၁-၄. ပစ္စယာနုလောမာဒိ

၂၀၈. စိတ္တသမုဋ္ဌာနံ ဓမ္မံ သံသဋ္ဌော စိတ္တသမုဋ္ဌာနော ဓမ္မော ဥပ္ပဇ္ဇတိ ဟေတုပစ္စယာ – စိတ္တသမုဋ္ဌာနံ ဧကံ ခန္ဓံ သံသဋ္ဌာ ဒွေ ခန္ဓာ၊ ဒွေ ခန္ဓေ။ပေ။ ပဋိသန္ဓိက္ခဏေ။ပေ။. (၁)

စိတ္တသမုဋ္ဌာနံ ဓမ္မံ သံသဋ္ဌော နောစိတ္တသမုဋ္ဌာနော ဓမ္မော ဥပ္ပဇ္ဇတိ ဟေတုပစ္စယာ – စိတ္တသမုဋ္ဌာနေ ခန္ဓေ သံသဋ္ဌံ စိတ္တံ၊ ပဋိသန္ဓိက္ခဏေ။ပေ။. (၂)

စိတ္တသမုဋ္ဌာနံ ဓမ္မံ သံသဋ္ဌော စိတ္တသမုဋ္ဌာနော စ နောစိတ္တသမုဋ္ဌာနော စ ဓမ္မာ ဥပ္ပဇ္ဇန္တိ ဟေတုပစ္စယာ – စိတ္တသမုဋ္ဌာနံ ဧကံ ခန္ဓံ သံသဋ္ဌာ ဒွေ ခန္ဓာ စိတ္တဉ္စ၊ ဒွေ ခန္ဓေ။ပေ။ ပဋိသန္ဓိက္ခဏေ။ပေ။. (၃)

၂၀၉. နောစိတ္တသမုဋ္ဌာနံ ဓမ္မံ သံသဋ္ဌော စိတ္တသမုဋ္ဌာနော ဓမ္မော ဥပ္ပဇ္ဇတိ ဟေတုပစ္စယာ – စိတ္တသံသဋ္ဌာ သမ္ပယုတ္တကာ ခန္ဓာ၊ ပဋိသန္ဓိက္ခဏေ။ပေ။. (၁)

စိတ္တသမုဋ္ဌာနဉ္စ နောစိတ္တသမုဋ္ဌာနဉ္စ ဓမ္မံ သံသဋ္ဌော စိတ္တသမုဋ္ဌာနော ဓမ္မော ဥပ္ပဇ္ဇတိ ဟေတုပစ္စယာ – စိတ္တသမုဋ္ဌာနံ ဧကံ ခန္ဓဉ္စ စိတ္တဉ္စ သံသဋ္ဌာ ဒွေ ခန္ဓာ၊ ဒွေ ခန္ဓေ။ပေ။ ပဋိသန္ဓိက္ခဏေ။ပေ။ (သံခိတ္တံ). (၁)

ဟေတုယာ ပဉ္စ၊ အာရမ္မဏေ ပဉ္စ (သဗ္ဗတ္ထ ပဉ္စ)၊ အဝိဂတေ ပဉ္စ.

စိတ္တသမုဋ္ဌာနံ ဓမ္မံ သံသဋ္ဌော စိတ္တသမုဋ္ဌာနော ဓမ္မော ဥပ္ပဇ္ဇတိ နဟေတုပစ္စယာ (ပဉ္စ ပဉှာ ကာတဗ္ဗာ. တီဏိ. မောဟော).

နဟေတုယာ ပဉ္စ၊ နအဓိပတိယာ ပဉ္စ၊ နပုရေဇာတေ ပဉ္စ၊ နပစ္ဆာဇာတေ ပဉ္စ၊ နအာသေဝနေ ပဉ္စ၊ နကမ္မေ တီဏိ၊ နဝိပါကေ ပဉ္စ၊ နဈာနေ ပဉ္စ၊ နမဂ္ဂေ ပဉ္စ၊ နဝိပ္ပယုတ္တေ ပဉ္စ.