၁. ဝိဘင်္ဂဝါရော

နဟေတုပစ္စယော

၃၂၃. အဇ္ဈတ္တိကံ ဓမ္မံ ပဋိစ္စ အဇ္ဈတ္တိကော ဓမ္မော ဥပ္ပဇ္ဇတိ နဟေတုပစ္စယာ – အဟေတုကပဋိသန္ဓိက္ခဏေ စိတ္တံ ပဋိစ္စ အဇ္ဈတ္တိကံ ကဋတ္တာရူပံ. (၁)

အဇ္ဈတ္တိကံ ဓမ္မံ ပဋိစ္စ ဗာဟိရော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ စိတ္တံ ပဋိစ္စ သမ္ပယုတ္တကာ ခန္ဓာ စိတ္တသမုဋ္ဌာနဉ္စ ရူပံ၊ အဟေတုကပဋိသန္ဓိက္ခဏေ စိတ္တံ ပဋိစ္စ သမ္ပယုတ္တကာ ခန္ဓာ ဗာဟိရံ ကဋတ္တာ စ ရူပံ၊ ဝိစိကိစ္ဆာသဟဂတံ ဥဒ္ဓစ္စသဟဂတံ စိတ္တံ ပဋိစ္စ ဝိစိကိစ္ဆာသဟဂတော ဥဒ္ဓစ္စသဟဂတော မောဟော. (၂)

အဇ္ဈတ္တိကံ ဓမ္မံ ပဋိစ္စ အဇ္ဈတ္တိကော စ ဗာဟိရော စ ဓမ္မာ ဥပ္ပဇ္ဇန္တိ နဟေတုပစ္စယာ – အဟေတုကပဋိသန္ဓိက္ခဏေ စိတ္တံ ပဋိစ္စ သမ္ပယုတ္တကာ ခန္ဓာ အဇ္ဈတ္တိကဉ္စ ဗာဟိရဉ္စ ကဋတ္တာရူပံ. (၃)

၃၂၄. ဗာဟိရံ ဓမ္မံ ပဋိစ္စ ဗာဟိရော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ ဗာဟိရံ ဧကံ ခန္ဓံ ပဋိစ္စ ဒွေ ခန္ဓာ စိတ္တသမုဋ္ဌာနဉ္စ ရူပံ၊ ဒွေ ခန္ဓေ။ပေ။ အဟေတုကပဋိသန္ဓိက္ခဏေ ။ပေ။ (ယာဝ အသညသတ္တာ) ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ ပဋိစ္စ ဝိစိကိစ္ဆာသဟဂတော ဥဒ္ဓစ္စသဟဂတော မောဟော. (၁)

ဗာဟိရံ ဓမ္မံ ပဋိစ္စ အဇ္ဈတ္တိကော ဓမ္မော ဥပ္ပဇ္ဇတိ နဟေတုပစ္စယာ – အဟေတုကေ ဗာဟိရေ ခန္ဓေ ပဋိစ္စ စိတ္တံ၊ အဟေတုကပဋိသန္ဓိက္ခဏေ ဗာဟိရေ ခန္ဓေ ပဋိစ္စ စိတ္တံ အဇ္ဈတ္တိကံ ကဋတ္တာ စ ရူပံ၊ အဟေတုကပဋိသန္ဓိက္ခဏေ ဝတ္ထုံ ပဋိစ္စ စိတ္တံ. (၂)

ဗာဟိရံ ဓမ္မံ ပဋိစ္စ အဇ္ဈတ္တိကော စ ဗာဟိရော စ ဓမ္မာ ဥပ္ပဇ္ဇန္တိ နဟေတုပစ္စယာ – အဟေတုကံ ဗာဟိရံ ဧကံ ခန္ဓံ ပဋိစ္စ ဒွေ ခန္ဓာ စိတ္တဉ္စ စိတ္တသမုဋ္ဌာနဉ္စ ရူပံ၊ ဒွေ ခန္ဓေ ။ပေ။ အဟေတုကပဋိသန္ဓိက္ခဏေ ဗာဟိရံ ဧကံ ခန္ဓံ ပဋိစ္စ ဒွေ ခန္ဓာ စိတ္တဉ္စ အဇ္ဈတ္တိကဉ္စ ဗာဟိရဉ္စ ကဋတ္တာရူပံ၊ အဟေတုကပဋိသန္ဓိက္ခဏေ ဝတ္ထုံ ပဋိစ္စ စိတ္တံ သမ္ပယုတ္တကာ စ ခန္ဓာ. (၃)

၃၂၅. အဇ္ဈတ္တိကဉ္စ ဗာဟိရဉ္စ ဓမ္မံ ပဋိစ္စ အဇ္ဈတ္တိကော ဓမ္မော ဥပ္ပဇ္ဇတိ နဟေတုပစ္စယာ – အဟေတုကပဋိသန္ဓိက္ခဏေ စိတ္တဉ္စ သမ္ပယုတ္တကေ စ ခန္ဓေ ပဋိစ္စ အဇ္ဈတ္တိကံ ကဋတ္တာရူပံ. (၁)

အဇ္ဈတ္တိကဉ္စ ဗာဟိရဉ္စ ဓမ္မံ ပဋိစ္စ ဗာဟိရော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ ဗာဟိရံ ဧကံ ခန္ဓဉ္စ စိတ္တဉ္စ ပဋိစ္စ ဒွေ ခန္ဓာ စိတ္တသမုဋ္ဌာနဉ္စ ရူပံ၊ ဒွေ ခန္ဓေ။ပေ။ အဟေတုကံ စိတ္တဉ္စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ၊ အဟေတုကပဋိသန္ဓိက္ခဏေ ဗာဟိရံ ဧကံ ခန္ဓဉ္စ စိတ္တဉ္စ ပဋိစ္စ ဒွေ ခန္ဓာ ဗာဟိရံ ကဋတ္တာ စ ရူပံ၊ အဟေတုကပဋိသန္ဓိက္ခဏေ စိတ္တဉ္စ မဟာဘူတေ စ ပဋိစ္စ ဗာဟိရံ ကဋတ္တာရူပံ၊ အဟေတုကပဋိသန္ဓိက္ခဏေ စိတ္တဉ္စ ဝတ္ထုဉ္စ ပဋိစ္စ ဗာဟိရာ ခန္ဓာ၊ ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ စ စိတ္တဉ္စ ပဋိစ္စ ဝိစိကိစ္ဆာသဟဂတော ဥဒ္ဓစ္စသဟဂတော မောဟော. (၂)

အဇ္ဈတ္တိကဉ္စ ဗာဟိရဉ္စ ဓမ္မံ ပဋိစ္စ အဇ္ဈတ္တိကော စ ဗာဟိရော စ ဓမ္မာ ဥပ္ပဇ္ဇန္တိ နဟေတုပစ္စယာ – အဟေတုကပဋိသန္ဓိက္ခဏေ ဗာဟိရံ ဧကံ ခန္ဓဉ္စ စိတ္တဉ္စ ပဋိစ္စ ဒွေ ခန္ဓာ အဇ္ဈတ္တိကဉ္စ ဗာဟိရဉ္စ ကဋတ္တာရူပံ၊ ဒွေ ခန္ဓေ စ။ပေ။. (၃)

နအာရမ္မဏပစ္စယော

၃၂၆. အဇ္ဈတ္တိကံ ဓမ္မံ ပဋိစ္စ အဇ္ဈတ္တိကော ဓမ္မော ဥပ္ပဇ္ဇတိ နအာရမ္မဏပစ္စယာ – ပဋိသန္ဓိက္ခဏေ စိတ္တံ ပဋိစ္စ အဇ္ဈတ္တိကံ ကဋတ္တာရူပံ. (၁)

အဇ္ဈတ္တိကံ ဓမ္မံ ပဋိစ္စ ဗာဟိရော ဓမ္မော ဥပ္ပဇ္ဇတိ နအာရမ္မဏပစ္စယာ – စိတ္တံ ပဋိစ္စ စိတ္တသမုဋ္ဌာနံ ရူပံ၊ ပဋိသန္ဓိက္ခဏေ စိတ္တံ ပဋိစ္စ ဗာဟိရံ ကဋတ္တာရူပံ. (၂)

အဇ္ဈတ္တိကံ ဓမ္မံ ပဋိစ္စ အဇ္ဈတ္တိကော စ ဗာဟိရော စ ဓမ္မာ ဥပ္ပဇ္ဇန္တိ နအာရမ္မဏပစ္စယာ၊ ပဋိသန္ဓိက္ခဏေ စိတ္တံ ပဋိစ္စ အဇ္ဈတ္တိကဉ္စ ဗာဟိရဉ္စ ကဋတ္တာရူပံ. (၃)

ဗာဟိရံ ဓမ္မံ ပဋိစ္စ ဗာဟိရော ဓမ္မော ဥပ္ပဇ္ဇတိ နအာရမ္မဏပစ္စယာ – ဗာဟိရေ ခန္ဓေ ပဋိစ္စ စိတ္တသမုဋ္ဌာနံ ရူပံ၊ ပဋိသန္ဓိက္ခဏေ ဗာဟိရေ ခန္ဓေ ပဋိစ္စ ဗာဟိရံ ကဋတ္တာရူပံ၊ ဗာဟိရေ ခန္ဓေ ပဋိစ္စ ဝတ္ထု၊ ဧကံ မဟာဘူတံ။ပေ။ (ယာဝ အသညသတ္တာ). (၁)

ဗာဟိရံ ဓမ္မံ ပဋိစ္စ အဇ္ဈတ္တိကော ဓမ္မော ဥပ္ပဇ္ဇတိ နအာရမ္မဏပစ္စယာ – ပဋိသန္ဓိက္ခဏေ ဗာဟိရေ ခန္ဓေ ပဋိစ္စ အဇ္ဈတ္တိကံ ကဋတ္တာရူပံ. (၂)

ဗာဟိရံ ဓမ္မံ ပဋိစ္စ အဇ္ဈတ္တိကော စ ဗာဟိရော စ ဓမ္မာ ဥပ္ပဇ္ဇန္တိ နအာရမ္မဏပစ္စယာ – ပဋိသန္ဓိက္ခဏေ ဗာဟိရေ ခန္ဓေ ပဋိစ္စ အဇ္ဈတ္တိကဉ္စ ဗာဟိရဉ္စ ကဋတ္တာရူပံ. (၃)

၃၂၇. အဇ္ဈတ္တိကဉ္စ ဗာဟိရဉ္စ ဓမ္မံ ပဋိစ္စ အဇ္ဈတ္တိကော ဓမ္မော ဥပ္ပဇ္ဇတိ နအာရမ္မဏပစ္စယာ – ပဋိသန္ဓိက္ခဏေ စိတ္တဉ္စ သမ္ပယုတ္တကေ စ ခန္ဓေ ပဋိစ္စ အဇ္ဈတ္တိကံ ကဋတ္တာရူပံ. (၁)

အဇ္ဈတ္တိကဉ္စ ဗာဟိရဉ္စ ဓမ္မံ ပဋိစ္စ ဗာဟိရော ဓမ္မော ဥပ္ပဇ္ဇတိ နအာရမ္မဏပစ္စယာ – ဗာဟိရေ ခန္ဓေ စ စိတ္တဉ္စ ပဋိစ္စ စိတ္တသမုဋ္ဌာနံ ရူပံ၊ စိတ္တဉ္စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ (ပဋိသန္ဓိက္ခဏေ ဒွေ ကာတဗ္ဗာ).

အဇ္ဈတ္တိကဉ္စ ဗာဟိရဉ္စ ဓမ္မံ ပဋိစ္စ အဇ္ဈတ္တိကော စ ဗာဟိရော စ ဓမ္မာ ဥပ္ပဇ္ဇန္တိ နအာရမ္မဏပစ္စယာ – ပဋိသန္ဓိက္ခဏေ စိတ္တဉ္စ သမ္ပယုတ္တကေ စ ခန္ဓေ ပဋိစ္စ အဇ္ဈတ္တိကဉ္စ ဗာဟိရဉ္စ ကဋတ္တာရူပံ (သံခိတ္တံ). (၃)

နဈာနပစ္စယော

၃၂၈. အဇ္ဈတ္တိကံ ဓမ္မံ ပဋိစ္စ ဗာဟိရော ဓမ္မော ဥပ္ပဇ္ဇတိ နဈာနပစ္စယာ – စက္ခုဝိညာဏံ ပဋိစ္စ သမ္ပယုတ္တကာ ခန္ဓာ။ပေ။ ကာယဝိညာဏံ။ပေ။.

ဗာဟိရံ ဓမ္မံ ပဋိစ္စ ဗာဟိရော ဓမ္မော ဥပ္ပဇ္ဇတိ နဈာနပစ္စယာ – စက္ခုဝိညာဏသဟဂတံ ဧကံ ခန္ဓံ ပဋိစ္စ ဒွေ ခန္ဓာ၊ ဒွေ ခန္ဓေ။ပေ။ ကာယဝိညာဏသဟဂတံ။ပေ။ ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ။ အသညသတ္တာနံ။ပေ။. ဗာဟိရံ ဓမ္မံ ပဋိစ္စ အဇ္ဈတ္တိကော ဓမ္မော ဥပ္ပဇ္ဇတိ နဈာနပစ္စယာ – စက္ခုဝိညာဏသဟဂတေ ခန္ဓေ ပဋိစ္စ စက္ခုဝိညာဏံ။ပေ။ ကာယဝိညာဏသဟဂတေ ခန္ဓေ ပဋိစ္စ ကာယဝိညာဏံ. ဗာဟိရံ ဓမ္မံ ပဋိစ္စ အဇ္ဈတ္တိကော စ ဗာဟိရော စ ဓမ္မာ ဥပ္ပဇ္ဇန္တိ နဈာနပစ္စယာ – စက္ခုဝိညာဏသဟဂတံ ဧကံ ခန္ဓံ ပဋိစ္စ ဒွေ ခန္ဓာ စက္ခုဝိညာဏဉ္စ၊ ဒွေ ခန္ဓေ။ပေ။ ကာယဝိညာဏသဟဂတံ ဧကံ ခန္ဓံ။ပေ။. (၃)

အဇ္ဈတ္တိကဉ္စ ဗာဟိရဉ္စ ဓမ္မံ ပဋိစ္စ ဗာဟိရော ဓမ္မော ဥပ္ပဇ္ဇတိ နဈာနပစ္စယာ – စက္ခုဝိညာဏသဟဂတံ ဧကံ ခန္ဓဉ္စ စက္ခုဝိညာဏဉ္စ ပဋိစ္စ ဒွေ ခန္ဓာ၊ ဒွေ ခန္ဓေ။ပေ။ ကာယဝိညာဏံ (စက္ကံ).