၁. ဝိဘင်္ဂဝါရော

နဟေတုပစ္စယော

၁၄၉. စိတ္တသမ္ပယုတ္တံ ဓမ္မံ ပဋိစ္စ စိတ္တသမ္ပယုတ္တော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ စိတ္တသမ္ပယုတ္တံ ဧကံ ခန္ဓံ ပဋိစ္စ ဒွေ ခန္ဓာ၊ ဒွေ ခန္ဓေ။ပေ။ အဟေတုကပဋိသန္ဓိက္ခဏေ။ပေ။ ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ ပဋိစ္စ ဝိစိကိစ္ဆာသဟဂတော ဥဒ္ဓစ္စသဟဂတော မောဟော. (၁)

(ဧဝံ နဝပိ ပဉှာ ကာတဗ္ဗာ. အဟေတုကန္တိ သဗ္ဗတ္ထ နိယာမေတဗ္ဗံ၊ ဧကံယေဝ မောဟံ မူလပဒေ.)

နအာရမ္မဏပစ္စယော

၁၅၀. စိတ္တသမ္ပယုတ္တံ ဓမ္မံ ပဋိစ္စ စိတ္တဝိပ္ပယုတ္တော ဓမ္မော ဥပ္ပဇ္ဇတိ နအာရမ္မဏပစ္စယာ – စိတ္တသမ္ပယုတ္တေ ခန္ဓေ ပဋိစ္စ စိတ္တသမုဋ္ဌာနံ ရူပံ၊ ပဋိသန္ဓိက္ခဏေ။ပေ။. (၁)

စိတ္တဝိပ္ပယုတ္တံ ဓမ္မံ ပဋိစ္စ စိတ္တဝိပ္ပယုတ္တော ဓမ္မော ဥပ္ပဇ္ဇတိ နအာရမ္မဏပစ္စယာ – ဧကံ မဟာဘူတံ။ပေ။ (ယာဝ အသညသတ္တာ). (၁)

စိတ္တသမ္ပယုတ္တဉ္စ စိတ္တဝိပ္ပယုတ္တဉ္စ ဓမ္မံ ပဋိစ္စ စိတ္တဝိပ္ပယုတ္တော ဓမ္မော ဥပ္ပဇ္ဇတိ နအာရမ္မဏပစ္စယာ – စိတ္တသမ္ပယုတ္တေ ခန္ဓေ စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ၊ ပဋိသန္ဓိက္ခဏေ ဧကံ (သံခိတ္တံ). (၁)