၁. ဝိဘင်္ဂဝါရော

နဟေတုပစ္စယော

၂၄၃. စိတ္တသဟဘုံ ဓမ္မံ ပဋိစ္စ စိတ္တသဟဘူ ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ စိတ္တသဟဘုံ ဧကံ ခန္ဓံ ပဋိစ္စ ဒွေ ခန္ဓာ စိတ္တသဟဘု စိတ္တသမုဋ္ဌာနဉ္စ ရူပံ၊ ဒွေ ခန္ဓေ။ပေ။ အဟေတုကပဋိသန္ဓိက္ခဏေ။ပေ။ ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ ပဋိစ္စ ဝိစိကိစ္ဆာသဟဂတော ဥဒ္ဓစ္စသဟဂတော မောဟော. (ဧဝံ နဝပိ ပဉှာ ကာတဗ္ဗာ. ‘‘အဟေတုက’’န္တိ နိယာမေတဗ္ဗံ. ယထာ အနုလောမေ လဗ္ဘတိ ဧဝံ ကာတဗ္ဗံ. တီဏိ မောဟော ယထာ စိတ္တသမုဋ္ဌာနဒုကေ ဧဝမေဝ ကာတဗ္ဗာ.)

နကမ္မပစ္စယော

၂၄၄. စိတ္တသဟဘုံ ဓမ္မံ ပဋိစ္စ စိတ္တသဟဘူ ဓမ္မော ဥပ္ပဇ္ဇတိ နကမ္မပစ္စယာ – စိတ္တသဟဘူ ခန္ဓေ ပဋိစ္စ စိတ္တသဟဘူ စေတနာ.

နောစိတ္တသဟဘုံ ဓမ္မံ ပဋိစ္စ နောစိတ္တသဟဘူ ဓမ္မော ဥပ္ပဇ္ဇတိ နကမ္မပစ္စယာ – ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ။ပေ။.

နောစိတ္တသဟဘုံ ဓမ္မံ ပဋိစ္စ စိတ္တသဟဘူ ဓမ္မော ဥပ္ပဇ္ဇတိ နကမ္မပစ္စယာ – စိတ္တံ ပဋိစ္စ သမ္ပယုတ္တကာ စေတနာ.

စိတ္တသဟဘုဉ္စ နောစိတ္တသဟဘုဉ္စ ဓမ္မံ ပဋိစ္စ စိတ္တသဟဘူ ဓမ္မော ဥပ္ပဇ္ဇတိ နကမ္မပစ္စယာ – စိတ္တသဟဘူ ခန္ဓေ စ စိတ္တဉ္စ ပဋိစ္စ သမ္ပယုတ္တကာ စေတနာ.

နဈာနပစ္စယော

၂၄၅. စိတ္တသဟဘုံ ဓမ္မံ ပဋိစ္စ စိတ္တသဟဘူ ဓမ္မော ဥပ္ပဇ္ဇတိ နဈာနပစ္စယာ – ပဉ္စဝိညာဏသဟဂတံ။ပေ။.