၁. ဝိဘင်္ဂဝါရော

ဟေတုပစ္စယော

၃၄၀. ဗာဟိရော ဓမ္မော ဗာဟိရဿ ဓမ္မဿ ဟေတုပစ္စယေန ပစ္စယော – ဗာဟိရာ ဟေတူ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော – ပဋိသန္ဓိက္ခဏေ ဗာဟိရာ ဟေတူ သမ္ပယုတ္တကာနံ ခန္ဓာနံ ဗာဟိရာနဉ္စ ကဋတ္တာရူပါနံ ဟေတုပစ္စယေန ပစ္စယော. (၁)

ဗာဟိရော ဓမ္မော အဇ္ဈတ္တိကဿ ဓမ္မဿ ဟေတုပစ္စယေန ပစ္စယော – ဗာဟိရာ ဟေတူ စိတ္တဿ ဟေတုပစ္စယေန ပစ္စယော၊ ပဋိသန္ဓိက္ခဏေ ဗာဟိရာ ဟေတူ စိတ္တဿ အဇ္ဈတ္တိကာနဉ္စ ကဋတ္တာရူပါနံ ဟေတုပစ္စယေန ပစ္စယော. (၂)

ဗာဟိရော ဓမ္မော အဇ္ဈတ္တိကဿ စ ဗာဟိရဿ စ ဓမ္မဿ ဟေတုပစ္စယေန ပစ္စယော – ဗာဟိရာ ဟေတူ သမ္ပယုတ္တကာနံ ခန္ဓာနံ စိတ္တဿ စ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော၊ ပဋိသန္ဓိက္ခဏေ ဗာဟိရာ ဟေတူ သမ္ပယုတ္တကာနံ ခန္ဓာနံ စိတ္တဿ စ အဇ္ဈတ္တိကာနဉ္စ ဗာဟိရာနဉ္စ ကဋတ္တာရူပါနံ ဟေတုပစ္စယေန ပစ္စယော. (၃)

အာရမ္မဏပစ္စယော

၃၄၁. အဇ္ဈတ္တိကော ဓမ္မော အဇ္ဈတ္တိကဿ ဓမ္မဿ အာရမ္မဏပစ္စယေန ပစ္စယော – စိတ္တံ အာရဗ္ဘ စိတ္တံ ဥပ္ပဇ္ဇတိ. (မူလံ ပုစ္ဆိတဗ္ဗံ) စိတ္တံ အာရဗ္ဘ ဗာဟိရာ ခန္ဓာ ဥပ္ပဇ္ဇန္တိ. (မူလံ ပုစ္ဆိတဗ္ဗံ) စိတ္တံ အာရဗ္ဘ စိတ္တဉ္စ သမ္ပယုတ္တကာ စ ခန္ဓာ ဥပ္ပဇ္ဇန္တိ. (၃)

ဗာဟိရော ဓမ္မော ဗာဟိရဿ ဓမ္မဿ အာရမ္မဏပစ္စယေန ပစ္စယော – ဒါနံ။ပေ။ သီလံ။ပေ။ ဥပေါသထကမ္မံ ကတွာ တံ ပစ္စဝေက္ခတိ အဿာဒေတိ အဘိနန္ဒတိ၊ တံ အာရဗ္ဘ ရာဂေါ။ပေ။ ဒေါမနဿံ ဥပ္ပဇ္ဇတိ၊ ပုဗ္ဗေ သုစိဏ္ဏာနိ ပစ္စဝေက္ခတိ၊ ဈာနာ ဝုဋ္ဌဟိတွာ ဈာနံ။ပေ။ အရိယာ မဂ္ဂါ ဝုဋ္ဌဟိတွာ မဂ္ဂံ။ပေ။ ဖလံ။ပေ။ နိဗ္ဗာနံ ပစ္စဝေက္ခန္တိ။ နိဗ္ဗာနံ ဂေါတြဘုဿ၊ ဝေါဒါနဿ၊ မဂ္ဂဿ၊ ဖလဿ၊ အာဝဇ္ဇနာယ အာရမ္မဏပစ္စယေန ပစ္စယော. အရိယာ ဗာဟိရေ ပဟီနေ ကိလေသေ ပစ္စဝေက္ခန္တိ၊ ဝိက္ခမ္ဘိတေ ကိလေသေ။ပေ။ ပုဗ္ဗေ သမုဒါစိဏ္ဏေ ကိလေသေ ဇာနန္တိ၊ ရူပေ။ပေ။ ဝတ္ထုံ ဗာဟိရေ ခန္ဓေ အနိစ္စတော။ပေ။ ဒေါမနဿံ ဥပ္ပဇ္ဇတိ၊ ဒိဗ္ဗေန စက္ခုနာ ရူပံ ပဿတိ၊ ဒိဗ္ဗာယ သောတဓာတုယာ သဒ္ဒံ သုဏာတိ. စေတောပရိယဉာဏေန ဗာဟိရစိတ္တသမင်္ဂိဿ စိတ္တံ ဇာနာတိ၊ အာကာသာနဉ္စာယတနံ ဝိညာဏဉ္စာယတနဿ။ပေ။ အာကိဉ္စညာယတနံ နေဝသညာနာသညာယတနဿ။ပေ။ ရူပါယတနံ စက္ခုဝိညာဏသဟဂတာနံ ခန္ဓာနံ အာရမ္မဏပစ္စယေန ပစ္စယော။ပေ။ ဖောဋ္ဌဗ္ဗာယတနံ။ပေ။ ဗာဟိရာ ခန္ဓာ ဣဒ္ဓိဝိဓဉာဏဿ၊ စေတောပရိယဉာဏဿ၊ ပုဗ္ဗေနိဝါသာနုဿတိဉာဏဿ၊ ယထာကမ္မူပဂဉာဏဿ၊ အနာဂတံသဉာဏဿ၊ အာဝဇ္ဇနာယ အာရမ္မဏပစ္စယေန ပစ္စယော. (၁)

ဗာဟိရော ဓမ္မော အဇ္ဈတ္တိကဿ ဓမ္မဿ အာရမ္မဏပစ္စယေန ပစ္စယော – ဒါနံ။ပေ။ သီလံ။ပေ။ ဥပေါသထကမ္မံ ကတွာ တံ ပစ္စဝေက္ခတိ အဿာဒေတိ အဘိနန္ဒတိ၊ တံ အာရဗ္ဘ စိတ္တံ ဥပ္ပဇ္ဇတိ. ပုဗ္ဗေ သုစိဏ္ဏာနိ။ပေ။ ဈာနံ။ပေ။ (သံခိတ္တံ၊ သဗ္ဗံ ကာတဗ္ဗံ) ပုဗ္ဗေ သမုဒါစိဏ္ဏေ။ပေ။ ရူပေ။ပေ။ ဝတ္ထုံ ဗာဟိရေ ခန္ဓေ အနိစ္စတော။ပေ။ ဝိပဿတိ၊ အဿာဒေတိ အဘိနန္ဒတိ၊ တံ အာရဗ္ဘ စိတ္တံ ဥပ္ပဇ္ဇတိ. ဒိဗ္ဗေန စက္ခုနာ ရူပံ ပဿတိ။ပေ။ ရူပါယတနံ စက္ခုဝိညာဏဿ။ပေ။ ဖောဋ္ဌဗ္ဗာယတနံ။ပေ။ ဗာဟိရာ ခန္ဓာ ဣဒ္ဓိဝိဓဉာဏဿ၊ စေတောပရိယဉာဏဿ၊ ပုဗ္ဗေနိဝါသာနုဿတိဉာဏဿ၊ ယထာကမ္မူပဂဉာဏဿ၊ အနာဂတံသဉာဏဿ၊ အာဝဇ္ဇနာယ အာရမ္မဏပစ္စယေန ပစ္စယော. (၃)

ဗာဟိရော ဓမ္မော အဇ္ဈတ္တိကဿ စ ဗာဟိရဿ စ ဓမ္မဿ အာရမ္မဏပစ္စယေန ပစ္စယော – ဒါနံ။ပေ။ သီလံ။ပေ။ ဥပေါသထကမ္မံ ကတွာ တံ ပစ္စဝေက္ခတိ အဿာဒေတိ အဘိနန္ဒတိ၊ တံ အာရဗ္ဘ စိတ္တဉ္စ သမ္ပယုတ္တကာ စ ခန္ဓာ ဥပ္ပဇ္ဇန္တိ (သံခိတ္တံ၊ သဗ္ဗံ ကာတဗ္ဗံ). ဗာဟိရေ ခန္ဓေ အနိစ္စတော။ပေ။ ဝိပဿတိ၊ အဿာဒေတိ အဘိနန္ဒတိ၊ တံ အာရဗ္ဘ စိတ္တဉ္စ သမ္ပယုတ္တကာ စ ခန္ဓာ ဥပ္ပဇ္ဇန္တိ. ဒိဗ္ဗေန စက္ခုနာ ရူပံ ပဿတိ။ပေ။ ရူပါယတနံ စက္ခုဝိညာဏဿ စ သမ္ပယုတ္တကာနဉ္စ ခန္ဓာနံ။ပေ။ ဖောဋ္ဌဗ္ဗာယတနံ။ပေ။ ဗာဟိရာ ခန္ဓာ ဣဒ္ဓိဝိဓဉာဏဿ၊ စေတောပရိယဉာဏဿ၊ ပုဗ္ဗေနိဝါသာနုဿတိဉာဏဿ၊ ယထာကမ္မူပဂဉာဏဿ၊ အနာဂတံသဉာဏဿ၊ အာဝဇ္ဇနာယ အာရမ္မဏပစ္စယေန ပစ္စယော. (၃)

အဇ္ဈတ္တိကော စ ဗာဟိရော စ ဓမ္မာ အဇ္ဈတ္တိကဿ ဓမ္မဿ အာရမ္မဏပစ္စယေန ပစ္စယော။ တီဏိ.

အဓိပတိပစ္စယော

၃၄၂. အဇ္ဈတ္တိကော ဓမ္မော အဇ္ဈတ္တိကဿ ဓမ္မဿ အဓိပတိပစ္စယေန ပစ္စယော. အာရမ္မဏာဓိပတိ – စိတ္တံ ဂရုံ ကတွာ စိတ္တံ ဥပ္ပဇ္ဇတိ. (၁)

အဇ္ဈတ္တိကော ဓမ္မော ဗာဟိရဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ. အာရမ္မဏာဓိပတိ – စိတ္တံ ဂရုံ ကတွာ ဗာဟိရာ ခန္ဓာ ဥပ္ပဇ္ဇန္တိ. သဟဇာတာဓိပတိ – စိတ္တာဓိပတိ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ အဓိပတိပစ္စယေန ပစ္စယော. (မူလံ) အာရမ္မဏာဓိပတိ – အဇ္ဈတ္တိကံ စိတ္တံ ဂရုံ ကတွာ စိတ္တဉ္စ သမ္ပယုတ္တကာ စ ခန္ဓာ ဥပ္ပဇ္ဇန္တိ. (၃)

ဗာဟိရော ဓမ္မော ဗာဟိရဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ. အာရမ္မဏာဓိပတိ – ဒါနံ ဒတွာ။ပေ။ တီဏိ (ဒွေ အဓိပတီ တိဏ္ဏမ္ပိ ကာတဗ္ဗာ). (၃)

အဇ္ဈတ္တိကော စ ဗာဟိရော စ ဓမ္မာ အဇ္ဈတ္တိကဿ ဓမ္မဿ အဓိပတိပစ္စယေန ပစ္စယော။ တီဏိ (တိဏ္ဏမ္ပိ ဧကာယေဝ အဓိပတိ).

အနန္တရပစ္စယာဒိ

၃၄၃. အဇ္ဈတ္တိကော ဓမ္မော အဇ္ဈတ္တိကဿ ဓမ္မဿ အနန္တရပစ္စယေန ပစ္စယော – ပုရိမံ ပုရိမံ စိတ္တံ ပစ္ဆိမဿ ပစ္ဆိမဿ စိတ္တဿ အနန္တရပစ္စယေန ပစ္စယော။ တီဏိ.

ဗာဟိရော ဓမ္မော ဗာဟိရဿ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ ဗာဟိရာ ခန္ဓာ ပစ္ဆိမာနံ ပစ္ဆိမာနံ ခန္ဓာနံ အနန္တရပစ္စယေန ပစ္စယော၊ အနုလောမံ ဂေါတြဘုဿ။ပေ။ တီဏိ (တိဏ္ဏမ္ပိ ဧကသဒိသာ).

အဇ္ဈတ္တိကော စ ဗာဟိရော စ ဓမ္မာ အဇ္ဈတ္တိကဿ ဓမ္မဿ အနန္တရပစ္စယေန ပစ္စယော။ တီဏိ၊ သမနန္တရပစ္စယေန ပစ္စယော။ နဝ၊ သဟဇာတပစ္စယေန ပစ္စယော။ နဝ (ပဋိစ္စသဒိသာ)၊ အညမညပစ္စယေန ပစ္စယော။ ပဉ္စ (ပဋိစ္စသဒိသာ)၊ နိဿယပစ္စယေန ပစ္စယော။ နဝ၊ (ပစ္စယဝါရသဒိသာ).

ဥပနိဿယပစ္စယော

၃၄၄. အဇ္ဈတ္တိကော ဓမ္မော အဇ္ဈတ္တိကဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ပေ။. ပကတူပနိဿယော – စိတ္တံ စိတ္တဿ ဥပနိဿယပစ္စယေန ပစ္စယော။ တီဏိ.

ဗာဟိရော ဓမ္မော ဗာဟိရဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ပေ။. ပကတူပနိဿယော – သဒ္ဓံ ဥပနိဿာယ ဒါနံ ဒေတိ။ပေ။ မာနံ ဇပ္ပေတိ၊ ဒိဋ္ဌိံ ဂဏှာတိ၊ သီလံ။ပေ။ သေနာသနံ ဥပနိဿာယ ဒါနံ ဒေတိ။ပေ။ သံဃံ ဘိန္ဒတိ၊ သဒ္ဓါ။ပေ။ သေနာသနံ သဒ္ဓါယ။ပေ။ ဖလသမာပတ္တိယာ ဥပနိဿယပစ္စယေန ပစ္စယော၊ (တီဏိပိ ပူရေတွာ ကာတဗ္ဗာ၊ စိတ္တဿာတိ ကာတဗ္ဗာ၊ သမ္ပယုတ္တကာနဉ္စာတိ ကာတဗ္ဗာ).

အဇ္ဈတ္တိကော စ ဗာဟိရော စ ဓမ္မာ အဇ္ဈတ္တိကဿ ဓမ္မဿ ဥပနိဿယပစ္စယေန ပစ္စယော။ တီဏိ.

ပုရေဇာတပစ္စယော

၃၄၅. အဇ္ဈတ္တိကော ဓမ္မော အဇ္ဈတ္တိကဿ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ. အာရမ္မဏပုရေဇာတံ – စက္ခုံ ။ပေ။ ကာယံ အနိစ္စတော။ပေ။ ဝိပဿတိ၊ အဿာဒေတိ အဘိနန္ဒတိ၊ တံ အာရဗ္ဘ စိတ္တံ ဥပ္ပဇ္ဇတိ. ဝတ္ထုပုရေဇာတံ – စက္ခာယတနံ စက္ခုဝိညာဏဿ။ပေ။ ကာယာယတနံ ကာယဝိညာဏဿ ပုရေဇာတပစ္စယေန ပစ္စယော. (၁)

အဇ္ဈတ္တိကော ဓမ္မော ဗာဟိရဿ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ. အာရမ္မဏပုရေဇာတံ – စက္ခုံ။ပေ။ ကာယံ အနိစ္စတော။ပေ။ ဝိပဿတိ၊ အဿာဒေတိ။ပေ။ ဒေါမနဿံ ဥပ္ပဇ္ဇတိ. ဝတ္ထုပုရေဇာတံ – စက္ခာယတနံ စက္ခုဝိညာဏသဟဂတာနံ ခန္ဓာနံ။ပေ။ ကာယာယတနံ ကာယဝိညာဏသဟဂတာနံ ခန္ဓာနံ ပုရေဇာတပစ္စယေန ပစ္စယော. (၂)

အဇ္ဈတ္တိကော ဓမ္မော အဇ္ဈတ္တိကဿ စ ဗာဟိရဿ စ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ. အာရမ္မဏပုရေဇာတံ – စက္ခုံ။ပေ။ ကာယံ အနိစ္စတော။ပေ။ ဝိပဿတိ၊ တံ အာရဗ္ဘ စိတ္တဉ္စ သမ္ပယုတ္တကာ ခန္ဓာ စ ဥပ္ပဇ္ဇန္တိ. ဝတ္ထုပုရေဇာတံ – စက္ခာယတနံ စက္ခုဝိညာဏဿ သမ္ပယုတ္တကာနဉ္စ ခန္ဓာနံ။ပေ။ ကာယာယတနံ ကာယဝိညာဏဿ သမ္ပယုတ္တကာနဉ္စ ခန္ဓာနံ ပုရေဇာတပစ္စယေန ပစ္စယော. (၃)

၃၄၆. ဗာဟိရော ဓမ္မော ဗာဟိရဿ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ. အာရမ္မဏပုရေဇာတံ – ရူပေ။ပေ။ ဖောဋ္ဌဗ္ဗေ။ ဝတ္ထုံ အနိစ္စတော။ပေ။ ဒေါမနဿံ ဥပ္ပဇ္ဇတိ၊ ဒိဗ္ဗေန စက္ခုနာ ရူပံ ပဿတိ၊ ဒိဗ္ဗာယ သောတဓာတုယာ သဒ္ဒံ သုဏာတိ. ဝတ္ထုပုရေဇာတံ – ဝတ္ထု ဗာဟိရာနံ ခန္ဓာနံ ပုရေဇာတပစ္စယေန ပစ္စယော. (၁)

ဗာဟိရော ဓမ္မော အဇ္ဈတ္တိကဿ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ. အာရမ္မဏပုရေဇာတံ – ရူပေ။ပေ။ ဖောဋ္ဌဗ္ဗေ။ ဝတ္ထုံ အနိစ္စတော။ပေ။ တံ အာရဗ္ဘ စိတ္တံ ဥပ္ပဇ္ဇတိ. ဒိဗ္ဗေန စက္ခုနာ ရူပံ ပဿတိ၊ ဒိဗ္ဗာယ သောတဓာတုယာ သဒ္ဒံ သုဏာတိ. ဝတ္ထုပုရေဇာတံ – ဝတ္ထု စိတ္တဿ ပုရေဇာတပစ္စယေန ပစ္စယော. (၂)

ဗာဟိရော ဓမ္မော အဇ္ဈတ္တိကဿ စ ဗာဟိရဿ စ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ. အာရမ္မဏပုရေဇာတံ – ရူပေ။ပေ။ ဖောဋ္ဌဗ္ဗေ။ ဝတ္ထုံ အနိစ္စတော။ပေ။ တံ အာရဗ္ဘ စိတ္တဉ္စ သမ္ပယုတ္တကာ ခန္ဓာ စ ဥပ္ပဇ္ဇန္တိ. ဒိဗ္ဗေန စက္ခုနာ ရူပံ ပဿတိ၊ ဒိဗ္ဗာယ သောတဓာတုယာ သဒ္ဒံ သုဏာတိ. ဝတ္ထုပုရေဇာတံ – ဝတ္ထု စိတ္တဿ သမ္ပယုတ္တကာနဉ္စ ခန္ဓာနံ ပုရေဇာတပစ္စယေန ပစ္စယော. (၃)

၃၄၇. အဇ္ဈတ္တိကော စ ဗာဟိရော စ ဓမ္မာ အဇ္ဈတ္တိကဿ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ. စက္ခာယတနဉ္စ ဝတ္ထု စ စိတ္တဿ။ပေ။ ကာယာယတနဉ္စ ဝတ္ထု စ စိတ္တဿ ပုရေဇာတပစ္စယေန ပစ္စယော၊ ရူပါယတနဉ္စ စက္ခာယတနဉ္စ စက္ခုဝိညာဏဿ။ပေ။ ဖောဋ္ဌဗ္ဗာယတနဉ္စ ကာယာယတနဉ္စ ကာယဝိညာဏဿ ပုရေဇာတပစ္စယေန ပစ္စယော. (၁)

အဇ္ဈတ္တိကော စ ဗာဟိရော စ ဓမ္မာ ဗာဟိရဿ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ. စက္ခာယတနဉ္စ ဝတ္ထု စ ဗာဟိရာနံ ခန္ဓာနံ ပုရေဇာတပစ္စယေန ပစ္စယော။ပေ။ ကာယာယတနဉ္စ ဝတ္ထု စ ဗာဟိရာနံ ခန္ဓာနံ ပုရေဇာတပစ္စယေန ပစ္စယော၊ ရူပါယတနဉ္စ စက္ခာယတနဉ္စ စက္ခုဝိညာဏသဟဂတာနံ ခန္ဓာနံ ပုရေဇာတပစ္စယေန ပစ္စယော။ပေ။ ဖောဋ္ဌဗ္ဗာယတနဉ္စ ကာယာယတနဉ္စ ကာယဝိညာဏသဟဂတာနံ ခန္ဓာနံ ပုရေဇာတပစ္စယေန ပစ္စယော. (၂)

အဇ္ဈတ္တိကော စ ဗာဟိရော စ ဓမ္မာ အဇ္ဈတ္တိကဿ စ ဗာဟိရဿ စ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ. စက္ခာယတနဉ္စ ဝတ္ထု စ စိတ္တဿ သမ္ပယုတ္တကာနဉ္စ ခန္ဓာနံ ပုရေဇာတပစ္စယေန ပစ္စယော။ပေ။ ကာယာယတနဉ္စ ဝတ္ထု စ။ပေ။ ရူပါယတနဉ္စ စက္ခာယတနဉ္စ စက္ခုဝိညာဏဿ သမ္ပယုတ္တကာနဉ္စ ခန္ဓာနံ ပုရေဇာတပစ္စယေန ပစ္စယော။ပေ။ ဖောဋ္ဌဗ္ဗာယတနဉ္စ။ပေ။. (၃)

ပစ္ဆာဇာတာသေဝနပစ္စယာ

၃၄၈. အဇ္ဈတ္တိကော ဓမ္မော အဇ္ဈတ္တိကဿ ဓမ္မဿ ပစ္ဆာဇာတပစ္စယေန ပစ္စယော – ပစ္ဆာဇာတာ အဇ္ဈတ္တိကာ ခန္ဓာ ပုရေဇာတဿ ဣမဿ အဇ္ဈတ္တိကဿ ကာယဿ ပစ္ဆာဇာတပစ္စယေန ပစ္စယော. (မူလံ ကာတဗ္ဗံ) ပစ္ဆာဇာတာ အဇ္ဈတ္တိကာ ခန္ဓာ ပုရေဇာတဿ ဣမဿ ဗာဟိရဿ ကာယဿ ပစ္ဆာဇာတပစ္စယေန ပစ္စယော. (မူလံ ကာတဗ္ဗံ) ပစ္ဆာဇာတာ အဇ္ဈတ္တိကာ ခန္ဓာ ပုရေဇာတဿ ဣမဿ အဇ္ဈတ္တိကဿ စ ဗာဟိရဿ စ ကာယဿ ပစ္ဆာဇာတပစ္စယေန ပစ္စယော (ဧဝံ နဝပိ ပဉှာ ကာတဗ္ဗာ)၊ အာသေဝနပစ္စယေန ပစ္စယော (နဝ ပဉှာ ကာတဗ္ဗာ).

ကမ္မ-ဝိပါကပစ္စယာ

၃၄၉. ဗာဟိရော ဓမ္မော ဗာဟိရဿ ဓမ္မဿ ကမ္မပစ္စယေန ပစ္စယော – သဟဇာတာ၊ နာနာက္ခဏိကာ. သဟဇာတာ – ဗာဟိရာ စေတနာ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ကမ္မပစ္စယေန ပစ္စယော၊ ပဋိသန္ဓိက္ခဏေ။ပေ။. နာနာက္ခဏိကာ – ဗာဟိရာ စေတနာ ဝိပါကာနံ ဗာဟိရာနံ ခန္ဓာနံ ကဋတ္တာ စ ရူပါနံ ကမ္မပစ္စယေန ပစ္စယော. (၁)

ဗာဟိရော ဓမ္မော အဇ္ဈတ္တိကဿ ဓမ္မဿ ကမ္မပစ္စယေန ပစ္စယော – သဟဇာတာ၊ နာနာက္ခဏိကာ. သဟဇာတာ – ဗာဟိရာ စေတနာ စိတ္တဿ ကမ္မပစ္စယေန ပစ္စယော၊ ပဋိသန္ဓိက္ခဏေ။ပေ။. နာနာက္ခဏိကာ – ဗာဟိရာ စေတနာ ဝိပါကဿ စိတ္တဿ အဇ္ဈတ္တိကာနဉ္စ ကဋတ္တာရူပါနံ ကမ္မပစ္စယေန ပစ္စယော. (၂)

ဗာဟိရော ဓမ္မော အဇ္ဈတ္တိကဿ စ ဗာဟိရဿ စ ဓမ္မဿ ကမ္မပစ္စယေန ပစ္စယော – သဟဇာတာ၊ နာနာက္ခဏိကာ. သဟဇာတာ – ဗာဟိရာ စေတနာ သမ္ပယုတ္တကာနံ ခန္ဓာနံ စိတ္တဿ စ စိတ္တသမုဋ္ဌာနာနဉ္စ ရူပါနံ ကမ္မပစ္စယေန ပစ္စယော၊ ပဋိသန္ဓိက္ခဏေ။ပေ။. နာနာက္ခဏိကာ – ဗာဟိရာ စေတနာ ဝိပါကာနံ ခန္ဓာနံ စိတ္တဿ စ အဇ္ဈတ္တိကာနဉ္စ ဗာဟိရာနဉ္စ ကဋတ္တာရူပါနံ ကမ္မပစ္စယေန ပစ္စယော. (၃) ဝိပါကပစ္စယေန ပစ္စယော။ နဝ.

အာဟာရပစ္စယော

၃၅၀. အဇ္ဈတ္တိကော ဓမ္မော အဇ္ဈတ္တိကဿ ဓမ္မဿ အာဟာရပစ္စယေန ပစ္စယော – ပဋိသန္ဓိက္ခဏေ အဇ္ဈတ္တိကာ အာဟာရာ အဇ္ဈတ္တိကာနံ ကဋတ္တာရူပါနံ အာဟာရပစ္စယေန ပစ္စယော. (၁)

အဇ္ဈတ္တိကော ဓမ္မော ဗာဟိရဿ ဓမ္မဿ အာဟာရပစ္စယေန ပစ္စယော – အဇ္ဈတ္တိကာ အာဟာရာ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ အာဟာရပစ္စယေန ပစ္စယော၊ ပဋိသန္ဓိက္ခဏေ အဇ္ဈတ္တိကာ အာဟာရာ သမ္ပယုတ္တကာနံ ခန္ဓာနံ ဗာဟိရာနဉ္စ ကဋတ္တာရူပါနံ အာဟာရပစ္စယေန ပစ္စယော. (မူလံ ကာတဗ္ဗံ) ပဋိသန္ဓိက္ခဏေ အဇ္ဈတ္တိကာ အာဟာရာ သမ္ပယုတ္တကာနံ ခန္ဓာနံ အဇ္ဈတ္တိကာနဉ္စ ဗာဟိရာနဉ္စ ကဋတ္တာရူပါနံ အာဟာရပစ္စယေန ပစ္စယော. (၃)

၃၅၁. ဗာဟိရော ဓမ္မော ဗာဟိရဿ ဓမ္မဿ အာဟာရပစ္စယေန ပစ္စယော – ဗာဟိရာ အာဟာရာ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ အာဟာရပစ္စယေန ပစ္စယော၊ ပဋိသန္ဓိက္ခဏေ။ပေ။ ဗာဟိရော ကဗဠီကာရော အာဟာရော ဗာဟိရဿ ကာယဿ အာဟာရပစ္စယေန ပစ္စယော. (၁)

ဗာဟိရော ဓမ္မော အဇ္ဈတ္တိကဿ ဓမ္မဿ အာဟာရပစ္စယေန ပစ္စယော – ဗာဟိရာ အာဟာရာ စိတ္တဿ အာဟာရပစ္စယေန ပစ္စယော၊ ပဋိသန္ဓိက္ခဏေ ဗာဟိရာ အာဟာရာ စိတ္တဿ အဇ္ဈတ္တိကာနဉ္စ ကဋတ္တာရူပါနံ အာဟာရပစ္စယေန ပစ္စယော၊ ဗာဟိရော ကဗဠီကာရော အာဟာရော အဇ္ဈတ္တိကဿ ကာယဿ အာဟာရပစ္စယေန ပစ္စယော. (၂)

ဗာဟိရော ဓမ္မော အဇ္ဈတ္တိကဿ စ ဗာဟိရဿ စ ဓမ္မဿ အာဟာရပစ္စယေန ပစ္စယော – ဗာဟိရာ အာဟာရာ သမ္ပယုတ္တကာနံ ခန္ဓာနံ စိတ္တဿ စ စိတ္တသမုဋ္ဌာနာနဉ္စ ရူပါနံ အာဟာရပစ္စယေန ပစ္စယော၊ ပဋိသန္ဓိက္ခဏေ ဗာဟိရာ အာဟာရာ သမ္ပယုတ္တကာနံ ခန္ဓာနံ စိတ္တဿ စ အဇ္ဈတ္တိကာနဉ္စ ဗာဟိရာနဉ္စ ကဋတ္တာရူပါနံ အာဟာရပစ္စယေန ပစ္စယော၊ ဗာဟိရော ကဗဠီကာရော အာဟာရော အဇ္ဈတ္တိကဿ စ ဗာဟိရဿ စ ကာယဿ အာဟာရပစ္စယေန ပစ္စယော. (၃)

၃၅၂. အဇ္ဈတ္တိကော စ ဗာဟိရော စ ဓမ္မာ အဇ္ဈတ္တိကဿ ဓမ္မဿ အာဟာရပစ္စယေန ပစ္စယော – ပဋိသန္ဓိက္ခဏေ အဇ္ဈတ္တိကာ စ ဗာဟိရာ စ အာဟာရာ အဇ္ဈတ္တိကာနံ ကဋတ္တာရူပါနံ အာဟာရပစ္စယေန ပစ္စယော. (၁)

အဇ္ဈတ္တိကော စ ဗာဟိရော စ ဓမ္မာ ဗာဟိရဿ ဓမ္မဿ အာဟာရပစ္စယေန ပစ္စယော – အဇ္ဈတ္တိကာ စ ဗာဟိရာ စ အာဟာရာ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ အာဟာရပစ္စယေန ပစ္စယော၊ ပဋိသန္ဓိက္ခဏေ အဇ္ဈတ္တိကာ စ ဗာဟိရာ စ အာဟာရာ သမ္ပယုတ္တကာနံ ခန္ဓာနံ ဗာဟိရာနဉ္စ ကဋတ္တာရူပါနံ အာဟာရပစ္စယေန ပစ္စယော. (၂)

အဇ္ဈတ္တိကော စ ဗာဟိရော စ ဓမ္မာ အဇ္ဈတ္တိကဿ စ ဗာဟိရဿ စ ဓမ္မဿ အာဟာရပစ္စယေန ပစ္စယော – ပဋိသန္ဓိက္ခဏေ အဇ္ဈတ္တိကာ စ ဗာဟိရာ စ အာဟာရာ သမ္ပယုတ္တကာနံ ခန္ဓာနံ အဇ္ဈတ္တိကာနဉ္စ ဗာဟိရာနဉ္စ ကဋတ္တာရူပါနံ အာဟာရပစ္စယေန ပစ္စယော. (၃)

ဣန္ဒြိယပစ္စယော

၃၅၃. အဇ္ဈတ္တိကော ဓမ္မော အဇ္ဈတ္တိကဿ ဓမ္မဿ ဣန္ဒြိယပစ္စယေန ပစ္စယော – ပဋိသန္ဓိက္ခဏေ အဇ္ဈတ္တိကာ ဣန္ဒြိယာ အဇ္ဈတ္တိကာနံ ကဋတ္တာရူပါနံ ဣန္ဒြိယပစ္စယေန ပစ္စယော၊ စက္ခုန္ဒြိယံ စက္ခုဝိညာဏဿ။ပေ။ ကာယိန္ဒြိယံ ကာယဝိညာဏဿ ဣန္ဒြိယပစ္စယေန ပစ္စယော. (၁)

အဇ္ဈတ္တိကော ဓမ္မော ဗာဟိရဿ ဓမ္မဿ ဣန္ဒြိယပစ္စယေန ပစ္စယော – အဇ္ဈတ္တိကာ ဣန္ဒြိယာ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ဣန္ဒြိယပစ္စယေန ပစ္စယော၊ ပဋိသန္ဓိက္ခဏေ အဇ္ဈတ္တိကာ ဣန္ဒြိယာ သမ္ပယုတ္တကာနံ ခန္ဓာနံ ဗာဟိရာနဉ္စ ကဋတ္တာရူပါနံ ဣန္ဒြိယပစ္စယေန ပစ္စယော၊ စက္ခုန္ဒြိယံ စက္ခုဝိညာဏသဟဂတာနံ ခန္ဓာနံ။ပေ။ ကာယိန္ဒြိယံ ကာယဝိညာဏသဟဂတာနံ ခန္ဓာနံ ဣန္ဒြိယပစ္စယေန ပစ္စယော. (၂)

အဇ္ဈတ္တိကော ဓမ္မော အဇ္ဈတ္တိကဿ စ ဗာဟိရဿ စ ဓမ္မဿ ဣန္ဒြိယပစ္စယေန ပစ္စယော – ပဋိသန္ဓိက္ခဏေ အဇ္ဈတ္တိကာ ဣန္ဒြိယာ သမ္ပယုတ္တကာနံ ခန္ဓာနံ အဇ္ဈတ္တိကာနဉ္စ ဗာဟိရာနဉ္စ ကဋတ္တာရူပါနံ ဣန္ဒြိယပစ္စယေန ပစ္စယော၊ စက္ခုန္ဒြိယံ စက္ခုဝိညာဏဿ သမ္ပယုတ္တကာနဉ္စ ခန္ဓာနံ။ပေ။ ကာယိန္ဒြိယံ ကာယဝိညာဏဿ သမ္ပယုတ္တကာနဉ္စ ခန္ဓာနံ ဣန္ဒြိယပစ္စယေန ပစ္စယော. (၃)

၃၅၄. ဗာဟိရော ဓမ္မော ဗာဟိရဿ ဓမ္မဿ ဣန္ဒြိယပစ္စယေန ပစ္စယော – ဗာဟိရာ ဣန္ဒြိယာ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ဣန္ဒြိယပစ္စယေန ပစ္စယော၊ ပဋိသန္ဓိက္ခဏေ ဗာဟိရာ ဣန္ဒြိယာ သမ္ပယုတ္တကာနံ ခန္ဓာနံ ဗာဟိရာနဉ္စ ကဋတ္တာရူပါနံ ဣန္ဒြိယပစ္စယေန ပစ္စယော၊ ရူပဇီဝိတိန္ဒြိယံ ဗာဟိရာနံ ကဋတ္တာရူပါနံ ဣန္ဒြိယပစ္စယေန ပစ္စယော. (၁)

ဗာဟိရော ဓမ္မော အဇ္ဈတ္တိကဿ ဓမ္မဿ ဣန္ဒြိယပစ္စယေန ပစ္စယော – ဗာဟိရာ ဣန္ဒြိယာ စိတ္တဿ ဣန္ဒြိယပစ္စယေန ပစ္စယော၊ ပဋိသန္ဓိက္ခဏေ ဗာဟိရာ ဣန္ဒြိယာ စိတ္တဿ အဇ္ဈတ္တိကာနဉ္စ ကဋတ္တာရူပါနံ ဣန္ဒြိယပစ္စယေန ပစ္စယော၊ ရူပဇီဝိတိန္ဒြိယံ အဇ္ဈတ္တိကာနံ ကဋတ္တာရူပါနံ ဣန္ဒြိယပစ္စယေန ပစ္စယော. (၂)

ဗာဟိရော ဓမ္မော အဇ္ဈတ္တိကဿ စ ဗာဟိရဿ စ ဓမ္မဿ ဣန္ဒြိယပစ္စယေန ပစ္စယော – ဗာဟိရာ ဣန္ဒြိယာ သမ္ပယုတ္တကာနံ ခန္ဓာနံ စိတ္တဿ စ စိတ္တသမုဋ္ဌာနာနဉ္စ ရူပါနံ ဣန္ဒြိယပစ္စယေန ပစ္စယော၊ ပဋိသန္ဓိက္ခဏေ ဗာဟိရာ ဣန္ဒြိယာ သမ္ပယုတ္တကာနံ ခန္ဓာနံ စိတ္တဿ စ အဇ္ဈတ္တိကာနဉ္စ ဗာဟိရာနဉ္စ ကဋတ္တာရူပါနံ ဣန္ဒြိယပစ္စယေန ပစ္စယော၊ ရူပဇီဝိတိန္ဒြိယံ အဇ္ဈတ္တိကာနဉ္စ ဗာဟိရာနဉ္စ ကဋတ္တာရူပါနံ ဣန္ဒြိယပစ္စယေန ပစ္စယော. (၃)

၃၅၅. အဇ္ဈတ္တိကော စ ဗာဟိရော စ ဓမ္မာ အဇ္ဈတ္တိကဿ ဓမ္မဿ ဣန္ဒြိယပစ္စယေန ပစ္စယော – ပဋိသန္ဓိက္ခဏေ အဇ္ဈတ္တိကာ စ ဗာဟိရာ စ ဣန္ဒြိယာ အဇ္ဈတ္တိကာနံ ကဋတ္တာရူပါနံ ဣန္ဒြိယပစ္စယေန ပစ္စယော၊ စက္ခုန္ဒြိယဉ္စ ဥပေက္ခိန္ဒြိယဉ္စ စက္ခုဝိညာဏဿ ဣန္ဒြိယပစ္စယေန ပစ္စယော။ပေ။ ကာယိန္ဒြိယဉ္စ သုခိန္ဒြိယံ စ။ပေ။ ကာယိန္ဒြိယဉ္စ ဒုက္ခိန္ဒြိယဉ္စ ကာယဝိညာဏဿ ဣန္ဒြိယပစ္စယေန ပစ္စယော. (၁)

အဇ္ဈတ္တိကော စ ဗာဟိရော စ ဓမ္မာ ဗာဟိရဿ ဓမ္မဿ ဣန္ဒြိယပစ္စယေန ပစ္စယော – အဇ္ဈတ္တိကာ စ ဗာဟိရာ စ ဣန္ဒြိယာ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ဣန္ဒြိယပစ္စယေန ပစ္စယော၊ ပဋိသန္ဓိက္ခဏေ အဇ္ဈတ္တိကာ စ ဗာဟိရာ စ ဣန္ဒြိယာ သမ္ပယုတ္တကာနံ ခန္ဓာနံ ဗာဟိရာနဉ္စ ကဋတ္တာရူပါနံ ဣန္ဒြိယပစ္စယေန ပစ္စယော၊ စက္ခုန္ဒြိယဉ္စ ဥပေက္ခိန္ဒြိယဉ္စ စက္ခုဝိညာဏသဟဂတာနံ ခန္ဓာနံ ဣန္ဒြိယပစ္စယေန ပစ္စယော။ပေ။ ကာယိန္ဒြိယဉ္စ သုခိန္ဒြိယဉ္စ။ပေ။ ကာယိန္ဒြိယဉ္စ ဒုက္ခိန္ဒြိယဉ္စ ကာယဝိညာဏသဟဂတာနံ ခန္ဓာနံ ဣန္ဒြိယပစ္စယေန ပစ္စယော. (၂)

အဇ္ဈတ္တိကော စ ဗာဟိရော စ ဓမ္မာ အဇ္ဈတ္တိကဿ စ ဗာဟိရဿ စ ဓမ္မဿ ဣန္ဒြိယပစ္စယေန ပစ္စယော – ပဋိသန္ဓိက္ခဏေ အဇ္ဈတ္တိကာ စ ဗာဟိရာ စ ဣန္ဒြိယာ သမ္ပယုတ္တကာနံ ခန္ဓာနံ အဇ္ဈတ္တိကာနဉ္စ ဗာဟိရာနဉ္စ ကဋတ္တာရူပါနံ ဣန္ဒြိယပစ္စယေန ပစ္စယော၊ စက္ခုန္ဒြိယဉ္စ ဥပေက္ခိန္ဒြိယဉ္စ စက္ခုဝိညာဏဿ သမ္ပယုတ္တကာနဉ္စ ခန္ဓာနံ ဣန္ဒြိယပစ္စယေန ပစ္စယော။ ကာယိန္ဒြိယဉ္စ။ပေ။. (၃)

ဈာနပစ္စယာဒိ

၃၅၆. ဗာဟိရော ဓမ္မော ဗာဟိရဿ ဓမ္မဿ ဈာနပစ္စယေန ပစ္စယော။ တီဏိ။ မဂ္ဂပစ္စယေန ပစ္စယော။ တီဏိ။ သမ္ပယုတ္တပစ္စယေန ပစ္စယော။ ပဉ္စ.

ဝိပ္ပယုတ္တပစ္စယော

၃၅၇. အဇ္ဈတ္တိကော ဓမ္မော အဇ္ဈတ္တိကဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ. သဟဇာတံ – ပဋိသန္ဓိက္ခဏေ စိတ္တံ အဇ္ဈတ္တိကာနံ ကဋတ္တာရူပါနံ ဝိပ္ပယုတ္တပစ္စယေန ပစ္စယော. ပုရေဇာတံ – စက္ခာယတနံ စက္ခုဝိညာဏဿ။ပေ။ ကာယာယတနံ ကာယဝိညာဏဿ ဝိပ္ပယုတ္တပစ္စယေန ပစ္စယော. ပစ္ဆာဇာတာ – အဇ္ဈတ္တိကာ ခန္ဓာ ပုရေဇာတဿ ဣမဿ အဇ္ဈတ္တိကဿ ကာယဿ ဝိပ္ပယုတ္တပစ္စယေန ပစ္စယော. (၁)

အဇ္ဈတ္တိကော ဓမ္မော ဗာဟိရဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ. သဟဇာတာ – အဇ္ဈတ္တိကာ ခန္ဓာ စိတ္တသမုဋ္ဌာနာနံ ရူပါနံ ဝိပ္ပယုတ္တပစ္စယေန ပစ္စယော၊ ပဋိသန္ဓိက္ခဏေ။ပေ။. ပုရေဇာတံ – စက္ခာယတနံ စက္ခုဝိညာဏသဟဂတာနံ ခန္ဓာနံ။ပေ။ ကာယာယတနံ ကာယဝိညာဏသဟဂတာနံ ခန္ဓာနံ ဝိပ္ပယုတ္တပစ္စယေန ပစ္စယော. ပစ္ဆာဇာတာ – အဇ္ဈတ္တိကာ ခန္ဓာ ပုရေဇာတဿ ဣမဿ ဗာဟိရဿ ကာယဿ ဝိပ္ပယုတ္တပစ္စယေန ပစ္စယော. (၂)

အဇ္ဈတ္တိကော ဓမ္မော အဇ္ဈတ္တိကဿ စ ဗာဟိရဿ စ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ. သဟဇာတာ – ပဋိသန္ဓိက္ခဏေ အဇ္ဈတ္တိကာ ခန္ဓာ အဇ္ဈတ္တိကာနဉ္စ ဗာဟိရာနဉ္စ ကဋတ္တာရူပါနံ ဝိပ္ပယုတ္တပစ္စယေန ပစ္စယော. ပုရေဇာတံ – စက္ခာယတနံ စက္ခုဝိညာဏဿ သမ္ပယုတ္တကာနဉ္စ ခန္ဓာနံ။ပေ။ ကာယာယတနံ ကာယဝိညာဏဿ သမ္ပယုတ္တကာနံ ခန္ဓာနံ ဝိပ္ပယုတ္တပစ္စယေန ပစ္စယော. ပစ္ဆာဇာတာ – အဇ္ဈတ္တိကာ ခန္ဓာ ပုရေဇာတဿ ဣမဿ အဇ္ဈတ္တိကဿ စ ဗာဟိရဿ စ ကာယဿ ဝိပ္ပယုတ္တပစ္စယေန ပစ္စယော. (၃)

၃၅၈. ဗာဟိရော ဓမ္မော ဗာဟိရဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ. သဟဇာတာ – ဗာဟိရာ ခန္ဓာ စိတ္တသမုဋ္ဌာနာနံ ရူပါနံ ဝိပ္ပယုတ္တပစ္စယေန ပစ္စယော၊ ပဋိသန္ဓိက္ခဏေ။ပေ။ ခန္ဓာ ဝတ္ထုဿ ဝိပ္ပယုတ္တပစ္စယေန ပစ္စယော၊ ဝတ္ထု ခန္ဓာနံ ဝိပ္ပယုတ္တပစ္စယေန ပစ္စယော. ပုရေဇာတံ – ဝတ္ထု ဗာဟိရာနံ ခန္ဓာနံ ဝိပ္ပယုတ္တပစ္စယေန ပစ္စယော. ပစ္ဆာဇာတာ – ဗာဟိရာ ခန္ဓာ ပုရေဇာတဿ ဣမဿ ဗာဟိရဿ ကာယဿ ဝိပ္ပယုတ္တပစ္စယေန ပစ္စယော. (၁)

ဗာဟိရော ဓမ္မော အဇ္ဈတ္တိကဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ. သဟဇာတာ – ပဋိသန္ဓိက္ခဏေ ဗာဟိရာ ခန္ဓာ အဇ္ဈတ္တိကာနံ ကဋတ္တာရူပါနံ ဝိပ္ပယုတ္တပစ္စယေန ပစ္စယော၊ ပဋိသန္ဓိက္ခဏေ ဝတ္ထု စိတ္တဿ ဝိပ္ပယုတ္တပစ္စယေန ပစ္စယော. ပုရေဇာတံ – ဝတ္ထု စိတ္တဿ ဝိပ္ပယုတ္တပစ္စယေန ပစ္စယော. ပစ္ဆာဇာတာ – ဗာဟိရာ ခန္ဓာ ပုရေဇာတဿ ဣမဿ အဇ္ဈတ္တိကဿ ကာယဿ ဝိပ္ပယုတ္တပစ္စယေန ပစ္စယော. (၂)

ဗာဟိရော ဓမ္မော အဇ္ဈတ္တိကဿ စ ဗာဟိရဿ စ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ (သံခိတ္တံ). (၃)

၃၅၉. အဇ္ဈတ္တိကော စ ဗာဟိရော စ ဓမ္မာ အဇ္ဈတ္တိကဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပစ္ဆာဇာတံ. သဟဇာတာ – ပဋိသန္ဓိက္ခဏေ အဇ္ဈတ္တိကာ စ ဗာဟိရာ စ ခန္ဓာ အဇ္ဈတ္တိကာနံ ကဋတ္တာရူပါနံ ဝိပ္ပယုတ္တပစ္စယေန ပစ္စယော. ပစ္ဆာဇာတံ – ပစ္ဆာဇာတာ။ပေ။ (သံခိတ္တံ). (၁)

အဇ္ဈတ္တိကော စ ဗာဟိရော စ ဓမ္မာ ဗာဟိရဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပစ္ဆာဇာတံ (သံခိတ္တံ). (၂)

အဇ္ဈတ္တိကော စ ဗာဟိရော စ ဓမ္မာ အဇ္ဈတ္တိကဿ စ ဗာဟိရဿ စ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပစ္ဆာဇာတံ. သဟဇာတာ – ပဋိသန္ဓိက္ခဏေ အဇ္ဈတ္တိကာ စ ဗာဟိရာ စ ခန္ဓာ။ပေ။ (သံခိတ္တံ). (၃)

အတ္ထိပစ္စယာဒိ

၃၆၀. အဇ္ဈတ္တိကော ဓမ္မော အဇ္ဈတ္တိကဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ. သဟဇာတာ – ပဋိသန္ဓိက္ခဏေ စိတ္တံ အဇ္ဈတ္တိကာနံ ကဋတ္တာရူပါနံ အတ္ထိပစ္စယေန ပစ္စယော. ပုရေဇာတံ – စက္ခုံ။ပေ။ ကာယံ အနိစ္စတော။ပေ။ (ပုရေဇာတသဒိသံ၊ နိန္နာနာကရဏံ). ပစ္ဆာဇာတံ (ပစ္ဆာဇာတသဒိသံ ကာတဗ္ဗံ). (၁)

အဇ္ဈတ္တိကော ဓမ္မော ဗာဟိရဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ. သဟဇာတံ – သဟဇာတာ အဇ္ဈတ္တိကာ ခန္ဓာ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ အတ္ထိပစ္စယေန ပစ္စယော (သံခိတ္တံ). (၂)

(ဣဓ အတ္ထိ သဗ္ဗဋ္ဌာနေ သဟဇာတံ ပစ္စယဝါရသဒိသံ. ပုရေဇာတံ ပုရေဇာတသဒိသံ. ပစ္ဆာဇာတံ ပစ္ဆာဇာတသဒိသံ ကာတဗ္ဗံ၊ နိန္နာနာကရဏံ).

အဇ္ဈတ္တိကော ဓမ္မော အဇ္ဈတ္တိကဿ စ ဗာဟိရဿ စ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ (သံခိတ္တံ). (၃)

၃၆၁. ဗာဟိရော ဓမ္မော ဗာဟိရဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ၊ အာဟာရံ၊ ဣန္ဒြိယံ (သဗ္ဗံ ဝိတ္ထာရေတဗ္ဗံ). (၁)

ဗာဟိရော ဓမ္မော အဇ္ဈတ္တိကဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ၊ အာဟာရံ၊ ဣန္ဒြိယံ (သံခိတ္တံ). (၂)

ဗာဟိရော ဓမ္မော အဇ္ဈတ္တိကဿ စ ဗာဟိရဿ စ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ၊ အာဟာရံ၊ ဣန္ဒြိယံ (သံခိတ္တံ). (၃)

၃၆၂. အဇ္ဈတ္တိကော စ ဗာဟိရော စ ဓမ္မာ အဇ္ဈတ္တိကဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ၊ အာဟာရံ၊ ဣန္ဒြိယံ. သဟဇာတာ – စက္ခုဝိညာဏသဟဂတာ ခန္ဓာ စ စက္ခာယတနဉ္စ စက္ခုဝိညာဏသဟဂတာ ခန္ဓာ စ စက္ခာယတနဉ္စ စက္ခုဝိညာဏဿ အတ္ထိပစ္စယေန ပစ္စယော။ပေ။ ကာယဝိညာဏသဟဂတာ ခန္ဓာ စ။ပေ။ ပဋိသန္ဓိက္ခဏေ အဇ္ဈတ္တိကာ စ ဗာဟိရာ စ ခန္ဓာ အဇ္ဈတ္တိကာနံ ကဋတ္တာရူပါနံ အတ္ထိပစ္စယေန ပစ္စယော. ပုရေဇာတံ – စက္ခာယတနဉ္စ ဝတ္ထု စ စိတ္တဿ အတ္ထိပစ္စယေန ပစ္စယော။ပေ။ ကာယာယတနဉ္စ ဝတ္ထု စ စိတ္တဿ အတ္ထိပစ္စယေန ပစ္စယော၊ ရူပါယတနဉ္စ စက္ခာယတနဉ္စ စက္ခုဝိညာဏဿ။ပေ။ ဖောဋ္ဌဗ္ဗာယတနဉ္စ ကာယာယတနဉ္စ ကာယဝိညာဏဿ အတ္ထိပစ္စယေန ပစ္စယော. ပစ္ဆာဇာတာ – အဇ္ဈတ္တိကာ စ ဗာဟိရာ စ ခန္ဓာ ပုရေဇာတဿ ဣမဿ အဇ္ဈတ္တိကဿ ကာယဿ အတ္ထိပစ္စယေန ပစ္စယော. ပစ္ဆာဇာတာ – အဇ္ဈတ္တိကာ စ ဗာဟိရာ စ ခန္ဓာ ကဗဠီကာရော အာဟာရော စ ဣမဿ အဇ္ဈတ္တိကဿ ကာယဿ အတ္ထိပစ္စယေန ပစ္စယော. ပစ္ဆာဇာတာ – အဇ္ဈတ္တိကာ စ ဗာဟိရာ စ ခန္ဓာ ရူပဇီဝိတိန္ဒြိယဉ္စ အဇ္ဈတ္တိကာနံ ကဋတ္တာရူပါနံ အတ္ထိပစ္စယေန ပစ္စယော. (၁)

အဇ္ဈတ္တိကော စ ဗာဟိရော စ ဓမ္မာ ဗာဟိရဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ၊ အာဟာရံ၊ ဣန္ဒြိယံ. သဟဇာတော – စက္ခုဝိညာဏသဟဂတော ဧကော ခန္ဓော စ စက္ခာယတနဉ္စ စက္ခုဝိညာဏဉ္စ ဒွိန္နံ ခန္ဓာနံ အတ္ထိပစ္စယေန ပစ္စယော။ပေ။ (သဟဇာတပစ္စယဝါရသဒိသံ နိန္နာနာကရဏံ၊ ပဌမဂမနသဒိသံယေဝ. သဗ္ဗေ ပဒါ ပဌမဃဋနာနယေန ဝိဘဇိတဗ္ဗာ). (၂)

အဇ္ဈတ္တိကော စ ဗာဟိရော စ ဓမ္မာ အဇ္ဈတ္တိကဿ စ ဗာဟိရဿ စ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ၊ အာဟာရံ၊ ဣန္ဒြိယံ. သဟဇာတော – စက္ခုဝိညာဏသဟဂတော ဧကော ခန္ဓော စ စက္ခာယတနဉ္စ ဒွိန္နံ ခန္ဓာနံ စက္ခုဝိညာဏဿ စ အတ္ထိပစ္စယေန ပစ္စယော (သံခိတ္တံ. သဗ္ဗေ ပဒါ ဝိဘဇိတဗ္ဗာ ပဌမဃဋနာနယေန). (၃)

နတ္ထိပစ္စယေန ပစ္စယော။ ဝိဂတပစ္စယေန ပစ္စယော။ အဝိဂတပစ္စယေန ပစ္စယော.