၁. ဝိဘင်္ဂဝါရော

ဟေတုပစ္စယော

၁၁၉. စေတသိကော ဓမ္မော စေတသိကဿ ဓမ္မဿ ဟေတုပစ္စယေန ပစ္စယော – စေတသိကာ ဟေတူ သမ္ပယုတ္တကာနံ ခန္ဓာနံ ဟေတုပစ္စယေန ပစ္စယော၊ ပဋိသန္ဓိက္ခဏေ။ပေ။. (၁)

စေတသိကော ဓမ္မော အစေတသိကဿ ဓမ္မဿ ဟေတုပစ္စယေန ပစ္စယော – စေတသိကာ ဟေတူ စိတ္တဿ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော၊ ပဋိသန္ဓိက္ခဏေ။ပေ။. (၂)

စေတသိကော ဓမ္မော စေတသိကဿ စ အစေတသိကဿ စ ဓမ္မဿ ဟေတုပစ္စယေန ပစ္စယော – စေတသိကာ ဟေတူ သမ္ပယုတ္တကာနံ ခန္ဓာနံ စိတ္တဿ စ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော၊ ပဋိသန္ဓိက္ခဏေ။ပေ။. (၃)

အာရမ္မဏပစ္စယော

၁၂၀. စေတသိကော ဓမ္မော စေတသိကဿ ဓမ္မဿ အာရမ္မဏပစ္စယေန ပစ္စယော – စေတသိကေ ခန္ဓေ အာရဗ္ဘ စေတသိကာ ခန္ဓာ ဥပ္ပဇန္တိ. (မူလံ ပုစ္ဆိတဗ္ဗံ) စေတသိကေ ခန္ဓေ အာရဗ္ဘ စိတ္တံ ဥပ္ပဇ္ဇတိ. (မူလံ ပုစ္ဆိတဗ္ဗံ) စေတသိကေ ခန္ဓေ အာရဗ္ဘ စေတသိကာ ခန္ဓာ စ စိတ္တဉ္စ ဥပ္ပဇ္ဇန္တိ. (၃)

၁၂၁. အစေတသိကော ဓမ္မော အစေတသိကဿ ဓမ္မဿ အာရမ္မဏပစ္စယေန ပစ္စယော – အရိယာ မဂ္ဂါ ဝုဋ္ဌဟိတွာ။ပေ။ ဖလံ ပစ္စဝေက္ခန္တိ၊ နိဗ္ဗာနံ ပစ္စဝေက္ခန္တိ. နိဗ္ဗာနံ ဂေါတြဘုဿ၊ ဝေါဒါနဿ၊ မဂ္ဂဿ၊ ဖလဿ၊ အာဝဇ္ဇနာယ အာရမ္မဏပစ္စယေန ပစ္စယော၊ စက္ခုံ။ပေ။ ဝတ္ထုံ အစေတသိကေ ခန္ဓေ အနိစ္စတော။ပေ။ ဝိပဿတိ အဿာဒေတိ အဘိနန္ဒတိ၊ တံ အာရဗ္ဘ စိတ္တံ ဥပ္ပဇ္ဇတိ. ဒိဗ္ဗေန စက္ခုနာ ရူပံ ပဿတိ၊ ဒိဗ္ဗာယ သောတဓာတုယာ သဒ္ဒံ သုဏာတိ. စေတောပရိယဉာဏေန အစေတသိကစိတ္တသမင်္ဂိဿ စိတ္တံ ဇာနာတိ၊ အာကာသာနဉ္စာယတနံ။ပေ။ အာကိဉ္စညာယတနံ။ပေ။ ရူပါယတနံ စက္ခုဝိညာဏဿ။ပေ။ ဖောဋ္ဌဗ္ဗာယတနံ ကာယဝိညာဏဿ။ပေ။ အစေတသိကာ ခန္ဓာ ဣဒ္ဓိဝိဓဉာဏဿ၊ စေတောပရိယဉာဏဿ၊ ပုဗ္ဗေနိဝါသာနုဿတိဉာဏဿ၊ အနာဂတံသဉာဏဿ၊ အာဝဇ္ဇနာယ အာရမ္မဏပစ္စယေန ပစ္စယော. (၁)

အစေတသိကော ဓမ္မော စေတသိကဿ ဓမ္မဿ အာရမ္မဏပစ္စယေန ပစ္စယော – အရိယာ မဂ္ဂါ ဝုဋ္ဌဟိတွာ။ပေ။ နိဗ္ဗာနံ ပစ္စဝေက္ခန္တိ (ပဌမဂမနသဒိသံ)၊ စက္ခုံ။ပေ။ ဝတ္ထုံ အစေတသိကေ ခန္ဓေ အနိစ္စတော။ပေ။ ဒေါမနဿံ ဥပ္ပဇ္ဇတိ၊ ဒိဗ္ဗေန စက္ခုနာ ရူပံ ပဿတိ၊ ဒိဗ္ဗာယ သောတဓာတုယာ သဒ္ဒံ သုဏာတိ. စေတောပရိယဉာဏေန အစေတသိကစိတ္တသမင်္ဂိဿ စိတ္တံ ဇာနာတိ၊ အာကာသာနဉ္စာယတနံ။ပေ။ အာကိဉ္စညာယတနံ နေဝသညာနာသညာယတနဿ။ပေ။ ရူပါယတနံ စက္ခုဝိညာဏသဟဂတာနံ ခန္ဓာနံ။ပေ။ ဖောဋ္ဌဗ္ဗာယတနံ ကာယဝိညာဏသဟဂတာနံ ခန္ဓာနံ။ပေ။ အစေတသိကာ ခန္ဓာ ဣဒ္ဓိဝိဓဉာဏဿ၊ စေတောပရိယဉာဏဿ၊ ပုဗ္ဗေနိဝါသာနုဿတိဉာဏဿ၊ အနာဂတံသဉာဏဿ၊ အာဝဇ္ဇနာယ အာရမ္မဏပစ္စယေန ပစ္စယော. (၂)

အစေတသိကော ဓမ္မော စေတသိကဿ စ အစေတသိကဿ စ ဓမ္မဿ အာရမ္မဏပစ္စယေန ပစ္စယော – အရိယာ မဂ္ဂါ ဝုဋ္ဌဟိတွာ။ပေ။ နိဗ္ဗာနံ ပစ္စဝေက္ခန္တိ (ပဌမဂမနသဒိသံ)၊ စက္ခုံ။ပေ။ ဝတ္ထုံ အစေတသိကေ ခန္ဓေ အနိစ္စတော။ပေ။ ဝိပဿတိ အဿာဒေတိ အဘိနန္ဒတိ၊ တံ အာရဗ္ဘ စိတ္တဉ္စ သမ္ပယုတ္တကာ စ ခန္ဓာ ဥပ္ပဇ္ဇန္တိ. ဒိဗ္ဗေန စက္ခုနာ ရူပံ ပဿတိ။ပေ။ ရူပါယတနံ စက္ခုဝိညာဏဿ သမ္ပယုတ္တကာနဉ္စ ခန္ဓာနံ အာရမ္မဏပစ္စယေန ပစ္စယော။ပေ။ ဖောဋ္ဌဗ္ဗာယတနံ ကာယဝိညာဏဿ သမ္ပယုတ္တကာနဉ္စ ခန္ဓာနံ။ပေ။ အစေတသိကာ ခန္ဓာ ဣဒ္ဓိဝိဓဉာဏဿ၊ စေတောပရိယဉာဏဿ၊ ပုဗ္ဗေနိဝါသာနုဿတိဉာဏဿ၊ အနာဂတံသဉာဏဿ၊ အာဝဇ္ဇနာယ အာရမ္မဏပစ္စယေန ပစ္စယော. (၃)

၁၂၂. စေတသိကော စ အစေတသိကော စ ဓမ္မာ စေတသိကဿ ဓမ္မဿ အာရမ္မဏပစ္စယေန ပစ္စယော – စေတသိကေ ခန္ဓေ စ စိတ္တဉ္စ အာရဗ္ဘ စေတသိကာ ခန္ဓာ ဥပ္ပဇ္ဇန္တိ. (မူလံ ပုစ္ဆိတဗ္ဗံ) စေတသိကေ ခန္ဓေ စ စိတ္တဉ္စ အာရဗ္ဘ စိတ္တံ ဥပ္ပဇ္ဇတိ. (မူလံ ပုစ္ဆိတဗ္ဗံ) စေတသိကေ ခန္ဓေ စ စိတ္တဉ္စ အာရဗ္ဘ စေတသိကာ ခန္ဓာ စ စိတ္တဉ္စ ဥပ္ပဇ္ဇန္တိ. (၃)

အဓိပတိပစ္စယော

၁၂၃. စေတသိကော ဓမ္မော စေတသိကဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ. အာရမ္မဏာဓိပတိ – စေတသိကေ ခန္ဓေ ဂရုံ ကတွာ စေတသိကာ ခန္ဓာ ဥပ္ပဇ္ဇန္တိ. သဟဇာတာဓိပတိ – စေတသိကာဓိပတိ သမ္ပယုတ္တကာနံ ခန္ဓာနံ အဓိပတိပစ္စယေန ပစ္စယော. (မူလံ ပုစ္ဆိတဗ္ဗံ) အာရမ္မဏာဓိပတိ – စေတသိကေ ခန္ဓေ ဂရုံ ကတွာ စိတ္တံ ဥပ္ပဇ္ဇတိ. သဟဇာတာဓိပတိ – စေတသိကာဓိပတိ စိတ္တဿ စိတ္တသမုဋ္ဌာနာနဉ္စ ရူပါနံ အဓိပတိပစ္စယေန ပစ္စယော. (မူလံ ပုစ္ဆိတဗ္ဗံ ) အာရမ္မဏာဓိပတိ – စေတသိကေ ခန္ဓေ ဂရုံ ကတွာ စေတသိကာ ခန္ဓာ စ စိတ္တဉ္စ ဥပ္ပဇ္ဇန္တိ. သဟဇာတာဓိပတိ – စေတသိကာဓိပတိ သမ္ပယုတ္တကာနံ ခန္ဓာနံ စိတ္တဿ စ စိတ္တသမုဋ္ဌာနာနဉ္စ ရူပါနံ အဓိပတိပစ္စယေန ပစ္စယော. (၃)

၁၂၄. အစေတသိကော ဓမ္မော အစေတသိကဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ. အာရမ္မဏာဓိပတိ – အရိယာ မဂ္ဂါ ဝုဋ္ဌဟိတွာ။ပေ။ နိဗ္ဗာနံ ဂရုံ ကတွာ ပစ္စဝေက္ခန္တိ၊ နိဗ္ဗာနံ ဂေါတြဘုဿ၊ ဝေါဒါနဿ. မဂ္ဂဿ၊ ဖလဿ အဓိပတိပစ္စယေန ပစ္စယော၊ စက္ခုံ ။ပေ။ ဝတ္ထုံ အစေတသိကေ ခန္ဓေ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ စိတ္တံ ဥပ္ပဇ္ဇတိ. သဟဇာတာဓိပတိ – အစေတသိကာဓိပတိ စိတ္တသမုဋ္ဌာနာနံ ရူပါနံ အဓိပတိပစ္စယေန ပစ္စယော. (၁)

အစေတသိကော ဓမ္မော စေတသိကဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ. အာရမ္မဏာဓိပတိ – အရိယာ မဂ္ဂါ ဝုဋ္ဌဟိတွာ။ပေ။ နိဗ္ဗာနံ ဂရုံ ကတွာ။ပေ။ (ပဌမဂမနသဒိသံ)၊ စက္ခုံ။ပေ။ ဝတ္ထုံ အစေတသိကေ ခန္ဓေ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ. သဟဇာတာဓိပတိ – အစေတသိကာဓိပတိ သမ္ပယုတ္တကာနံ ခန္ဓာနံ အဓိပတိပစ္စယေန ပစ္စယော. (၂)

အစေတသိကော ဓမ္မော စေတသိကဿ စ အစေတသိကဿ စ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ. အာရမ္မဏာဓိပတိ – အရိယာ မဂ္ဂါ ဝုဋ္ဌဟိတွာ။ပေ။ နိဗ္ဗာနံ။ပေ။ (ပဌမဂမနံ) အစေတသိကေ ခန္ဓေ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ စေတသိကာ ခန္ဓာ စ စိတ္တဉ္စ ဥပ္ပဇ္ဇန္တိ. သဟဇာတာဓိပတိ – အစေတသိကာဓိပတိ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ အဓိပတိပစ္စယေန ပစ္စယော. (၃)

စေတသိကော စ အစေတသိကော စ ဓမ္မာ စေတသိကဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ။ တီဏိ (အာရမ္မဏာဓိပတိယေဝ).

အနန္တရပစ္စယာဒိ

၁၂၅. စေတသိကော ဓမ္မော စေတသိကဿ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ စေတသိကာ ခန္ဓာ ပစ္ဆိမာနံ ပစ္ဆိမာနံ စေတသိကာနံ ခန္ဓာနံ အနန္တရပစ္စယေန ပစ္စယော. (မူလံ ပုစ္ဆိတဗ္ဗံ) ပုရိမာ ပုရိမာ စေတသိကာ ခန္ဓာ ပစ္ဆိမဿ ပစ္ဆိမဿ စိတ္တဿ အနန္တရပစ္စယေန ပစ္စယော. (မူလံ ပုစ္ဆိတဗ္ဗံ) ပုရိမာ ပုရိမာ စေတသိကာ ခန္ဓာ ပစ္ဆိမာနံ ပစ္ဆိမာနံ စေတသိကာနံ ခန္ဓာနံ စိတ္တဿ စ အနန္တရပစ္စယေန ပစ္စယော. (၃)

၁၂၆. အစေတသိကော ဓမ္မော အစေတသိကဿ ဓမ္မဿ အနန္တရပစ္စယေန ပစ္စယော – ပုရိမံ ပုရိမံ စိတ္တံ ပစ္ဆိမဿ ပစ္ဆိမဿ စိတ္တဿ အနန္တရပစ္စယေန ပစ္စယော၊ အနုလောမံ ဂေါတြဘုဿ။ပေ။ ဖလသမာပတ္တိယာ အနန္တရပစ္စယေန ပစ္စယော. (၁)

အစေတသိကော ဓမ္မော စေတသိကဿ ဓမ္မဿ အနန္တရပစ္စယေန ပစ္စယော (ဧဝံ တီဏိ ကာတဗ္ဗာနိ၊ ပဌမဂမနသဒိသံ. ပူရိတွာ ကာတဗ္ဗံ၊ နိန္နာနာကရဏံ).

စေတသိကော စ အစေတသိကော စ ဓမ္မာ စေတသိကဿ ဓမ္မဿ အနန္တရပစ္စယေန ပစ္စယော။ တီဏိ (အာဝဇ္ဇနာပိ ဝုဋ္ဌာနမ္ပိ နတ္ထိ).

သမနန္တရပစ္စယေန ပစ္စယော။ နဝ၊ သဟဇာတပစ္စယေန ပစ္စယော။ နဝ (ပဋိစ္စဝါရသဒိသံ)၊ အညမညပစ္စယေန ပစ္စယော။ နဝ (ပဋိစ္စဝါရသဒိသံ)၊ နိဿယပစ္စယေန ပစ္စယော။ နဝ (ပစ္စယဝါရသဒိသံ).

ဥပနိဿယပစ္စယော

၁၂၇. စေတသိကော ဓမ္မော စေတသိကဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ပေ။. ပကတူပနိဿယော – စေတသိကာ ခန္ဓာ စေတသိကာနံ ခန္ဓာနံ ဥပနိဿယပစ္စယေန ပစ္စယော. (မူလံ ပုစ္ဆိတဗ္ဗံ၊ တီဏိ ဥပနိဿယာ) စေတသိကာ ခန္ဓာ စိတ္တဿ ဥပနိဿယပစ္စယေန ပစ္စယော. (မူလံ ပုစ္ဆိတဗ္ဗံ၊ တီဏိ ဥပနိဿယာ) စေတသိကာ ခန္ဓာ စေတသိကာနံ ခန္ဓာနံ စိတ္တဿ စ ဥပနိဿယပစ္စယေန ပစ္စယော. (၃)

၁၂၈. အစေတသိကော ဓမ္မော အစေတသိကဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ပေ။. ပကတူပနိဿယော – ဥတုံ။ ဘောဇနံ။ သေနာသနံ စိတ္တံ ဥပနိဿာယ ဒါနံ ဒေတိ။ပေ။ သံဃံ ဘိန္ဒတိ၊ ဥတုံ။ ဘောဇနံ။ သေနာသနံ စိတ္တံ သဒ္ဓါယ။ပေ။ ပညာယ။ ရာဂဿ။ပေ။ ပတ္ထနာယ ကာယိကဿ သုခဿ၊ ကာယိကဿ ဒုက္ခဿ၊ မဂ္ဂဿ၊ ဖလသမာပတ္တိယာ ဥပနိဿယပစ္စယေန ပစ္စယော. (၁)

အစေတသိကော ဓမ္မော စေတသိကဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော ပကတူပနိဿယော။ပေ။. ပကတူပနိဿယော – ဥတုံ။ ဘောဇနံ။ သေနာသနံ စိတ္တံ ဥပနိဿာယ ဒါနံ ဒေတိ။ပေ။ (တီဏိ၊ ပဌမဂမနသဒိသံ နိန္နာနာကရဏံ).

စေတသိကော စ အစေတသိကော စ ဓမ္မာ စေတသိကဿ ဓမ္မဿ ဥပနိဿယပစ္စယေန ပစ္စယော။ တီဏိ.

ပုရေဇာတပစ္စယော

၁၂၉. အစေတသိကော ဓမ္မော အစေတသိကဿ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ. အာရမ္မဏပုရေဇာတံ – စက္ခုံ။ပေ။ ဝတ္ထုံ အနိစ္စတော။ပေ။ ဝိပဿတိ အဿာဒေတိ အဘိနန္ဒတိ၊ တံ အာရဗ္ဘ စိတ္တံ ဥပ္ပဇ္ဇတိ. ဒိဗ္ဗေန စက္ခုနာ ရူပံ ပဿတိ၊ ဒိဗ္ဗာယ သောတဓာတုယာ သဒ္ဒံ သုဏာတိ. ရူပါယတနံ စက္ခုဝိညာဏဿ။ပေ။ ဖောဋ္ဌဗ္ဗာယတနံ ကာယဝိညာဏဿ။ပေ။. ဝတ္ထုပုရေဇာတံ – စက္ခာယတနံ စက္ခုဝိညာဏဿ။ပေ။ ကာယာယတနံ ကာယဝိညာဏဿ။ပေ။ ဝတ္ထု စိတ္တဿ ပုရေဇာတပစ္စယေန ပစ္စယော. (၁)

အစေတသိကော ဓမ္မော စေတသိကဿ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ. အာရမ္မဏပုရေဇာတံ – စက္ခုံ။ပေ။ ဝတ္ထုံ အနိစ္စတော။ပေ။ ဒေါမနဿံ ဥပ္ပဇ္ဇတိ၊ ဒိဗ္ဗေန စက္ခုနာ ရူပံ ပဿတိ၊ ဒိဗ္ဗာယ သောတဓာတုယာ သဒ္ဒံ သုဏာတိ. ရူပါယတနံ စက္ခုဝိညာဏသဟဂတာနံ ခန္ဓာနံ။ပေ။ ဖောဋ္ဌဗ္ဗာယတနံ ကာယဝိညာဏသဟဂတာနံ ခန္ဓာနံ။ပေ။. ဝတ္ထုပုရေဇာတံ – စက္ခာယတနံ စက္ခုဝိညာဏသဟဂတာနံ ခန္ဓာနံ။ပေ။ ကာယာယတနံ။ပေ။ ဝတ္ထု စေတသိကာနံ ခန္ဓာနံ ပုရေဇာတပစ္စယေန ပစ္စယော. (၂)

အစေတသိကော ဓမ္မော စေတသိကဿ စ အစေတသိကဿ စ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ. အာရမ္မဏပုရေဇာတံ – စက္ခုံ။ပေ။ ဝတ္ထုံ အနိစ္စတော။ပေ။ ဝိပဿတိ အဿာဒေတိ အဘိနန္ဒတိ၊ တံ အာရဗ္ဘ စိတ္တဉ္စ သမ္ပယုတ္တကာ စ ခန္ဓာ ဥပ္ပဇ္ဇန္တိ. ဒိဗ္ဗေန စက္ခုနာ ရူပံ ပဿတိ၊ ဒိဗ္ဗာယ သောတဓာတုယာ သဒ္ဒံ သုဏာတိ. ရူပါယတနံ စက္ခုဝိညာဏဿ သမ္ပယုတ္တကာနဉ္စ ခန္ဓာနံ။ပေ။ ဖောဋ္ဌဗ္ဗာယတနံ။ပေ။. ဝတ္ထုပုရေဇာတံ – စက္ခာယတနံ စက္ခုဝိညာဏဿ သမ္ပယုတ္တကာနဉ္စ ခန္ဓာနံ။ပေ။ ကာယာယတနံ။ပေ။ ဝတ္ထု စိတ္တဿ သမ္ပယုတ္တကာနဉ္စ ခန္ဓာနံ ပုရေဇာတပစ္စယေန ပစ္စယော. (၃)

ပစ္ဆာဇာတာသေဝနပစ္စယာ

၁၃၀. စေတသိကော ဓမ္မော အစေတသိကဿ ဓမ္မဿ ပစ္ဆာဇာတပစ္စယေန ပစ္စယော (သံခိတ္တံ).

အစေတသိကော ဓမ္မော အစေတသိကဿ ဓမ္မဿ ပစ္ဆာဇာတပစ္စယေန ပစ္စယော (သံခိတ္တံ).

စေတသိကော စ အစေတသိကော စ ဓမ္မာ အစေတသိကဿ ဓမ္မဿ ပစ္ဆာဇာတပစ္စယေန ပစ္စယော (သံခိတ္တံ).

စေတသိကော ဓမ္မော စေတသိကဿ ဓမ္မဿ အာသေဝနပစ္စယေန ပစ္စယော (သံခိတ္တံ).

ကမ္မပစ္စယော

၁၃၁. စေတသိကော ဓမ္မော စေတသိကဿ ဓမ္မဿ ကမ္မပစ္စယေန ပစ္စယော – သဟဇာတာ၊ နာနာက္ခဏိကာ. သဟဇာတာ – စေတသိကာ စေတနာ သမ္ပယုတ္တကာနံ ခန္ဓာနံ ကမ္မပစ္စယေန ပစ္စယော၊ ပဋိသန္ဓိက္ခဏေ။ပေ။. နာနာက္ခဏိကာ – စေတသိကာ စေတနာ ဝိပါကာနံ ခန္ဓာနံ ကမ္မပစ္စယေန ပစ္စယော. (၁)

စေတသိကော ဓမ္မော အစေတသိကဿ ဓမ္မဿ ကမ္မပစ္စယေန ပစ္စယော – သဟဇာတာ၊ နာနာက္ခဏိကာ. သဟဇာတာ – စေတသိကာ စေတနာ စိတ္တဿ စိတ္တသမုဋ္ဌာနာနဉ္စ ရူပါနံ ကမ္မပစ္စယေန ပစ္စယော၊ ပဋိသန္ဓိက္ခဏေ။ပေ။. နာနာက္ခဏိကာ – စေတသိကာ စေတနာ ဝိပါကဿ စိတ္တဿ ကဋတ္တာ စ ရူပါနံ ကမ္မပစ္စယေန ပစ္စယော. (၂)

စေတသိကော ဓမ္မော စေတသိကဿ စ အစေတသိကဿ စ ဓမ္မဿ ကမ္မပစ္စယေန ပစ္စယော – သဟဇာတာ၊ နာနာက္ခဏိကာ. သဟဇာတာ – စေတသိကာ စေတနာ သမ္ပယုတ္တကာနံ ခန္ဓာနံ စိတ္တဿ စ စိတ္တသမုဋ္ဌာနာနဉ္စ ရူပါနံ ကမ္မပစ္စယေန ပစ္စယော၊ ပဋိသန္ဓိက္ခဏေ။ပေ။. နာနာက္ခဏိကာ – စေတသိကာ စေတနာ ဝိပါကာနံ ခန္ဓာနံ စိတ္တဿ ကဋတ္တာ စ ရူပါနံ ကမ္မပစ္စယေန ပစ္စယော. (၃)

ဝိပါကပစ္စယာဒိ

၁၃၂. စေတသိကော ဓမ္မော စေတသိကဿ ဓမ္မဿ ဝိပါကပစ္စယေန ပစ္စယော။ နဝ။ အာဟာရပစ္စယေန ပစ္စယော။ နဝ။ ဣန္ဒြိယပစ္စယေန ပစ္စယော။ နဝ။ ဈာနပစ္စယေန ပစ္စယော။ တီဏိ။ မဂ္ဂပစ္စယေန ပစ္စယော။ တီဏိ။ သမ္ပယုတ္တပစ္စယေန ပစ္စယော။ ပဉ္စ.

ဝိပ္ပယုတ္တပစ္စယော

၁၃၃. စေတသိကော ဓမ္မော အစေတသိကဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပစ္ဆာဇာတံ (သံခိတ္တံ). (၁)

အစေတသိကော ဓမ္မော အစေတသိကဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ. သဟဇာတံ – စိတ္တံ စိတ္တသမုဋ္ဌာနာနံ ရူပါနံ ဝိပ္ပယုတ္တပစ္စယေန ပစ္စယော၊ ပဋိသန္ဓိက္ခဏေ စိတ္တံ ကဋတ္တာရူပါနံ ဝိပ္ပယုတ္တပစ္စယေန ပစ္စယော၊ စိတ္တံ ဝတ္ထုဿ ဝိပ္ပယုတ္တပစ္စယေန ပစ္စယော၊ ဝတ္ထု စိတ္တဿ ဝိပ္ပယုတ္တပစ္စယေန ပစ္စယော. ပုရေဇာတံ – စက္ခာယတနံ စက္ခုဝိညာဏဿ ဝိပ္ပယုတ္တပစ္စယေန ပစ္စယော။ပေ။ ကာယာယတနံ ကာယဝိညာဏဿ။ပေ။ ဝတ္ထု စိတ္တဿ ဝိပ္ပယုတ္တပစ္စယေန ပစ္စယော. ပစ္ဆာဇာတံ – စိတ္တံ ပုရေဇာတဿ ဣမဿ ကာယဿ ဝိပ္ပယုတ္တပစ္စယေန ပစ္စယော. (၁)

အစေတသိကော ဓမ္မော စေတသိကဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပုရေဇာတံ. သဟဇာတံ – ပဋိသန္ဓိက္ခဏေ ဝတ္ထု စေတသိကာနံ ခန္ဓာနံ ဝိပ္ပယုတ္တပစ္စယေန ပစ္စယော. ပုရေဇာတံ – စက္ခာယတနံ စက္ခုဝိညာဏသဟဂတာနံ ခန္ဓာနံ။ပေ။ ကာယာယတနံ ကာယဝိညာဏသဟဂတာနံ ခန္ဓာနံ။ပေ။ ဝတ္ထု စေတသိကာနံ ခန္ဓာနံ ဝိပ္ပယုတ္တပစ္စယေန ပစ္စယော. (၂)

အစေတသိကော ဓမ္မော စေတသိကဿ စ အစေတသိကဿ စ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပုရေဇာတံ. သဟဇာတံ – ပဋိသန္ဓိက္ခဏေ ဝတ္ထု စေတသိကာနံ ခန္ဓာနံ စိတ္တဿ စ ဝိပ္ပယုတ္တပစ္စယေန ပစ္စယော. ပုရေဇာတံ – စက္ခာယတနံ စက္ခုဝိညာဏဿ သမ္ပယုတ္တကာနဉ္စ ခန္ဓာနံ။ပေ။ ကာယာယတနံ ကာယဝိညာဏဿ သမ္ပယုတ္တကာနဉ္စ ခန္ဓာနံ။ပေ။ ဝတ္ထု စိတ္တဿ သမ္ပယုတ္တကာနဉ္စ ခန္ဓာနံ ဝိပ္ပယုတ္တပစ္စယေန ပစ္စယော. (၃)

စေတသိကော စ အစေတသိကော စ ဓမ္မာ အစေတသိကဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပစ္ဆာဇာတံ (သံခိတ္တံ).

အတ္ထိပစ္စယော

၁၃၄. စေတသိကော ဓမ္မော စေတသိကဿ ဓမ္မဿ အတ္ထိပစ္စယေန ပစ္စယော။ ဧကံ (ပဋိစ္စဝါရသဒိသံ).

စေတသိကော ဓမ္မော အစေတသိကဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပစ္ဆာဇာတံ (သံခိတ္တံ). (၂)

စေတသိကော ဓမ္မော စေတသိကဿ စ အစေတသိကဿ စ ဓမ္မဿ အတ္ထိပစ္စယေန ပစ္စယော။ ဧကံ (ပဋိစ္စဝါရသဒိသံ). (၃)

၁၃၅. အစေတသိကော ဓမ္မော အစေတသိကဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ၊ အာဟာရံ၊ ဣန္ဒြိယံ (သံခိတ္တံ). (၁)

အစေတသိကော ဓမ္မော စေတသိကဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ. သဟဇာတံ – စိတ္တံ စေတသိကာနံ ခန္ဓာနံ အတ္ထိပစ္စယေန ပစ္စယော၊ ပဋိသန္ဓိက္ခဏေ စိတ္တံ။ပေ။ ပဋိသန္ဓိက္ခဏေ ဝတ္ထု စေတသိကာနံ ခန္ဓာနံ အတ္ထိပစ္စယေန ပစ္စယော. ပုရေဇာတံ – စက္ခုံ။ပေ။ ဝတ္ထုံ အနိစ္စတော။ပေ။ (ပုရေဇာတသဒိသံ နိန္နာနာကရဏံ). (၂)

အစေတသိကော ဓမ္မော စေတသိကဿ စ အစေတသိကဿ စ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ. သဟဇာတံ – စိတ္တံ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ အတ္ထိပစ္စယေန ပစ္စယော၊ ပဋိသန္ဓိက္ခဏေ စိတ္တံ။ပေ။ ပဋိသန္ဓိက္ခဏေ ဝတ္ထု စေတသိကာနံ ခန္ဓာနံ စိတ္တဿ စ အတ္ထိပစ္စယေန ပစ္စယော. ပုရေဇာတံ – စက္ခုံ။ပေ။ ဝတ္ထုံ အနိစ္စတော။ပေ။ (ပုရေဇာတသဒိသံ နိန္နာနံ). (၃)

၁၃၆. စေတသိကော စ အစေတသိကော စ ဓမ္မာ စေတသိကဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ. သဟဇာတော – စက္ခုဝိညာဏသဟဂတော ဧကော ခန္ဓော စ စက္ခာယတနဉ္စ ဒွိန္နံ ခန္ဓာနံ။ပေ။ ကာယဝိညာဏသဟဂတော။ပေ။ စေတသိကော ဧကော ခန္ဓော စ ဝတ္ထု စ ဒွိန္နံ ခန္ဓာနံ အတ္ထိပစ္စယေန ပစ္စယော၊ ဒွေ ခန္ဓာ စ။ပေ။. သဟဇာတော – စေတသိကော ဧကော ခန္ဓော စ စိတ္တဉ္စ ဒွိန္နံ ခန္ဓာနံ အတ္ထိပစ္စယေန ပစ္စယော၊ ဒွေ ခန္ဓာ စ။ပေ။ (ပဋိသန္ဓိက္ခဏေ) ဒွေပိ ကာတဗ္ဗာ. (၁)

စေတသိကော စ အစေတသိကော စ ဓမ္မာ အစေတသိကဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ၊ အာဟာရံ၊ ဣန္ဒြိယံ. သဟဇာတာ – စက္ခုဝိညာဏသဟဂတာ ခန္ဓာ စ စက္ခာယတနဉ္စ စက္ခုဝိညာဏဿ။ပေ။ ကာယဝိညာဏဿ။ပေ။ စေတသိကာ ခန္ဓာ စ စိတ္တဉ္စ စိတ္တသမုဋ္ဌာနာနံ ရူပါနံ အတ္ထိပစ္စယေန ပစ္စယော၊ စေတသိကာ ခန္ဓာ စ စိတ္တဉ္စ မဟာဘူတာ စ စိတ္တသမုဋ္ဌာနာနံ ရူပါနံ အတ္ထိပစ္စယေန ပစ္စယော. သဟဇာတာ – စေတသိကာ ခန္ဓာ စ ဝတ္ထု စ စိတ္တဿ အတ္ထိပစ္စယေန ပစ္စယော (ပဋိသန္ဓိက္ခဏေ တီဏိပိ ကာတဗ္ဗာ). ပစ္ဆာဇာတာ – စေတသိကာ ခန္ဓာ စ စိတ္တဉ္စ ပုရေဇာတဿ ဣမဿ ကာယဿ အတ္ထိပစ္စယေန ပစ္စယော. ပစ္ဆာဇာတာ – စေတသိကာ ခန္ဓာ စ စိတ္တဉ္စ ကဗဠီကာရော အာဟာရော စ ဣမဿ ကာယဿ အတ္ထိပစ္စယေန ပစ္စယော. ပစ္ဆာဇာတာ – စေတသိကာ ခန္ဓာ စ စိတ္တဉ္စ ရူပဇီဝိတိန္ဒြိယဉ္စ ကဋတ္တာရူပါနံ အတ္ထိပစ္စယေန ပစ္စယော. (၂)

စေတသိကော စ အစေတသိကော စ ဓမ္မာ စေတသိကဿ စ အစေတသိကဿ စ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ. သဟဇာတော – စက္ခုဝိညာဏသဟဂတော ဧကော ခန္ဓော စ စက္ခာယတနဉ္စ ဒွိန္နံ ခန္ဓာနံ စက္ခုဝိညာဏဿ စ အတ္ထိပစ္စယေန ပစ္စယော။ပေ။ ကာယဝိညာဏသဟဂတော ဧကော ခန္ဓော စ ကာယာယတနဉ္စ ဒွိန္နံ ခန္ဓာနံ ကာယဝိညာဏဿ စ အတ္ထိပစ္စယေန ပစ္စယော၊ ဒွေ ခန္ဓာ စ။ပေ။. သဟဇာတော – စေတသိကော ဧကော ခန္ဓော စ ဝတ္ထု စ ဒွိန္နံ ခန္ဓာနံ စိတ္တဿ စ အတ္ထိပစ္စယေန ပစ္စယော၊ ဒွေ ခန္ဓာ စ။ပေ။ (ပဋိသန္ဓိယာ ဒွေ ကာတဗ္ဗာ). (၃)