၁. ဝိဘင်္ဂဝါရော

ဟေတုပစ္စယော

၂၉၆. စိတ္တသံသဋ္ဌသမုဋ္ဌာနံ ဓမ္မံ သံသဋ္ဌော စိတ္တသံသဋ္ဌသမုဋ္ဌာနော ဓမ္မော ဥပ္ပဇ္ဇတိ ဟေတုပစ္စယာ – စိတ္တသံသဋ္ဌသမုဋ္ဌာနံ ဧကံ ခန္ဓံ သံသဋ္ဌာ ဒွေ ခန္ဓာ၊ ဒွေ ခန္ဓေ။ပေ။ ပဋိသန္ဓိက္ခဏေ။ပေ။. (၁)

စိတ္တသံသဋ္ဌသမုဋ္ဌာနံ ဓမ္မံ သံသဋ္ဌော နောစိတ္တသံသဋ္ဌသမုဋ္ဌာနော ဓမ္မော ဥပ္ပဇ္ဇတိ ဟေတုပစ္စယာ – စိတ္တသံသဋ္ဌသမုဋ္ဌာနေ ခန္ဓေ သံသဋ္ဌံ စိတ္တံ၊ ပဋိသန္ဓိက္ခဏေ။ပေ။. (၂)

စိတ္တသံသဋ္ဌသမုဋ္ဌာနံ ဓမ္မံ သံသဋ္ဌော စိတ္တသံသဋ္ဌသမုဋ္ဌာနော စ နောစိတ္တသံသဋ္ဌသမုဋ္ဌာနော စ ဓမ္မာ ဥပ္ပဇ္ဇန္တိ ဟေတုပစ္စယာ – စိတ္တသံသဋ္ဌသမုဋ္ဌာနံ ဧကံ ခန္ဓံ သံသဋ္ဌာ ဒွေ ခန္ဓာ စိတ္တဉ္စ၊ ဒွေ ခန္ဓေ။ပေ။ ပဋိသန္ဓိက္ခဏေ။ပေ။. (၃)

နောစိတ္တသံသဋ္ဌသမုဋ္ဌာနံ ဓမ္မံ သံသဋ္ဌော စိတ္တသံသဋ္ဌသမုဋ္ဌာနော ဓမ္မော ဥပ္ပဇ္ဇတိ ဟေတုပစ္စယာ – စိတ္တံ သံသဋ္ဌာ သမ္ပယုတ္တကာ ခန္ဓာ၊ ပဋိသန္ဓိက္ခဏေ။ပေ။. (၁)

စိတ္တသံသဋ္ဌသမုဋ္ဌာနဉ္စ နောစိတ္တသံသဋ္ဌသမုဋ္ဌာနဉ္စ ဓမ္မံ သံသဋ္ဌော စိတ္တသံသဋ္ဌသမုဋ္ဌာနော ဓမ္မော ဥပ္ပဇ္ဇတိ ဟေတုပစ္စယာ – စိတ္တသံသဋ္ဌသမုဋ္ဌာနံ ဧကံ ခန္ဓဉ္စ စိတ္တဉ္စ သံသဋ္ဌာ ဒွေ ခန္ဓာ၊ ဒွေ ခန္ဓေ။ပေ။ ပဋိသန္ဓိက္ခဏေ။ပေ။. (၁) (သံခိတ္တံ.)