၅. သံသဋ္ဌဝါရော

၁-၄. ပစ္စယာနုလောမာဒိ

၃၉၃. နောဥပါဒါ ဓမ္မံ သံသဋ္ဌော နောဥပါဒါ ဓမ္မော ဥပ္ပဇ္ဇတိ ဟေတုပစ္စယာ – နောဥပါဒါ ဧကံ ခန္ဓံ သံသဋ္ဌာ တယော ခန္ဓာ။ပေ။ ဒွေ ခန္ဓေ သံသဋ္ဌာ ဒွေ ခန္ဓာ၊ ပဋိသန္ဓိက္ခဏေ။ပေ။ (သံခိတ္တံ).

ဟေတုယာ ဧကံ၊ အာရမ္မဏေ ဧကံ၊ အဓိပတိယာ ဧကံ (သဗ္ဗတ္ထ ဧကံ)၊ အဝိဂတေ ဧကံ.

အနုလောမံ.

နောဥပါဒါ ဓမ္မံ သံသဋ္ဌော နောဥပါဒါ ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ နောဥပါဒါ ဧကံ ခန္ဓံ သံသဋ္ဌာ တယော ခန္ဓာ။ပေ။ ဒွေ ခန္ဓေ။ပေ။ အဟေတုကပဋိသန္ဓိက္ခဏေ။ပေ။ ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ သံသဋ္ဌော ဝိစိကိစ္ဆာသဟဂတော ဥဒ္ဓစ္စသဟဂတော မောဟော (သံခိတ္တံ).

နဟေတုယာ ဧကံ၊ နအဓိပတိယာ ဧကံ၊ နပုရေဇာတေ ဧကံ၊ နပစ္ဆာဇာတေ ဧကံ၊ နအာသေဝနေ ဧကံ၊ နကမ္မေ ဧကံ၊ နဝိပါကေ ဧကံ၊ နဈာနေ ဧကံ၊ နမဂ္ဂေ ဧကံ၊ နဝိပ္ပယုတ္တေ ဧကံ.

ပစ္စနီယံ.