၁. ဝိဘင်္ဂဝါရော

နဟေတုပစ္စယော

၂၈၂. စိတ္တသံသဋ္ဌသမုဋ္ဌာနံ ဓမ္မံ ပဋိစ္စ စိတ္တသံသဋ္ဌသမုဋ္ဌာနော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ စိတ္တသံသဋ္ဌသမုဋ္ဌာနံ ဧကံ ခန္ဓံ ပဋိစ္စ ဒွေ ခန္ဓာ၊ ဒွေ ခန္ဓေ။ပေ။ အဟေတုကပဋိသန္ဓိက္ခဏေ။ပေ။ ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ ပဋိစ္စ ဝိစိကိစ္ဆာသဟဂတော ဥဒ္ဓစ္စသဟဂတော မောဟော. (၁)

စိတ္တသံသဋ္ဌသမုဋ္ဌာနံ ဓမ္မံ ပဋိစ္စ နောစိတ္တသံသဋ္ဌသမုဋ္ဌာနော ဓမ္မော ဥပ္ပဇ္ဇတိ နဟေတုပစ္စယာ – အဟေတုကေ စိတ္တသံသဋ္ဌသမုဋ္ဌာနေ ခန္ဓေ ပဋိစ္စ စိတ္တံ စိတ္တသမုဋ္ဌာနဉ္စ ရူပံ၊ အဟေတုကပဋိသန္ဓိက္ခဏေ။ပေ။. (၂)

စိတ္တသံသဋ္ဌသမုဋ္ဌာနံ ဓမ္မံ ပဋိစ္စ စိတ္တသံသဋ္ဌသမုဋ္ဌာနော စ နောစိတ္တသံသဋ္ဌသမုဋ္ဌာနော စ ဓမ္မာ ဥပ္ပဇ္ဇန္တိ နဟေတုပစ္စယာ – အဟေတုကံ စိတ္တသံသဋ္ဌသမုဋ္ဌာနံ ဧကံ ခန္ဓံ ပဋိစ္စ ဒွေ ခန္ဓာ စိတ္တဉ္စ စိတ္တသမုဋ္ဌာနဉ္စ ရူပံ၊ ဒွေ ခန္ဓေ။ပေ။ အဟေတုကပဋိသန္ဓိက္ခဏေ။ပေ။. (၃)

၂၈၃. နောစိတ္တသံသဋ္ဌသမုဋ္ဌာနံ ဓမ္မံ ပဋိစ္စ နောစိတ္တသံသဋ္ဌသမုဋ္ဌာနော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ စိတ္တံ ပဋိစ္စ စိတ္တသမုဋ္ဌာနံ ရူပံ၊ အဟေတုကပဋိသန္ဓိက္ခဏေ စိတ္တံ ပဋိစ္စ ကဋတ္တာရူပံ၊ စိတ္တံ ပဋိစ္စ ဝတ္ထု၊ ဝတ္ထုံ ပဋိစ္စ စိတ္တံ၊ ဧကံ မဟာဘူတံ။ပေ။ (ယာဝ အသညသတ္တာ). (၁)

နောစိတ္တသံသဋ္ဌသမုဋ္ဌာနံ ဓမ္မံ ပဋိစ္စ စိတ္တသံသဋ္ဌသမုဋ္ဌာနော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ စိတ္တံ ပဋိစ္စ သမ္ပယုတ္တကာ ခန္ဓာ၊ အဟေတုကပဋိသန္ဓိက္ခဏေ စိတ္တံ ပဋိစ္စ သမ္ပယုတ္တကာ ခန္ဓာ၊ အဟေတုကပဋိသန္ဓိက္ခဏေ ဝတ္ထုံ ပဋိစ္စ စိတ္တသံသဋ္ဌသမုဋ္ဌာနာ ခန္ဓာ၊ ဝိစိကိစ္ဆာသဟဂတံ ဥဒ္ဓစ္စသဟဂတံ စိတ္တံ ပဋိစ္စ ဝိစိကိစ္ဆာသဟဂတော ဥဒ္ဓစ္စသဟဂတော မောဟော. (၂)

နောစိတ္တသံသဋ္ဌသမုဋ္ဌာနံ ဓမ္မံ ပဋိစ္စ စိတ္တသံသဋ္ဌသမုဋ္ဌာနော စ နောစိတ္တသံသဋ္ဌသမုဋ္ဌာနော စ ဓမ္မာ ဥပ္ပဇ္ဇန္တိ နဟေတုပစ္စယာ – အဟေတုကံ စိတ္တံ ပဋိစ္စ သမ္ပယုတ္တကာ ခန္ဓာ စိတ္တသမုဋ္ဌာနဉ္စ ရူပံ၊ အဟေတုကပဋိသန္ဓိက္ခဏေ စိတ္တံ ပဋိစ္စ သမ္ပယုတ္တကာ ခန္ဓာ ကဋတ္တာ စ ရူပံ၊ အဟေတုကပဋိသန္ဓိက္ခဏေ ဝတ္ထုံ ပဋိစ္စ စိတ္တံ သမ္ပယုတ္တကာ စ ခန္ဓာ. (၃)

၂၈၄. စိတ္တသံသဋ္ဌသမုဋ္ဌာနဉ္စ နောစိတ္တသံသဋ္ဌသမုဋ္ဌာနဉ္စ ဓမ္မံ ပဋိစ္စ စိတ္တသံသဋ္ဌသမုဋ္ဌာနော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ စိတ္တသံသဋ္ဌသမုဋ္ဌာနံ ဧကံ ခန္ဓဉ္စ စိတ္တဉ္စ ပဋိစ္စ ဒွေ ခန္ဓာ၊ ဒွေ ခန္ဓေ။ပေ။ အဟေတုကပဋိသန္ဓိက္ခဏေ စိတ္တသံသဋ္ဌသမုဋ္ဌာနံ ဧကံ ခန္ဓဉ္စ စိတဉ္စ။ပေ။ အဟေတုကပဋိသန္ဓိက္ခဏေ စိတ္တသံသဋ္ဌသမုဋ္ဌာနံ ဧကံ ခန္ဓဉ္စ ဝတ္ထုဉ္စ ပဋိစ္စ ဒွေ ခန္ဓာ၊ ဒွေ ခန္ဓေ။ပေ။ ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ စ စိတ္တဉ္စ ပဋိစ္စ ဝိစိကိစ္ဆာသဟဂတော ဥဒ္ဓစ္စသဟဂတော မောဟော. (၁)

စိတ္တသံသဋ္ဌသမုဋ္ဌာနဉ္စ နောစိတ္တသံသဋ္ဌသမုဋ္ဌာနဉ္စ ဓမ္မံ ပဋိစ္စ နောစိတ္တသံသဋ္ဌသမုဋ္ဌာနော ဓမ္မော ဥပ္ပဇ္ဇတိ နဟေတုပစ္စယာ – အဟေတုကေ စိတ္တသံသဋ္ဌသမုဋ္ဌာနေ ခန္ဓေ စ စိတ္တဉ္စ ပဋိစ္စ စိတ္တသမုဋ္ဌာနံ ရူပံ၊ အဟေတုကေ စိတ္တသံသဋ္ဌသမုဋ္ဌာနေ ခန္ဓေ စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ၊ အဟေတုကပဋိသန္ဓိက္ခဏေ စိတ္တသံသဋ္ဌသမုဋ္ဌာနေ ခန္ဓေ စ စိတ္တဉ္စ ပဋိစ္စ ကဋတ္တာရူပံ၊ အဟေတုကပဋိသန္ဓိက္ခဏေ စိတ္တသံသဋ္ဌသမုဋ္ဌာနေ ခန္ဓေ စ မဟာဘူတေ စ ပဋိစ္စ ကဋတ္တာရူပံ၊ အဟေတုကပဋိသန္ဓိက္ခဏေ စိတ္တသံသဋ္ဌသမုဋ္ဌာနေ ခန္ဓေ စ ဝတ္ထုဉ္စ ပဋိစ္စ စိတ္တံ. (၂)

စိတ္တသံသဋ္ဌသမုဋ္ဌာနဉ္စ နောစိတ္တသံသဋ္ဌသမုဋ္ဌာနဉ္စ ဓမ္မံ ပဋိစ္စ စိတ္တသံသဋ္ဌသမုဋ္ဌာနော စ နောစိတ္တသံသဋ္ဌသမုဋ္ဌာနော စ ဓမ္မာ ဥပ္ပဇ္ဇန္တိ နဟေတုပစ္စယာ – အဟေတုကံ စိတ္တသံသဋ္ဌသမုဋ္ဌာနံ ဧကံ ခန္ဓဉ္စ စိတ္တဉ္စ ပဋိစ္စ ဒွေ ခန္ဓာ စိတ္တသမုဋ္ဌာနဉ္စ ရူပံ၊ ဒွေ ခန္ဓေ။ပေ။ (အဟေတုကပဋိသန္ဓိက္ခဏေ ဒွေပိ ကာတဗ္ဗာ). (၃)

နအာရမ္မဏပစ္စယော

၂၈၅. စိတ္တသံသဋ္ဌသမုဋ္ဌာနံ ဓမ္မံ ပဋိစ္စ နောစိတ္တသံသဋ္ဌသမုဋ္ဌာနော ဓမ္မော ဥပ္ပဇ္ဇတိ နအာရမ္မဏပစ္စယာ – စိတ္တသံသဋ္ဌသမုဋ္ဌာနေ ခန္ဓေ ပဋိစ္စ စိတ္တသမုဋ္ဌာနံ ရူပံ၊ ပဋိသန္ဓိက္ခဏေ။ပေ။. (၁)

နောစိတ္တသံသဋ္ဌသမုဋ္ဌာနံ ဓမ္မံ ပဋိစ္စ နောစိတ္တသံသဋ္ဌသမုဋ္ဌာနော ဓမ္မော ဥပ္ပဇ္ဇတိ နအာရမ္မဏပစ္စယာ – စိတ္တံ ပဋိစ္စ စိတ္တသမုဋ္ဌာနံ ရူပံ၊ ပဋိသန္ဓိက္ခဏေ စိတ္တံ ပဋိစ္စ ကဋတ္တာရူပံ၊ စိတ္တံ ပဋိစ္စ ဝတ္ထု၊ ဧကံ မဟာဘူတံ။ပေ။ (ယာဝ အသညသတ္တာ). (၁)

စိတ္တသံသဋ္ဌသမုဋ္ဌာနဉ္စ နောစိတ္တသံသဋ္ဌသမုဋ္ဌာနဉ္စ ဓမ္မံ ပဋိစ္စ နောစိတ္တသံသဋ္ဌသမုဋ္ဌာနော ဓမ္မော ဥပ္ပဇ္ဇတိ နအာရမ္မဏပစ္စယာ – စိတ္တသံသဋ္ဌသမုဋ္ဌာနေ ခန္ဓေ စ စိတ္တဉ္စ ပဋိစ္စ စိတ္တသမုဋ္ဌာနံ ရူပံ၊ စိတ္တသံသဋ္ဌသမုဋ္ဌာနေ ခန္ဓေ စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ (ပဋိသန္ဓိက္ခဏေ ဒွေ၊ သံခိတ္တံ). (၁)