၁. ဝိဘင်္ဂဝါရော

ဟေတုပစ္စယော

၆၉. ဒဿနေန ပဟာတဗ္ဗော ဓမ္မော ဒဿနေန ပဟာတဗ္ဗဿ ဓမ္မဿ ဟေတုပစ္စယေန ပစ္စယော – ဒဿနေန ပဟာတဗ္ဗာ ဟေတူ သမ္ပယုတ္တကာနံ ခန္ဓာနံ ဟေတုပစ္စယေန ပစ္စယော. (၁)

ဒဿနေန ပဟာတဗ္ဗော ဓမ္မော နေဝဒဿနေန နဘာဝနာယ ပဟာတဗ္ဗဿ ဓမ္မဿ ဟေတုပစ္စယေန ပစ္စယော – ဒဿနေန ပဟာတဗ္ဗာ ဟေတူ စိတ္တသမုဋ္ဌာနာနံ ရူပါနံ ဟေတုပစ္စယေန ပစ္စယော. (၂)

ဒဿနေန ပဟာတဗ္ဗော ဓမ္မော ဒဿနေန ပဟာတဗ္ဗဿ စ နေဝဒဿနေန နဘာဝနာယ ပဟာတဗ္ဗဿ စ ဓမ္မဿ ဟေတုပစ္စယေန ပစ္စယော – ဒဿနေန ပဟာတဗ္ဗာ ဟေတူ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော. (၃)

၇၀. ဘာဝနာယ ပဟာတဗ္ဗော ဓမ္မော။ပေ။ ဓမ္မဿ ဟေတုပစ္စယေန ပစ္စယော – ဘာဝနာယ ပဟာတဗ္ဗာ ဟေတူ သမ္ပယုတ္တကာနံ ခန္ဓာနံ ဟေတုပစ္စယေန ပစ္စယော. (၁)

ဘာဝနာယ ပဟာတဗ္ဗော ဓမ္မော နေဝဒဿနေန နဘာဝနာယ ပဟာတဗ္ဗဿ။ပေ။ ဘာဝနာယ ပဟာတဗ္ဗာ ဟေတူ စိတ္တသမုဋ္ဌာနာနံ ရူပါနံ ဟေတုပစ္စယေန ပစ္စယော. (၂)

ဘာဝနာယ ပဟာတဗ္ဗော ဓမ္မော ဘာဝနာယ ပဟာတဗ္ဗဿ စ နေဝဒဿနေန နဘာဝနာယ ပဟာတဗ္ဗဿ စ ဓမ္မဿ။ပေ။ ဘာဝနာယ ပဟာတဗ္ဗာ ဟေတူ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော. (၃)

နေဝဒဿနေန နဘာဝနာယ ပဟာတဗ္ဗော ဓမ္မော နေဝဒဿနေန နဘာဝနာယ ပဟာတဗ္ဗဿ ဓမ္မဿ။ပေ။ နေဝဒဿနေန နဘာဝနာယ ပဟာတဗ္ဗာ ဟေတူ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော. ပဋိသန္ဓိက္ခဏေ နေဝဒဿနေန နဘာဝနာယ ပဟာတဗ္ဗာ ဟေတူ သမ္ပယုတ္တကာနံ ခန္ဓာနံ ကဋတ္တာ စ ရူပါနံ ဟေတုပစ္စယေန ပစ္စယော. (၁)

အာရမ္မဏပစ္စယော

၇၁. ဒဿနေန ပဟာတဗ္ဗော ဓမ္မော ဒဿနေန ပဟာတဗ္ဗဿ ဓမ္မဿ အာရမ္မဏပစ္စယေန ပစ္စယော – ဒဿနေန ပဟာတဗ္ဗံ ရာဂံ အဿာဒေတိ အဘိနန္ဒတိ၊ တံ အာရဗ္ဘ ဒဿနေန ပဟာတဗ္ဗော ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ၊ ဝိစိကိစ္ဆာ ဥပ္ပဇ္ဇတိ. ဒဿနေန ပဟာတဗ္ဗံ ဒေါမနဿံ ဥပ္ပဇ္ဇတိ၊ ဒိဋ္ဌိံ အဿာဒေတိ အဘိနန္ဒတိ၊ တံ အာရဗ္ဘ ဒဿနေန ပဟာတဗ္ဗော ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ၊ ဝိစိကိစ္ဆာ ဥပ္ပဇ္ဇတိ. ဒဿနေန ပဟာတဗ္ဗံ ဒေါမနဿံ ဥပ္ပဇ္ဇတိ၊ ဝိစိကိစ္ဆံ အာရဗ္ဘ ဝိစိကိစ္ဆာ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ၊ ဒဿနေန ပဟာတဗ္ဗံ ဒေါမနဿံ ဥပ္ပဇ္ဇတိ. ဒဿနေန ပဟာတဗ္ဗံ ဒေါမနဿံ အာရဗ္ဘ ဒဿနေန ပဟာတဗ္ဗံ ဒေါမနဿံ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ၊ ဝိစိကိစ္ဆာ ဥပ္ပဇ္ဇတိ. (၁)

ဒဿနေန ပဟာတဗ္ဗော ဓမ္မော နေဝဒဿနေန နဘာဝနာယ ပဟာတဗ္ဗဿ ဓမ္မဿ အာရမ္မဏပစ္စယေန ပစ္စယော – အရိယာ ဒဿနေန ပဟာတဗ္ဗေ ပဟီနေ ကိလေသေ ပစ္စဝေက္ခန္တိ၊ ပုဗ္ဗေ သမုဒါစိဏ္ဏေ ကိလေသေ ဇာနန္တိ. ဒဿနေန ပဟာတဗ္ဗေ ခန္ဓေ အနိစ္စတော ဒုက္ခတော အနတ္တတော ဝိပဿန္တိ. စေတောပရိယဉာဏေန ဒဿနေန ပဟာတဗ္ဗစိတ္တသမင်္ဂိဿ စိတ္တံ ဇာနန္တိ. ဒဿနေန ပဟာတဗ္ဗာ ခန္ဓာ စေတောပရိယဉာဏဿ၊ ပုဗ္ဗေနိဝါသာနုဿတိဉာဏဿ၊ ယထာကမ္မူပဂဉာဏဿ၊ အနာဂတံသဉာဏဿ၊ အာဝဇ္ဇနာယ အာရမ္မဏပစ္စယေန ပစ္စယော. (၂)

၇၂. ဘာဝနာယ ပဟာတဗ္ဗော ဓမ္မော ဘာဝနာယ ပဟာတဗ္ဗဿ ဓမ္မဿ အာရမ္မဏပစ္စယေန ပစ္စယော – ဘာဝနာယ ပဟာတဗ္ဗံ ရာဂံ အဿာဒေတိ အဘိနန္ဒတိ၊ တံ အာရဗ္ဘ ဘာဝနာယ ပဟာတဗ္ဗော ရာဂေါ ဥပ္ပဇ္ဇတိ၊ ဥဒ္ဓစ္စံ ဥပ္ပဇ္ဇတိ. ဘာဝနာယ ပဟာတဗ္ဗံ ဒေါမနဿံ ဥပ္ပဇ္ဇတိ၊ ဥဒ္ဓစ္စံ အာရဗ္ဘ ဥဒ္ဓစ္စံ ဥပ္ပဇ္ဇတိ. ဘာဝနာယ ပဟာတဗ္ဗံ ဒေါမနဿံ ဥပ္ပဇ္ဇတိ၊ ဘာဝနာယ ပဟာတဗ္ဗံ ဒေါမနဿံ အာရဗ္ဘ ဘာဝနာယ ပဟာတဗ္ဗံ ဒေါမနဿံ ဥပ္ပဇ္ဇတိ၊ ဥဒ္ဓစ္စံ ဥပ္ပဇ္ဇတိ. (၁)

ဘာဝနာယ ပဟာတဗ္ဗော ဓမ္မော ဒဿနေန ပဟာတဗ္ဗဿ ဓမ္မဿ အာရမ္မဏပစ္စယေန ပစ္စယော – ဘာဝနာယ ပဟာတဗ္ဗံ ရာဂံ အဿာဒေတိ အဘိနန္ဒတိ၊ တံ အာရဗ္ဘ ဒဿနေန ပဟာတဗ္ဗော ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ၊ ဝိစိကိစ္ဆာ ဥပ္ပဇ္ဇတိ၊ ဒဿနေန ပဟာတဗ္ဗံ ဒေါမနဿံ ဥပ္ပဇ္ဇတိ. ဥဒ္ဓစ္စံ အာရဗ္ဘ ဒိဋ္ဌိ ဥပ္ပဇ္ဇတိ၊ ဝိစိကိစ္ဆာ ဥပ္ပဇ္ဇတိ၊ ဒဿနေန ပဟာတဗ္ဗံ ဒေါမနဿံ ဥပ္ပဇ္ဇတိ. ဘာဝနာယ ပဟာတဗ္ဗံ ဒေါမနဿံ အာရဗ္ဘ ဒဿနေန ပဟာတဗ္ဗံ ဒေါမနဿံ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ၊ ဝိစိကိစ္ဆာ ဥပ္ပဇ္ဇတိ. (၂)

ဘာဝနာယ ပဟာတဗ္ဗော ဓမ္မော နေဝဒဿနေန နဘာဝနာယ ပဟာတဗ္ဗဿ ဓမ္မဿ အာရမ္မဏပစ္စယေန ပစ္စယော – အရိယာ ဘာဝနာယ ပဟာတဗ္ဗေ ပဟီနေ ကိလေသေ ပစ္စဝေက္ခန္တိ၊ ဝိက္ခမ္ဘိတေ ကိလေသေ ပစ္စဝေက္ခန္တိ၊ ပုဗ္ဗေ သမုဒါစိဏ္ဏေ ကိလေသေ ဇာနန္တိ. ဘာဝနာယ ပဟာတဗ္ဗေ ခန္ဓေ အနိစ္စတော ဒုက္ခတော အနတ္တတော ဝိပဿန္တိ၊ စေတောပရိယဉာဏေန ဘာဝနာယ ပဟာတဗ္ဗစိတ္တသမင်္ဂိဿ စိတ္တံ ဇာနန္တိ. ဘာဝနာယ ပဟာတဗ္ဗာ ခန္ဓာ စေတောပရိယဉာဏဿ၊ ပုဗ္ဗေနိဝါသာနုဿတိဉာဏဿ၊ ယထာကမ္မူပဂဉာဏဿ၊ အနာဂတံသဉာဏဿ၊ အာဝဇ္ဇနာယ အာရမ္မဏပစ္စယေန ပစ္စယော. (၃)

၇၃. နေဝဒဿနေန နဘာဝနာယ ပဟာတဗ္ဗော ဓမ္မော နေဝဒဿနေန နဘာဝနာယ ပဟာတဗ္ဗဿ ဓမ္မဿ အာရမ္မဏပစ္စယေန ပစ္စယော – ဒါနံ ဒတွာ သီလံ သမာဒိယိတွာ ဥပေါသထကမ္မံ ကတွာ တံ ပစ္စဝေက္ခတိ၊ ပုဗ္ဗေ သုစိဏ္ဏာနိ ပစ္စဝေက္ခတိ၊ ဈာနာ ဝုဋ္ဌဟိတွာ ဈာနံ ပစ္စဝေက္ခတိ. အရိယာ မဂ္ဂါ ဝုဋ္ဌဟိတွာ မဂ္ဂံ ပစ္စဝေက္ခန္တိ၊ ဖလံ ပစ္စဝေက္ခန္တိ၊ နိဗ္ဗာနံ ပစ္စဝေက္ခန္တိ၊ နိဗ္ဗာနံ ဂေါတြဘုဿ၊ ဝေါဒါနဿ၊ မဂ္ဂဿ၊ ဖလဿ၊ အာဝဇ္ဇနာယ အာရမ္မဏပစ္စယေန ပစ္စယော. စက္ခုံ အနိစ္စတော ဒုက္ခတော အနတ္တတော ဝိပဿတိ၊ သောတံ။ ဃာနံ။ ဇိဝှံ။ ကာယံ။ ရူပေ။ သဒ္ဒေ။ ဂန္ဓေ။ ရသေ။ ဖောဋ္ဌဗ္ဗေ။ ဝတ္ထုံ။ နေဝဒဿနေန နဘာဝနာယ ပဟာတဗ္ဗေ ခန္ဓေ အနိစ္စတော ဒုက္ခတော အနတ္တတော ဝိပဿတိ၊ ဒိဗ္ဗေန စက္ခုနာ ရူပံ ပဿတိ၊ ဒိဗ္ဗာယ သောတဓာတုယာ သဒ္ဒံ သုဏာတိ၊ စေတောပရိယဉာဏေန နေဝဒဿနေန နဘာဝနာယ ပဟာတဗ္ဗစိတ္တသမင်္ဂိဿ စိတ္တံ ဇာနန္တိ၊ အာကာသာနဉ္စာယတနံ ဝိညာဏဉ္စာယတနဿ။ပေ။ အာကိဉ္စညာယတနံ နေဝသညာနာသညာယတနဿ။ပေ။ ရူပါယတနံ စက္ခုဝိညာဏဿ အာရမ္မဏပစ္စယေန ပစ္စယော။ပေ။ ဖောဋ္ဌဗ္ဗာယတနံ ကာယဝိညာဏဿ အာရမ္မဏပစ္စယေန ပစ္စယော။ပေ။ နေဝဒဿနေန နဘာဝနာယ ပဟာတဗ္ဗာ ခန္ဓာ ဣဒ္ဓိဝိဓဉာဏဿ၊ စေတောပရိယဉာဏဿ၊ ပုဗ္ဗေနိဝါသာနုဿတိဉာဏဿ၊ ယထာကမ္မူပဂဉာဏဿ၊ အနာဂတံသဉာဏဿ၊ အာဝဇ္ဇနာယ အာရမ္မဏပစ္စယေန ပစ္စယော. (၁)

နေဝဒဿနေန နဘာဝနာယ ပဟာတဗ္ဗော ဓမ္မော ဒဿနေန ပဟာတဗ္ဗဿ ဓမ္မဿ အာရမ္မဏပစ္စယေန ပစ္စယော – ဒါနံ ဒတွာ သီလံ သမာဒိယိတွာ ဥပေါသထကမ္မံ ကတွာ တံ အဿာဒေတိ အဘိနန္ဒတိ၊ တံ အာရဗ္ဘ ဒဿနေန ပဟာတဗ္ဗော ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ၊ ဝိစိကိစ္ဆာ ဥပ္ပဇ္ဇတိ၊ ဒဿနေန ပဟာတဗ္ဗံ ဒေါမနဿံ ဥပ္ပဇ္ဇတိ. ပုဗ္ဗေ သုစိဏ္ဏာနိ အဿာဒေတိ အဘိနန္ဒတိ။ပေ။ ဈာနာ ဝုဋ္ဌဟိတွာ ဈာနံ အဿာဒေတိ အဘိနန္ဒတိ၊ တံ အာရဗ္ဘ ဒဿနေန ပဟာတဗ္ဗော ရာဂေါ။ပေ။ ဒိဋ္ဌိ။ပေ။ ဝိစိကိစ္ဆာ။ပေ။ ဈာနေ ပရိဟီနေ ဝိပ္ပဋိသာရိဿ ဒဿနေန ပဟာတဗ္ဗံ ဒေါမနဿံ ဥပ္ပဇ္ဇတိ. စက္ခုံ အဿာဒေတိ အဘိနန္ဒတိ။ပေ။ သောတံ။ ဃာနံ။ ဇိဝှံ။ ကာယံ။ ရူပေ။ သဒ္ဒေ။ ဂန္ဓေ။ ရသေ။ ဖောဋ္ဌဗ္ဗေ။ ဝတ္ထုံ။ နေဝဒဿနေန နဘာဝနာယ ပဟာတဗ္ဗေ ခန္ဓေ အဿာဒေတိ အဘိနန္ဒတိ၊ တံ အာရဗ္ဘ ဒဿနေန ပဟာတဗ္ဗော ရာဂေါ။ပေ။ ဒိဋ္ဌိ။ပေ။ ဝိစိကိစ္ဆာ။ပေ။ ဒဿနေန ပဟာတဗ္ဗံ ဒေါမနဿံ ဥပ္ပဇ္ဇတိ. (၂)

နေဝဒဿနေန နဘာဝနာယ ပဟာတဗ္ဗော ဓမ္မော ဘာဝနာယ ပဟာတဗ္ဗဿ ဓမ္မဿ အာရမ္မဏပစ္စယေန ပစ္စယော – ဒါနံ ဒတွာ သီလံ သမာဒိယိတွာ ဥပေါသထကမ္မံ ကတွာ တံ အဿာဒေတိ အဘိနန္ဒတိ၊ တံ အာရဗ္ဘ ဘာဝနာယ ပဟာတဗ္ဗော ရာဂေါ ဥပ္ပဇ္ဇတိ၊ ဥဒ္ဓစ္စံ ဥပ္ပဇ္ဇတိ၊ ဘာဝနာယ ပဟာတဗ္ဗံ ဒေါမနဿံ ဥပ္ပဇ္ဇတိ. ပုဗ္ဗေ သုစိဏ္ဏာနိ။ပေ။ ဈာနာ ဝုဋ္ဌဟိတွာ။ပေ။ စက္ခုံ။ပေ။ ဝတ္ထုံ။ နေဝဒဿနေန နဘာဝနာယ ပဟာတဗ္ဗေ ခန္ဓေ အဿာဒေတိ။ပေ။ တံ အာရဗ္ဘ ဘာဝနာယ ပဟာတဗ္ဗော ရာဂေါ ဥပ္ပဇ္ဇတိ၊ ဥဒ္ဓစ္စံ ဥပ္ပဇ္ဇတိ၊ ဘာဝနာယ ပဟာတဗ္ဗံ ဒေါမနဿံ ဥပ္ပဇ္ဇတိ. (၃)

အဓိပတိပစ္စယော

၇၄. ဒဿနေန ပဟာတဗ္ဗော ဓမ္မော ဒဿနေန ပဟာတဗ္ဗဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ. အာရမ္မဏာဓိပတိ – ဒဿနေန ပဟာတဗ္ဗံ ရာဂံ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ ဒဿနေန ပဟာတဗ္ဗော ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ၊ ဒိဋ္ဌိံ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ ဒဿနေန ပဟာတဗ္ဗော ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ. သဟဇာတာဓိပတိ – ဒဿနေန ပဟာတဗ္ဗာဓိပတိ သမ္ပယုတ္တကာနံ ခန္ဓာနံ အဓိပတိပစ္စယေန ပစ္စယော. (၁)

ဒဿနေန ပဟာတဗ္ဗော ဓမ္မော နေဝဒဿနေန နဘာဝနာယ ပဟာတဗ္ဗဿ ဓမ္မဿ အဓိပတိပစ္စယေန ပစ္စယော. သဟဇာတာဓိပတိ – ဒဿနေန ပဟာတဗ္ဗာဓိပတိ စိတ္တသမုဋ္ဌာနာနံ ရူပါနံ အဓိပတိပစ္စယေန ပစ္စယော. (၂)

ဒဿနေန ပဟာတဗ္ဗော ဓမ္မော ဒဿနေန ပဟာတဗ္ဗဿ စ နေဝဒဿနေန နဘာဝနာယ ပဟာတဗ္ဗဿ စ ဓမ္မဿ အဓိပတိပစ္စယေန ပစ္စယော. သဟဇာတာဓိပတိ – ဒဿနေန ပဟာတဗ္ဗာဓိပတိ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ အဓိပတိပစ္စယေန ပစ္စယော. (၃)

၇၅. ဘာဝနာယ ပဟာတဗ္ဗော ဓမ္မော ဘာဝနာယ ပဟာတဗ္ဗဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ. အာရမ္မဏာဓိပတိ – ဘာဝနာယ ပဟာတဗ္ဗံ ရာဂံ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ ဘာဝနာယ ပဟာတဗ္ဗော ရာဂေါ ဥပ္ပဇ္ဇတိ. သဟဇာတာဓိပတိ – ဘာဝနာယ ပဟာတဗ္ဗာဓိပတိ သမ္ပယုတ္တကာနံ ခန္ဓာနံ အဓိပတိပစ္စယေန ပစ္စယော. (၁)

ဘာဝနာယ ပဟာတဗ္ဗော ဓမ္မော ဒဿနေန ပဟာတဗ္ဗဿ ဓမ္မဿ အဓိပတိပစ္စယေန ပစ္စယော. အာရမ္မဏာဓိပတိ – ဘာဝနာယ ပဟာတဗ္ဗံ ရာဂံ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ ဒဿနေန ပဟာတဗ္ဗော ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ. (၂)

ဘာဝနာယ ပဟာတဗ္ဗော ဓမ္မော နေဝဒဿနေန နဘာဝနာယ ပဟာတဗ္ဗဿ ဓမ္မဿ အဓိပတိပစ္စယေန ပစ္စယော. သဟဇာတာဓိပတိ – ဘာဝနာယ ပဟာတဗ္ဗာဓိပတိ စိတ္တသမုဋ္ဌာနာနံ ရူပါနံ အဓိပတိပစ္စယေန ပစ္စယော. (၃)

ဘာဝနာယ ပဟာတဗ္ဗော ဓမ္မော ဘာဝနာယ ပဟာတဗ္ဗဿ စ နေဝဒဿနေန နဘာဝနာယ ပဟာတဗ္ဗဿ စ ဓမ္မဿ အဓိပတိပစ္စယေန ပစ္စယော. သဟဇာတာဓိပတိ – ဘာဝနာယ ပဟာတဗ္ဗာဓိပတိ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ အဓိပတိပစ္စယေန ပစ္စယော. (၄)

၇၆. နေဝဒဿနေန နဘာဝနာယ ပဟာတဗ္ဗော ဓမ္မော နေဝဒဿနေန နဘာဝနာယ ပဟာတဗ္ဗဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ. အာရမ္မဏာဓိပတိ – ဒါနံ ဒတွာ သီလံ သမာဒိယိတွာ ဥပေါသထကမ္မံ ကတွာ တံ ဂရုံ ကတွာ ပစ္စဝေက္ခတိ၊ ပုဗ္ဗေ သုစိဏ္ဏာနိ။ပေ။ ဈာနာ ဝုဋ္ဌဟိတွာ ဈာနံ ဂရုံ ကတွာ ပစ္စဝေက္ခတိ၊ အရိယာ မဂ္ဂါ ဝုဋ္ဌဟိတွာ မဂ္ဂံ ဂရုံ ကတွာ ပစ္စဝေက္ခန္တိ၊ ဖလံ ဂရုံ ကတွာ ပစ္စဝေက္ခန္တိ၊ နိဗ္ဗာနံ ဂရုံ ကတွာ ပစ္စဝေက္ခန္တိ၊ နိဗ္ဗာနံ ဂေါတြဘုဿ၊ ဝေါဒါနဿ၊ မဂ္ဂဿ၊ ဖလဿ အဓိပတိပစ္စယေန ပစ္စယော. သဟဇာတာဓိပတိ – နေဝဒဿနေန နဘာဝနာယ ပဟာတဗ္ဗာဓိပတိ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ အဓိပတိပစ္စယေန ပစ္စယော. (၁)

နေဝဒဿနေန နဘာဝနာယ ပဟာတဗ္ဗော ဓမ္မော ဒဿနေန ပဟာတဗ္ဗဿ ဓမ္မဿ အဓိပတိပစ္စယေန ပစ္စယော. အာရမ္မဏာဓိပတိ – ဒါနံ ဒတွာ သီလံ သမာဒိယိတွာ ဥပေါသထကမ္မံ ကတွာ တံ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ ဒဿနေန ပဟာတဗ္ဗော ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ. ပုဗ္ဗေ သုစိဏ္ဏာနိ ဂရုံ ကတွာ။ပေ။ ဈာနာ ဝုဋ္ဌဟိတွာ ဈာနံ ဂရုံ ကတွာ။ပေ။ စက္ခုံ။ပေ။ ဝတ္ထုံ။ နေဝဒဿနေန နဘာဝနာယ ပဟာတဗ္ဗေ ခန္ဓေ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ ဒဿနေန ပဟာတဗ္ဗော ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ. (၂)

နေဝဒဿနေန နဘာဝနာယ ပဟာတဗ္ဗော ဓမ္မော ဘာဝနာယ ပဟာတဗ္ဗဿ ဓမ္မဿ အဓိပတိပစ္စယေန ပစ္စယော. အာရမ္မဏာဓိပတိ – ဒါနံ ဒတွာ သီလံ သမာဒိယိတွာ ဥပေါသထကမ္မံ ကတွာ တံ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ ဘာဝနာယ ပဟာတဗ္ဗော ရာဂေါ ဥပ္ပဇ္ဇတိ. ပုဗ္ဗေ။ပေ။ နေဝဒဿနေန နဘာဝနာယ ပဟာတဗ္ဗေ ခန္ဓေ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ ဘာဝနာယ ပဟာတဗ္ဗော ရာဂေါ ဥပ္ပဇ္ဇတိ. (၃)

အနန္တရပစ္စယော

၇၇. ဒဿနေန ပဟာတဗ္ဗော ဓမ္မော ဒဿနေန ပဟာတဗ္ဗဿ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ ဒဿနေန ပဟာတဗ္ဗာ ခန္ဓာ ပစ္ဆိမာနံ ပစ္ဆိမာနံ ဒဿနေန ပဟာတဗ္ဗာနံ ခန္ဓာနံ အနန္တရပစ္စယေန ပစ္စယော.

ဒဿနေန ပဟာတဗ္ဗော ဓမ္မော နေဝဒဿနေန နဘာဝနာယ ပဟာတဗ္ဗဿ ဓမ္မဿ အနန္တရပစ္စယေန ပစ္စယော – ဒဿနေန ပဟာတဗ္ဗာ ခန္ဓာ ဝုဋ္ဌာနဿ အနန္တရပစ္စယေန ပစ္စယော. (၂)

ဘာဝနာယ ပဟာတဗ္ဗော ဓမ္မော ဘာဝနာယ ပဟာတဗ္ဗဿ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ ဘာဝနာယ ပဟာတဗ္ဗာ ခန္ဓာ ပစ္ဆိမာနံ ပစ္ဆိမာနံ ဘာဝနာယ ပဟာတဗ္ဗာနံ ခန္ဓာနံ အနန္တရပစ္စယေန ပစ္စယော. (၁)

ဘာဝနာယ ပဟာတဗ္ဗော ဓမ္မော နေဝဒဿနေန နဘာဝနာယ ပဟာတဗ္ဗဿ ဓမ္မဿ အနန္တရပစ္စယေန ပစ္စယော – ဘာဝနာယ ပဟာတဗ္ဗာ ခန္ဓာ ဝုဋ္ဌာနဿ အနန္တရပစ္စယေန ပစ္စယော. (၂)

နေဝဒဿနေန နဘာဝနာယ ပဟာတဗ္ဗော ဓမ္မော နေဝဒဿနေန နဘာဝနာယ ပဟာတဗ္ဗဿ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ နေဝဒဿနေန နဘာဝနာယ ပဟာတဗ္ဗာ ခန္ဓာ ပစ္ဆိမာနံ ပစ္ဆိမာနံ နေဝဒဿနေန နဘာဝနာယ ပဟာတဗ္ဗာနံ ခန္ဓာနံ အနန္တရပစ္စယေန ပစ္စယော. အနုလောမံ ဂေါတြဘုဿ။ အနုလောမံ ဝေါဒါနဿ။ ဂေါတြဘု မဂ္ဂဿ။ ဝေါဒါနံ မဂ္ဂဿ။ မဂ္ဂေါ ဖလဿ။ ဖလံ ဖလဿ။ အနုလောမံ ဖလသမာပတ္တိယာ။ နိရောဓာ ဝုဋ္ဌဟန္တဿ နေဝသညာနာသညာယတနံ ဖလသမာပတ္တိယာ အနန္တရပစ္စယေန ပစ္စယော. (၁)

နေဝဒဿနေန နဘာဝနာယ ပဟာတဗ္ဗော ဓမ္မော ဒဿနေန ပဟာတဗ္ဗဿ ဓမ္မဿ။ပေ။ အာဝဇ္ဇနာ ဒဿနေန ပဟာတဗ္ဗာနံ ခန္ဓာနံ အနန္တရပစ္စယေန ပစ္စယော. (၂)

နေဝဒဿနေန နဘာဝနာယ ပဟာတဗ္ဗော ဓမ္မော ဘာဝနာယ ပဟာတဗ္ဗဿ ဓမ္မဿ အနန္တရပစ္စယေန ပစ္စယော – အာဝဇ္ဇနာ ဘာဝနာယ ပဟာတဗ္ဗာနံ ခန္ဓာနံ အနန္တရပစ္စယေန ပစ္စယော. (၃)

သမနန္တရပစ္စယော

၇၈. ဒဿနေန ပဟာတဗ္ဗော ဓမ္မော ဒဿနေန ပဟာတဗ္ဗဿ ဓမ္မဿ သမနန္တရပစ္စယေန ပစ္စယော (အနန္တရသဒိသံ).

သဟဇာတပစ္စယော

၇၉. ဒဿနေန ပဟာတဗ္ဗော ဓမ္မော ဒဿနေန ပဟာတဗ္ဗဿ ဓမ္မဿ သဟဇာတပစ္စယေန ပစ္စယော။ တီဏိ.

ဘာဝနာယ ပဟာတဗ္ဗော ဓမ္မော ဘာဝနာယ ပဟာတဗ္ဗဿ ဓမ္မဿ။ တီဏိ.

နေဝဒဿနေန နဘာဝနာယ ပဟာတဗ္ဗော ဓမ္မော နေဝဒဿနေန နဘာဝနာယ ပဟာတဗ္ဗဿ ဓမ္မဿ သဟဇာတပစ္စယေန ပစ္စယော – နေဝဒဿနေန နဘာဝနာယ ပဟာတဗ္ဗော ဧကော ခန္ဓော တိဏ္ဏန္နံ ခန္ဓာနံ စိတ္တသမုဋ္ဌာနာနဉ္စ ရူပါနံ သဟဇာတပစ္စယေန ပစ္စယော။ပေ။ ဒွေ ခန္ဓာ။ပေ။ ပဋိသန္ဓိက္ခဏေ။ပေ။ ခန္ဓာ ဝတ္ထုဿ သဟဇာတပစ္စယေန ပစ္စယော. ဝတ္ထု ခန္ဓာနံ။ပေ။ ဧကံ မဟာဘူတံ တိဏ္ဏန္နံ မဟာဘူတာနံ။ပေ။ မဟာဘူတာ စိတ္တသမုဋ္ဌာနာနံ ရူပါနံ။ပေ။ ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ။ အသညသတ္တာနံ။ပေ။. (၁)

ဒဿနေန ပဟာတဗ္ဗော စ နေဝဒဿနေန နဘာဝနာယ ပဟာတဗ္ဗော စ ဓမ္မာ နေဝဒဿနေန နဘာဝနာယ ပဟာတဗ္ဗဿ ဓမ္မဿ သဟဇာတပစ္စယေန ပစ္စယော – ဒဿနေန ပဟာတဗ္ဗာ ခန္ဓာ စ မဟာဘူတာ စ စိတ္တသမုဋ္ဌာနာနံ ရူပါနံ သဟဇာတပစ္စယေန ပစ္စယော. (၁)

ဘာဝနာယ ပဟာတဗ္ဗော စ နေဝဒဿနေန နဘာဝနာယ ပဟာတဗ္ဗော စ ဓမ္မာ နေဝဒဿနေန နဘာဝနာယ ပဟာတဗ္ဗဿ ဓမ္မဿ သဟဇာတပစ္စယေန ပစ္စယော – ဘာဝနာယ ပဟာတဗ္ဗာ ခန္ဓာ စ မဟာဘူတာ စ စိတ္တသမုဋ္ဌာနာနံ ရူပါနံ သဟဇာတပစ္စယေန ပစ္စယော. (၁)

အညမညပစ္စယော

၈၀. ဒဿနေန ပဟာတဗ္ဗော ဓမ္မော ဒဿနေန ပဟာတဗ္ဗဿ ဓမ္မဿ အညမညပစ္စယေန ပစ္စယော – ဒဿနေန ပဟာတဗ္ဗော ဧကော ခန္ဓော တိဏ္ဏန္နံ ခန္ဓာနံ။ပေ။. (၁)

ဘာဝနာယ ပဟာတဗ္ဗော ဓမ္မော ဘာဝနာယ ပဟာတဗ္ဗဿ ဓမ္မဿ။ပေ။ ဘာဝနာယ ပဟာတဗ္ဗော ဧကော ခန္ဓော တိဏ္ဏန္နံ ခန္ဓာနံ။ပေ။. (၁)

နေဝဒဿနေန နဘာဝနာယ ပဟာတဗ္ဗော ဓမ္မော နေဝဒဿနေန နဘာဝနာယ ပဟာတဗ္ဗဿ ဓမ္မဿ။ပေ။ နေဝဒဿနေန နဘာဝနာယ ပဟာတဗ္ဗော ဧကော ခန္ဓော တိဏ္ဏန္နံ ခန္ဓာနံ အညမညပစ္စယေန ပစ္စယော။ပေ။ ဒွေ ခန္ဓာ။ပေ။ ပဋိသန္ဓိက္ခဏေ နေဝဒဿနေန နဘာဝနာယ ပဟာတဗ္ဗော ဧကော ခန္ဓော တိဏ္ဏန္နံ ခန္ဓာနံ ဝတ္ထုဿ စ အညမညပစ္စယေန ပစ္စယော။ပေ။ ဒွေ ခန္ဓာ။ပေ။ ခန္ဓာ ဝတ္ထုဿ။ပေ။ ဝတ္ထု ခန္ဓာနံ။ပေ။ ဧကံ မဟာဘူတံ တိဏ္ဏန္နံ မဟာဘူတာနံ အညမညပစ္စယေန ပစ္စယော။ပေ။ အသညသတ္တာနံ။ပေ။. (၁)

နိဿယပစ္စယော

၈၁. ဒဿနေန ပဟာတဗ္ဗော ဓမ္မော ဒဿနေန ပဟာတဗ္ဗဿ ဓမ္မဿ နိဿယပစ္စယေန ပစ္စယော။ တီဏိ.

ဘာဝနာယ ပဟာတဗ္ဗော ဓမ္မော ဘာဝနာယ ပဟာတဗ္ဗဿ ဓမ္မဿ။ တီဏိ.

နေဝဒဿနေန နဘာဝနာယ ပဟာတဗ္ဗော ဓမ္မော နေဝဒဿနေန နဘာဝနာယ ပဟာတဗ္ဗဿ ဓမ္မဿ နိဿယပစ္စယေန ပစ္စယော – နေဝဒဿနေန နဘာဝနာယ ပဟာတဗ္ဗော ဧကော ခန္ဓော တိဏ္ဏန္နံ ခန္ဓာနံ စိတ္တသမုဋ္ဌာနာနဉ္စ ရူပါနံ။ပေ။ ဒွေ ခန္ဓာ။ပေ။ ပဋိသန္ဓိက္ခဏေ။ပေ။ ခန္ဓာ ဝတ္ထုဿ။ပေ။ ဝတ္ထု ခန္ဓာနံ။ပေ။ ဧကံ မဟာဘူတံ။ပေ။ အသညသတ္တာနံ။ပေ။ စက္ခာယတနံ စက္ခုဝိညာဏဿ။ပေ။ ကာယာယတနံ ကာယဝိညာဏဿ။ပေ။ ဝတ္ထု။ပေ။. (၁)

နေဝဒဿနေန နဘာဝနာယ ပဟာတဗ္ဗော ဓမ္မော ဒဿနေန ပဟာတဗ္ဗဿ ဓမ္မဿ နိဿယပစ္စယေန ပစ္စယော – ဝတ္ထု ဒဿနေန ပဟာတဗ္ဗာနံ ခန္ဓာနံ နိဿယပစ္စယေန ပစ္စယော. (၂)

နေဝဒဿနေန နဘာဝနာယ ပဟာတဗ္ဗော ဓမ္မော ဘာဝနာယ ပဟာတဗ္ဗဿ ဓမ္မဿ နိဿယပစ္စယေန ပစ္စယော – ဝတ္ထု ဘာဝနာယ ပဟာတဗ္ဗာနံ ခန္ဓာနံ နိဿယပစ္စယေန ပစ္စယော. (၃)

၈၂. ဒဿနေန ပဟာတဗ္ဗော စ နေဝဒဿနေန နဘာဝနာယ ပဟာတဗ္ဗော စ ဓမ္မာ ဒဿနေန ပဟာတဗ္ဗဿ ဓမ္မဿ နိဿယပစ္စယေန ပစ္စယော – ဒဿနေန ပဟာတဗ္ဗော ဧကော ခန္ဓော စ ဝတ္ထု စ တိဏ္ဏန္နံ ခန္ဓာနံ နိဿယပစ္စယေန ပစ္စယော။ပေ။ ဒွေ ခန္ဓာ။ပေ။. (၁)

ဒဿနေန ပဟာတဗ္ဗော စ နေဝဒဿနေန နဘာဝနာယ ပဟာတဗ္ဗော စ ဓမ္မာ နေဝဒဿနေန နဘာဝနာယ ပဟာတဗ္ဗဿ ဓမ္မဿ နိဿယပစ္စယေန ပစ္စယော – ဒဿနေန ပဟာတဗ္ဗာ ခန္ဓာ စ မဟာဘူတာ စ စိတ္တသမုဋ္ဌာနာနံ ရူပါနံ နိဿယပစ္စယေန ပစ္စယော. (၂)

ဘာဝနာယ ပဟာတဗ္ဗော စ နေဝဒဿနေန နဘာဝနာယ ပဟာတဗ္ဗော စ ဓမ္မာ ဘာဝနာယ ပဟာတဗ္ဗဿ ဓမ္မဿ နိဿယပစ္စယေန ပစ္စယော – ဘာဝနာယ ပဟာတဗ္ဗော ဧကော ခန္ဓော စ ဝတ္ထု စ တိဏ္ဏန္နံ ခန္ဓာနံ နိဿယပစ္စယေန ပစ္စယော။ပေ။ ဒွေ ခန္ဓာ။ပေ။. (၁)

ဘာဝနာယ ပဟာတဗ္ဗော စ နေဝဒဿနေန နဘာဝနာယ ပဟာတဗ္ဗော စ ဓမ္မာ နေဝဒဿနေန နဘာဝနာယ ပဟာတဗ္ဗဿ ဓမ္မဿ နိဿယပစ္စယေန ပစ္စယော – ဘာဝနာယ ပဟာတဗ္ဗာ ခန္ဓာ စ မဟာဘူတာ စ စိတ္တသမုဋ္ဌာနာနံ ရူပါနံ နိဿယပစ္စယေန ပစ္စယော. (၂)

ဥပနိဿယပစ္စယော

၈၃. ဒဿနေန ပဟာတဗ္ဗော ဓမ္မော ဒဿနေန ပဟာတဗ္ဗဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ပေ။. ပကတူပနိဿယော – ဒဿနေန ပဟာတဗ္ဗံ ရာဂံ ဥပနိဿာယ ပါဏံ ဟနတိ၊ အဒိန္နံ အာဒိယတိ။ပေ။ သံဃံ ဘိန္ဒတိ. ဒဿနေန ပဟာတဗ္ဗံ ဒေါသံ။ မောဟံ။ ဒိဋ္ဌိံ။ ပတ္ထနံ ဥပနိဿာယ ပါဏံ ဟနတိ။ပေ။ သံဃံ ဘိန္ဒတိ. ဒဿနေန ပဟာတဗ္ဗော ရာဂေါ။ ဒေါသော။ မောဟော။ ဒိဋ္ဌိ။ ပတ္ထနာ ဒဿနေန ပဟာတဗ္ဗဿ ရာဂဿ.. ဒေါသဿ။ မောဟဿ။ ဒိဋ္ဌိယာ။ ပတ္ထနာယ ဥပနိဿယပစ္စယေန ပစ္စယော. (၁)

ဒဿနေန ပဟာတဗ္ဗော ဓမ္မော နေဝဒဿနေန နဘာဝနာယ ပဟာတဗ္ဗဿ ဓမ္မဿ ဥပနိဿယပစ္စယေန ပစ္စယော – အနန္တရူပနိဿယော၊ ပကတူပနိဿယော။ပေ။. ပကတူပနိဿယော – ဒဿနေန ပဟာတဗ္ဗံ ရာဂံ ဥပနိဿာယ ဒါနံ ဒေတိ၊ သီလံ သမာဒိယတိ၊ ဥပေါသထကမ္မံ ကရောတိ။ပေ။ သမာပတ္တိံ ဥပ္ပါဒေတိ. ဒဿနေန ပဟာတဗ္ဗံ ဒေါသံ။ပေ။ ပတ္ထနံ ဥပနိဿာယ ဒါနံ ဒေတိ။ပေ။ သမာပတ္တိံ ဥပ္ပါဒေတိ. ဒဿနေန ပဟာတဗ္ဗော ရာဂေါ။ ဒေါသော။ မောဟော။ ဒိဋ္ဌိ။ ပတ္ထနာ သဒ္ဓါယ။ပေ။ ပညာယ ကာယိကဿ သုခဿ၊ ကာယိကဿ ဒုက္ခဿ ဖလသမာပတ္တိယာ ဥပနိဿယပစ္စယေန ပစ္စယော. (၂)

၈၄. ဘာဝနာယ ပဟာတဗ္ဗော ဓမ္မော ဘာဝနာယ ပဟာတဗ္ဗဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ပေ။. ပကတူပနိဿယော – ဘာဝနာယ ပဟာတဗ္ဗော ရာဂေါ။ ဒေါသော။ မောဟော။ မာနော။ ပတ္ထနာ ဘာဝနာယ ပဟာတဗ္ဗဿ ရာဂဿ။ ဒေါသဿ။ မောဟဿ။ မာနဿ။ ပတ္ထနာယ ဥပနိဿယပစ္စယေန ပစ္စယော. (၁)

ဘာဝနာယ ပဟာတဗ္ဗော ဓမ္မော ဒဿနေန ပဟာတဗ္ဗဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ ပကတူပနိဿယော။ပေ။. ပကတူပနိဿယော – ဘာဝနာယ ပဟာတဗ္ဗံ ရာဂံ ဥပနိဿာယ ပါဏံ ဟနတိ။ပေ။ သံဃံ ဘိန္ဒတိ. ဘာဝနာယ ပဟာတဗ္ဗံ ဒေါသံ။ မောဟံ။ မာနံ။ ပတ္ထနံ ဥပနိဿာယ ပါဏံ ဟနတိ။ပေ။ သံဃံ ဘိန္ဒတိ. ဘာဝနာယ ပဟာတဗ္ဗော ရာဂေါ။ ဒေါသော။ မောဟော။ မာနော။ ပတ္ထနာ ဒဿနေန ပဟာတဗ္ဗဿ ရာဂဿ။ ဒေါသဿ။ မောဟဿ။ ဒိဋ္ဌိယာ။ ပတ္ထနာယ ဥပနိဿယပစ္စယေန ပစ္စယော. သကဘဏ္ဍေ ဆန္ဒရာဂေါ ပရဘဏ္ဍေ ဆန္ဒရာဂဿ ဥပနိဿယပစ္စယေန ပစ္စယော. သကပရိဂ္ဂဟေ ဆန္ဒရာဂေါ ပရပရိဂ္ဂဟေ ဆန္ဒရာဂဿ ဥပနိဿယပစ္စယေန ပစ္စယော. (၂)

ဘာဝနာယ ပဟာတဗ္ဗော ဓမ္မော နေဝဒဿနေန နဘာဝနာယ ပဟာတဗ္ဗဿ ဓမ္မဿ ဥပနိဿယပစ္စယေန ပစ္စယော – အနန္တရူပနိဿယော၊ ပကတူပနိဿယော။ပေ။. ပကတူပနိဿယော – ဘာဝနာယ ပဟာတဗ္ဗံ ရာဂံ ဥပနိဿာယ ဒါနံ ဒေတိ။ပေ။ သမာပတ္တိံ ဥပ္ပါဒေတိ. ဘာဝနာယ ပဟာတဗ္ဗံ ဒေါသံ။ မောဟံ။ မာနံ။ ပတ္ထနံ ဥပနိဿာယ ဒါနံ ဒေတိ။ပေ။ သမာပတ္တိံ ဥပ္ပါဒေတိ. ဘာဝနာယ ပဟာတဗ္ဗော ရာဂေါ။ ဒေါသော။ မောဟော။ မာနော။ ပတ္ထနာ သဒ္ဓါယ။ပေ။ ဖလသမာပတ္တိယာ ဥပနိဿယပစ္စယေန ပစ္စယော. (၃)

၈၅. နေဝဒဿနေန နဘာဝနာယ ပဟာတဗ္ဗော ဓမ္မော နေဝဒဿနေန နဘာဝနာယ ပဟာတဗ္ဗဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ပေ။. ပကတူပနိဿယော – သဒ္ဓံ ဥပနိဿာယ ဒါနံ ဒေတိ။ပေ။ သမာပတ္တိံ ဥပ္ပါဒေတိ. သီလံ။ သုတံ။ စာဂံ။ ပညံ။ ကာယိကံ။ သုခံ။ ကာယိကံ ဒုက္ခံ။ ဥတုံ။ ဘောဇနံ။ သေနာသနံ။ ဥပနိဿာယ ဒါနံ ဒေတိ။ပေ။ သမာပတ္တိံ ဥပ္ပါဒေတိ. သဒ္ဓါ။ သီလံ။ သုတံ။ စာဂေါ ။ ပညာ။ ကာယိကံ သုခံ။ ကာယိကံ ဒုက္ခံ။ ဥတု။ ဘောဇနံ။ သေနာသနံ။ သဒ္ဓါယ။ပေ။ ပညာယ ကာယိကဿ သုခဿ၊ ကာယိကဿ ဒုက္ခဿ ဖလသမာပတ္တိယာ ဥပနိဿယပစ္စယေန ပစ္စယော. (၁)

နေဝဒဿနေန နဘာဝနာယ ပဟာတဗ္ဗော ဓမ္မော ဒဿနေန ပဟာတဗ္ဗဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ပေ။. ပကတူပနိဿယော – သဒ္ဓံ ဥပနိဿာယ ဒိဋ္ဌိံ ဂဏှာတိ. သီလံ။ပေ။ သေနာသနံ ဥပနိဿာယ ပါဏံ ဟနတိ။ပေ။ သံဃံ ဘိန္ဒတိ. သဒ္ဓါ။ပေ။ သေနာသနံ ဒဿနေန ပဟာတဗ္ဗဿ ရာဂဿ။ ဒေါသဿ။ မောဟဿ။ ဒိဋ္ဌိယာ။ ပတ္ထနာယ ဥပနိဿယပစ္စယေန ပစ္စယော. (၂)

နေဝဒဿနေန နဘာဝနာယ ပဟာတဗ္ဗော ဓမ္မော ဘာဝနာယ ပဟာတဗ္ဗဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ပေ။. ပကတူပနိဿယော – သဒ္ဓံ ဥပနိဿာယ မာနံ ဇပ္ပေတိ. သီလံ။ပေ။ ပညံ။ ကာယိကံ သုခံ။ ကာယိကံ ဒုက္ခံ။ ဥတုံ။ ဘောဇနံ။ သေနာသနံ။ ဥပနိဿာယ မာနံ ဇပ္ပေတိ. သဒ္ဓါ။ပေ။ ပညာ။ ကာယိကံ သုခံ။ ကာယိကံ ဒုက္ခံ။ ဥတု။ ဘောဇနံ။ သေနာသနံ ဘာဝနာယ ပဟာတဗ္ဗဿ ရာဂဿ။ ဒေါသဿ။ မောဟဿ။ မာနဿ။ ပတ္ထနာယ ဥပနိဿယပစ္စယေန ပစ္စယော. (၃)

ပုရေဇာတပစ္စယော

၈၆. နေဝဒဿနေန နဘာဝနာယ ပဟာတဗ္ဗော ဓမ္မော နေဝဒဿနေန နဘာဝနာယ ပဟာတဗ္ဗဿ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ. အာရမ္မဏပုရေဇာတံ – စက္ခုံ အနိစ္စတော ဒုက္ခတော အနတ္တတော ဝိပဿတိ၊ သောတံ။ ဃာနံ။ ဇိဝှံ။ ကာယံ။ ရူပေ။ သဒ္ဒေ။ ဂန္ဓေ။ ရသေ။ ဖောဋ္ဌဗ္ဗေ။ ဝတ္ထုံ။ပေ။ ဒိဗ္ဗေန စက္ခုနာ ရူပံ ပဿတိ၊ ဒိဗ္ဗာယ သောတဓာတုယာ သဒ္ဒံ သုဏာတိ. ရူပါယတနံ စက္ခုဝိညာဏဿ။ပေ။ ဖောဋ္ဌဗ္ဗာယတနံ ကာယဝိညာဏဿ ပုရေဇာတပစ္စယေန ပစ္စယော. ဝတ္ထုပုရေဇာတံ – စက္ခာယတနံ စက္ခုဝိညာဏဿ။ပေ။ ကာယာယတနံ ကာယဝိညာဏဿ။ပေ။ ဝတ္ထု နေဝဒဿနေန နဘာဝနာယ ပဟာတဗ္ဗာနံ ခန္ဓာနံ ပုရေဇာတပစ္စယေန ပစ္စယော. (၁)

နေဝဒဿနေန နဘာဝနာယ ပဟာတဗ္ဗော ဓမ္မော ဒဿနေန ပဟာတဗ္ဗဿ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ. အာရမ္မဏပုရေဇာတံ – စက္ခုံ အဿာဒေတိ အဘိနန္ဒတိ၊ တံ အာရဗ္ဘ ဒဿနေန ပဟာတဗ္ဗော ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ၊ ဝိစိကိစ္ဆာ ဥပ္ပဇ္ဇတိ၊ ဒဿနေန ပဟာတဗ္ဗံ ဒေါမနဿံ ဥပ္ပဇ္ဇတိ။ပေ။ ဝတ္ထုံ အဿာဒေတိ အဘိနန္ဒတိ၊ တံ အာရဗ္ဘ ဒဿနေန ပဟာတဗ္ဗော ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ၊ ဝိစိကိစ္ဆာ ဥပ္ပဇ္ဇတိ၊ ဒဿနေန ပဟာတဗ္ဗံ ဒေါမနဿံ ဥပ္ပဇ္ဇတိ. ဝတ္ထုပုရေဇာတံ – ဝတ္ထု ဒဿနေန ပဟာတဗ္ဗာနံ ခန္ဓာနံ ပုရေဇာတပစ္စယေန ပစ္စယော. (၂)

နေဝဒဿနေန နဘာဝနာယ ပဟာတဗ္ဗော ဓမ္မော ဘာဝနာယ ပဟာတဗ္ဗဿ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ. အာရမ္မဏပုရေဇာတံ – စက္ခုံ အဿာဒေတိ အဘိနန္ဒတိ၊ တံ အာရဗ္ဘ ဘာဝနာယ ပဟာတဗ္ဗော ရာဂေါ ဥပ္ပဇ္ဇတိ။ ဥဒ္ဓစ္စံ ဥပ္ပဇ္ဇတိ။ ဘာဝနာယ ပဟာတဗ္ဗံ ဒေါမနဿံ ဥပ္ပဇ္ဇတိ၊ သောတံ။ပေ။ ကာယံ။ ရူပေ။ပေ။ ဖောဋ္ဌဗ္ဗေ။ ဝတ္ထုံ အဿာဒေတိ အဘိနန္ဒတိ၊ တံ အာရဗ္ဘ ဘာဝနာယ ပဟာတဗ္ဗော ရာဂေါ ဥပ္ပဇ္ဇတိ၊ ဥဒ္ဓစ္စံ ဥပ္ပဇ္ဇတိ၊ ဘာဝနာယ ပဟာတဗ္ဗံ ဒေါမနဿံ ဥပ္ပဇ္ဇတိ. ဝတ္ထုပုရေဇာတံ – ဝတ္ထု ဘာဝနာယ ပဟာတဗ္ဗာနံ ခန္ဓာနံ ပုရေဇာတပစ္စယေန ပစ္စယော. (၃)

ပစ္ဆာဇာတပစ္စယော

၈၇. ဒဿနေန ပဟာတဗ္ဗော ဓမ္မော နေဝဒဿနေန နဘာဝနာယ ပဟာတဗ္ဗဿ ဓမ္မဿ ပစ္ဆာဇာတပစ္စယေန ပစ္စယော – ပစ္ဆာဇာတာ ဒဿနေန ပဟာတဗ္ဗာ ခန္ဓာ ပုရေဇာတဿ ဣမဿ ကာယဿ ပစ္ဆာဇာတပစ္စယေန ပစ္စယော. (၁)

ဘာဝနာယ ပဟာတဗ္ဗော ဓမ္မော နေဝဒဿနေန နဘာဝနာယ ပဟာတဗ္ဗဿ ဓမ္မဿ ပစ္ဆာဇာတပစ္စယေန ပစ္စယော – ပစ္ဆာဇာတာ ဘာဝနာယ ပဟာတဗ္ဗာ ခန္ဓာ ပုရေဇာတဿ ဣမဿ ကာယဿ ပစ္ဆာဇာတပစ္စယေန ပစ္စယော. (၁)

နေဝဒဿနေန နဘာဝနာယ ပဟာတဗ္ဗော ဓမ္မော နေဝဒဿနေန နဘာဝနာယ ပဟာတဗ္ဗဿ ဓမ္မဿ ပစ္ဆာဇာတပစ္စယေန ပစ္စယော – ပစ္ဆာဇာတာ နေဝဒဿနေန နဘာဝနာယ ပဟာတဗ္ဗာ ခန္ဓာ ပုရေဇာတဿ ဣမဿ ကာယဿ ပစ္ဆာဇာတပစ္စယေန ပစ္စယော. (၁)

အာသေဝနပစ္စယော

၈၈. ဒဿနေန ပဟာတဗ္ဗော ဓမ္မော ဒဿနေန ပဟာတဗ္ဗဿ ဓမ္မဿ အာသေဝနပစ္စယေန ပစ္စယော – ပုရိမာ ပုရိမာ ဒဿနေန ပဟာတဗ္ဗာ ခန္ဓာ ပစ္ဆိမာနံ ပစ္ဆိမာနံ။ပေ။ အာသေဝနပစ္စယေန ပစ္စယော. (၁)

ဘာဝနာယ ပဟာတဗ္ဗော ဓမ္မော ဘာဝနာယ ပဟာတဗ္ဗဿ ဓမ္မဿ အာသေဝနပစ္စယေန ပစ္စယော – ပုရိမာ ပုရိမာ ဘာဝနာယ ပဟာတဗ္ဗာ ခန္ဓာ ပစ္ဆိမာနံ ပစ္ဆိမာနံ။ပေ။ အာသေဝနပစ္စယေန ပစ္စယော. (၁)

နေဝဒဿနေန နဘာဝနာယ ပဟာတဗ္ဗော ဓမ္မော နေဝဒဿနေန နဘာဝနာယ ပဟာတဗ္ဗဿ ဓမ္မဿ အာသေဝနပစ္စယေန ပစ္စယော – ပုရိမာ ပုရိမာ နေဝဒဿနေန နဘာဝနာယ ပဟာတဗ္ဗာ ခန္ဓာ ပစ္ဆိမာနံ ပစ္ဆိမာနံ။ပေ။ အာသေဝနပစ္စယေန ပစ္စယော. အနုလောမံ ဂေါတြဘုဿ။ အနုလောမံ ဝေါဒါနဿ။ ဂေါတြဘု မဂ္ဂဿ။ ဝေါဒါနံ မဂ္ဂဿ အာသေဝနပစ္စယေန ပစ္စယော. (၁)

ကမ္မပစ္စယော

၈၉. ဒဿနေန ပဟာတဗ္ဗော ဓမ္မော ဒဿနေန ပဟာတဗ္ဗဿ ဓမ္မဿ ကမ္မပစ္စယေန ပစ္စယော – ဒဿနေန ပဟာတဗ္ဗာ စေတနာ သမ္ပယုတ္တကာနံ ခန္ဓာနံ ကမ္မပစ္စယေန ပစ္စယော. (၁)

ဒဿနေန ပဟာတဗ္ဗော ဓမ္မော နေဝဒဿနေန နဘာဝနာယ ပဟာတဗ္ဗဿ ဓမ္မဿ ကမ္မပစ္စယေန ပစ္စယော – သဟဇာတာ၊ နာနာက္ခဏိကာ. သဟဇာတာ – ဒဿနေန ပဟာတဗ္ဗာ စေတနာ စိတ္တသမုဋ္ဌာနာနံ ရူပါနံ ကမ္မပစ္စယေန ပစ္စယော. နာနာက္ခဏိကာ – ဒဿနေန ပဟာတဗ္ဗာ စေတနာ ဝိပါကာနံ ခန္ဓာနံ ကဋတ္တာ စ ရူပါနံ ကမ္မပစ္စယေန ပစ္စယော. (၂)

ဒဿနေန ပဟာတဗ္ဗော ဓမ္မော ဒဿနေန ပဟာတဗ္ဗဿ စ နေဝဒဿနေန နဘာဝနာယ ပဟာတဗ္ဗဿ စ ဓမ္မဿ ကမ္မပစ္စယေန ပစ္စယော – ဒဿနေန ပဟာတဗ္ဗာ စေတနာ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ကမ္မပစ္စယေန ပစ္စယော. (၃)

ဘာဝနာယ ပဟာတဗ္ဗော ဓမ္မော ဘာဝနာယ ပဟာတဗ္ဗဿ ဓမ္မဿ ကမ္မပစ္စယေန ပစ္စယော – ဘာဝနာယ ပဟာတဗ္ဗာ စေတနာ သမ္ပယုတ္တကာနံ ခန္ဓာနံ ကမ္မပစ္စယေန ပစ္စယော. (၁)

ဘာဝနာယ ပဟာတဗ္ဗော ဓမ္မော နေဝဒဿနေန နဘာဝနာယ ပဟာတဗ္ဗဿ ဓမ္မဿ ကမ္မပစ္စယေန ပစ္စယော – ဘာဝနာယ ပဟာတဗ္ဗာ စေတနာ စိတ္တသမုဋ္ဌာနာနံ ရူပါနံ ကမ္မပစ္စယေန ပစ္စယော. (၂)

ဘာဝနာယ ပဟာတဗ္ဗော ဓမ္မော ဘာဝနာယ ပဟာတဗ္ဗဿ စ နေဝဒဿနေန နဘာဝနာယ ပဟာတဗ္ဗဿ စ ဓမ္မဿ ကမ္မပစ္စယေန ပစ္စယော – ဘာဝနာယ ပဟာတဗ္ဗာ စေတနာ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ကမ္မပစ္စယေန ပစ္စယော. (၃)

နေဝဒဿနေန နဘာဝနာယ ပဟာတဗ္ဗော ဓမ္မော နေဝဒဿနေန နဘာဝနာယ ပဟာတဗ္ဗဿ ဓမ္မဿ ကမ္မပစ္စယေန ပစ္စယော – သဟဇာတာ၊ နာနာက္ခဏိကာ. သဟဇာတာ – နေဝဒဿနေန နဘာဝနာယ ပဟာတဗ္ဗာ စေတနာ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ကမ္မပစ္စယေန ပစ္စယော. ပဋိသန္ဓိက္ခဏေ နေဝဒဿနေန နဘာဝနာယ ပဟာတဗ္ဗာ စေတနာ သမ္ပယုတ္တကာနံ ခန္ဓာနံ ကဋတ္တာ စ ရူပါနံ။ပေ။. နာနာက္ခဏိကာ – နေဝဒဿနေန နဘာဝနာယ ပဟာတဗ္ဗာ စေတနာ ဝိပါကာနံ ခန္ဓာနံ ကဋတ္တာ စ ရူပါနံ ကမ္မပစ္စယေန ပစ္စယော. (၁)

ဝိပါကပစ္စယော

၉၀. နေဝဒဿနေန နဘာဝနာယ ပဟာတဗ္ဗော ဓမ္မော နေဝဒဿနေန နဘာဝနာယ ပဟာတဗ္ဗဿ ဓမ္မဿ ဝိပါကပစ္စယေန ပစ္စယော – ဝိပါကော နေဝဒဿနေန နဘာဝနာယ ပဟာတဗ္ဗော ဧကော ခန္ဓော တိဏ္ဏန္နံ ခန္ဓာနံ စိတ္တသမုဋ္ဌာနာနဉ္စ ရူပါနံ ဝိပါကပစ္စယေန ပစ္စယော။ပေ။ ပဋိသန္ဓိက္ခဏေ။ပေ။ ခန္ဓာ ဝတ္ထုဿ ဝိပါကပစ္စယေန ပစ္စယော.

အာဟာရပစ္စယာဒိ

၉၁. ဒဿနေန ပဟာတဗ္ဗော ဓမ္မော ဒဿနေန ပဟာတဗ္ဗဿ ဓမ္မဿ အာဟာရပစ္စယေန ပစ္စယော (သံခိတ္တံ) ကဗဠီကာရော။ သတ္တ ပဉှာ။ ဣန္ဒြိယပစ္စယေန ပစ္စယော။ စက္ခုန္ဒြိယဉ္စ။ပေ။ ရူပဇီဝိတိန္ဒြိယဉ္စ ။ပေ။ သတ္တ ပဉှာ ဈာနပစ္စယေန ပစ္စယော။ မဂ္ဂပစ္စယေန ပစ္စယော။ သမ္ပယုတ္တပစ္စယေန ပစ္စယော.

ဝိပ္ပယုတ္တပစ္စယော

၉၂. ဒဿနေန ပဟာတဗ္ဗော ဓမ္မော ဒဿနေန ပဟာတဗ္ဗဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပစ္ဆာဇာတံ. သဟဇာတာ – ဒဿနေန ပဟာတဗ္ဗာ ခန္ဓာ စိတ္တသမုဋ္ဌာနာနံ ရူပါနံ ဝိပ္ပယုတ္တပစ္စယေန ပစ္စယော. ပစ္ဆာဇာတာ – ဒဿနေန ပဟာတဗ္ဗာ ခန္ဓာ ပုရေဇာတဿ ဣမဿ ကာယဿ ဝိပ္ပယုတ္တပစ္စယေန ပစ္စယော. (၁)

ဘာဝနာယ ပဟာတဗ္ဗော ဓမ္မော နေဝဒဿနေန နဘာဝနာယ ပဟာတဗ္ဗဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပစ္ဆာဇာတံ (ဣဒမ္ပိ ဒဿနေန သဒိသံ).

နေဝဒဿနေန နဘာဝနာယ ပဟာတဗ္ဗော ဓမ္မော နေဝဒဿနေန နဘာဝနာယ ပဟာတဗ္ဗဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ. သဟဇာတာ – နေဝဒဿနေန နဘာဝနာယ ပဟာတဗ္ဗာ ခန္ဓာ စိတ္တသမုဋ္ဌာနာနံ ရူပါနံ ဝိပ္ပယုတ္တပစ္စယေန ပစ္စယော. ပဋိသန္ဓိက္ခဏေ နေဝဒဿနေန နဘာဝနာယ ပဟာတဗ္ဗာ ခန္ဓာ ကဋတ္တာရူပါနံ ဝိပ္ပယုတ္တပစ္စယေန ပစ္စယော၊ ခန္ဓာ ဝတ္ထုဿ ဝိပ္ပယုတ္တပစ္စယေန ပစ္စယော၊ ဝတ္ထု ခန္ဓာနံ ဝိပ္ပယုတ္တပစ္စယေန ပစ္စယော. ပုရေဇာတံ – စက္ခာယတနံ စက္ခုဝိညာဏဿ။ပေ။ ကာယာယတနံ ကာယဝိညာဏဿ။ပေ။ ဝတ္ထု နေဝဒဿနေန နဘာဝနာယ ပဟာတဗ္ဗာနံ ခန္ဓာနံ ဝိပ္ပယုတ္တပစ္စယေန ပစ္စယော. ပစ္ဆာဇာတာ – နေဝဒဿနေန နဘာဝနာယ ပဟာတဗ္ဗာ ခန္ဓာ ပုရေဇာတဿ ဣမဿ ကာယဿ ဝိပ္ပယုတ္တပစ္စယေန ပစ္စယော. (၁)

နေဝဒဿနေန နဘာဝနာယ ပဟာတဗ္ဗော ဓမ္မော ဒဿနေန ပဟာတဗ္ဗဿ ဓမ္မဿ ဝိပ္ပယုတ္တပစ္စယေန ပစ္စယော – ပုရေဇာတံ ဝတ္ထု ဒဿနေန ပဟာတဗ္ဗာနံ ခန္ဓာနံ ဝိပ္ပယုတ္တပစ္စယေန ပစ္စယော. (၂)

နေဝဒဿနေန နဘာဝနာယ ပဟာတဗ္ဗော ဓမ္မော ဘာဝနာယ ပဟာတဗ္ဗဿ ဓမ္မဿ ဝိပ္ပယုတ္တပစ္စယေန ပစ္စယော – ပုရေဇာတံ ဝတ္ထု ဘာဝနာယ ပဟာတဗ္ဗာနံ ခန္ဓာနံ ဝိပ္ပယုတ္တပစ္စယေန ပစ္စယော. (၃)

အတ္ထိပစ္စယော

၉၃. ဒဿနေန ပဟာတဗ္ဗော ဓမ္မော ဒဿနေန ပဟာတဗ္ဗဿ ဓမ္မဿ အတ္ထိပစ္စယေန ပစ္စယော – ဒဿနေန ပဟာတဗ္ဗော ဧကော ခန္ဓော တိဏ္ဏန္နံ ခန္ဓာနံ အတ္ထိပစ္စယေန ပစ္စယော။ပေ။ ဒွေ ခန္ဓာ။ပေ။. (၁)

ဒဿနေန ပဟာတဗ္ဗော ဓမ္မော နေဝဒဿနေန နဘာဝနာယ ပဟာတဗ္ဗဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပစ္ဆာဇာတံ. သဟဇာတာ – ဒဿနေန ပဟာတဗ္ဗာ ခန္ဓာ စိတ္တသမုဋ္ဌာနာနံ ရူပါနံ အတ္ထိပစ္စယေန ပစ္စယော. ပစ္ဆာဇာတာ – ဒဿနေန ပဟာတဗ္ဗာ ခန္ဓာ ပုရေဇာတဿ ဣမဿ ကာယဿ အတ္ထိပစ္စယေန ပစ္စယော. (၂)

ဒဿနေန ပဟာတဗ္ဗော ဓမ္မော ဒဿနေန ပဟာတဗ္ဗဿ စ နေဝဒဿနေန နဘာဝနာယ ပဟာတဗ္ဗဿ စ ဓမ္မဿ အတ္ထိပစ္စယေန ပစ္စယော – ဒဿနေန ပဟာတဗ္ဗော ဧကော ခန္ဓော တိဏ္ဏန္နံ ခန္ဓာနံ စိတ္တသမုဋ္ဌာနာနဉ္စ ရူပါနံ။ပေ။ ဒွေ ခန္ဓာ။ပေ။. (၃)

ဘာဝနာယ ပဟာတဗ္ဗော ဓမ္မော ဘာဝနာယ ပဟာတဗ္ဗဿ။ တီဏိ (ဒဿနေန သဒိသံ ကာတဗ္ဗံ).

၉၄. နေဝဒဿနေန နဘာဝနာယ ပဟာတဗ္ဗော ဓမ္မော နေဝဒဿနေန နဘာဝနာယ ပဟာတဗ္ဗဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ၊ အာဟာရံ၊ ဣန္ဒြိယံ. သဟဇာတော – နေဝဒဿနေန နဘာဝနာယ ပဟာတဗ္ဗော ဧကော ခန္ဓော တိဏ္ဏန္နံ ခန္ဓာနံ စိတ္တသမုဋ္ဌာနာနဉ္စ ရူပါနံ အတ္ထိပစ္စယေန ပစ္စယော။ပေ။ ပဋိသန္ဓိက္ခဏေ။ပေ။ ခန္ဓာ ဝတ္ထုဿ။ပေ။ ဝတ္ထု ခန္ဓာနံ အတ္ထိပစ္စယေန ပစ္စယော၊ ဧကံ မဟာဘူတံ။ပေ။ အသညသတ္တာနံ ဧကံ မဟာဘူတံ။ပေ။. ပုရေဇာတံ – စက္ခုံ အနိစ္စတော ဒုက္ခတော အနတ္တတော ဝိပဿတိ၊ သောတံ။ပေ။ ကာယံ။ ရူပေ။ပေ။ ဖောဋ္ဌဗ္ဗေ။ ဝတ္ထုံ အနိစ္စတော ဒုက္ခတော အနတ္တတော ဝိပဿတိ၊ ဒိဗ္ဗေန စက္ခုနာ ရူပံ ပဿတိ၊ ဒိဗ္ဗာယ သောတဓာတုယာ သဒ္ဒံ သုဏာတိ၊ ရူပါယတနံ စက္ခုဝိညာဏဿ။ပေ။ ဖောဋ္ဌဗ္ဗာယတနံ ကာယဝိညာဏဿ။ပေ။ စက္ခာယတနံ စက္ခုဝိညာဏဿ။ပေ။ ကာယာယတနံ ကာယဝိညာဏဿ။ပေ။ ဝတ္ထု နေဝဒဿနေန နဘာဝနာယ ပဟာတဗ္ဗာနံ ခန္ဓာနံ အတ္ထိပစ္စယေန ပစ္စယော. ပစ္ဆာဇာတာ – နေဝဒဿနေန နဘာဝနာယ ပဟာတဗ္ဗာ ခန္ဓာ ပုရေဇာတဿ ဣမဿ ကာယဿ အတ္ထိပစ္စယေန ပစ္စယော. ကဗဠီကာရော အာဟာရော ဣမဿ ကာယဿ။ပေ။ ရူပဇီဝိတိန္ဒြိယံ ကဋတ္တာရူပါနံ အတ္ထိပစ္စယေန ပစ္စယော. (၁)

နေဝဒဿနေန နဘာဝနာယ ပဟာတဗ္ဗော ဓမ္မော ဒဿနေန ပဟာတဗ္ဗဿ ဓမ္မဿ အတ္ထိပစ္စယေန ပစ္စယော – ပုရေဇာတံ စက္ခုံ အဿာဒေတိ အဘိနန္ဒတိ၊ တံ အာရဗ္ဘ ဒဿနေန ပဟာတဗ္ဗော ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ၊ ဝိစိကိစ္ဆာ ဥပ္ပဇ္ဇတိ၊ ဒဿနေန ပဟာတဗ္ဗံ ဒေါမနဿံ ဥပ္ပဇ္ဇတိ၊ သောတံ။ပေ။ ဝတ္ထုံ အဿာဒေတိ။ပေ။ ဝတ္ထု ဒဿနေန ပဟာတဗ္ဗာနံ ခန္ဓာနံ အတ္ထိပစ္စယေန ပစ္စယော. (၂)

နေဝဒဿနေန နဘာဝနာယ ပဟာတဗ္ဗော ဓမ္မော ဘာဝနာယ ပဟာတဗ္ဗဿ ဓမ္မဿ အတ္ထိပစ္စယေန ပစ္စယော – ပုရေဇာတံ စက္ခုံ အဿာဒေတိ အဘိနန္ဒတိ၊ တံ အာရဗ္ဘ ဘာဝနာယ ပဟာတဗ္ဗော ရာဂေါ ဥပ္ပဇ္ဇတိ၊ ဥဒ္ဓစ္စံ ဥပ္ပဇ္ဇတိ၊ ဘာဝနာယ ပဟာတဗ္ဗံ ဒေါမနဿံ ဥပ္ပဇ္ဇတိ၊ သောတံ။ပေ။ ဝတ္ထုံ အဿာဒေတိ အဘိနန္ဒတိ။ပေ။ ဝတ္ထု ဘာဝနာယ ပဟာတဗ္ဗာနံ ခန္ဓာနံ အတ္ထိပစ္စယေန ပစ္စယော. (၃)

၉၅. ဒဿနေန ပဟာတဗ္ဗော စ နေဝဒဿနေန နဘာဝနာယ ပဟာတဗ္ဗော စ ဓမ္မာ ဒဿနေန ပဟာတဗ္ဗဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ. သဟဇာတော – ဒဿနေန ပဟာတဗ္ဗော ဧကော ခန္ဓော စ ဝတ္ထု စ တိဏ္ဏန္နံ ခန္ဓာနံ အတ္ထိပစ္စယေန ပစ္စယော။ပေ။ ဒွေ ခန္ဓာ စ ဝတ္ထု စ။ပေ။. (၁)

ဒဿနေန ပဟာတဗ္ဗော စ နေဝဒဿနေန နဘာဝနာယ ပဟာတဗ္ဗော စ ဓမ္မာ နေဝဒဿနေန နဘာဝနာယ ပဟာတဗ္ဗဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပစ္ဆာဇာတံ၊ အာဟာရံ၊ ဣန္ဒြိယံ. သဟဇာတာ – ဒဿနေန ပဟာတဗ္ဗာ ခန္ဓာ စ မဟာဘူတာ စ စိတ္တသမုဋ္ဌာနာနံ ရူပါနံ အတ္ထိပစ္စယေန ပစ္စယော. ပစ္ဆာဇာတာ – ဒဿနေန ပဟာတဗ္ဗာ ခန္ဓာ စ ကဗဠီကာရော အာဟာရော စ ဣမဿ ကာယဿ အတ္ထိပစ္စယေန ပစ္စယော. ပစ္ဆာဇာတာ – ဒဿနေန ပဟာတဗ္ဗာ ခန္ဓာ စ ရူပဇီဝိတိန္ဒြိယဉ္စ ကဋတ္တာရူပါနံ အတ္ထိပစ္စယေန ပစ္စယော. (၂)

ဘာဝနာယ ပဟာတဗ္ဗော စ နေဝဒဿနေန နဘာဝနာယ ပဟာတဗ္ဗော စ ဓမ္မာ ဘာဝနာယ ပဟာတဗ္ဗဿ။ပေ။ (ဒွေ ပဉှာ ကာတဗ္ဗာ).

နတ္ထိဝိဂတာဝိဂတပစ္စယာ

၉၆. ဒဿနေန ပဟာတဗ္ဗော ဓမ္မော ဒဿနေန ပဟာတဗ္ဗဿ ဓမ္မဿ နတ္ထိပစ္စယေန ပစ္စယော။ ဝိဂတပစ္စယေန ပစ္စယော။ အဝိဂတပစ္စယေန ပစ္စယော.