၁. ဝိဘင်္ဂဝါရော

ဟေတုပစ္စယော

၄၁၆. ဥပါဒိန္နံ ဓမ္မံ ပဋိစ္စ ဥပါဒိန္နော ဓမ္မော ဥပ္ပဇ္ဇတိ ဟေတုပစ္စယာ – ဥပါဒိန္နံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓေ။ပေ။ ပဋိသန္ဓိက္ခဏေ ဥပါဒိန္နံ ဧကံ ခန္ဓံ ပဋိစ္စ တယော ခန္ဓာ ကဋတ္တာ စ ရူပံ။ပေ။ ဒွေ ခန္ဓေ။ပေ။ ခန္ဓေ ပဋိစ္စ ဝတ္ထု၊ ဝတ္ထုံ ပဋိစ္စ ခန္ဓာ၊ ဧကံ မဟာဘူတံ။ပေ။ မဟာဘူတေ ပဋိစ္စ ကဋတ္တာရူပံ ဥပါဒါရူပံ. (၁)

ဥပါဒိန္နံ ဓမ္မံ ပဋိစ္စ အနုပါဒိန္နော ဓမ္မော ဥပ္ပဇ္ဇတိ ဟေတုပစ္စယာ – ဥပါဒိန္နေ ခန္ဓေ ပဋိစ္စ စိတ္တသမုဋ္ဌာနံ ရူပံ. (၂)

ဥပါဒိန္နံ ဓမ္မံ ပဋိစ္စ ဥပါဒိန္နော စ အနုပါဒိန္နော စ ဓမ္မာ ဥပ္ပဇ္ဇန္တိ ဟေတုပစ္စယာ – ဥပါဒိန္နံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။. (၃)

အနုပါဒိန္နံ ဓမ္မံ ပဋိစ္စ အနုပါဒိန္နော ဓမ္မော ဥပ္ပဇ္ဇတိ ဟေတုပစ္စယာ – အနုပါဒိန္နံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။ ဧကံ မဟာဘူတံ ပဋိစ္စ။ပေ။ မဟာဘူတေ ပဋိစ္စ စိတ္တသမုဋ္ဌာနံ ရူပံ ဥပါဒါရူပံ. (၁)

ဥပါဒိန္နဉ္စ အနုပါဒိန္နဉ္စ ဓမ္မံ ပဋိစ္စ အနုပါဒိန္နော ဓမ္မော ဥပ္ပဇ္ဇတိ ဟေတုပစ္စယာ – ဥပါဒိန္နေ ခန္ဓေ စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ. (၁)

အာရမ္မဏပစ္စယော

၄၁၇. ဥပါဒိန္နံ ဓမ္မံ ပဋိစ္စ ဥပါဒိန္နော ဓမ္မော ဥပ္ပဇ္ဇတိ အာရမ္မဏပစ္စယာ – ဥပါဒိန္နံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓေ။ပေ။ ပဋိသန္ဓိက္ခဏေ။ပေ။ ဝတ္ထုံ ပဋိစ္စ ခန္ဓာ. (၁)

အနုပါဒိန္နံ ဓမ္မံ ပဋိစ္စ အနုပါဒိန္နော ဓမ္မော ဥပ္ပဇ္ဇတိ အာရမ္မဏပစ္စယာ – အနုပါဒိန္နံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓေ။ပေ။. (၁)

အဓိပတိပစ္စယော

၄၁၈. အနုပါဒိန္နံ ဓမ္မံ ပဋိစ္စ အနုပါဒိန္နော ဓမ္မော ဥပ္ပဇ္ဇတိ အဓိပတိပစ္စယာ – အနုပါဒိန္နံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။ ဧကံ မဟာဘူတံ ပဋိစ္စ။ပေ။ မဟာဘူတေ ပဋိစ္စ စိတ္တသမုဋ္ဌာနံ ရူပံ ဥပါဒါရူပံ (သံခိတ္တံ).