၁. ဝိဘင်္ဂဝါရော

ဟေတုပစ္စယော

၃၀၀. စိတ္တသံသဋ္ဌသမုဋ္ဌာနော ဓမ္မော စိတ္တသံသဋ္ဌသမုဋ္ဌာနဿ ဓမ္မဿ ဟေတုပစ္စယေန ပစ္စယော – စိတ္တသံသဋ္ဌသမုဋ္ဌာနာ ဟေတူ သမ္ပယုတ္တကာနံ ခန္ဓာနံ ဟေတုပစ္စယေန ပစ္စယော၊ ပဋိသန္ဓိက္ခဏေ။ပေ။. (မူလံ ကာတဗ္ဗံ) စိတ္တသံသဋ္ဌသမုဋ္ဌာနာ ဟေတူ စိတ္တဿ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော၊ ပဋိသန္ဓိက္ခဏေ။ပေ။. (မူလံ ကာတဗ္ဗံ) စိတ္တသံသဋ္ဌသမုဋ္ဌာနာ ဟေတူ သမ္ပယုတ္တကာနံ ခန္ဓာနံ စိတ္တဿ စ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော၊ ပဋိသန္ဓိက္ခဏေ။ပေ။. (၃)

အာရမ္မဏပစ္စယော

၃၀၁. စိတ္တသံသဋ္ဌသမုဋ္ဌာနော ဓမ္မော စိတ္တသံသဋ္ဌသမုဋ္ဌာနဿ ဓမ္မဿ အာရမ္မဏပစ္စယေန ပစ္စယော – စိတ္တသံသဋ္ဌသမုဋ္ဌာနေ ခန္ဓေ အာရဗ္ဘ စိတ္တသံသဋ္ဌသမုဋ္ဌာနာ ခန္ဓာ ဥပ္ပဇ္ဇန္တိ. (မူလံ ကာတဗ္ဗံ) စိတ္တသံသဋ္ဌသမုဋ္ဌာနေ ခန္ဓေ အာရဗ္ဘ စိတ္တံ ဥပ္ပဇ္ဇတိ. (မူလံ ကာတဗ္ဗံ) စိတ္တသံသဋ္ဌသမုဋ္ဌာနေ ခန္ဓေ အာရဗ္ဘ စိတ္တဉ္စ သမ္ပယုတ္တကာ စ ခန္ဓာ ဥပ္ပဇ္ဇန္တိ. (၃)

နောစိတ္တသံသဋ္ဌသမုဋ္ဌာနော ဓမ္မော နောစိတ္တသံသဋ္ဌသမုဋ္ဌာနဿ ဓမ္မဿ အာရမ္မဏပစ္စယေန ပစ္စယော – အရိယာ မဂ္ဂါ ဝုဋ္ဌဟိတွာ မဂ္ဂံ ပစ္စဝေက္ခန္တိ။ပေ။ နိဗ္ဗာနံ ပစ္စဝေက္ခန္တိ. နိဗ္ဗာနံ ဂေါတြဘုဿ။ပေ။. (သံခိတ္တံ. ယထာ စိတ္တသဟဘူဒုကေ အာရမ္မဏံ ဧဝံ ကာတဗ္ဗံ၊ နိန္နာနာကရဏံ. နဝပိ ပဉှာ.)

အဓိပတိပစ္စယော

၃၀၂. စိတ္တသံသဋ္ဌသမုဋ္ဌာနော ဓမ္မော စိတ္တသံသဋ္ဌသမုဋ္ဌာနဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ။ တီဏိ (ဒွေပိ အဓိပတီ ကာတဗ္ဗာ). (၃)

နောစိတ္တသံသဋ္ဌသမုဋ္ဌာနော ဓမ္မော နောစိတ္တသံသဋ္ဌသမုဋ္ဌာနဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ။ တီဏိ (ဒွေပိ အဓိပတိ ကာတဗ္ဗာ). (၃)

စိတ္တသံသဋ္ဌသမုဋ္ဌာနော စ နောစိတ္တသံသဋ္ဌသမုဋ္ဌာနော စ ဓမ္မာ စိတ္တသံသဋ္ဌသမုဋ္ဌာနဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ. (ဧကာယေဝ အဓိပတိ ကာတဗ္ဗာ၊ နဝပိ ပဉှာ. ယထာ စိတ္တသဟဘူဒုကံ၊ ဧဝံ ကာတဗ္ဗံ၊ နိန္နာနာကရဏံ).

အနန္တရပစ္စယာဒိ

၃၀၃. စိတ္တသံသဋ္ဌသမုဋ္ဌာနော ဓမ္မော စိတ္တသံသဋ္ဌသမုဋ္ဌာနဿ ဓမ္မဿ အနန္တရပစ္စယေန ပစ္စယော (နဝပိ ပဉှာ စိတ္တသဟဘူဒုကသဒိသာ)။ သမနန္တရပစ္စယေန ပစ္စယော။ နဝ။ သဟဇာတပစ္စယေန ပစ္စယော။ နဝ (ပဋိစ္စသဒိသာ)။ အညမညပစ္စယေန ပစ္စယော။ နဝ (ပဋိစ္စသဒိသာ)။ နိဿယပစ္စယေန ပစ္စယော။ နဝ (ပစ္စယသဒိသာ)။ ဥပနိဿယပစ္စယေန ပစ္စယော (နဝပိ ပဉှာ စိတ္တသဟဘူဒုကသဒိသာ၊ နိန္နာနာကရဏံ).

ပုရေဇာတပစ္စယာဒိ

၃၀၄. နောစိတ္တသံသဋ္ဌသမုဋ္ဌာနော ဓမ္မော နောစိတ္တသံသဋ္ဌသမုဋ္ဌာနဿ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ။ တီဏိ (စိတ္တသဟဘူဒုကသဒိသာ၊ နိန္နာနာကရဏံ).

စိတ္တသံသဋ္ဌသမုဋ္ဌာနော ဓမ္မော နောစိတ္တသံသဋ္ဌသမုဋ္ဌာနဿ ဓမ္မဿ ပစ္ဆာဇာတပစ္စယေန ပစ္စယော (စိတ္တသဟဘူဒုကသဒိသာ၊ နိန္နာနာကရဏံ. တီဏိပိ ပစ္ဆာဇာတာ. ဒွေ. ဧကမူလာနံ ဧကာ ဃဋနာ)။ အာသေဝနပစ္စယေန ပစ္စယော။ နဝ.

ကမ္မပစ္စယာဒိ

၃၀၅. စိတ္တသံသဋ္ဌသမုဋ္ဌာနော ဓမ္မော စိတ္တသံသဋ္ဌသမုဋ္ဌာနဿ ဓမ္မဿ ကမ္မပစ္စယေန ပစ္စယော။ တီဏိ (စိတ္တသဟဘူဒုကသဒိသာ နိန္နာနာကရဏာ. တီဏိပိ သဟဇာတာ၊ နာနာက္ခဏိကာ)။ ဝိပါကပစ္စယေန ပစ္စယော။ နဝ။ အာဟာရပစ္စယေန ပစ္စယော။ နဝ (စိတ္တသဟဘူဂမနသဒိသာ၊ ဧကံယေဝ ကဗဠီကာရံ အာဟာရံ)။ ဣန္ဒြိယပစ္စယေန ပစ္စယော။ နဝ။ ဈာနပစ္စယေန ပစ္စယော။ တီဏိ။ မဂ္ဂပစ္စယေန ပစ္စယော။ တီဏိ။ သမ္ပယုတ္တပစ္စယေန ပစ္စယော။ ပဉ္စ.

ဝိပ္ပယုတ္တပစ္စယော

၃၀၆. စိတ္တသံသဋ္ဌသမုဋ္ဌာနော ဓမ္မော နောစိတ္တသံသဋ္ဌသမုဋ္ဌာနဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပစ္ဆာဇာတံ (သံခိတ္တံ). (၁)

နောစိတ္တသံသဋ္ဌသမုဋ္ဌာနော ဓမ္မော နောစိတ္တသံသဋ္ဌသမုဋ္ဌာနဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ (သံခိတ္တံ). (၁)

နောစိတ္တသံသဋ္ဌသမုဋ္ဌာနော ဓမ္မော စိတ္တသံသဋ္ဌသမုဋ္ဌာနဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပုရေဇာတံ. သဟဇာတံ – ပဋိသန္ဓိက္ခဏေ ဝတ္ထု စိတ္တသံသဋ္ဌသမုဋ္ဌာနာနံ ခန္ဓာနံ ဝိပ္ပယုတ္တပစ္စယေန ပစ္စယော. ပုရေဇာတံ – စက္ခာယတနံ စက္ခုဝိညာဏသဟဂတာနံ ခန္ဓာနံ ဝိပ္ပယုတ္တပစ္စယေန ပစ္စယော။ပေ။ ကာယာယတနံ။ပေ။ ဝတ္ထု စိတ္တသံသဋ္ဌသမုဋ္ဌာနာနံ ခန္ဓာနံ ဝိပ္ပယုတ္တပစ္စယေန ပစ္စယော. (၂)

နောစိတ္တသံသဋ္ဌသမုဋ္ဌာနော ဓမ္မော စိတ္တသံသဋ္ဌသမုဋ္ဌာနဿ စ နောစိတ္တသံသဋ္ဌသမုဋ္ဌာနဿ စ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပုရေဇာတံ. သဟဇာတံ – ပဋိသန္ဓိက္ခဏေ ဝတ္ထု စိတ္တဿ သမ္ပယုတ္တကာနဉ္စ ခန္ဓာနံ ဝိပ္ပယုတ္တပစ္စယေန ပစ္စယော. ပုရေဇာတံ – စက္ခာယတနံ စက္ခုဝိညာဏဿ သမ္ပယုတ္တကာနဉ္စ ခန္ဓာနံ ဝိပ္ပယုတ္တပစ္စယေန ပစ္စယော။ပေ။ ကာယာယတနံ။ပေ။ ဝတ္ထု စိတ္တဿ သမ္ပယုတ္တကာနဉ္စ ခန္ဓာနံ ဝိပ္ပယုတ္တပစ္စယေန ပစ္စယော. (၃)

စိတ္တသံသဋ္ဌသမုဋ္ဌာနော စ နောစိတ္တသံသဋ္ဌသမုဋ္ဌာနော စ ဓမ္မာ နောစိတ္တသံသဋ္ဌသမုဋ္ဌာနဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပစ္ဆာဇာတံ (သံခိတ္တံ).

အတ္ထိပစ္စယော

၃၀၇. စိတ္တသံသဋ္ဌသမုဋ္ဌာနော ဓမ္မော စိတ္တသံသဋ္ဌသမုဋ္ဌာနဿ ဓမ္မဿ အတ္ထိပစ္စယေန ပစ္စယော (ပဋိစ္စသဒိသာ). စိတ္တသံသဋ္ဌသမုဋ္ဌာနော ဓမ္မော နောစိတ္တသံသဋ္ဌသမုဋ္ဌာနဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပစ္ဆာဇာတံ (သံခိတ္တံ). စိတ္တသံသဋ္ဌသမုဋ္ဌာနော ဓမ္မော စိတ္တသံသဋ္ဌသမုဋ္ဌာနဿ စ နောစိတ္တသံသဋ္ဌသမုဋ္ဌာနဿ စ ဓမ္မဿ အတ္ထိပစ္စယေန ပစ္စယော (ပဋိစ္စသဒိသာ). (၃)

နောစိတ္တသံသဋ္ဌသမုဋ္ဌာနော ဓမ္မော နောစိတ္တသံသဋ္ဌသမုဋ္ဌာနဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ၊ အာဟာရံ၊ ဣန္ဒြိယံ (ပုရေဇာတသဒိသံ ပုရေဇာတံ ကာတဗ္ဗံ. သဗ္ဗံ သံခိတ္တံ. ဝိတ္ထာရေတဗ္ဗံ). (၁)

နောစိတ္တသံသဋ္ဌသမုဋ္ဌာနော ဓမ္မော စိတ္တသံသဋ္ဌသမုဋ္ဌာနဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ. သဟဇာတံ – စိတ္တံ သမ္ပယုတ္တကာနံ ခန္ဓာနံ အတ္ထိပစ္စယေန ပစ္စယော၊ ပဋိသန္ဓိက္ခဏေ စိတ္တံ သမ္ပယုတ္တကာနံ ခန္ဓာနံ အတ္ထိပစ္စယေန ပစ္စယော၊ ပဋိသန္ဓိက္ခဏေ ဝတ္ထု စိတ္တသံသဋ္ဌသမုဋ္ဌာနာနံ ခန္ဓာနံ အတ္ထိပစ္စယေန ပစ္စယော. ပုရေဇာတံ (ပုရေဇာတသဒိသံ၊ နိန္နာနာကရဏံ). (၂)

နောစိတ္တသံသဋ္ဌသမုဋ္ဌာနော ဓမ္မော စိတ္တသံသဋ္ဌသမုဋ္ဌာနဿ စ နောစိတ္တသံသဋ္ဌသမုဋ္ဌာနဿ စ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ. သဟဇာတံ – စိတ္တံ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ အတ္ထိပစ္စယေန ပစ္စယော၊ ပဋိသန္ဓိက္ခဏေ စိတ္တံ သမ္ပယုတ္တကာနံ ခန္ဓာနံ ကဋတ္တာ စ ရူပါနံ အတ္ထိပစ္စယေန ပစ္စယော၊ ပဋိသန္ဓိက္ခဏေ ဝတ္ထု စိတ္တဿ သမ္ပယုတ္တကာနဉ္စ ခန္ဓာနံ အတ္ထိပစ္စယေန ပစ္စယော. ပုရေဇာတံ (ပုရေဇာတသဒိသံ). (၃)

၃၀၈. စိတ္တသံသဋ္ဌသမုဋ္ဌာနော စ နောစိတ္တသံသဋ္ဌသမုဋ္ဌာနော စ ဓမ္မာ စိတ္တသံသဋ္ဌသမုဋ္ဌာနဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ. သဟဇာတော – စက္ခုဝိညာဏသဟဂတော ဧကော ခန္ဓော စ စက္ခုဝိညာဏဉ္စ ဒွိန္နံ ခန္ဓာနံ။ပေ။ ဒွေ ခန္ဓာ စ။ပေ။ စက္ခုဝိညာဏသဟဂတော ဧကော ခန္ဓော စ စက္ခာယတနဉ္စ ဒွိန္နံ ခန္ဓာနံ။ပေ။ ဒွေ ခန္ဓာ စ။ပေ။ ကာယဝိညာဏသဟဂတော။ပေ။ စိတ္တသံသဋ္ဌသမုဋ္ဌာနော ဧကော ခန္ဓော စ စိတ္တဉ္စ ဒွိန္နံ ခန္ဓာနံ အတ္ထိပစ္စယေန ပစ္စယော၊ ဒွေ ခန္ဓာ စ။ပေ။ စိတ္တသံသဋ္ဌသမုဋ္ဌာနော ဧကော ခန္ဓော စ ဝတ္ထု စ ဒွိန္နံ ခန္ဓာနံ အတ္ထိပစ္စယေန ပစ္စယော။ပေ။ ဒွေ ခန္ဓာ စ။ပေ။ (ပဋိသန္ဓိက္ခဏေ ဒွေပိ ကာတဗ္ဗာ). (၁)

စိတ္တသံသဋ္ဌသမုဋ္ဌာနော စ နောစိတ္တသံသဋ္ဌသမုဋ္ဌာနော စ ဓမ္မာ နောစိတ္တသံသဋ္ဌသမုဋ္ဌာနဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ၊ အာဟာရံ၊ ဣန္ဒြိယံ. သဟဇာတာ – စက္ခုဝိညာဏသဟဂတာ ခန္ဓာ စ စက္ခာယတနဉ္စ စက္ခုဝိညာဏဿ အတ္ထိပစ္စယေန ပစ္စယော။ပေ။ ကာယဝိညာဏသဟဂတာ။ပေ။ စိတ္တသံသဋ္ဌသမုဋ္ဌာနာ ခန္ဓာ စ စိတ္တဉ္စ စိတ္တသံသဋ္ဌသမုဋ္ဌာနာနံ ရူပါနံ အတ္ထိပစ္စယေန ပစ္စယော၊ စိတ္တသံသဋ္ဌသမုဋ္ဌာနာ ခန္ဓာ စ မဟာဘူတာ စ စိတ္တသံသဋ္ဌသမုဋ္ဌာနာနံ ရူပါနံ အတ္ထိပစ္စယေန ပစ္စယော၊ စိတ္တသံသဋ္ဌသမုဋ္ဌာနာ ခန္ဓာ စ ဝတ္ထု စ စိတ္တဿ အတ္ထိပစ္စယေန ပစ္စယော (ပဋိသန္ဓိက္ခဏေ တီဏိ ကာတဗ္ဗာ). ပစ္ဆာဇာတာ – စိတ္တသံသဋ္ဌသမုဋ္ဌာနာ ခန္ဓာ စ စိတ္တဉ္စ ပုရေဇာတဿ ဣမဿ နောစိတ္တသံသဋ္ဌသမုဋ္ဌာနဿ ကာယဿ အတ္ထိပစ္စယေန ပစ္စယော. ပစ္ဆာဇာတာ – စိတ္တသံသဋ္ဌသမုဋ္ဌာနာ ခန္ဓာ စ စိတ္တဉ္စ ကဗဠီကာရော အာဟာရော စ ဣမဿ နောစိတ္တသံသဋ္ဌသမုဋ္ဌာနဿ ကာယဿ အတ္ထိပစ္စယေန ပစ္စယော. ပစ္ဆာဇာတာ – စိတ္တသံသဋ္ဌသမုဋ္ဌာနာ ခန္ဓာ စ စိတ္တဉ္စ ရူပဇီဝိတိန္ဒြိယဉ္စ ကဋတ္တာရူပါနံ အတ္ထိပစ္စယေန ပစ္စယော. (၂)

စိတ္တသံသဋ္ဌသမုဋ္ဌာနော စ နောစိတ္တသံသဋ္ဌသမုဋ္ဌာနော စ ဓမ္မာ စိတ္တသံသဋ္ဌသမုဋ္ဌာနဿ စ နောစိတ္တသံသဋ္ဌသမုဋ္ဌာနဿ စ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ. သဟဇာတော – စက္ခုဝိညာဏသဟဂတော ဧကော ခန္ဓော စ စက္ခာယတနဉ္စ ဒွိန္နံ ခန္ဓာနံ စက္ခုဝိညာဏဿ စ အတ္ထိပစ္စယေန ပစ္စယော၊ ဒွေ ခန္ဓာ စ။ပေ။ ကာယဝိညာဏသဟဂတော။ပေ။. သဟဇာတော – စိတ္တသံသဋ္ဌသမုဋ္ဌာနော ဧကော ခန္ဓော စ စိတ္တဉ္စ ဒွိန္နံ ခန္ဓာနံ စိတ္တသမုဋ္ဌာနာနဉ္စ ရူပါနံ အတ္ထိပစ္စယေန ပစ္စယော၊ ဒွေ ခန္ဓာ စ။ပေ။ စိတ္တသံသဋ္ဌသမုဋ္ဌာနော ဧကော ခန္ဓော စ ဝတ္ထု စ ဒွိန္နံ ခန္ဓာနံ စိတ္တဿ စ အတ္ထိပစ္စယေန ပစ္စယော၊ ဒွေ ခန္ဓာ စ။ပေ။ (ပဋိသန္ဓိက္ခဏေ ဒွေပိ ကာတဗ္ဗာ). (၃)