၁. ဝိဘင်္ဂဝါရော

ဟေတုပစ္စယော

၃၁၈. အဇ္ဈတ္တိကံ ဓမ္မံ ပဋိစ္စ အဇ္ဈတ္တိကော ဓမ္မော ဥပ္ပဇ္ဇတိ ဟေတုပစ္စယာ – ပဋိသန္ဓိက္ခဏေ စိတ္တံ ပဋိစ္စ အဇ္ဈတ္တိကံ ကဋတ္တာရူပံ. (၁)

အဇ္ဈတ္တိကံ ဓမ္မံ ပဋိစ္စ ဗာဟိရော ဓမ္မော ဥပ္ပဇ္ဇတိ ဟေတုပစ္စယာ – စိတ္တံ ပဋိစ္စ သမ္ပယုတ္တကာ ခန္ဓာ စိတ္တသမုဋ္ဌာနဉ္စ ရူပံ၊ ပဋိသန္ဓိက္ခဏေ စိတ္တံ ပဋိစ္စ သမ္ပယုတ္တကာ ခန္ဓာ ဗာဟိရံ ကဋတ္တာ စ ရူပံ. (၂)

အဇ္ဈတ္တိကံ ဓမ္မံ ပဋိစ္စ အဇ္ဈတ္တိကော စ ဗာဟိရော စ ဓမ္မာ ဥပ္ပဇ္ဇန္တိ ဟေတုပစ္စယာ – ပဋိသန္ဓိက္ခဏေ စိတ္တံ ပဋိစ္စ သမ္ပယုတ္တကာ ခန္ဓာ အဇ္ဈတ္တိကဉ္စ ဗာဟိရဉ္စ ကဋတ္တာရူပံ. (၃)

၃၁၉. ဗာဟိရံ ဓမ္မံ ပဋိစ္စ ဗာဟိရော ဓမ္မော ဥပ္ပဇ္ဇတိ ဟေတုပစ္စယာ – ဗာဟိရံ ဧကံ ခန္ဓံ ပဋိစ္စ ဒွေ ခန္ဓာ စိတ္တသမုဋ္ဌာနဉ္စ ရူပံ၊ ဒွေ ခန္ဓေ။ပေ။ ပဋိသန္ဓိက္ခဏေ ဗာဟိရံ ဧကံ ခန္ဓံ ပဋိစ္စ ဒွေ ခန္ဓာ ဗာဟိရံ ကဋတ္တာ စ ရူပံ၊ ဒွေ ခန္ဓေ။ပေ။ ခန္ဓေ ပဋိစ္စ ဝတ္ထု၊ ဝတ္ထုံ ပဋိစ္စ ခန္ဓာ၊ ဧကံ မဟာဘူတံ။ပေ။ မဟာဘူတေ ပဋိစ္စ စိတ္တသမုဋ္ဌာနံ ရူပံ ကဋတ္တာရူပံ ဥပါဒါရူပံ. (၁)

ဗာဟိရံ ဓမ္မံ ပဋိစ္စ အဇ္ဈတ္တိကော ဓမ္မော ဥပ္ပဇ္ဇတိ ဟေတုပစ္စယာ – ဗာဟိရေ ခန္ဓေ ပဋိစ္စ စိတ္တံ၊ ပဋိသန္ဓိက္ခဏေ ဗာဟိရေ ခန္ဓေ ပဋိစ္စ စိတ္တံ အဇ္ဈတ္တိကံ ကဋတ္တာ စ ရူပံ၊ ပဋိသန္ဓိက္ခဏေ ဗာဟိရံ ဝတ္ထုံ ပဋိစ္စ စိတ္တံ. (၂)

ဗာဟိရံ ဓမ္မံ ပဋိစ္စ အဇ္ဈတ္တိကော စ ဗာဟိရော စ ဓမ္မာ ဥပ္ပဇ္ဇန္တိ ဟေတုပစ္စယာ – ဗာဟိရံ ဧကံ ခန္ဓံ ပဋိစ္စ ဒွေ ခန္ဓာ စိတ္တဉ္စ စိတ္တသမုဋ္ဌာနဉ္စ ရူပံ၊ ဒွေ ခန္ဓေ။ပေ။ ပဋိသန္ဓိက္ခဏေ ဗာဟိရံ ဧကံ ခန္ဓံ ပဋိစ္စ ဒွေ ခန္ဓာ စိတ္တဉ္စ အဇ္ဈတ္တိကဉ္စ ဗာဟိရဉ္စ ကဋတ္တာရူပံ၊ ဒွေ ခန္ဓေ။ပေ။ ပဋိသန္ဓိက္ခဏေ ဝတ္ထုံ ပဋိစ္စ စိတ္တံ သမ္ပယုတ္တကာ စ ခန္ဓာ. (၃)

၃၂၀. အဇ္ဈတ္တိကဉ္စ ဗာဟိရဉ္စ ဓမ္မံ ပဋိစ္စ အဇ္ဈတ္တိကော ဓမ္မော ဥပ္ပဇ္ဇတိ ဟေတုပစ္စယာ – ပဋိသန္ဓိက္ခဏေ စိတ္တဉ္စ သမ္ပယုတ္တကေ စ ခန္ဓေ ပဋိစ္စ အဇ္ဈတ္တိကံ ကဋတ္တာရူပံ. (၁)

အဇ္ဈတ္တိကဉ္စ ဗာဟိရဉ္စ ဓမ္မံ ပဋိစ္စ ဗာဟိရော ဓမ္မော ဥပ္ပဇ္ဇတိ ဟေတုပစ္စယာ – ဗာဟိရံ ဧကံ ခန္ဓဉ္စ စိတ္တဉ္စ ပဋိစ္စ ဒွေ ခန္ဓာ စိတ္တသမုဋ္ဌာနဉ္စ ရူပံ၊ ဒွေ ခန္ဓေ စ။ပေ။ စိတ္တဉ္စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ၊ ပဋိသန္ဓိက္ခဏေ ဗာဟိရံ ဧကံ ခန္ဓဉ္စ စိတ္တဉ္စ ပဋိစ္စ ဒွေ ခန္ဓာ ဗာဟိရံ ကဋတ္တာ စ ရူပံ၊ ဒွေ ခန္ဓေ စ။ပေ။ စိတ္တဉ္စ မဟာဘူတေ စ ပဋိစ္စ ဗာဟိရံ ကဋတ္တာရူပံ၊ ပဋိသန္ဓိက္ခဏေ စိတ္တဉ္စ ဝတ္ထုဉ္စ ပဋိစ္စ ဗာဟိရာ ခန္ဓာ. (၂)

အဇ္ဈတ္တိကဉ္စ ဗာဟိရဉ္စ ဓမ္မံ ပဋိစ္စ အဇ္ဈတ္တိကော စ ဗာဟိရော စ ဓမ္မာ ဥပ္ပဇ္ဇန္တိ ဟေတုပစ္စယာ – ပဋိသန္ဓိက္ခဏေ ဗာဟိရံ ဧကံ ခန္ဓဉ္စ စိတ္တဉ္စ ပဋိစ္စ ဒွေ ခန္ဓာ အဇ္ဈတ္တိကဉ္စ ဗာဟိရဉ္စ ကဋတ္တာရူပံ၊ ဒွေ ခန္ဓေ စ။ပေ။. (၃)

အာရမ္မဏပစ္စယော

၃၂၁. အဇ္ဈတ္တိကံ ဓမ္မံ ပဋိစ္စ ဗာဟိရော ဓမ္မော ဥပ္ပဇ္ဇတိ အာရမ္မဏပစ္စယာ – စိတ္တံ ပဋိစ္စ သမ္ပယုတ္တကာ ခန္ဓာ၊ ပဋိသန္ဓိက္ခဏေ စိတ္တံ ပဋိစ္စ သမ္ပယုတ္တကာ ခန္ဓာ. (၁)

ဗာဟိရံ ဓမ္မံ ပဋိစ္စ ဗာဟိရော ဓမ္မော ဥပ္ပဇ္ဇတိ အာရမ္မဏပစ္စယာ – ဗာဟိရံ ဧကံ ခန္ဓံ ပဋိစ္စ ဒွေ ခန္ဓာ၊ ဒွေ ခန္ဓေ။ပေ။ ပဋိသန္ဓိက္ခဏေ။ပေ။ ဝတ္ထုံ ပဋိစ္စ ခန္ဓာ. (၁)

ဗာဟိရံ ဓမ္မံ ပဋိစ္စ အဇ္ဈတ္တိကော ဓမ္မော ဥပ္ပဇ္ဇတိ အာရမ္မဏပစ္စယာ – ဗာဟိရေ ခန္ဓေ ပဋိစ္စ စိတ္တံ၊ ပဋိသန္ဓိက္ခဏေ ဗာဟိရေ ခန္ဓေ ပဋိစ္စ စိတ္တံ၊ ပဋိသန္ဓိက္ခဏေ ဝတ္ထုံ ပဋိစ္စ စိတ္တံ. (၂)

ဗာဟိရံ ဓမ္မံ ပဋိစ္စ အဇ္ဈတ္တိကော စ ဗာဟိရော စ ဓမ္မာ ဥပ္ပဇ္ဇန္တိ အာရမ္မဏပစ္စယာ – ဗာဟိရံ ဧကံ ခန္ဓံ ပဋိစ္စ ဒွေ ခန္ဓာ စိတ္တဉ္စ၊ ဒွေ ခန္ဓေ။ပေ။ ပဋိသန္ဓိက္ခဏေ ဗာဟိရံ ဧကံ ခန္ဓံ ပဋိစ္စ ဒွေ ခန္ဓာ စိတ္တဉ္စ၊ ဒွေ ခန္ဓေ။ပေ။ ပဋိသန္ဓိက္ခဏေ ဝတ္ထုံ ပဋိစ္စ စိတ္တံ သမ္ပယုတ္တကာ စ ခန္ဓာ. (၃)

အဇ္ဈတ္တိကဉ္စ ဗာဟိရဉ္စ ဓမ္မံ ပဋိစ္စ ဗာဟိရော ဓမ္မော ဥပ္ပဇ္ဇတိ အာရမ္မဏပစ္စယာ – ဗာဟိရံ ဧကံ ခန္ဓဉ္စ စိတ္တဉ္စ ပဋိစ္စ ဒွေ ခန္ဓာ၊ ဒွေ ခန္ဓေ စ။ပေ။ ပဋိသန္ဓိက္ခဏေ ဗာဟိရံ ဧကံ ခန္ဓံ စိတ္တဉ္စ ပဋိစ္စ ဒွေ ခန္ဓာ၊ ဒွေ ခန္ဓေ စ။ပေ။ ပဋိသန္ဓိက္ခဏေ ဗာဟိရံ ဧကံ ခန္ဓဉ္စ စိတ္တဉ္စ ဝတ္ထုဉ္စ ပဋိစ္စ ဒွေ ခန္ဓာ၊ ဒွေ ခန္ဓေ စ။ပေ။ (သံခိတ္တံ). (၁)