၁. ဝိဘင်္ဂဝါရော

ဟေတုပစ္စယော

၆၁. စိတ္တံ ဓမ္မံ ပစ္စယာ နောစိတ္တော ဓမ္မော ဥပ္ပဇ္ဇတိ ဟေတုပစ္စယာ – စိတ္တံ ပစ္စယာ သမ္ပယုတ္တကာ ခန္ဓာ စိတ္တသမုဋ္ဌာနဉ္စ ရူပံ၊ ပဋိသန္ဓိက္ခဏေ။ပေ။. (၁)

နောစိတ္တံ ဓမ္မံ ပစ္စယာ နောစိတ္တော ဓမ္မော ဥပ္ပဇ္ဇတိ ဟေတုပစ္စယာ – နောစိတ္တံ ဧကံ ခန္ဓံ ပစ္စယာ ဒွေ ခန္ဓာ စိတ္တသမုဋ္ဌာနဉ္စ ရူပံ၊ ဒွေ ခန္ဓေ။ပေ။ ပဋိသန္ဓိက္ခဏေ။ပေ။ (ယာဝ မဟာဘူတာ)၊ ဝတ္ထုံ ပစ္စယာ နောစိတ္တာ ခန္ဓာ. (၁)

နောစိတ္တံ ဓမ္မံ ပစ္စယာ စိတ္တော ဓမ္မော ဥပ္ပဇ္ဇတိ ဟေတုပစ္စယာ – နောစိတ္တေ ခန္ဓေ ပစ္စယာ စိတ္တံ၊ ဝတ္ထုံ ပစ္စယာ စိတ္တံ၊ ပဋိသန္ဓိက္ခဏေ နောစိတ္တေ ခန္ဓေ ပစ္စယာ စိတ္တံ၊ ပဋိသန္ဓိက္ခဏေ ဝတ္ထုံ ပစ္စယာ စိတ္တံ. (၂)

နောစိတ္တံ ဓမ္မံ ပစ္စယာ စိတ္တော စ နောစိတ္တော စ ဓမ္မာ ဥပ္ပဇ္ဇန္တိ ဟေတုပစ္စယာ – နောစိတ္တံ ဧကံ ခန္ဓံ ပစ္စယာ ဒွေ ခန္ဓာ စိတ္တဉ္စ စိတ္တသမုဋ္ဌာနဉ္စ ရူပံ၊ ဒွေ ခန္ဓေ။ပေ။ ဝတ္ထုံ ပစ္စယာ စိတ္တဉ္စ သမ္ပယုတ္တကာ စ ခန္ဓာ၊ ပဋိသန္ဓိက္ခဏေ နောစိတ္တံ ဧကံ ခန္ဓံ ပစ္စယာ ဒွေ ခန္ဓာ စိတ္တဉ္စ ကဋတ္တာ စ ရူပံ၊ ဒွေ ခန္ဓေ။ပေ။ ပဋိသန္ဓိက္ခဏေ ဝတ္ထုံ ပစ္စယာ စိတ္တဉ္စ သမ္ပယုတ္တကာ စ ခန္ဓာ. (၃)

စိတ္တဉ္စ နောစိတ္တဉ္စ ဓမ္မံ ပစ္စယာ နောစိတ္တော ဓမ္မော ဥပ္ပဇ္ဇတိ ဟေတုပစ္စယာ – နောစိတ္တံ ဧကံ ခန္ဓဉ္စ စိတ္တဉ္စ ပစ္စယာ ဒွေ ခန္ဓာ စိတ္တသမုဋ္ဌာနဉ္စ ရူပံ၊ ဒွေ ခန္ဓေ စ။ပေ။ စိတ္တဉ္စ မဟာဘူတေ စ ပစ္စယာ စိတ္တသမုဋ္ဌာနံ ရူပံ၊ စိတ္တဉ္စ ဝတ္ထုဉ္စ ပစ္စယာ နောစိတ္တာ ခန္ဓာ၊ ပဋိသန္ဓိက္ခဏေ နောစိတ္တံ ဧကံ ခန္ဓဉ္စ စိတ္တဉ္စ ပစ္စယာ ဒွေ ခန္ဓာ ကဋတ္တာ စ ရူပံ၊ ဒွေ ခန္ဓေ စ။ပေ။ ပဋိသန္ဓိက္ခဏေ စိတ္တဉ္စ မဟာဘူတေ စ ပစ္စယာ ကဋတ္တာရူပံ၊ ပဋိသန္ဓိက္ခဏေ စိတ္တဉ္စ ဝတ္ထုဉ္စ ပစ္စယာ နောစိတ္တာ ခန္ဓာ. (၁)

အာရမ္မဏပစ္စယော

၆၂. စိတ္တံ ဓမ္မံ ပစ္စယာ နောစိတ္တော ဓမ္မော ဥပ္ပဇ္ဇတိ အာရမ္မဏပစ္စယာ။ ဧကံ (ပဋိစ္စဝါရသဒိသံ).

နောစိတ္တံ ဓမ္မံ ပစ္စယာ နောစိတ္တော ဓမ္မော ဥပ္ပဇ္ဇတိ အာရမ္မဏပစ္စယာ – နောစိတ္တံ ဧကံ ခန္ဓံ ပစ္စယာ ဒွေ ခန္ဓာ၊ ဒွေ ခန္ဓေ။ပေ။ ပဋိသန္ဓိက္ခဏေ။ပေ။ ပဋိသန္ဓိက္ခဏေ ဝတ္ထုံ ပစ္စယာ ခန္ဓာ၊ စက္ခာယတနံ ပစ္စယာ စက္ခုဝိညာဏသဟဂတာ ခန္ဓာ။ပေ။ ကာယာယတနံ ပစ္စယာ ကာယဝိညာဏသဟဂတာ ခန္ဓာ၊ ဝတ္ထုံ ပစ္စယာ နောစိတ္တာ ခန္ဓာ. (၁)

နောစိတ္တံ ဓမ္မံ ပစ္စယာ စိတ္တော ဓမ္မော ဥပ္ပဇ္ဇတိ အာရမ္မဏပစ္စယာ – နောစိတ္တေ ခန္ဓေ ပစ္စယာ စိတ္တံ၊ ဝတ္ထုံ ပစ္စယာ စိတ္တံ၊ ပဋိသန္ဓိက္ခဏေ နောစိတ္တေ ခန္ဓေ ပစ္စယာ စိတ္တံ၊ ပဋိသန္ဓိက္ခဏေ ဝတ္ထုံ ပစ္စယာ စိတ္တံ၊ စက္ခာယတနံ ပစ္စယာ စက္ခုဝိညာဏံ။ပေ။ ကာယာယတနံ ပစ္စယာ ကာယဝိညာဏံ. (၂)

နောစိတ္တံ ဓမ္မံ ပစ္စယာ စိတ္တော စ နောစိတ္တော စ ဓမ္မာ ဥပ္ပဇ္ဇန္တိ အာရမ္မဏပစ္စယာ – နောစိတ္တံ ဧကံ ခန္ဓံ ပစ္စယာ ဒွေ ခန္ဓာ စိတ္တဉ္စ၊ ဒွေ ခန္ဓေ။ပေ။ ဝတ္ထုံ ပစ္စယာ စိတ္တဉ္စ သမ္ပယုတ္တကာ စ ခန္ဓာ၊ ပဋိသန္ဓိက္ခဏေ။ပေ။ ပဋိသန္ဓိက္ခဏေ ဝတ္ထုံ ပစ္စယာ စိတ္တဉ္စ သမ္ပယုတ္တကာ စ ခန္ဓာ၊ စက္ခာယတနံ ပစ္စယာ စက္ခုဝိညာဏံ သမ္ပယုတ္တကာ စ ခန္ဓာ။ပေ။ ကာယာယတနံ ပစ္စယာ ကာယဝိညာဏံ သမ္ပယုတ္တကာ စ ခန္ဓာ. (၃)

စိတ္တဉ္စ နောစိတ္တဉ္စ ဓမ္မံ ပစ္စယာ နောစိတ္တော ဓမ္မော ဥပ္ပဇ္ဇတိ အာရမ္မဏပစ္စယာ – နောစိတ္တံ ဧကံ ခန္ဓဉ္စ စိတ္တဉ္စ ပစ္စယာ ဒွေ ခန္ဓာ၊ ဒွေ ခန္ဓေ စ။ပေ။ စိတ္တဉ္စ ဝတ္ထုဉ္စ ပစ္စယာ နောစိတ္တာ ခန္ဓာ၊ ပဋိသန္ဓိက္ခဏေ။ပေ။ ပဋိသန္ဓိက္ခဏေ စိတ္တဉ္စ ဝတ္ထုဉ္စ ပစ္စယာ နောစိတ္တာ ခန္ဓာ၊ စက္ခာယတနဉ္စ စက္ခုဝိညာဏဉ္စ ပစ္စယာ စက္ခုဝိညာဏသဟဂတာ ခန္ဓာ။ပေ။ ကာယာယတနံ စ။ပေ။ (သံခိတ္တံ). (၁)