ္ထိပစ္စယေန ပစ္စယော. (၂)

၄၃. သာရမ္မဏော စ အနာရမ္မဏော စ ဓမ္မာ သာရမ္မဏဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ. သဟဇာတော – စက္ခုဝိညာဏသဟဂတော ဧကော ခန္ဓော စ စက္ခာယတနဉ္စ တိဏ္ဏန္နံ ခန္ဓာနံ အတ္ထိပစ္စယေန ပစ္စယော။ပေ။ ဒွေ ခန္ဓာ စ။ပေ။ ကာယဝိညာဏသဟဂတော ဧကော ခန္ဓော စ ကာယာယတနဉ္စ တိဏ္ဏန္နံ ခန္ဓာနံ အတ္ထိပစ္စယေန ပစ္စယော။ပေ။ ဒွေ ခန္ဓာ စ။ပေ။ သာရမ္မဏော ဧကော ခန္ဓော စ ဝတ္ထု စ တိဏ္ဏန္နံ ခန္ဓာနံ အတ္ထိပစ္စယေန ပစ္စယော။ပေ။ ဒွေ ခန္ဓာ စ။ပေ။ ပဋိသန္ဓိက္ခဏေ။ပေ။. (၁)

သာရမ္မဏော စ အနာရမ္မဏော စ ဓမ္မာ အနာရမ္မဏဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပစ္ဆာဇာတံ၊ အာဟာရံ၊ ဣန္ဒြိယံ. သဟဇာတာ – သာရမ္မဏာ ခန္ဓာ စ မဟာဘူတာ စ စိတ္တသမုဋ္ဌာနာနံ ရူပါနံ အတ္ထိပစ္စယေန ပစ္စယော၊ ပဋိသန္ဓိက္ခဏေ။ပေ။. ပစ္ဆာဇာတာ – သာရမ္မဏာ ခန္ဓာ စ ကဗဠီကာရော အာဟာရော စ ဣမဿ ကာယဿ အတ္ထိပစ္စယေန ပစ္စယော. ပစ္ဆာဇာတာ – သာရမ္မဏာ ခန္ဓာ စ ရူပဇီဝိတိန္ဒြိယဉ္စ ကဋတ္တာရူပါနံ အတ္ထိပစ္စယေန ပစ္စယော. (၂)

၁. ပစ္စယာနုလောမံ