၁. ဝိဘင်္ဂဝါရော

ဟေတုပစ္စယော

၁၄၄. စိတ္တသမ္ပယုတ္တံ ဓမ္မံ ပဋိစ္စ စိတ္တသမ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ – စိတ္တသမ္ပယုတ္တံ ဧကံ ခန္ဓံ ပဋိစ္စ ဒွေ ခန္ဓာ၊ ဒွေ ခန္ဓေ ပဋိစ္စ ဧကော ခန္ဓော၊ ပဋိသန္ဓိက္ခဏေ။ပေ။. (၁)

စိတ္တသမ္ပယုတ္တံ ဓမ္မံ ပဋိစ္စ စိတ္တဝိပ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ – စိတ္တသမ္ပယုတ္တေ ခန္ဓေ ပဋိစ္စ စိတ္တသမုဋ္ဌာနံ ရူပံ၊ ပဋိသန္ဓိက္ခဏေ။ပေ။. (၂)

စိတ္တသမ္ပယုတ္တံ ဓမ္မံ ပဋိစ္စ စိတ္တသမ္ပယုတ္တော စ စိတ္တဝိပ္ပယုတ္တော စ ဓမ္မာ ဥပ္ပဇ္ဇန္တိ ဟေတုပစ္စယာ – စိတ္တသမ္ပယုတ္တံ ဧကံ ခန္ဓံ ပဋိစ္စ ဒွေ ခန္ဓာ စိတ္တသမုဋ္ဌာနဉ္စ ရူပံ၊ ဒွေ ခန္ဓေ။ပေ။ ပဋိသန္ဓိက္ခဏေ။ပေ။. (၃)

၁၄၅. စိတ္တဝိပ္ပယုတ္တံ ဓမ္မံ ပဋိစ္စ စိတ္တဝိပ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ – ဧကံ မဟာဘူတံ။ပေ။ မဟာဘူတေ ပဋိစ္စ စိတ္တသမုဋ္ဌာနံ ရူပံ။ပေ။ ပဋိသန္ဓိက္ခဏေ။ပေ။ ဧကံ မဟာဘူတံ။ပေ။ မဟာဘူတေ ပဋိစ္စ ကဋတ္တာရူပံ ဥပါဒါရူပံ. (၁)

စိတ္တဝိပ္ပယုတ္တံ ဓမ္မံ ပဋိစ္စ စိတ္တသမ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ – ပဋိသန္ဓိက္ခဏေ ဝတ္ထုံ ပဋိစ္စ စိတ္တသမ္ပယုတ္တကာ ခန္ဓာ. (၂)

စိတ္တဝိပ္ပယုတ္တံ ဓမ္မံ ပဋိစ္စ စိတ္တသမ္ပယုတ္တော စ စိတ္တဝိပ္ပယုတ္တော စ ဓမ္မာ ဥပ္ပဇ္ဇန္တိ ဟေတုပစ္စယာ – ပဋိသန္ဓိက္ခဏေ ဝတ္ထုံ ပဋိစ္စ စိတ္တသမ္ပယုတ္တကာ ခန္ဓာ၊ မဟာဘူတေ ပဋိစ္စ ကဋတ္တာရူပံ. (၃)

၁၄၆. စိတ္တသမ္ပယုတ္တဉ္စ စိတ္တဝိပ္ပယုတ္တဉ္စ ဓမ္မံ ပဋိစ္စ စိတ္တသမ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ – ပဋိသန္ဓိက္ခဏေ စိတ္တသမ္ပယုတ္တံ ဧကံ ခန္ဓဉ္စ ဝတ္ထုဉ္စ ပဋိစ္စ ဒွေ ခန္ဓာ၊ ဒွေ ခန္ဓေ စ။ပေ။. (၁)

စိတ္တသမ္ပယုတ္တဉ္စ စိတ္တဝိပ္ပယုတ္တဉ္စ ဓမ္မံ ပဋိစ္စ စိတ္တဝိပ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ – စိတ္တသမ္ပယုတ္တေ ခန္ဓေ စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ၊ ပဋိသန္ဓိက္ခဏေ စိတ္တသမ္ပယုတ္တေ ခန္ဓေ စ မဟာဘူတေ စ ပဋိစ္စ ကဋတ္တာရူပံ. (၂)

စိတ္တသမ္ပယုတ္တဉ္စ စိတ္တဝိပ္ပယုတ္တဉ္စ ဓမ္မံ ပဋိစ္စ စိတ္တသမ္ပယုတ္တော စ စိတ္တဝိပ္ပယုတ္တော စ ဓမ္မာ ဥပ္ပဇ္ဇန္တိ ဟေတုပစ္စယာ – ပဋိသန္ဓိက္ခဏေ စိတ္တသမ္ပယုတ္တံ ဧကံ ခန္ဓဉ္စ ဝတ္ထုဉ္စ ပဋိစ္စ ဒွေ ခန္ဓာ၊ ဒွေ ခန္ဓေ စ။ပေ။ စိတ္တသမ္ပယုတ္တေ ခန္ဓေ စ မဟာဘူတေ စ ပဋိစ္စ ကဋတ္တာရူပံ. (၃)

အာရမ္မဏပစ္စယော

၁၄၇. စိတ္တသမ္ပယုတ္တံ ဓမ္မံ ပဋိစ္စ စိတ္တသမ္ပယုတ္တော ဓမ္မော ဥပ္ပဇ္ဇတိ အာရမ္မဏပစ္စယာ – စိတ္တသမ္ပယုတ္တံ ဧကံ ခန္ဓံ ပဋိစ္စ ဒွေ ခန္ဓာ၊ ဒွေ ခန္ဓေ။ပေ။ ပဋိသန္ဓိက္ခဏေ။ပေ။. (၁)

စိတ္တဝိပ္ပယုတ္တံ ဓမ္မံ ပဋိစ္စ စိတ္တသမ္ပယုတ္တော ဓမ္မော ဥပ္ပဇ္ဇတိ အာရမ္မဏပစ္စယာ – ပဋိသန္ဓိက္ခဏေ ဝတ္ထုံ ပဋိစ္စ စိတ္တသမ္ပယုတ္တကာ ခန္ဓာ. (၁)

စိတ္တသမ္ပယုတ္တဉ္စ စိတ္တဝိပ္ပယုတ္တဉ္စ ဓမ္မံ ပဋိစ္စ စိတ္တသမ္ပယုတ္တော ဓမ္မော ဥပ္ပဇ္ဇတိ အာရမ္မဏပစ္စယာ – ပဋိသန္ဓိက္ခဏေ စိတ္တသမ္ပယုတ္တံ ဧကံ ခန္ဓဉ္စ ဝတ္ထုဉ္စ ပဋိစ္စ ဒွေ ခန္ဓာ၊ ဒွေ ခန္ဓေ စ။ပေ။ (သံခိတ္တံ). (၁)