၁. ဝိဘင်္ဂဝါရော

ဟေတုပစ္စယော

၄၄၅. ဥပါဒိန္နော ဓမ္မော ဥပါဒိန္နဿ ဓမ္မဿ ဟေတုပစ္စယေန ပစ္စယော – ဥပါဒိန္နာ ဟေတူ သမ္ပယုတ္တကာနံ ခန္ဓာနံ ဟေတုပစ္စယေန ပစ္စယော၊ ပဋိသန္ဓိက္ခဏေ ဥပါဒိန္နာ ဟေတူ သမ္ပယုတ္တကာနံ ခန္ဓာနံ ကဋတ္တာ စ ရူပါနံ ဟေတုပစ္စယေန ပစ္စယော. (၁)

ဥပါဒိန္နော ဓမ္မော အနုပါဒိန္နဿ ဓမ္မဿ ဟေတုပစ္စယေန ပစ္စယော – ဥပါဒိန္နာ ဟေတူ စိတ္တသမုဋ္ဌာနာနံ ရူပါနံ ဟေတုပစ္စယေန ပစ္စယော. (၂)

ဥပါဒိန္နော ဓမ္မော ဥပါဒိန္နဿ စ အနုပါဒိန္နဿ စ ဓမ္မဿ ဟေတုပစ္စယေန ပစ္စယော – ဥပါဒိန္နာ ဟေတူ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော. (၃)

အနုပါဒိန္နော ဓမ္မော အနုပါဒိန္နဿ ဓမ္မဿ ဟေတုပစ္စယေန ပစ္စယော – အနုပါဒိန္နာ ဟေတူ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော. (၁)

အာရမ္မဏပစ္စယော

၄၄၆. ဥပါဒိန္နော ဓမ္မော ဥပါဒိန္နဿ ဓမ္မဿ အာရမ္မဏပစ္စယေန ပစ္စယော – စက္ခုံ။ပေ။ ကာယံ ဥပါဒိန္နေ ရူပေ။ ဂန္ဓေ။ ရသေ။ ဖောဋ္ဌဗ္ဗေ။ ဝတ္ထုံ ဥပါဒိန္နေ ခန္ဓေ အနိစ္စတော။ပေ။ ဒေါမနဿံ ဥပ္ပဇ္ဇတိ၊ ကုသလာကုသလေ နိရုဒ္ဓေ ဝိပါကော တဒါရမ္မဏတာ ဥပ္ပဇ္ဇတိ၊ ဥပါဒိန္နံ ရူပါယတနံ စက္ခုဝိညာဏဿ။ပေ။ ဥပါဒိန္နံ ဂန္ဓာယတနံ ဃာနဝိညာဏဿ။ပေ။ ဖောဋ္ဌဗ္ဗာယတနံ ကာယဝိညာဏဿ အာရမ္မဏပစ္စယေန ပစ္စယော. (၁)

ဥပါဒိန္နော ဓမ္မော အနုပါဒိန္နဿ ဓမ္မဿ အာရမ္မဏပစ္စယေန ပစ္စယော – စက္ခုံ။ပေ။ ကာယံ ဥပါဒိန္နေ ရူပေ။ ဂန္ဓေ။ ရသေ။ ဖောဋ္ဌဗ္ဗေ။ ဝတ္ထုံ ဥပါဒိန္နေ ခန္ဓေ အနိစ္စတော။ပေ။ ဒေါမနဿံ ဥပ္ပဇ္ဇတိ၊ ဒိဗ္ဗေန စက္ခုနာ ဥပါဒိန္နံ ရူပံ ပဿတိ. စေတောပရိယဉာဏေန ဥပါဒိန္နစိတ္တသမင်္ဂိဿ စိတ္တံ ဇာနာတိ၊ ဥပါဒိန္နာ ခန္ဓာ ဣဒ္ဓိဝိဓဉာဏဿ၊ စေတောပရိယဉာဏဿ၊ ပုဗ္ဗေနိဝါသာနုဿတိဉာဏဿ၊ အနာဂတံသဉာဏဿ၊ အာဝဇ္ဇနာယ အာရမ္မဏပစ္စယေန ပစ္စယော. (၂)

၄၄၇. အနုပါဒိန္နော ဓမ္မော အနုပါဒိန္နဿ ဓမ္မဿ အာရမ္မဏပစ္စယေန ပစ္စယော – ဒါနံ ။ပေ။ သီလံ။ပေ။ ဥပေါသထကမ္မံ ကတွာ တံ ပစ္စဝေက္ခတိ အဿာဒေတိ အဘိနန္ဒတိ၊ တံ အာရဗ္ဘ ရာဂေါ။ပေ။ ဒေါမနဿံ ဥပ္ပဇ္ဇတိ၊ ပုဗ္ဗေ သုစိဏ္ဏာနိ။ပေ။ ဈာနာ။ပေ။ အရိယာ မဂ္ဂါ ဝုဋ္ဌဟိတွာ မဂ္ဂံ ပစ္စဝေက္ခန္တိ၊ ဖလံ။ပေ။ နိဗ္ဗာနံ။ပေ။ နိဗ္ဗာနံ ဂေါတြဘုဿ၊ ဝေါဒါနဿ၊ မဂ္ဂဿ၊ ဖလဿ၊ အာဝဇ္ဇနာယ အာရမ္မဏပစ္စယေန ပစ္စယော. အရိယာ ပဟီနေ ကိလေသေ။ပေ။ ဝိက္ခမ္ဘိတေ ကိလေသေ။ပေ။ ပုဗ္ဗေ။ပေ။ အနုပါဒိန္နေ ရူပေ။ သဒ္ဒေ။ ဂန္ဓေ။ ရသေ။ ဖောဋ္ဌဗ္ဗေ အနုပါဒိန္နေ ခန္ဓေ အနိစ္စတော။ပေ။ ဒေါမနဿံ ဥပ္ပဇ္ဇတိ၊ ဒိဗ္ဗေန စက္ခုနာ အနုပါဒိန္နံ ရူပံ ပဿတိ၊ ဒိဗ္ဗာယ သောတဓာတုယာ သဒ္ဒံ သုဏာတိ. စေတောပရိယဉာဏေန အနုပါဒိန္နစိတ္တသမင်္ဂိဿ စိတ္တံ ဇာနာတိ၊ အာကာသာနဉ္စာယတနံ။ပေ။ အာကိဉ္စညာယတနံ။ပေ။ အနုပါဒိန္နာ ခန္ဓာ ဣဒ္ဓိဝိဓဉာဏဿ၊ စေတောပရိယဉာဏဿ၊ ပုဗ္ဗေနိဝါသာနုဿတိဉာဏဿ၊ ယထာကမ္မူပဂဉာဏဿ၊ အနာဂတံသဉာဏဿ၊ အာဝဇ္ဇနာယ အာရမ္မဏပစ္စယေန ပစ္စယော. (၁)

အနုပါဒိန္နော ဓမ္မော ဥပါဒိန္နဿ ဓမ္မဿ အာရမ္မဏပစ္စယေန ပစ္စယော – အနုပါဒိန္နေ ရူပေ။ သဒ္ဒေ။ ဂန္ဓေ။ ရသေ။ ဖောဋ္ဌဗ္ဗေ အနုပါဒိန္နေ ခန္ဓေ အနိစ္စတော။ပေ။ ဒေါမနဿံ ဥပ္ပဇ္ဇတိ၊ ကုသလာကုသလေ နိရုဒ္ဓေ ဝိပါကော တဒါရမ္မဏတာ ဥပ္ပဇ္ဇတိ၊ အာကာသာနဉ္စာယတနကုသလံ ဝိညာဏဉ္စာယတနဝိပါကဿ။ပေ။ အာကိဉ္စညာယတနကုသလံ။ပေ။ အနုပါဒိန္နံ ရူပါယတနံ စက္ခုဝိညာဏဿ။ပေ။ သဒ္ဒါယတနံ။ပေ။ ဖောဋ္ဌဗ္ဗာယတနံ ကာယဝိညာဏဿ အာရမ္မဏပစ္စယေန ပစ္စယော. (၂)

အဓိပတိပစ္စယော

၄၄၈. ဥပါဒိန္နော ဓမ္မော အနုပါဒိန္နဿ ဓမ္မဿ အဓိပတိပစ္စယေန ပစ္စယော. အာရမ္မဏာဓိပတိ – စက္ခုံ။ပေ။ ကာယံ ဥပါဒိန္နေ ရူပေ။ ဂန္ဓေ။ ရသေ။ ဖောဋ္ဌဗ္ဗေ။ ဝတ္ထုံ ဥပါဒိန္နေ ခန္ဓေ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ. (၁)

အနုပါဒိန္နော ဓမ္မော အနုပါဒိန္နဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ. အာရမ္မဏာဓိပတိ – ဒါနံ။ပေ။ သီလံ။ပေ။ ဥပေါသထကမ္မံ ကတွာ တံ ဂရုံ ကတွာ ပစ္စဝေက္ခတိ အဿာဒေတိ အဘိနန္ဒတိ၊ တံ ဂရုံ ကတွာ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ၊ ပုဗ္ဗေ။ပေ။ ဈာနာ။ပေ။ အရိယာ မဂ္ဂါ ဝုဋ္ဌဟိတွာ မဂ္ဂံ ဂရုံ ကတွာ ပစ္စဝေက္ခန္တိ၊ ဖလံ။ပေ။ နိဗ္ဗာနံ ဂရုံ ကတွာ ပစ္စဝေက္ခန္တိ. နိဗ္ဗာနံ ဂေါတြဘုဿ၊ ဝေါဒါနဿ၊ မဂ္ဂဿ၊ ဖလဿ၊ အဓိပတိပစ္စယေန ပစ္စယော၊ အနုပါဒိန္နေ ရူပေ။ သဒ္ဒေ။ ဂန္ဓေ။ ရသေ။ ဖောဋ္ဌဗ္ဗေ အနုပါဒိန္နေ ခန္ဓေ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ. သဟဇာတာဓိပတိ – အနုပါဒိန္နာဓိပတိ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ အဓိပတိပစ္စယေန ပစ္စယော. (၁)

အနန္တရပစ္စယော

၄၄၉. ဥပါဒိန္နော ဓမ္မော ဥပါဒိန္နဿ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ ဥပါဒိန္နာ ခန္ဓာ ပစ္ဆိမာနံ ပစ္ဆိမာနံ ဥပါဒိန္နာနံ ခန္ဓာနံ အနန္တရပစ္စယေန ပစ္စယော. ပဉ္စဝိညာဏံ ဝိပါကမနောဓာတုယာ အနန္တရပစ္စယေန ပစ္စယော. ဝိပါကမနောဓာတု ဝိပါကမနောဝိညာဏဓာတုယာ အနန္တရပစ္စယေန ပစ္စယော. (၁)

ဥပါဒိန္နော ဓမ္မော အနုပါဒိန္နဿ ဓမ္မဿ အနန္တရပစ္စယေန ပစ္စယော – ဘဝင်္ဂံ အာဝဇ္ဇနာယ၊ ဝိပါကမနောဝိညာဏဓာတု ကိရိယမနောဝိညာဏဓာတုယာ အနန္တရပစ္စယေန ပစ္စယော. (၂)

၄၅၀. အနုပါဒိန္နော ဓမ္မော အနုပါဒိန္နဿ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ အနုပါဒိန္နာ ခန္ဓာ ပစ္ဆိမာနံ ပစ္ဆိမာနံ အနုပါဒိန္နာနံ ခန္ဓာနံ အနန္တရပစ္စယေန ပစ္စယော၊ အနုလောမံ ဂေါတြဘုဿ။ပေ။ ဖလသမာပတ္တိယာ အနန္တရပစ္စယေန ပစ္စယော. (၁)

အနုပါဒိန္နော ဓမ္မော ဥပါဒိန္နဿ ဓမ္မဿ အနန္တရပစ္စယေန ပစ္စယော – အာဝဇ္ဇနာ ပဉ္စန္နံ ဝိညာဏာနံ။ပေ။ အနုပါဒိန္နာ ခန္ဓာ ဝုဋ္ဌာနဿ အနန္တရပစ္စယေန ပစ္စယော။ သမနန္တရပစ္စယေန ပစ္စယော။ သဟဇာတပစ္စယေန ပစ္စယော။ ပဉ္စ (ပဋိစ္စသဒိသာ)။ အညမညပစ္စယေန ပစ္စယော။ ဒွေ (ပဋိစ္စသဒိသာ)။ နိဿယပစ္စယေန ပစ္စယော (ပစ္စယဝါရေ နိဿယသဒိသာ) ပဉ္စ.

ဥပနိဿယပစ္စယော

၄၅၁. ဥပါဒိန္နော ဓမ္မော ဥပါဒိန္နဿ ဓမ္မဿ ဥပနိဿယပစ္စယေန ပစ္စယော – အနန္တရူပနိဿယော၊ ပကတူပနိဿယော။ပေ။. ပကတူပနိဿယော – ကာယိကံ သုခံ ကာယိကဿ သုခဿ။ ကာယိကဿ ဒုက္ခဿ ဥပနိဿယပစ္စယေန ပစ္စယော၊ ကာယိကံ ဒုက္ခံ။ ဥပါဒိန္နံ ဥတု။ ဘောဇနံ ကာယိကဿ သုခဿ။ ကာယိကဿ ဒုက္ခဿ ဥပနိဿယပစ္စယေန ပစ္စယော၊ ကာယိကံ သုခံ။ ကာယိကံ ဒုက္ခံ။ ဥတု။ ဘောဇနံ။ ကာယိကဿ သုခဿ။ ကာယိကဿ ဒုက္ခဿ ဥပနိဿယပစ္စယေန ပစ္စယော. (၁)

ဥပါဒိန္နော ဓမ္မော အနုပါဒိန္နဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ပေ။. ပကတူပနိဿယော – ကာယိကံ သုခံ ဥပနိဿာယ ဒါနံ ဒေတိ။ပေ။ သံဃံ ဘိန္ဒတိ၊ ကာယိကံ ဒုက္ခံ။ ဥပါဒိန္နံ ဥတုံ။ ဘောဇနံ ဥပနိဿာယ ဒါနံ ဒေတိ။ပေ။ သမာပတ္တိံ ဥပ္ပါဒေတိ၊ ပါဏံ ဟနတိ။ပေ။ သံဃံ ဘိန္ဒတိ၊ ကာယိကံ သုခံ။ ကာယိကံ ဒုက္ခံ။ ဥတု။ ဘောဇနံ သဒ္ဓါယ။ပေ။ ပတ္ထနာယ မဂ္ဂဿ၊ ဖလသမာပတ္တိယာ ဥပနိဿယပစ္စယေန ပစ္စယော. (၂)

၄၅၂. အနုပါဒိန္နော ဓမ္မော အနုပါဒိန္နဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ပေ။. ပကတူပနိဿယော – သဒ္ဓံ ဥပနိဿာယ ဒါနံ ဒေတိ၊ မာနံ ဇပ္ပေတိ၊ ဒိဋ္ဌိံ ဂဏှာတိ၊ သီလံ။ပေ။ ပတ္ထနံ။ ဥတုံ။ ဘောဇနံ။ သေနာသနံ ဥပနိဿာယ ဒါနံ ဒေတိ။ပေ။ သံဃံ ဘိန္ဒတိ၊ သဒ္ဓါ။ပေ။ ပတ္ထနာ။ ဥတု။ ဘောဇနံ။ သေနာသနံ သဒ္ဓါယ။ပေ။ ပတ္ထနာယ မဂ္ဂဿ၊ ဖလသမာပတ္တိယာ ဥပနိဿယပစ္စယေန ပစ္စယော. (၁)

အနုပါဒိန္နော ဓမ္မော ဥပါဒိန္နဿ ဓမ္မဿ ဥပနိဿယပစ္စယေန ပစ္စယော – အနန္တရူပနိဿယော၊ ပကတူပနိဿယော။ပေ။. ပကတူပနိဿယော – သဒ္ဓံ ဥပနိဿာယ အတ္တာနံ အာတာပေတိ ပရိတာပေတိ၊ ပရိယိဋ္ဌိမူလကံ ဒုက္ခံ ပစ္စနုဘောတိ၊ သီလံ။ပေ။ ပတ္ထနံ။ ဥတုံ။ ဘောဇနံ။ သေနာသနံ ဥပနိဿာယ အတ္တာနံ အာတာပေတိ ပရိတာပေတိ၊ ပရိယိဋ္ဌိမူလကံ ဒုက္ခံ ပစ္စနုဘောတိ၊ သဒ္ဓါ။ပေ။ သေနာသနံ ကာယိကဿ သုခဿ။ ကာယိကဿ ဒုက္ခဿ ဥပနိဿယပစ္စယေန ပစ္စယော. ကုသလာကုသလံ ကမ္မံ ဝိပါကဿ ဥပနိဿယပစ္စယေန ပစ္စယော. (၂)

ပုရေဇာတပစ္စယော

၄၅၃. ဥပါဒိန္နော ဓမ္မော ဥပါဒိန္နဿ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ. အာရမ္မဏပုရေဇာတံ – စက္ခုံ။ပေ။ ကာယံ ဥပါဒိန္နေ ရူပေ။ ဂန္ဓေ။ ရသေ။ ဖောဋ္ဌဗ္ဗေ။ ဝတ္ထုံ အနိစ္စတော။ပေ။ ဒေါမနဿံ ဥပ္ပဇ္ဇတိ၊ ကုသလာကုသလေ နိရုဒ္ဓေ ဝိပါကော တဒါရမ္မဏတာ ဥပ္ပဇ္ဇတိ၊ ဥပါဒိန္နံ ရူပါယတနံ စက္ခုဝိညာဏဿ။ပေ။ ဂန္ဓာယတနံ။ပေ။ ဖောဋ္ဌဗ္ဗာယတနံ ကာယဝိညာဏဿ။ပေ။. ဝတ္ထုပုရေဇာတံ – စက္ခာယတနံ စက္ခုဝိညာဏဿ။ပေ။ ကာယာယတနံ ကာယဝိညာဏဿ။ပေ။ ဝတ္ထု ဥပါဒိန္နာနံ ခန္ဓာနံ ပုရေဇာတပစ္စယေန ပစ္စယော. (၁)

ဥပါဒိန္နော ဓမ္မော အနုပါဒိန္နဿ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ. အာရမ္မဏပုရေဇာတံ – စက္ခုံ။ပေ။ ကာယံ၊ ဥပါဒိန္နေ ရူပေ။ ဂန္ဓေ။ ရသေ။ ဖောဋ္ဌဗ္ဗေ ဝတ္ထုံ အနိစ္စတော။ပေ။ ဒေါမနဿံ ဥပ္ပဇ္ဇတိ၊ ဒိဗ္ဗေန စက္ခုနာ ဥပါဒိန္နံ ရူပံ ပဿတိ. ဝတ္ထုပုရေဇာတံ – ဝတ္ထု အနုပါဒိန္နာနံ ခန္ဓာနံ ပုရေဇာတပစ္စယေန ပစ္စယော. (၂)

၄၅၄. အနုပါဒိန္နော ဓမ္မော အနုပါဒိန္နဿ ဓမ္မဿ ပုရေဇာတပစ္စယေန ပစ္စယော. အာရမ္မဏပုရေဇာတံ – အနုပါဒိန္နေ ရူပေ။ သဒ္ဒေ။ ဂန္ဓေ။ ရသေ။ ဖောဋ္ဌဗ္ဗေ အနိစ္စတော။ပေ။ ဒေါမနဿံ ဥပ္ပဇ္ဇတိ၊ ဒိဗ္ဗေန စက္ခုနာ အနုပါဒိန္နံ ရူပံ ပဿတိ၊ ဒိဗ္ဗာယ သောတဓာတုယာ သဒ္ဒံ သုဏာတိ. (၁)

အနုပါဒိန္နော ဓမ္မော ဥပါဒိန္နဿ ဓမ္မဿ ပုရေဇာတပစ္စယေန ပစ္စယော. အာရမ္မဏပုရေဇာတံ – အနုပါဒိန္နေ ရူပေ။ သဒ္ဒေ။ ဂန္ဓေ။ ရသေ။ ဖောဋ္ဌဗ္ဗေ အနိစ္စတော။ပေ။ ဒေါမနဿံ ဥပ္ပဇ္ဇတိ၊ ကုသလာကုသလေ နိရုဒ္ဓေ ဝိပါကော တဒါရမ္မဏတာ ဥပ္ပဇ္ဇတိ၊ အနုပါဒိန္နံ ရူပါယတနံ စက္ခုဝိညာဏဿ။ပေ။ သဒ္ဒါယတနံ။ပေ။ ဖောဋ္ဌဗ္ဗာယတနံ ကာယဝိညာဏဿ ပုရေဇာတပစ္စယေန ပစ္စယော. (၂)

ဥပါဒိန္နော စ အနုပါဒိန္နော စ ဓမ္မာ ဥပါဒိန္နဿ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ. အနုပါဒိန္နံ ရူပါယတနဉ္စ စက္ခာယတနဉ္စ စက္ခုဝိညာဏဿ။ပေ။ သဒ္ဒါယတနဉ္စ သောတာယတနဉ္စ။ပေ။ ဖောဋ္ဌဗ္ဗာယတနဉ္စ ကာယာယတနဉ္စ ကာယဝိညာဏဿ ပုရေဇာတပစ္စယေန ပစ္စယော၊ အနုပါဒိန္နံ ရူပါယတနဉ္စ ဝတ္ထု စ။ပေ။ ဖောဋ္ဌဗ္ဗာယတနဉ္စ ဝတ္ထု စ ဥပါဒိန္နာနံ ခန္ဓာနံ ပုရေဇာတပစ္စယေန ပစ္စယော. (၁)

ဥပါဒိန္နော စ အနုပါဒိန္နော စ ဓမ္မာ အနုပါဒိန္နဿ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ. အနုပါဒိန္နံ ရူပါယတနဉ္စ ဝတ္ထု စ။ပေ။ ဖောဋ္ဌဗ္ဗာယတနဉ္စ ဝတ္ထု စ အနုပါဒိန္နာနံ ခန္ဓာနံ ပုရေဇာတပစ္စယေန ပစ္စယော. (၂)

ပစ္ဆာဇာတာသေဝနပစ္စယာ

၄၅၅. ဥပါဒိန္နော ဓမ္မော ဥပါဒိန္နဿ ဓမ္မဿ ပစ္ဆာဇာတပစ္စယေန ပစ္စယော – ပစ္ဆာဇာတာ ဥပါဒိန္နာ ခန္ဓာ ပုရေဇာတဿ ဣမဿ ဥပါဒိန္နဿ ကာယဿ ပစ္ဆာဇာတပစ္စယေန ပစ္စယော. (၁)

ဥပါဒိန္နော ဓမ္မော အနုပါဒိန္နဿ ဓမ္မဿ ပစ္ဆာဇာတပစ္စယေန ပစ္စယော – ပစ္ဆာဇာတာ ဥပါဒိန္နာ ခန္ဓာ ပုရေဇာတဿ ဣမဿ အနုပါဒိန္နဿ ကာယဿ ပစ္ဆာဇာတပစ္စယေန ပစ္စယော. (၂)

ဥပါဒိန္နော ဓမ္မော ဥပါဒိန္နဿ စ အနုပါဒိန္နဿ စ ဓမ္မဿ ပစ္ဆာဇာတပစ္စယေန ပစ္စယော (သံခိတ္တံ). (၃)

အနုပါဒိန္နော ဓမ္မော အနုပါဒိန္နဿ ဓမ္မဿ ပစ္ဆာဇာတပစ္စယေန ပစ္စယော (သံခိတ္တံ). (၁)

အနုပါဒိန္နော ဓမ္မော ဥပါဒိန္နဿ ဓမ္မဿ ပစ္ဆာဇာတပစ္စယေန ပစ္စယော (သံခိတ္တံ). (၂)

အနုပါဒိန္နော ဓမ္မော ဥပါဒိန္နဿ စ အနုပါဒိန္နဿ စ ဓမ္မဿ ပစ္ဆာဇာတပစ္စယေန ပစ္စယော (သံခိတ္တံ). (၃)

၄၅၆. အနုပါဒိန္နော ဓမ္မော အနုပါဒိန္နဿ ဓမ္မဿ အာသေဝနပစ္စယေန ပစ္စယော။ ဧကံ (သံခိတ္တံ).

ကမ္မပစ္စယော

၄၅၇. ဥပါဒိန္နော ဓမ္မော ဥပါဒိန္နဿ ဓမ္မဿ ကမ္မပစ္စယေန ပစ္စယော – ဥပါဒိန္နာ စေတနာ သမ္ပယုတ္တကာနံ ခန္ဓာနံ ကမ္မပစ္စယေန ပစ္စယော၊ ပဋိသန္ဓိက္ခဏေ ဥပါဒိန္နာ စေတနာ သမ္ပယုတ္တကာနံ ခန္ဓာနံ ကဋတ္တာ စ ရူပါနံ ကမ္မပစ္စယေန ပစ္စယော. (၁)

ဥပါဒိန္နော ဓမ္မော အနုပါဒိန္နဿ ဓမ္မဿ ကမ္မပစ္စယေန ပစ္စယော – ဥပါဒိန္နာ စေတနာ စိတ္တသမုဋ္ဌာနာနံ ရူပါနံ ကမ္မပစ္စယေန ပစ္စယော. (၂)

ဥပါဒိန္နော ဓမ္မော ဥပါဒိန္နဿ စ အနုပါဒိန္နဿ စ ဓမ္မဿ ကမ္မပစ္စယေန ပစ္စယော – ဥပါဒိန္နာ စေတနာ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ကမ္မပစ္စယေန ပစ္စယော. (၃)

အနုပါဒိန္နော ဓမ္မော အနုပါဒိန္နဿ ဓမ္မဿ ကမ္မပစ္စယေန ပစ္စယော – အနုပါဒိန္နာ စေတနာ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ကမ္မပစ္စယေန ပစ္စယော. (၁)

အနုပါဒိန္နော ဓမ္မော ဥပါဒိန္နဿ ဓမ္မဿ ကမ္မပစ္စယေန ပစ္စယော. နာနာက္ခဏိကာ – အနုပါဒိန္နာ စေတနာ ဝိပါကာနံ ခန္ဓာနံ ကဋတ္တာ စ ရူပါနံ ကမ္မပစ္စယေန ပစ္စယော. (၂)

ဝိပါကပစ္စယော

၄၅၈. ဥပါဒိန္နော ဓမ္မော ဥပါဒိန္နဿ ဓမ္မဿ ဝိပါကပစ္စယေန ပစ္စယော – ဥပါဒိန္နော ဧကော ခန္ဓော (သံခိတ္တံ. ဥပါဒိန္နမူလကေ တီဏိ. ).

အနုပါဒိန္နော ဓမ္မော အနုပါဒိန္နဿ ဓမ္မဿ ဝိပါကပစ္စယေန ပစ္စယော – ဝိပါကော အနုပါဒိန္နော ဧကော ခန္ဓော တိဏ္ဏန္နံ ခန္ဓာနံ စိတ္တသမုဋ္ဌာနာနဉ္စ ရူပါနံ ဝိပါကပစ္စယေန ပစ္စယော။ပေ။ ဒွေ ခန္ဓာ။ပေ။. (၁)

အာဟာရပစ္စယော

၄၅၉. ဥပါဒိန္နော ဓမ္မော ဥပါဒိန္နဿ ဓမ္မဿ အာဟာရပစ္စယေန ပစ္စယော – ဥပါဒိန္နာ အာဟာရာ သမ္ပယုတ္တကာနံ ခန္ဓာနံ အာဟာရပစ္စယေန ပစ္စယော၊ ပဋိသန္ဓိက္ခဏေ။ပေ။ ဥပါဒိန္နော ကဗဠီကာရော အာဟာရော ဣမဿ ဥပါဒိန္နဿ ကာယဿ အာဟာရပစ္စယေန ပစ္စယော. (၁)

ဥပါဒိန္နော ဓမ္မော အနုပါဒိန္နဿ ဓမ္မဿ အာဟာရပစ္စယေန ပစ္စယော – ဥပါဒိန္နာ အာဟာရာ စိတ္တသမုဋ္ဌာနာနံ ရူပါနံ အာဟာရပစ္စယေန ပစ္စယော၊ ဥပါဒိန္နော ကဗဠီကာရော အာဟာရော ဣမဿ အနုပါဒိန္နဿ ကာယဿ အာဟာရပစ္စယေန ပစ္စယော. (၂)

ဥပါဒိန္နော ဓမ္မော ဥပါဒိန္နဿ စ အနုပါဒိန္နဿ စ ဓမ္မဿ အာဟာရပစ္စယေန ပစ္စယော – ဥပါဒိန္နာ အာဟာရာ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ အာဟာရပစ္စယေန ပစ္စယော၊ ဥပါဒိန္နော ကဗဠီကာရော အာဟာရော ဣမဿ ဥပါဒိန္နဿ စ အနုပါဒိန္နဿ စ ကာယဿ အာဟာရပစ္စယေန ပစ္စယော. (၃)

၄၆၀. အနုပါဒိန္နော ဓမ္မော အနုပါဒိန္နဿ ဓမ္မဿ အာဟာရပစ္စယေန ပစ္စယော – အနုပါဒိန္နာ အာဟာရာ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ အာဟာရပစ္စယေန ပစ္စယော၊ အနုပါဒိန္နော ကဗဠီကာရော အာဟာရော ဣမဿ အနုပါဒိန္နဿ ကာယဿ အာဟာရပစ္စယေန ပစ္စယော. (၁)

အနုပါဒိန္နော ဓမ္မော ဥပါဒိန္နဿ ဓမ္မဿ အာဟာရပစ္စယေန ပစ္စယော – အနုပါဒိန္နော ကဗဠီကာရော အာဟာရော ဣမဿ ဥပါဒိန္နဿ ကာယဿ အာဟာရပစ္စယေန ပစ္စယော. (၂)

အနုပါဒိန္နော ဓမ္မော ဥပါဒိန္နဿ စ အနုပါဒိန္နဿ စ ဓမ္မဿ အာဟာရပစ္စယေန ပစ္စယော – အနုပါဒိန္နော ကဗဠီကာရော အာဟာရော ဣမဿ ဥပါဒိန္နဿ စ အနုပါဒိန္နဿ စ ကာယဿ အာဟာရပစ္စယေန ပစ္စယော. (၃)

ဥပါဒိန္နော စ အနုပါဒိန္နော စ ဓမ္မာ ဥပါဒိန္နဿ ဓမ္မဿ အာဟာရပစ္စယေန ပစ္စယော – ဥပါဒိန္နော စ အနုပါဒိန္နော စ ကဗဠီကာရော အာဟာရော ဣမဿ ဥပါဒိန္နဿ ကာယဿ အာဟာရပစ္စယေန ပစ္စယော. (၁)

ဥပါဒိန္နော စ အနုပါဒိန္နော စ ဓမ္မာ အနုပါဒိန္နဿ ဓမ္မဿ အာဟာရပစ္စယေန ပစ္စယော – ဥပါဒိန္နော စ အနုပါဒိန္နော စ ကဗဠီကာရော အာဟာရော ဣမဿ အနုပါဒိန္နဿ ကာယဿ အာဟာရပစ္စယေန ပစ္စယော. (၂)

ဥပါဒိန္နော စ အနုပါဒိန္နော စ ဓမ္မာ ဥပါဒိန္နဿ စ အနုပါဒိန္နဿ စ ဓမ္မဿ အာဟာရပစ္စယေန ပစ္စယော – ဥပါဒိန္နော စ အနုပါဒိန္နော စ ကဗဠီကာရော အာဟာရော ဣမဿ ဥပါဒိန္နဿ စ အနုပါဒိန္နဿ စ ကာယဿ အာဟာရပစ္စယေန ပစ္စယော. (၃)

ဣန္ဒြိယပစ္စယာဒိ

၄၆၁. ဥပါဒိန္နော ဓမ္မော ဥပါဒိန္နဿ ဓမ္မဿ ဣန္ဒြိယပစ္စယေန ပစ္စယော – ဥပါဒိန္နာ ဣန္ဒြိယာ သမ္ပယုတ္တကာနံ ခန္ဓာနံ ဣန္ဒြိယပစ္စယေန ပစ္စယော. (၁)

ပဋိသန္ဓိက္ခဏေ ဥပါဒိန္နာ ဣန္ဒြိယာ သမ္ပယုတ္တကာနံ ခန္ဓာနံ ကဋတ္တာ စ ရူပါနံ ဣန္ဒြိယပစ္စယေန ပစ္စယော၊ စက္ခုန္ဒြိယံ စက္ခုဝိညာဏဿ။ပေ။ ကာယိန္ဒြိယံ ကာယဝိညာဏဿ။ပေ။ ရူပဇီဝိတိန္ဒြိယံ ကဋတ္တာရူပါနံ ဣန္ဒြိယပစ္စယေန ပစ္စယော. (၂)

ဥပါဒိန္နော ဓမ္မော အနုပါဒိန္နဿ ဓမ္မဿ။ပေ။ (ဥပါဒိန္နမူလကေ တီဏိ၊ ပဌမဿေဝ ရူပဇီဝိတိန္ဒြိယံ၊ ဣတရေသု နတ္ထိ). (၃)

အနုပါဒိန္နော ဓမ္မော အနုပါဒိန္နဿ ဓမ္မဿ ဣန္ဒြိယပစ္စယေန ပစ္စယော – အနုပါဒိန္နာ ဣန္ဒြိယာ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ဣန္ဒြိယပစ္စယေန ပစ္စယော. (၁)

ဥပါဒိန္နော ဓမ္မော ဥပါဒိန္နဿ ဓမ္မဿ ဈာနပစ္စယေန ပစ္စယော။ စတ္တာရိ၊ မဂ္ဂပစ္စယေန ပစ္စယော။ စတ္တာရိ၊ သမ္ပယုတ္တပစ္စယေန ပစ္စယော။ ဒွေ.

ဝိပ္ပယုတ္တပစ္စယော

၄၆၂. ဥပါဒိန္နော ဓမ္မော ဥပါဒိန္နဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ. သဟဇာတံ – ပဋိသန္ဓိက္ခဏေ ဥပါဒိန္နာ ခန္ဓာ ကဋတ္တာရူပါနံ ဝိပ္ပယုတ္တပစ္စယေန ပစ္စယော၊ ခန္ဓာ ဝတ္ထုဿ ဝိပ္ပယုတ္တပစ္စယေန ပစ္စယော၊ ဝတ္ထု ခန္ဓာနံ ဝိပ္ပယုတ္တပစ္စယေန ပစ္စယော. ပုရေဇာတံ – စက္ခာယတနံ စက္ခုဝိညာဏဿ။ပေ။ ကာယာယတနံ ကာယဝိညာဏဿ။ပေ။ ဝတ္ထု ဥပါဒိန္နာနံ ခန္ဓာနံ ဝိပ္ပယုတ္တပစ္စယေန ပစ္စယော. ပစ္ဆာဇာတာ – ဥပါဒိန္နာ ခန္ဓာ ပုရေဇာတဿ ဣမဿ ဥပါဒိန္နဿ ကာယဿ ဝိပ္ပယုတ္တပစ္စယေန ပစ္စယော. (၁)

ဥပါဒိန္နော ဓမ္မော အနုပါဒိန္နဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ. သဟဇာတာ – ဥပါဒိန္နာ ခန္ဓာ စိတ္တသမုဋ္ဌာနာနံ ရူပါနံ ဝိပ္ပယုတ္တပစ္စယေန ပစ္စယော. ပုရေဇာတံ – ဝတ္ထု အနုပါဒိန္နာနံ ခန္ဓာနံ ဝိပ္ပယုတ္တပစ္စယေန ပစ္စယော. ပစ္ဆာဇာတာ – ဥပါဒိန္နာ ခန္ဓာ ပုရေဇာတဿ ဣမဿ အနုပါဒိန္နဿ ကာယဿ ဝိပ္ပယုတ္တပစ္စယေန ပစ္စယော. (၂)

ဥပါဒိန္နော ဓမ္မော ဥပါဒိန္နဿ စ အနုပါဒိန္နဿ စ ဓမ္မဿ ဝိပ္ပယုတ္တပစ္စယေန ပစ္စယော. ပစ္ဆာဇာတာ – ဥပါဒိန္နာ ခန္ဓာ ပုရေဇာတဿ ဣမဿ ဥပါဒိန္နဿ စ အနုပါဒိန္နဿ စ ကာယဿ ဝိပ္ပယုတ္တပစ္စယေန ပစ္စယော. (၃)

၄၆၃. အနုပါဒိန္နော ဓမ္မော အနုပါဒိန္နဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပစ္ဆာဇာတံ. သဟဇာတာ – အနုပါဒိန္နာ ခန္ဓာ စိတ္တသမုဋ္ဌာနာနံ ရူပါနံ ဝိပ္ပယုတ္တပစ္စယေန ပစ္စယော. ပစ္ဆာဇာတာ – အနုပါဒိန္နာ ခန္ဓာ ပုရေဇာတဿ ဣမဿ အနုပါဒိန္နဿ ကာယဿ ဝိပ္ပယုတ္တပစ္စယေန ပစ္စယော. (၁)

အနုပါဒိန္နော ဓမ္မော ဥပါဒိန္နဿ ဓမ္မဿ ဝိပ္ပယုတ္တပစ္စယေန ပစ္စယော. ပစ္ဆာဇာတာ – အနုပါဒိန္နာ ခန္ဓာ ပုရေဇာတဿ ဣမဿ ဥပါဒိန္နဿ ကာယဿ ဝိပ္ပယုတ္တပစ္စယေန ပစ္စယော. (၂)

အနုပါဒိန္နော ဓမ္မော ဥပါဒိန္နဿ စ အနုပါဒိန္နဿ စ ဓမ္မဿ ဝိပ္ပယုတ္တပစ္စယေန ပစ္စယော. ပစ္ဆာဇာတာ – အနုပါဒိန္နာ ခန္ဓာ ပုရေဇာတဿ ဣမဿ ဥပါဒိန္နဿ စ အနုပါဒိန္နဿ စ ကာယဿ ဝိပ္ပယုတ္တပစ္စယေန ပစ္စယော. (၃)

အတ္ထိပစ္စယာဒိ

၄၆၄. ဥပါဒိန္နော ဓမ္မော ဥပါဒိန္နဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ၊ အာဟာရံ၊ ဣန္ဒြိယံ (သံခိတ္တံ. ယထာ နိက္ခိတ္တပဒါနိ ဝိဘဇိတဗ္ဗာနိ ပရိပုဏ္ဏာနိ). (၁)

ဥပါဒိန္နော ဓမ္မော အနုပါဒိန္နဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ၊ အာဟာရံ (သံခိတ္တံ၊ ယထာ နိက္ခိတ္တပဒါနိ ဝိတ္ထာရေတဗ္ဗာနိ. (၂)

ဥပါဒိန္နော ဓမ္မော ဥပါဒိန္နဿ စ အနုပါဒိန္နဿ စ ဓမ္မဿ အတ္ထိပစ္စယေန ပစ္စယော – သဟဇာတံ၊ ပစ္ဆာဇာတံ၊ အာဟာရံ (သံခိတ္တံ၊ ယထာ နိက္ခိတ္တပဒါနိ ဝိတ္ထာရေတဗ္ဗာနိ). (၃)

အနုပါဒိန္နော ဓမ္မော အနုပါဒိန္နဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ၊ အာဟာရံ (သံခိတ္တံ၊ ယထာ နိက္ခိတ္တပဒါနိ ဝိဘဇိတဗ္ဗာနိ). (၁)

အနုပါဒိန္နော ဓမ္မော ဥပါဒိန္နဿ ဓမ္မဿ အတ္ထိပစ္စယေန ပစ္စယော – ပုရေဇာတံ၊ ပစ္ဆာဇာတံ၊ အာဟာရံ. ပုရေဇာတံ – အနုပါဒိန္နေ ရူပေ။ သဒ္ဒေ။ ဂန္ဓေ။ ရသေ။ ဖောဋ္ဌဗ္ဗေ အနိစ္စတော။ပေ။ ဒေါမနဿံ ဥပ္ပဇ္ဇတိ၊ ကုသလာကုသလေ နိရုဒ္ဓေ ဝိပါကော တဒါရမ္မဏတာ ဥပ္ပဇ္ဇတိ၊ အနုပါဒိန္နံ ရူပါယတနံ စက္ခုဝိညာဏဿ။ပေ။ ဖောဋ္ဌဗ္ဗာယတနံ ကာယဝိညာဏဿ။ပေ။. ပစ္ဆာဇာတာ – အနုပါဒိန္နာ ခန္ဓာ ပုရေဇာတဿ ဣမဿ ဥပါဒိန္နဿ ကာယဿ အတ္ထိပစ္စယေန ပစ္စယော၊ အနုပါဒိန္နော ကဗဠီကာရော အာဟာရော ဣမဿ ဥပါဒိန္နဿ ကာယဿ အတ္ထိပစ္စယေန ပစ္စယော. (၂)

အနုပါဒိန္နော ဓမ္မော ဥပါဒိန္နဿ စ အနုပါဒိန္နဿ စ ဓမ္မဿ အတ္ထိပစ္စယေန ပစ္စယော – ပစ္ဆာဇာတံ၊ အာဟာရံ. ပစ္ဆာဇာတာ – အနုပါဒိန္နာ ခန္ဓာ ပုရေဇာတဿ ဣမဿ ဥပါဒိန္နဿ စ အနုပါဒိန္နဿ စ ကာယဿ အတ္ထိပစ္စယေန ပစ္စယော၊ အနုပါဒိန္နော ကဗဠီကာရော အာဟာရော ဣမဿ ဥပါဒိန္နဿ စ အနုပါဒိန္နဿ စ ကာယဿ အတ္ထိပစ္စယေန ပစ္စယော. (၃)

၄၆၅. ဥပါဒိန္နော စ အနုပါဒိန္နော စ ဓမ္မာ ဥပါဒိန္နဿ ဓမ္မဿ အတ္ထိပစ္စယေန ပစ္စယော – ပုရေဇာတံ၊ ပစ္ဆာဇာတံ၊ အာဟာရံ၊ ဣန္ဒြိယံ. ပုရေဇာတံ – အနုပါဒိန္နံ ရူပါယတနဉ္စ စက္ခာယတနဉ္စ စက္ခုဝိညာဏဿ။ပေ။ အနုပါဒိန္နံ ဖောဋ္ဌဗ္ဗာယတနဉ္စ ကာယာယတနဉ္စ ကာယဝိညာဏဿ အတ္ထိပစ္စယေန ပစ္စယော၊ အနုပါဒိန္နံ ရူပါယတနဉ္စ ဝတ္ထု စ။ပေ။ ဖောဋ္ဌဗ္ဗာယတနဉ္စ ဝတ္ထု စ ဥပါဒိန္နာနံ ခန္ဓာနံ အတ္ထိပစ္စယေန ပစ္စယော. ပစ္ဆာဇာတာ – ဥပါဒိန္နာ ခန္ဓာ စ အနုပါဒိန္နော ကဗဠီကာရော အာဟာရော စ ဣမဿ ဥပါဒိန္နဿ ကာယဿ အတ္ထိပစ္စယေန ပစ္စယော. ပစ္ဆာဇာတာ – အနုပါဒိန္နာ ခန္ဓာ စ ရူပဇီဝိတိန္ဒြိယဉ္စ ကဋတ္တာရူပါနံ အတ္ထိပစ္စယေန ပစ္စယော. (၁)

ဥပါဒိန္နော စ အနုပါဒိန္နော စ ဓမ္မာ အနုပါဒိန္နဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ၊ အာဟာရံ. သဟဇာတာ – ဥပါဒိန္နာ ခန္ဓာ စ မဟာဘူတာ စ စိတ္တသမုဋ္ဌာနာနံ ရူပါနံ အတ္ထိပစ္စယေန ပစ္စယော. သဟဇာတော – အနုပါဒိန္နော ဧကော ခန္ဓော စ ဝတ္ထု စ တိဏ္ဏန္နံ ခန္ဓာနံ အတ္ထိပစ္စယေန ပစ္စယော။ပေ။ ဒွေ ခန္ဓာ စ။ပေ။. ပုရေဇာတံ – အနုပါဒိန္နံ ရူပါယတနဉ္စ ဝတ္ထု စ အနုပါဒိန္နာနံ ခန္ဓာနံ အတ္ထိပစ္စယေန ပစ္စယော။ပေ။ ဖောဋ္ဌဗ္ဗာယတနဉ္စ ဝတ္ထု စ အနုပါဒိန္နာနံ ခန္ဓာနံ အတ္ထိပစ္စယေန ပစ္စယော. ပစ္ဆာဇာတာ – ဥပါဒိန္နာ ခန္ဓာ စ အနုပါဒိန္နော ကဗဠီကာရော အာဟာရော စ ဣမဿ အနုပါဒိန္နဿ ကာယဿ အတ္ထိပစ္စယေန ပစ္စယော. (၂)

ဥပါဒိန္နော စ အနုပါဒိန္နော စ ဓမ္မာ ဥပါဒိန္နဿ စ အနုပါဒိန္နဿ စ ဓမ္မဿ အတ္ထိပစ္စယေန ပစ္စယော. အာဟာရံ – ဥပါဒိန္နော စ အနုပါဒိန္နော စ ကဗဠီကာရော အာဟာရော ဣမဿ ဥပါဒိန္နဿ စ အနုပါဒိန္နဿ စ ကာယဿ အတ္ထိပစ္စယေန ပစ္စယော. (၃)

နတ္ထိပစ္စယေန ပစ္စယော။ ဝိဂတပစ္စယေန ပစ္စယော။ အဝိဂတပစ္စယေန ပစ္စယော.