၁. ဝိဘင်္ဂဝါရော

နဟေတုပစ္စယော

၉၉. စေတသိကံ ဓမ္မံ ပဋိစ္စ စေတသိကော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ စေတသိကံ ဧကံ ခန္ဓံ ပဋိစ္စ ဒွေ ခန္ဓာ၊ ဒွေ ခန္ဓေ။ပေ။ အဟေတုကပဋိသန္ဓိက္ခဏေ။ပေ။ ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ ပဋိစ္စ ဝိစိကိစ္ဆာသဟဂတော ဥဒ္ဓစ္စသဟဂတော မောဟော. (၁)

စေတသိကံ ဓမ္မံ ပဋိစ္စ အစေတသိကော ဓမ္မော ဥပ္ပဇ္ဇတိ နဟေတုပစ္စယာ – အဟေတုကေ စေတသိကေ ခန္ဓေ ပဋိစ္စ စိတ္တဉ္စ စိတ္တသမုဋ္ဌာနဉ္စ ရူပံ၊ အဟေတုကပဋိသန္ဓိက္ခဏေ။ပေ။. (၂)

စေတသိကံ ဓမ္မံ ပဋိစ္စ စေတသိကော စ အစေတသိကော စ ဓမ္မာ ဥပ္ပဇ္ဇန္တိ နဟေတုပစ္စယာ – အဟေတုကံ စေတသိကံ ဧကံ ခန္ဓံ ပဋိစ္စ ဒွေ ခန္ဓာ စိတ္တဉ္စ စိတ္တသမုဋ္ဌာနဉ္စ ရူပံ၊ ဒွေ ခန္ဓေ။ပေ။ အဟေတုကပဋိသန္ဓိက္ခဏေ ။ပေ။. (၃)

၁၀၀. အစေတသိကံ ဓမ္မံ ပဋိစ္စ အစေတသိကော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ စိတ္တံ ပဋိစ္စ စိတ္တသမုဋ္ဌာနံ ရူပံ၊ အဟေတုကပဋိသန္ဓိက္ခဏေ စိတ္တံ ပဋိစ္စ ကဋတ္တာရူပံ၊ စိတ္တံ ပဋိစ္စ ဝတ္ထု၊ ဝတ္ထုံ ပဋိစ္စ စိတ္တံ၊ ဧကံ မဟာဘူတံ။ပေ။ အသညသတ္တာနံ ဧကံ မဟာဘူတံ။ပေ။. (၁)

အစေတသိကံ ဓမ္မံ ပဋိစ္စ စေတသိကော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ စိတ္တံ ပဋိစ္စ သမ္ပယုတ္တကာ ခန္ဓာ၊ အဟေတုကပဋိသန္ဓိက္ခဏေ စိတ္တံ ပဋိစ္စ သမ္ပယုတ္တကာ ခန္ဓာ၊ အဟေတုကပဋိသန္ဓိက္ခဏေ ဝတ္ထုံ ပဋိစ္စ စေတသိကာ ခန္ဓာ၊ ဝိစိကိစ္ဆာသဟဂတံ ဥဒ္ဓစ္စသဟဂတံ စိတ္တံ ပဋိစ္စ ဝိစိကိစ္ဆာသဟဂတော ဥဒ္ဓစ္စသဟဂတော မောဟော. (၂)

အစေတသိကံ ဓမ္မံ ပဋိစ္စ စေတသိကော စ အစေတသိကော စ ဓမ္မာ ဥပ္ပဇ္ဇန္တိ နဟေတုပစ္စယာ – အဟေတုကံ စိတ္တံ ပဋိစ္စ သမ္ပယုတ္တကာ ခန္ဓာ စိတ္တသမုဋ္ဌာနဉ္စ ရူပံ၊ အဟေတုကပဋိသန္ဓိက္ခဏေ စိတ္တံ ပဋိစ္စ သမ္ပယုတ္တကာ ခန္ဓာ ကဋတ္တာ စ ရူပံ၊ အဟေတုကပဋိသန္ဓိက္ခဏေ ဝတ္ထုံ ပဋိစ္စ စိတ္တဉ္စ သမ္ပယုတ္တကာ စ ခန္ဓာ. (၃)

၁၀၁. စေတသိကဉ္စ အစေတသိကဉ္စ ဓမ္မံ ပဋိစ္စ စေတသိကော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ စေတသိကံ ဧကံ ခန္ဓဉ္စ စိတ္တဉ္စ ပဋိစ္စ ဒွေ ခန္ဓာ၊ ဒွေ ခန္ဓေ စ။ပေ။ အဟေတုကပဋိသန္ဓိက္ခဏေ စေတသိကံ ဧကံ ခန္ဓဉ္စ စိတ္တဉ္စ ပဋိစ္စ ဒွေ ခန္ဓာ၊ ဒွေ ခန္ဓေ စ။ပေ။ အဟေတုကပဋိသန္ဓိက္ခဏေ စေတသိကံ ဧကံ ခန္ဓဉ္စ ဝတ္ထုဉ္စ ပဋိစ္စ ဒွေ ခန္ဓာ၊ ဒွေ ခန္ဓေ စ။ပေ။ ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ စ စိတ္တဉ္စ ပဋိစ္စ ဝိစိကိစ္ဆာသဟဂတော ဥဒ္ဓစ္စသဟဂတော မောဟော. (၁)

စေတသိကဉ္စ အစေတသိကဉ္စ ဓမ္မံ ပဋိစ္စ အစေတသိကော ဓမ္မော ဥပ္ပဇ္ဇတိ နဟေတုပစ္စယာ – အဟေတုကေ စေတသိကေ ခန္ဓေ စ စိတ္တဉ္စ ပဋိစ္စ စိတ္တသမုဋ္ဌာနံ ရူပံ၊ အဟေတုကေ စေတသိကေ ခန္ဓေ စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ၊ အဟေတုကပဋိသန္ဓိက္ခဏေ စေတသိကေ ခန္ဓေ စ စိတ္တဉ္စ ပဋိစ္စ ကဋတ္တာရူပံ၊ အဟေတုကပဋိသန္ဓိက္ခဏေ စေတသိကေ ခန္ဓေ စ မဟာဘူတေ စ ပဋိစ္စ ကဋတ္တာရူပံ၊ အဟေတုကပဋိသန္ဓိက္ခဏေ စေတသိကေ ခန္ဓေ စ ဝတ္ထုဉ္စ ပဋိစ္စ စိတ္တံ. (၂)

စေတသိကဉ္စ အစေတသိကဉ္စ ဓမ္မံ ပဋိစ္စ စေတသိကော စ အစေတသိကော စ ဓမ္မာ ဥပ္ပဇ္ဇန္တိ နဟေတုပစ္စယာ – အဟေတုကံ စေတသိကံ ဧကံ ခန္ဓဉ္စ စိတ္တဉ္စ ပဋိစ္စ ဒွေ ခန္ဓာ စိတ္တသမုဋ္ဌာနဉ္စ ရူပံ၊ အဟေတုကပဋိသန္ဓိက္ခဏေ စေတသိကံ ဧကံ ခန္ဓဉ္စ စိတ္တဉ္စ ပဋိစ္စ ဒွေ ခန္ဓာ ကဋတ္တာ စ ရူပံ၊ အဟေတုကပဋိသန္ဓိက္ခဏေ စေတသိကံ ဧကံ ခန္ဓဉ္စ ဝတ္ထုဉ္စ ပဋိစ္စ ဒွေ ခန္ဓာ စိတ္တဉ္စ၊ ဒွေ ခန္ဓေ စ။ပေ။. (၃)

နအာရမ္မဏပစ္စယော

၁၀၂. စေတသိကံ ဓမ္မံ ပဋိစ္စ အစေတသိကော ဓမ္မော ဥပ္ပဇ္ဇတိ နအာရမ္မဏပစ္စယာ – စေတသိကေ ခန္ဓေ ပဋိစ္စ စိတ္တသမုဋ္ဌာနံ ရူပံ၊ ပဋိသန္ဓိက္ခဏေ။ပေ။. (၁)

အစေတသိကံ ဓမ္မံ ပဋိစ္စ အစေတသိကော ဓမ္မော ဥပ္ပဇ္ဇတိ နအာရမ္မဏပစ္စယာ – စိတ္တံ ပဋိစ္စ စိတ္တသမုဋ္ဌာနံ ရူပံ၊ ပဋိသန္ဓိက္ခဏေ ။ပေ။ (ယာဝ အသညသတ္တာ). (၁)

စေတသိကဉ္စ အစေတသိကဉ္စ ဓမ္မံ ပဋိစ္စ အစေတသိကော ဓမ္မော ဥပ္ပဇ္ဇတိ နအာရမ္မဏပစ္စယာ – စေတသိကေ ခန္ဓေ စ စိတ္တဉ္စ ပဋိစ္စ စိတ္တသမုဋ္ဌာနံ ရူပံ၊ စေတသိကေ ခန္ဓေ စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ (ပဋိသန္ဓိက္ခဏေ ဒွေပိ ကာတဗ္ဗာ၊ သံခိတ္တံ).