၁-၄. ပစ္စယာနုလောမာဒိ

၃၃၉. အဇ္ဈတ္တိကံ ဓမ္မံ သံသဋ္ဌော ဗာဟိရော ဓမ္မော ဥပ္ပဇ္ဇတိ ဟေတုပစ္စယာ – စိတ္တံ သံသဋ္ဌာ သမ္ပယုတ္တကာ ခန္ဓာ၊ ပဋိသန္ဓိက္ခဏေ စိတ္တံ သံသဋ္ဌာ သမ္ပယုတ္တကာ ခန္ဓာ. (၁)

ဗာဟိရံ ဓမ္မံ သံသဋ္ဌော ဗာဟိရော ဓမ္မော ဥပ္ပဇ္ဇတိ ဟေတုပစ္စယာ – ဗာဟိရံ ဧကံ ခန္ဓံ သံသဋ္ဌာ ဒွေ ခန္ဓာ၊ ဒွေ ခန္ဓေ။ပေ။ ပဋိသန္ဓိက္ခဏေ။ပေ။. ဗာဟိရံ ဓမ္မံ သံသဋ္ဌော အဇ္ဈတ္တိကော ဓမ္မော ဥပ္ပဇ္ဇတိ ဟေတုပစ္စယာ – ဗာဟိရေ ခန္ဓေ သံသဋ္ဌံ စိတ္တံ၊ ပဋိသန္ဓိက္ခဏေ။ပေ။. ဗာဟိရံ ဓမ္မံ သံသဋ္ဌော အဇ္ဈတ္တိကော စ ဗာဟိရော စ ဓမ္မာ ဥပ္ပဇ္ဇန္တိ ဟေတုပစ္စယာ – ဗာဟိရံ ဧကံ ခန္ဓံ သံသဋ္ဌာ ဒွေ ခန္ဓာ စိတ္တဉ္စ၊ ဒွေ ခန္ဓေ။ပေ။ ပဋိသန္ဓိက္ခဏေ။ပေ။. (၃)

အဇ္ဈတ္တိကဉ္စ ဗာဟိရဉ္စ ဓမ္မံ သံသဋ္ဌော ဗာဟိရော ဓမ္မော ဥပ္ပဇ္ဇတိ ဟေတုပစ္စယာ – ဗာဟိရံ ဧကံ ခန္ဓဉ္စ စိတ္တဉ္စ သံသဋ္ဌာ ဒွေ ခန္ဓာ၊ ဒွေ ခန္ဓေ။ပေ။ ပဋိသန္ဓိက္ခဏေ။ပေ။ (သံခိတ္တံ). ဟေတုယာ ပဉ္စ၊ အာရမ္မဏေ ပဉ္စ၊ အဓိပတိယာ ပဉ္စ (သဗ္ဗတ္ထ ပဉ္စ)၊ အဝိဂတေ ပဉ္စ (အနုလောမံ).

အဇ္ဈတ္တိကံ ဓမ္မံ သံသဋ္ဌော ဗာဟိရော ဓမ္မော ဥပ္ပဇ္ဇတိ နဟေတုပစ္စယာ (ဧဝံ ပဉ္စ ကာတဗ္ဗာ၊ တီဏိယေဝ မောဟော).

နဟေတုယာ ပဉ္စ၊ နအဓိပတိယာ ပဉ္စ၊ နပုရေဇာတေ ပဉ္စ၊ နပစ္ဆာဇာတေ ပဉ္စ၊ နအာသေဝနေ ပဉ္စ၊ နကမ္မေ တီဏိ၊ နဝိပါကေ ပဉ္စ၊ နဈာနေ ပဉ္စ၊ နမဂ္ဂေ ပဉ္စ၊ နဝိပ္ပယုတ္တေ ပဉ္စ (ပစ္စနီယံ).