၁-၄. ပစ္စယာနုလောမာဒိ

ဟေတုပစ္စယော

၆၉. စိတ္တံ ဓမ္မံ သံသဋ္ဌော နောစိတ္တော ဓမ္မော ဥပ္ပဇ္ဇတိ ဟေတုပစ္စယာ – စိတ္တံ သံသဋ္ဌာ သမ္ပယုတ္တကာ ခန္ဓာ၊ ပဋိသန္ဓိက္ခဏေ။ပေ။. (၁)

နောစိတ္တံ ဓမ္မံ သံသဋ္ဌော နောစိတ္တော ဓမ္မော ဥပ္ပဇ္ဇတိ ဟေတုပစ္စယာ – နောစိတ္တံ ဧကံ ခန္ဓံ သံသဋ္ဌာ ဒွေ ခန္ဓာ၊ ဒွေ ခန္ဓေ သံသဋ္ဌော ဧကော ခန္ဓော၊ ပဋိသန္ဓိက္ခဏေ။ပေ။. (၁)

နောစိတ္တံ ဓမ္မံ သံသဋ္ဌော စိတ္တော ဓမ္မော ဥပ္ပဇ္ဇတိ ဟေတုပစ္စယာ – နောစိတ္တေ ခန္ဓေ သံသဋ္ဌံ စိတ္တံ၊ ပဋိသန္ဓိက္ခဏေ။ပေ။. (၂)

နောစိတ္တံ ဓမ္မံ သံသဋ္ဌော စိတ္တော စ နောစိတ္တော စ ဓမ္မာ ဥပ္ပဇ္ဇန္တိ ဟေတုပစ္စယာ – နောစိတ္တံ ဧကံ ခန္ဓံ သံသဋ္ဌာ ဒွေ ခန္ဓာ စိတ္တဉ္စ၊ ဒွေ ခန္ဓေ။ပေ။ ပဋိသန္ဓိက္ခဏေ။ပေ။. (၃)

စိတ္တဉ္စ နောစိတ္တဉ္စ ဓမ္မံ သံသဋ္ဌော နောစိတ္တော ဓမ္မော ဥပ္ပဇ္ဇတိ ဟေတုပစ္စယာ – နောစိတ္တံ ဧကံ ခန္ဓဉ္စ စိတ္တဉ္စ သံသဋ္ဌာ ဒွေ ခန္ဓာ၊ ဒွေ ခန္ဓေ စ။ပေ။ ပဋိသန္ဓိက္ခဏေ။ပေ။ (သံခိတ္တံ).

ဟေတုယာ ပဉ္စ၊ အာရမ္မဏေ ပဉ္စ၊ အဓိပတိယာ ပဉ္စ (သဗ္ဗတ္ထ ပဉ္စ)၊ အဝိဂတေ ပဉ္စ (သံခိတ္တံ).

နဟေတုယာ ပဉ္စ၊ နအဓိပတိယာ ပဉ္စ၊ နပုရေဇာတေ ပဉ္စ၊ နပစ္ဆာဇာတေ ပဉ္စ၊ နအာသေဝနေ ပဉ္စ၊ နကမ္မေ တီဏိ၊ နဝိပါကေ ပဉ္စ၊ နဈာနေ ပဉ္စ၊ နမဂ္ဂေ ပဉ္စ၊ နဝိပ္ပယုတ္တေ ပဉ္စ.