၁. ဝိဘင်္ဂဝါရော

ဟေတုပစ္စယော

၂၄၇. စိတ္တသဟဘုံ ဓမ္မံ ပစ္စယာ စိတ္တသဟဘူ ဓမ္မော ဥပ္ပဇ္ဇတိ ဟေတုပစ္စယာ။ တီဏိ (ပဋိစ္စသဒိသာ).

နောစိတ္တသဟဘုံ ဓမ္မံ ပစ္စယာ နောစိတ္တသဟဘူ ဓမ္မော ဥပ္ပဇ္ဇတိ ဟေတုပစ္စယာ – ဝတ္ထုံ ပစ္စယာ စိတ္တံ၊ စိတ္တံ ပစ္စယာ နောစိတ္တသဟဘု စိတ္တသမုဋ္ဌာနံ ရူပံ၊ ပဋိသန္ဓိက္ခဏေ။ပေ။ (ပဋိစ္စဝါရသဒိသံ၊ သဗ္ဗေ မဟာဘူတာ). (၁)

နောစိတ္တသဟဘုံ ဓမ္မံ ပစ္စယာ စိတ္တသဟဘူ ဓမ္မော ဥပ္ပဇ္ဇတိ ဟေတုပစ္စယာ – စိတ္တံ ပစ္စယာ သမ္ပယုတ္တကာ ခန္ဓာ စိတ္တသဟဘု စိတ္တသမုဋ္ဌာနဉ္စ ရူပံ၊ ဝတ္ထုံ ပစ္စယာ စိတ္တသဟဘူ ခန္ဓာ၊ ပဋိသန္ဓိက္ခဏေ။ပေ။ (သဗ္ဗေ မဟာဘူတာ ပဋိစ္စသဒိသံ). (၂)

နောစိတ္တသဟဘုံ ဓမ္မံ ပစ္စယာ စိတ္တသဟဘူ စ နောစိတ္တသဟဘူ စ ဓမ္မာ ဥပ္ပဇ္ဇန္တိ ဟေတုပစ္စယာ – စိတ္တံ ပစ္စယာ သမ္ပယုတ္တကာ ခန္ဓာ စိတ္တသဟဘု စ နောစိတ္တသဟဘု စ စိတ္တသမုဋ္ဌာနံ ရူပံ၊ ဝတ္ထုံ ပစ္စယာ စိတ္တဉ္စ သမ္ပယုတ္တကာ စ ခန္ဓာ၊ ပဋိသန္ဓိက္ခဏေ။ပေ။ (ပဋိစ္စသဒိသံ၊ သဗ္ဗေ မဟာဘူတာ). (၃)

၂၄၈. စိတ္တသဟဘုဉ္စ နောစိတ္တသဟဘုဉ္စ ဓမ္မံ ပစ္စယာ စိတ္တသဟဘူ ဓမ္မော ဥပ္ပဇ္ဇတိ ဟေတုပစ္စယာ – စိတ္တသဟဘုံ ဧကံ ခန္ဓဉ္စ စိတ္တဉ္စ ပစ္စယာ ဒွေ ခန္ဓာ စိတ္တသဟဘု စိတ္တသမုဋ္ဌာနဉ္စ ရူပံ၊ ဒွေ ခန္ဓေ စ။ပေ။ စိတ္တသဟဘုံ ဧကံ ခန္ဓဉ္စ ဝတ္ထုဉ္စ ပစ္စယာ ဒွေ ခန္ဓာ၊ ဒွေ ခန္ဓေ စ။ပေ။ ပဋိသန္ဓိက္ခဏေ။ပေ။ (ပဋိစ္စသဒိသံ၊ သဗ္ဗေ မဟာဘူတာ). (၁)

စိတ္တသဟဘုဉ္စ နောစိတ္တသဟဘုဉ္စ ဓမ္မံ ပစ္စယာ နောစိတ္တသဟဘူ ဓမ္မော ဥပ္ပဇ္ဇတိ ဟေတုပစ္စယာ – စိတ္တသဟဘူ ခန္ဓေ စ စိတ္တဉ္စ ပစ္စယာ နောစိတ္တသဟဘု စိတ္တသမုဋ္ဌာနံ ရူပံ၊ စိတ္တသဟဘူ ခန္ဓေ စ ဝတ္ထုဉ္စ ပစ္စယာ စိတ္တံ. စိတ္တသဟဘူ ခန္ဓေ စ မဟာဘူတေ စ ပစ္စယာ နောစိတ္တသဟဘု စိတ္တသမုဋ္ဌာနံ ရူပံ၊ ပဋိသန္ဓိက္ခဏေ။ပေ။ (ပဋိစ္စသဒိသံ၊ သဗ္ဗေ မဟာဘူတာ). (၂)

စိတ္တသဟဘုဉ္စ နောစိတ္တသဟဘုဉ္စ ဓမ္မံ ပစ္စယာ စိတ္တသဟဘူ စ နောစိတ္တသဟဘူ စ ဓမ္မာ ဥပ္ပဇ္ဇန္တိ ဟေတုပစ္စယာ – စိတ္တသဟဘုံ ဧကံ ခန္ဓဉ္စ စိတ္တဉ္စ ပစ္စယာ ဒွေ ခန္ဓာ စိတ္တသဟဘု စ နောစိတ္တသဟဘု စ စိတ္တသမုဋ္ဌာနံ ရူပံ၊ စိတ္တသဟဘုံ ဧကံ ခန္ဓဉ္စ ဝတ္ထုဉ္စ ပစ္စယာ ဒွေ ခန္ဓာ စိတ္တဉ္စ၊ ဒွေ ခန္ဓေ စ။ပေ။ ပဋိသန္ဓိက္ခဏေ။ပေ။ (ပဋိစ္စသဒိသံ၊ သဗ္ဗေ မဟာဘူတာ). (၃)

အာရမ္မဏပစ္စယော

၂၄၉. စိတ္တသဟဘုံ ဓမ္မံ ပစ္စယာ စိတ္တသဟဘူ ဓမ္မော ဥပ္ပဇ္ဇတိ အာရမ္မဏပစ္စယာ။ တီဏိ (ပဋိစ္စသဒိသံ).

နောစိတ္တသဟဘုံ ဓမ္မံ ပစ္စယာ နောစိတ္တသဟဘူ ဓမ္မော ဥပ္ပဇ္ဇတိ အာရမ္မဏပစ္စယာ။ပေ။ စက္ခာယတနံ ပစ္စယာ စက္ခုဝိညာဏံ။ပေ။ ကာယာယတနံ။ပေ။. (ဣမံ စိတ္တသမုဋ္ဌာနဒုကံ ပစ္စယဝါရေ အာရမ္မဏသဒိသံ. ဆန္နမ္ပိ ဣမေသံ ပဉ္စဝိညာဏမူလာ ကာတဗ္ဗာ. သံခိတ္တံ.)