၁. ဝိဘင်္ဂဝါရော
နဟေတုပစ္စယော
၄၂၀. ဥပါဒိန္နံ ဓမ္မံ ပဋိစ္စ ဥပါဒိန္နော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ ဥပါဒိန္နံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓေ။ပေ။ အဟေတုကပဋိသန္ဓိက္ခဏေ ဥပါဒိန္နံ ဧကံ ခန္ဓံ ပဋိစ္စ တယော ခန္ဓာ ကဋတ္တာ စ ရူပံ။ပေ။ ဒွေ ခန္ဓေ။ပေ။ ခန္ဓေ ပဋိစ္စ ဝတ္ထု၊ ဝတ္ထုံ ပဋိစ္စ ခန္ဓာ၊ ဧကံ မဟာဘူတံ ပဋိစ္စ။ပေ။ မဟာဘူတေ ပဋိစ္စ ကဋတ္တာရူပံ ဥပါဒါရူပံ၊ အသညသတ္တာနံ ဧကံ မဟာဘူတံ ပဋိစ္စ။ပေ။ မဟာဘူတေ ပဋိစ္စ ကဋတ္တာရူပံ ဥပါဒါရူပံ. (၁)
ဥပါဒိန္နံ ဓမ္မံ ပဋိစ္စ အနုပါဒိန္နော ဓမ္မော ဥပ္ပဇ္ဇတိ နဟေတုပစ္စယာ – အဟေတုကေ ဥပါဒိန္နေ ခန္ဓေ ပဋိစ္စ စိတ္တသမုဋ္ဌာနံ ရူပံ. (၂)
ဥပါဒိန္နံ ဓမ္မံ ပဋိစ္စ ဥပါဒိန္နော စ အနုပါဒိန္နော စ ဓမ္မာ ဥပ္ပဇ္ဇန္တိ နဟေတုပစ္စယာ – အဟေတုကံ ဥပါဒိန္နံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။. (၃)
၄၂၁. အနုပါဒိန္နံ ဓမ္မံ ပဋိစ္စ အနုပါဒိန္နော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ အနုပါဒိန္နံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။ ဧကံ မဟာဘူတံ။ပေ။ မဟာဘူတေ ပဋိစ္စ စိတ္တသမုဋ္ဌာနံ ရူပံ ဥပါဒါရူပံ. ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ ဧကံ မဟာဘူတံ။ပေ။ မဟာဘူတေ ပဋိစ္စ ဥပါဒါရူပံ. ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ ပဋိစ္စ ဝိစိကိစ္ဆာသဟဂတော ဥဒ္ဓစ္စသဟဂတော မောဟော. (၁)
ဥပါဒိန္နဉ္စ အနုပါဒိန္နဉ္စ ဓမ္မံ ပဋိစ္စ အနုပါဒိန္နော ဓမ္မော ဥပ္ပဇ္ဇတိ နဟေတုပစ္စယာ – အဟေတုကေ ဥပါဒိန္နေ ခန္ဓေ စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ. (၁)
နအာရမ္မဏပစ္စယော
၄၂၂. ဥပါဒိန္နံ ဓမ္မံ ပဋိစ္စ ဥပါဒိန္နော ဓမ္မော ဥပ္ပဇ္ဇတိ နအာရမ္မဏပစ္စယာ – ပဋိသန္ဓိက္ခဏေ ဥပါဒိန္နေ ခန္ဓေ ပဋိစ္စ ကဋတ္တာရူပံ၊ ခန္ဓေ ပဋိစ္စ ဝတ္ထု၊ ဧကံ မဟာဘူတံ။ပေ။ မဟာဘူတေ ပဋိစ္စ ကဋတ္တာရူပံ ဥပါဒါရူပံ. အသညသတ္တာနံ ဧကံ မဟာဘူတံ။ပေ။ မဟာဘူတေ ပဋိစ္စ ကဋတ္တာရူပံ ဥပါဒါရူပံ. (၁)
ဥပါဒိန္နံ ဓမ္မံ ပဋိစ္စ အနုပါဒိန္နော ဓမ္မော ဥပ္ပဇ္ဇတိ နအာရမ္မဏပစ္စယာ – ဥပါဒိန္နေ ခန္ဓေ ပဋိစ္စ စိတ္တသမုဋ္ဌာနံ ရူပံ. (၂)
အနုပါဒိန္နံ ဓမ္မံ ပဋိစ္စ အနုပါဒိန္နော ဓမ္မော ဥပ္ပဇ္ဇတိ နအာရမ္မဏပစ္စယာ – အနုပါဒိန္နေ ခန္ဓေ ပဋိစ္စ စိတ္တသမုဋ္ဌာနံ ရူပံ၊ ဧကံ မဟာဘူတံ။ပေ။ ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ ဧကံ မဟာဘူတံ။ပေ။ မဟာဘူတေ ပဋိစ္စ ဥပါဒါရူပံ. (၁)
ဥပါဒိန္နဉ္စ အနုပါဒိန္နဉ္စ ဓမ္မံ ပဋိစ္စ အနုပါဒိန္နော ဓမ္မော ဥပ္ပဇ္ဇတိ နအာရမ္မဏပစ္စယာ – ဥပါဒိန္နေ ခန္ဓေ စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ. (၁)
နအဓိပတိပစ္စယာဒိ
၄၂၃. ဥပါဒိန္နံ ဓမ္မံ ပဋိစ္စ ဥပါဒိန္နော ဓမ္မော ဥပ္ပဇ္ဇတိ နအဓိပတိပစ္စယာ။ နအနန္တရပစ္စယာ။ နသမနန္တရပစ္စယာ။ နအညမညပစ္စယာ။ နဥပနိဿယပစ္စယာ.
နပုရေဇာတပစ္စယာဒိ
၄၂၄. ဥပါဒိန္နံ ဓမ္မံ ပဋိစ္စ ဥပါဒိန္နော ဓမ္မော ဥပ္ပဇ္ဇတိ နပုရေဇာတပစ္စယာ – အရူပေ ဥပါဒိန္နံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓေ။ပေ။ ပဋိသန္ဓိက္ခဏေ ဥပါဒိန္နံ ဧကံ ခန္ဓံ ပဋိစ္စ တယော ခန္ဓာ ကဋတ္တာ စ ရူပံ။ပေ။ ဒွေ ခန္ဓေ။ပေ။ (ယာဝ အသညသတ္တာ). (၁)
ဥပါဒိန္နံ ဓမ္မံ ပဋိစ္စ အနုပါဒိန္နော ဓမ္မော ဥပ္ပဇ္ဇတိ နပုရေဇာတပစ္စယာ – ဥပါဒိန္နေ ခန္ဓေ ပဋိစ္စ စိတ္တသမုဋ္ဌာနံ ရူပံ. (၂)
အနုပါဒိန္နံ ဓမ္မံ ပဋိစ္စ အနုပါဒိန္နော ဓမ္မော ဥပ္ပဇ္ဇတိ နပုရေဇာတပစ္စယာ – အရူပေ အနုပါဒိန္နံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓေ။ပေ။ အနုပါဒိန္နေ ခန္ဓေ ပဋိစ္စ စိတ္တသမုဋ္ဌာနံ ရူပံ၊ ဧကံ မဟာဘူတံ။ပေ။ (ယာဝ အသညသတ္တာ). (၁)
ဥပါဒိန္နဉ္စ အနုပါဒိန္နဉ္စ ဓမ္မံ ပဋိစ္စ အနုပါဒိန္နော ဓမ္မော ဥပ္ပဇ္ဇတိ နပုရေဇာတပစ္စယာ – ဥပါဒိန္နေ ခန္ဓေ စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ။ နပစ္ဆာဇာတပစ္စယာ။ နအာသေဝနပစ္စယာ. (၁)
နကမ္မပစ္စယော
၄၂၅. အနုပါဒိန္နံ ဓမ္မံ ပဋိစ္စ အနုပါဒိန္နော ဓမ္မော ဥပ္ပဇ္ဇတိ နကမ္မပစ္စယာ – အနုပါဒိန္နေ ခန္ဓေ ပဋိစ္စ အနုပါဒိန္နာ စေတနာ။ ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ။ပေ။ မဟာဘူတေ ပဋိစ္စ ဥပါဒါရူပံ. (၁)
နဝိပါကပစ္စယော
၄၂၆. ဥပါဒိန္နံ ဓမ္မံ ပဋိစ္စ ဥပါဒိန္နော ဓမ္မော ဥပ္ပဇ္ဇတိ နဝိပါကပစ္စယာ – အသညသတ္တာနံ ဧကံ မဟာဘူတံ။ပေ။ မဟာဘူတေ ပဋိစ္စ ကဋတ္တာရူပံ ဥပါဒါရူပံ. (၁)
အနုပါဒိန္နံ ဓမ္မံ ပဋိစ္စ အနုပါဒိန္နော ဓမ္မော ဥပ္ပဇ္ဇတိ နဝိပါကပစ္စယာ – အနုပါဒိန္နံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။ ဧကံ မဟာဘူတံ။ပေ။ (ယာဝ ဥတုသမုဋ္ဌာနံ).
နအာဟာရပစ္စယော
၄၂၇. ဥပါဒိန္နံ ဓမ္မံ ပဋိစ္စ ဥပါဒိန္နော ဓမ္မော ဥပ္ပဇ္ဇတိ နအာဟာရပစ္စယာ – အသညသတ္တာနံ ဧကံ မဟာဘူတံ။ပေ။. (၁)
အနုပါဒိန္နံ ဓမ္မံ ပဋိစ္စ အနုပါဒိန္နော ဓမ္မော ဥပ္ပဇ္ဇတိ နအာဟာရပစ္စယာ – ဗာဟိရံ။ ဥတုသမုဋ္ဌာနံ။ပေ။. (၁)
နဣန္ဒြိယပစ္စယော
၄၂၈. ဥပါဒိန္နံ ဓမ္မံ ပဋိစ္စ ဥပါဒိန္နော ဓမ္မော ဥပ္ပဇ္ဇတိ နဣန္ဒြိယပစ္စယာ – အသညသတ္တာနံ မဟာဘူတေ ပဋိစ္စ ရူပဇီဝိတိန္ဒြိယံ. (၁)
အနုပါဒိန္နံ ဓမ္မံ ပဋိစ္စ အနုပါဒိန္နော ဓမ္မော ဥပ္ပဇ္ဇတိ နဣန္ဒြိယပစ္စယာ – ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ။ပေ။. (၁)
နဈာနပစ္စယာဒိ
၄၂၉. ဥပါဒိန္နံ ဓမ္မံ ပဋိစ္စ ဥပါဒိန္နော ဓမ္မော ဥပ္ပဇ္ဇတိ နဈာနပစ္စယာ – ပဉ္စဝိညာဏသဟဂတံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓေ။ပေ။ အသညသတ္တာနံ။ပေ။.
အနုပါဒိန္နံ ဓမ္မံ ပဋိစ္စ အနုပါဒိန္နော ဓမ္မော ဥပ္ပဇ္ဇတိ နဈာနပစ္စယာ – ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ။ပေ။.
ဥပါဒိန္နံ ဓမ္မံ ပဋိစ္စ ဥပါဒိန္နော ဓမ္မော ဥပ္ပဇ္ဇတိ နမဂ္ဂပစ္စယာ (နဟေတုသဒိသံ၊ မောဟော နတ္ထိ)။ နသမ္ပယုတ္တပစ္စယာ.
နဝိပ္ပယုတ္တပစ္စယာဒိ
၄၃၀. ဥပါဒိန္နံ ဓမ္မံ ပဋိစ္စ ဥပါဒိန္နော ဓမ္မော ဥပ္ပဇ္ဇတိ နဝိပ္ပယုတ္တပစ္စယာ – အရူပေ ဥပါဒိန္နံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓေ။ပေ။ အသညသတ္တာနံ ဧကံ မဟာဘူတံ ပဋိစ္စ။ပေ။.
အနုပါဒိန္နံ ဓမ္မံ ပဋိစ္စ အနုပါဒိန္နော ဓမ္မော ဥပ္ပဇ္ဇတိ နဝိပ္ပယုတ္တပစ္စယာ – အရူပေ အနုပါဒိန္နံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓေ။ပေ။ ဗာဟိရံ ။ အာဟာရသမုဋ္ဌာနံ။ ဥတုသမုဋ္ဌာနံ။ပေ။ နောနတ္ထိပစ္စယာ။ နောဝိဂတပစ္စယာ.