၁. ဝိဘင်္ဂဝါရော

ဟေတုပစ္စယော

၃၃၂. အဇ္ဈတ္တိကံ ဓမ္မံ ပစ္စယာ အဇ္ဈတ္တိကော ဓမ္မော ဥပ္ပဇ္ဇတိ ဟေတုပစ္စယာ။ တီဏိ (ပဋိစ္စသဒိသာ).

ဗာဟိရံ ဓမ္မံ ပစ္စယာ ဗာဟိရော ဓမ္မော ဥပ္ပဇ္ဇတိ ဟေတုပစ္စယာ – ဗာဟိရံ ဧကံ ခန္ဓံ ပစ္စယာ ဒွေ ခန္ဓာ စိတ္တသမုဋ္ဌာနဉ္စ ရူပံ၊ ဒွေ ခန္ဓေ။ပေ။ (ပဋိသန္ဓိက္ခဏေ ဒွေပိ ကာတဗ္ဗာ၊ ယာဝ အဇ္ဈတ္တိကာ မဟာဘူတာ) ဝတ္ထုံ ပစ္စယာ ဗာဟိရာ ခန္ဓာ. ဗာဟိရံ ဓမ္မံ ပစ္စယာ အဇ္ဈတ္တိကော ဓမ္မော ဥပ္ပဇ္ဇတိ ဟေတုပစ္စယာ – ဗာဟိရေ ခန္ဓေ ပစ္စယာ စိတ္တံ၊ ဝတ္ထုံ ပစ္စယာ စိတ္တံ (ပဋိသန္ဓိက္ခဏေ ဒွေပိ ကာတဗ္ဗာ). ဗာဟိရံ ဓမ္မံ ပစ္စယာ အဇ္ဈတ္တိကော စ ဗာဟိရော စ ဓမ္မာ ဥပ္ပဇ္ဇန္တိ ဟေတုပစ္စယာ – ဗာဟိရံ ဧကံ ခန္ဓံ ပစ္စယာ ဒွေ ခန္ဓာ စိတ္တဉ္စ စိတ္တသမုဋ္ဌာနဉ္စ ရူပံ၊ ဒွေ ခန္ဓေ။ပေ။ ဝတ္ထုံ ပစ္စယာ စိတ္တံ သမ္ပယုတ္တကာ စ ခန္ဓာ (ပဋိသန္ဓိက္ခဏေ ဒွေပိ ကာတဗ္ဗာ). (၃)

၃၃၃. အဇ္ဈတ္တိကဉ္စ ဗာဟိရဉ္စ ဓမ္မံ ပစ္စယာ အဇ္ဈတ္တိကော ဓမ္မော ဥပ္ပဇ္ဇတိ ဟေတုပစ္စယာ – ပဋိသန္ဓိက္ခဏေ စိတ္တဉ္စ သမ္ပယုတ္တကေ စ ခန္ဓေ ပစ္စယာ အဇ္ဈတ္တိကံ ကဋတ္တာရူပံ. အဇ္ဈတ္တိကဉ္စ ဗာဟိရဉ္စ ဓမ္မံ ပစ္စယာ ဗာဟိရော ဓမ္မော ဥပ္ပဇ္ဇတိ ဟေတုပစ္စယာ – ဗာဟိရံ ဧကံ ခန္ဓဉ္စ စိတ္တဉ္စ ပစ္စယာ ဒွေ ခန္ဓာ စိတ္တသမုဋ္ဌာနဉ္စ ရူပံ၊ ဒွေ ခန္ဓေ။ပေ။ စိတ္တဉ္စ မဟာဘူတေ စ ပစ္စယာ စိတ္တသမုဋ္ဌာနံ ရူပံ၊ စိတ္တဉ္စ ဝတ္ထုဉ္စ ပစ္စယာ ဗာဟိရာ ခန္ဓာ (ပဋိသန္ဓိက္ခဏေ တီဏိပိ ကာတဗ္ဗာ). အဇ္ဈတ္တိကဉ္စ ဗာဟိရဉ္စ ဓမ္မံ ပစ္စယာ အဇ္ဈတ္တိကော စ ဗာဟိရော စ ဓမ္မာ ဥပ္ပဇ္ဇန္တိ ဟေတုပစ္စယာ – ပဋိသန္ဓိက္ခဏေ ဗာဟိရံ ဧကံ ခန္ဓဉ္စ စိတ္တဉ္စ ပစ္စယာ ဒွေ ခန္ဓာ အဇ္ဈတ္တိကဉ္စ ဗာဟိရဉ္စ ကဋတ္တာရူပံ၊ ဒွေ ခန္ဓေ။ပေ။. (၃)

အာရမ္မဏပစ္စယော

၃၃၄. အဇ္ဈတ္တိကံ ဓမ္မံ ပစ္စယာ အဇ္ဈတ္တိကော ဓမ္မော ဥပ္ပဇ္ဇတိ အာရမ္မဏပစ္စယာ – စက္ခာယတနံ ပစ္စယာ စက္ခုဝိညာဏံ။ပေ။ ကာယာယတနံ ။ပေ။. အဇ္ဈတ္တိကံ ဓမ္မံ ပစ္စယာ ဗာဟိရော ဓမ္မော ဥပ္ပဇ္ဇတိ အာရမ္မဏပစ္စယာ – စက္ခာယတနဉ္စ စက္ခုဝိညာဏဉ္စ ပစ္စယာ စက္ခုဝိညာဏသဟဂတာ ခန္ဓာ။ပေ။ ကာယာယတနဉ္စ။ပေ။ စိတ္တံ ပစ္စယာ သမ္ပယုတ္တကာ ခန္ဓာ၊ ပဋိသန္ဓိက္ခဏေ။ပေ။. အဇ္ဈတ္တိကံ ဓမ္မံ ပစ္စယာ အဇ္ဈတ္တိကော စ ဗာဟိရော စ ဓမ္မာ ဥပ္ပဇ္ဇန္တိ အာရမ္မဏပစ္စယာ – စက္ခာယတနံ ပစ္စယာ စက္ခုဝိညာဏံ သမ္ပယုတ္တကာ စ ခန္ဓာ။ပေ။ ကာယာယတနံ။ပေ။. (၃)

ဗာဟိရံ ဓမ္မံ ပစ္စယာ ဗာဟိရော ဓမ္မော ဥပ္ပဇ္ဇတိ အာရမ္မဏပစ္စယာ – ဗာဟိရံ ဧကံ ခန္ဓံ ပစ္စယာ ဒွေ ခန္ဓာ၊ ဒွေ ခန္ဓေ။ပေ။ ပဋိသန္ဓိက္ခဏေ။ပေ။ ဝတ္ထုံ ပစ္စယာ ဗာဟိရာ ခန္ဓာ. ဗာဟိရံ ဓမ္မံ ပစ္စယာ အဇ္ဈတ္တိကော ဓမ္မော ဥပ္ပဇ္ဇတိ အာရမ္မဏပစ္စယာ – ဗာဟိရေ ခန္ဓေ ပစ္စယာ စိတ္တံ၊ ဝတ္ထုံ ပစ္စယာ စိတ္တံ (ပဋိသန္ဓိက္ခဏေ ဒွေပိ ကာတဗ္ဗာ). ဗာဟိရံ ဓမ္မံ ပစ္စယာ အဇ္ဈတ္တိကော စ ဗာဟိရော စ ဓမ္မာ ဥပ္ပဇ္ဇန္တိ အာရမ္မဏပစ္စယာ – ဝတ္ထုံ ပစ္စယာ စိတ္တဉ္စ သမ္ပယုတ္တကာ စ ခန္ဓာ (ပဋိသန္ဓိက္ခဏေ ဧကံ ကာတဗ္ဗံ). (၃)

၃၃၅. အဇ္ဈတ္တိကဉ္စ ဗာဟိရဉ္စ ဓမ္မံ ပစ္စယာ အဇ္ဈတ္တိကော ဓမ္မော ဥပ္ပဇ္ဇတိ အာရမ္မဏပစ္စယာ – စက္ခုဝိညာဏသဟဂတေ ခန္ဓေ စ စက္ခာယတနဉ္စ ပစ္စယာ စက္ခုဝိညာဏံ။ပေ။ ကာယဝိညာဏသဟဂတေ။ပေ။.

အဇ္ဈတ္တိကဉ္စ ဗာဟိရဉ္စ ဓမ္မံ ပစ္စယာ ဗာဟိရော ဓမ္မော ဥပ္ပဇ္ဇတိ အာရမ္မဏပစ္စယာ – စက္ခုဝိညာဏသဟဂတံ ဧကံ ခန္ဓဉ္စ စက္ခာယတနဉ္စ စက္ခုဝိညာဏဉ္စ ပစ္စယာ ဒွေ ခန္ဓာ၊ ဒွေ ခန္ဓေ။ပေ။ ကာယဝိညာဏသဟဂတံ။ပေ။ ဗာဟိရံ ဧကံ ခန္ဓဉ္စ စိတ္တဉ္စ ပစ္စယာ ဒွေ ခန္ဓာ၊ ဒွေ ခန္ဓေ။ပေ။ စိတ္တဉ္စ ဝတ္ထုဉ္စ ပစ္စယာ ဗာဟိရာ ခန္ဓာ (ပဋိသန္ဓိက္ခဏေ ဒွေပိ ကာတဗ္ဗာ). အဇ္ဈတ္တိကဉ္စ ဗာဟိရဉ္စ ဓမ္မံ ပစ္စယာ အဇ္ဈတ္တိကော စ ဗာဟိရော စ ဓမ္မာ ဥပ္ပဇ္ဇန္တိ အာရမ္မဏပစ္စယာ – စက္ခုဝိညာဏသဟဂတံ ဧကံ ခန္ဓဉ္စ စက္ခာယတနဉ္စ ပစ္စယာ ဒွေ ခန္ဓာ စက္ခုဝိညာဏဉ္စ၊ ဒွေ ခန္ဓေ။ပေ။ (သံခိတ္တံ). (၃)