၈. ဒဿနေနပဟာတဗ္ဗတ္တိကံ

၁. ပဋိစ္စဝါရော

၁. ပစ္စယာနုလောမံ

၁. ဝိဘင်္ဂဝါရော

ဟေတုပစ္စယော

၁. ဒဿနေန ပဟာတဗ္ဗံ ဓမ္မံ ပဋိစ္စ ဒဿနေန ပဟာတဗ္ဗော ဓမ္မော ဥပ္ပဇ္ဇတိ ဟေတုပစ္စယာ – ဒဿနေန ပဟာတဗ္ဗံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓေ ပဋိစ္စ ဒွေ ခန္ဓာ. (၁)

ဒဿနေန ပဟာတဗ္ဗံ ဓမ္မံ ပဋိစ္စ နေဝဒဿနေန နဘာဝနာယ ပဟာတဗ္ဗော ဓမ္မော ဥပ္ပဇ္ဇတိ ဟေတုပစ္စယာ – ဒဿနေန ပဟာတဗ္ဗေ ခန္ဓေ ပဋိစ္စ စိတ္တသမုဋ္ဌာနံ ရူပံ. (၂)

ဒဿနေန ပဟာတဗ္ဗံ ဓမ္မံ ပဋိစ္စ ဒဿနေန ပဟာတဗ္ဗော စ နေဝဒဿနေန နဘာဝနာယ ပဟာတဗ္ဗော စ ဓမ္မာ ဥပ္ပဇ္ဇန္တိ ဟေတုပစ္စယာ – ဒဿနေန ပဟာတဗ္ဗံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ ပဋိစ္စ ဒွေ ခန္ဓာ စိတ္တသမုဋ္ဌာနဉ္စ ရူပံ. (၃)

၂. ဘာဝနာယ ပဟာတဗ္ဗံ ဓမ္မံ ပဋိစ္စ ဘာဝနာယ ပဟာတဗ္ဗော ဓမ္မော ဥပ္ပဇ္ဇတိ ဟေတုပစ္စယာ – ဘာဝနာယ ပဟာတဗ္ဗံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓေ ပဋိစ္စ ဒွေ ခန္ဓာ. (၁)

ဘာဝနာယ ပဟာတဗ္ဗံ ဓမ္မံ ပဋိစ္စ နေဝဒဿနေန နဘာဝနာယ ပဟာတဗ္ဗော ဓမ္မော ဥပ္ပဇ္ဇတိ ဟေတုပစ္စယာ – ဘာဝနာယ ပဟာတဗ္ဗေ ခန္ဓေ ပဋိစ္စ စိတ္တသမုဋ္ဌာနံ ရူပံ. (၂)

ဘာဝနာယ ပဟာတဗ္ဗံ ဓမ္မံ ပဋိစ္စ ဘာဝနာယ ပဟာတဗ္ဗော စ နေဝဒဿနေန နဘာဝနာယ ပဟာတဗ္ဗော စ ဓမ္မာ ဥပ္ပဇ္ဇန္တိ ဟေတုပစ္စယာ – ဘာဝနာယ ပဟာတဗ္ဗံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ ပဋိစ္စ ဒွေ ခန္ဓာ စိတ္တသမုဋ္ဌာနဉ္စ ရူပံ. (၃)

၃. နေဝဒဿနေန နဘာဝနာယ ပဟာတဗ္ဗံ ဓမ္မံ ပဋိစ္စ နေဝဒဿနေန နဘာဝနာယ ပဟာတဗ္ဗော ဓမ္မော ဥပ္ပဇ္ဇတိ ဟေတုပစ္စယာ – နေဝဒဿနေန နဘာဝနာယ ပဟာတဗ္ဗံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ ပဋိစ္စ ဒွေ ခန္ဓာ စိတ္တသမုဋ္ဌာနဉ္စ ရူပံ. ပဋိသန္ဓိက္ခဏေ နေဝဒဿနေန နဘာဝနာယ ပဟာတဗ္ဗံ ဧကံ ခန္ဓံ ပဋိစ္စ တယော ခန္ဓာ ကဋတ္တာ စ ရူပံ။ပေ။ ဒွေ ခန္ဓေ ပဋိစ္စ ဒွေ ခန္ဓာ ကဋတ္တာ စ ရူပံ၊ ခန္ဓေ ပဋိစ္စ ဝတ္ထု၊ ဝတ္ထုံ ပဋိစ္စ ခန္ဓာ၊ ဧကံ မဟာဘူတံ ပဋိစ္စ တယော မဟာဘူတာ။ပေ။ ဒွေ မဟာဘူတေ ပဋိစ္စ ဒွေ မဟာဘူတာ၊ မဟာဘူတေ ပဋိစ္စ စိတ္တသမုဋ္ဌာနံ ရူပံ ကဋတ္တာရူပံ ဥပါဒါရူပံ. (၁)

၄. ဒဿနေန ပဟာတဗ္ဗဉ္စ နေဝဒဿနေန နဘာဝနာယ ပဟာတဗ္ဗဉ္စ ဓမ္မံ ပဋိစ္စ နေဝဒဿနေန နဘာဝနာယ ပဟာတဗ္ဗော ဓမ္မော ဥပ္ပဇ္ဇတိ ဟေတုပစ္စယာ – ဒဿနေန ပဟာတဗ္ဗေ ခန္ဓေ စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ. (၁)

ဘာဝနာယ ပဟာတဗ္ဗဉ္စ နေဝဒဿနေန နဘာဝနာယ ပဟာတဗ္ဗဉ္စ ဓမ္မံ ပဋိစ္စ နေဝဒဿနေန နဘာဝနာယ ပဟာတဗ္ဗော ဓမ္မော ဥပ္ပဇ္ဇတိ ဟေတုပစ္စယာ – ဘာဝနာယ ပဟာတဗ္ဗေ ခန္ဓေ စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ. (၁)

အာရမ္မဏပစ္စယော

၅. ဒဿနေန ပဟာတဗ္ဗံ ဓမ္မံ ပဋိစ္စ ဒဿနေန ပဟာတဗ္ဗော ဓမ္မော ဥပ္ပဇ္ဇတိ အာရမ္မဏပစ္စယာ – ဒဿနေန ပဟာတဗ္ဗံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓေ ပဋိစ္စ ဒွေ ခန္ဓာ. (၁)

ဘာဝနာယ ပဟာတဗ္ဗံ ဓမ္မံ ပဋိစ္စ ဘာဝနာယ ပဟာတဗ္ဗော ဓမ္မော ဥပ္ပဇ္ဇတိ အာရမ္မဏပစ္စယာ – ဘာဝနာယ ပဟာတဗ္ဗံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓေ ပဋိစ္စ ဒွေ ခန္ဓာ. (၁)

နေဝဒဿနေန နဘာဝနာယ ပဟာတဗ္ဗံ ဓမ္မံ ပဋိစ္စ နေဝဒဿနေန နဘာဝနာယ ပဟာတဗ္ဗော ဓမ္မော ဥပ္ပဇ္ဇတိ အာရမ္မဏပစ္စယာ – နေဝဒဿနေန နဘာဝနာယ ပဟာတဗ္ဗံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓေ ပဋိစ္စ ဒွေ ခန္ဓာ. ပဋိသန္ဓိက္ခဏေ နေဝဒဿနေန နဘာဝနာယ ပဟာတဗ္ဗံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓေ ပဋိစ္စ ဒွေ ခန္ဓာ. ဝတ္ထုံ ပဋိစ္စ ခန္ဓာ. (၁)

အဓိပတိပစ္စယော

၆. ဒဿနေန ပဟာတဗ္ဗံ ဓမ္မံ ပဋိစ္စ ဒဿနေန ပဟာတဗ္ဗော ဓမ္မော ဥပ္ပဇ္ဇတိ အဓိပတိပစ္စယာ။ တီဏိ.

ဘာဝနာယ ပဟာတဗ္ဗံ ဓမ္မံ ပဋိစ္စ ဘာဝနာယ ပဟာတဗ္ဗော ဓမ္မော ဥပ္ပဇ္ဇတိ အဓိပတိပစ္စယာ။ တီဏိ.

နေဝဒဿနေန နဘာဝနာယ ပဟာတဗ္ဗံ ဓမ္မံ ပဋိစ္စ နေဝဒဿနေန နဘာဝနာယ ပဟာတဗ္ဗော ဓမ္မော ဥပ္ပဇ္ဇတိ အဓိပတိပစ္စယာ – နေဝဒဿနေန နဘာဝနာယ ပဟာတဗ္ဗံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ ပဋိစ္စ ဒွေ ခန္ဓာ စိတ္တသမုဋ္ဌာနဉ္စ ရူပံ၊ ဧကံ မဟာဘူတံ ပဋိစ္စ တယော မဟာဘူတာ။ပေ။ ဒွေ မဟာဘူတေ ပဋိစ္စ ဒွေ မဟာဘူတာ၊ မဟာဘူတေ ပဋိစ္စ စိတ္တသမုဋ္ဌာနံ ရူပံ ဥပါဒါရူပံ. (၁)

၇. ဒဿနေန ပဟာတဗ္ဗဉ္စ နေဝဒဿနေန နဘာဝနာယ ပဟာတဗ္ဗဉ္စ ဓမ္မံ ပဋိစ္စ နေဝဒဿနေန နဘာဝနာယ ပဟာတဗ္ဗော ဓမ္မော ဥပ္ပဇ္ဇတိ အဓိပတိပစ္စယာ – ဒဿနေန ပဟာတဗ္ဗေ ခန္ဓေ စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ. (၁)

ဘာဝနာယ ပဟာတဗ္ဗဉ္စ နေဝဒဿနေန နဘာဝနာယ ပဟာတဗ္ဗဉ္စ ဓမ္မံ ပဋိစ္စ နေဝဒဿနေန နဘာဝနာယ ပဟာတဗ္ဗော ဓမ္မော ဥပ္ပဇ္ဇတိ အဓိပတိပစ္စယာ – ဘာဝနာယ ပဟာတဗ္ဗေ ခန္ဓေ စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ. (၁)

အနန္တရ-သမနန္တရပစ္စယာ

၈. ဒဿနေန ပဟာတဗ္ဗံ ဓမ္မံ ပဋိစ္စ ဒဿနေန ပဟာတဗ္ဗော ဓမ္မော ဥပ္ပဇ္ဇတိ အနန္တရပစ္စယာ။ သမနန္တရပစ္စယာ (အာရမ္မဏသဒိသံ).

သဟဇာတပစ္စယော

၉. ဒဿနေန ပဟာတဗ္ဗံ ဓမ္မံ ပဋိစ္စ ဒဿနေန ပဟာတဗ္ဗော ဓမ္မော ဥပ္ပဇ္ဇတိ သဟဇာတပစ္စယာ။ တီဏိ.

ဘာဝနာယ ပဟာတဗ္ဗံ ဓမ္မံ ပဋိစ္စ ဘာဝနာယ ပဟာတဗ္ဗော ဓမ္မော ဥပ္ပဇ္ဇတိ သဟဇာတပစ္စယာ။ တီဏိ.

နေဝဒဿနေန နဘာဝနာယ ပဟာတဗ္ဗံ ဓမ္မံ ပဋိစ္စ နေဝဒဿနေန နဘာဝနာယ ပဟာတဗ္ဗော ဓမ္မော ဥပ္ပဇ္ဇတိ သဟဇာတပစ္စယာ။ပေ။ ဧကံ မဟာဘူတံ ပဋိစ္စ။ပေ။ ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ။ အသညသတ္တာနံ ဧကံ မဟာဘူတံ။ပေ။. (၁)

၁၀. ဒဿနေန ပဟာတဗ္ဗဉ္စ နေဝဒဿနေန နဘာဝနာယ ပဟာတဗ္ဗဉ္စ ဓမ္မံ ပဋိစ္စ နေဝဒဿနေန နဘာဝနာယ ပဟာတဗ္ဗော ဓမ္မော ဥပ္ပဇ္ဇတိ သဟဇာတပစ္စယာ – ဒဿနေန ပဟာတဗ္ဗေ ခန္ဓေ စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ.

ဘာဝနာယ ပဟာတဗ္ဗဉ္စ နေဝဒဿနေန နဘာဝနာယ ပဟာတဗ္ဗဉ္စ ဓမ္မံ ပဋိစ္စ နေဝဒဿနေန နဘာဝနာယ ပဟာတဗ္ဗော ဓမ္မော ဥပ္ပဇ္ဇတိ သဟဇာတပစ္စယာ – ဘာဝနာယ ပဟာတဗ္ဗေ ခန္ဓေ စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ. (၁)

အညမညပစ္စယော

၁၁. ဒဿနေန ပဟာတဗ္ဗံ ဓမ္မံ ပဋိစ္စ ဒဿနေန ပဟာတဗ္ဗော ဓမ္မော ဥပ္ပဇ္ဇတိ အညမညပစ္စယာ။ ဧကံ.

ဘာဝနာယ ပဟာတဗ္ဗံ ဓမ္မံ ပဋိစ္စ ဘာဝနာယ ပဟာတဗ္ဗော ဓမ္မော ဥပ္ပဇ္ဇတိ သဟဇာတပစ္စယာ။ ဧကံ.

နေဝဒဿနေန နဘာဝနာယ ပဟာတဗ္ဗံ ဓမ္မံ ပဋိစ္စ နေဝဒဿနေန နဘာဝနာယ ပဟာတဗ္ဗော ဓမ္မော ဥပ္ပဇ္ဇတိ အညမညပစ္စယာ – နေဝဒဿနေန နဘာဝနာယ ပဟာတဗ္ဗံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓေ ပဋိစ္စ ဒွေ ခန္ဓာ. ပဋိသန္ဓိက္ခဏေ နေဝဒဿနေန နဘာဝနာယ ပဟာတဗ္ဗံ ဧကံ ခန္ဓံ ပဋိစ္စ တယော ခန္ဓာ ဝတ္ထု စ။ပေ။ ဒွေ ခန္ဓေ ပဋိစ္စ ဒွေ ခန္ဓာ ဝတ္ထု စ၊ ခန္ဓေ ပဋိစ္စ ဝတ္ထု၊ ဝတ္ထုံ ပဋိစ္စ ခန္ဓာ၊ ဧကံ မဟာဘူတံ ပဋိစ္စ တယော မဟာဘူတာ။ပေ။ ဒွေ မဟာဘူတေ ပဋိစ္စ ဒွေ မဟာဘူတာ၊ ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ။ အသညသတ္တာနံ။ပေ။ ဒွေ မဟာဘူတေ ပဋိစ္စ ဒွေ မဟာဘူတာ.

နိဿယပစ္စယာဒိ

၁၂. ဒဿနေန ပဟာတဗ္ဗံ ဓမ္မံ ပဋိစ္စ ဒဿနေန ပဟာတဗ္ဗော ဓမ္မော ဥပ္ပဇ္ဇတိ နိဿယပစ္စယာ။ (ဟေတုပစ္စယသဒိသံ) ဥပနိဿယပစ္စယာ။ တီဏိ။ ပုရေဇာတပစ္စယာ။ တီဏိ (ပဋိသန္ဓိ နတ္ထိ)။ အာသေဝနပစ္စယာ။ (ဝိပါကပဋိသန္ဓိ နတ္ထိ) ကမ္မပစ္စယာ (ပရိပုဏ္ဏံ. အဇ္ဈတ္တိကာ စ အသညသတ္တာနဉ္စ မဟာဘူတာ).

ဝိပါကပစ္စယော

၁၃. နေဝဒဿနေန နဘာဝနာယ ပဟာတဗ္ဗံ ဓမ္မံ ပဋိစ္စ နေဝဒဿနေန နဘာဝနာယ ပဟာတဗ္ဗော ဓမ္မော ဥပ္ပဇ္ဇတိ ဝိပါကပစ္စယာ – ဝိပါကံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ပဋိသန္ဓိက္ခဏေ။ပေ။ ခန္ဓေ ပဋိစ္စ ဝတ္ထု၊ ဝတ္ထုံ ပဋိစ္စ ခန္ဓာ၊ ဧကံ မဟာဘူတံ။ပေ။ မဟာဘူတေ ပဋိစ္စ စိတ္တသမုဋ္ဌာနံ ရူပံ ကဋတ္တာရူပံ ဥပါဒါရူပံ. (၁)

အာဟာရပစ္စယာဒိ

၁၄. ဒဿနေန ပဟာတဗ္ဗံ ဓမ္မံ ပဋိစ္စ ဒဿနေန ပဟာတဗ္ဗော ဓမ္မော ဥပ္ပဇ္ဇတိ အာဟာရပစ္စယာ (ပရိပုဏ္ဏံ၊ အဇ္ဈတ္တိကာ မဟာဘူတာ စ အာဟာရသမုဋ္ဌာနဉ္စ)။ ဣန္ဒြိယပစ္စယာ (ကမ္မပစ္စယသဒိသံ)။ ဈာနပစ္စယာ။ မဂ္ဂပစ္စယာ (ဟေတုပစ္စယသဒိသံ)။ သမ္ပယုတ္တပစ္စယာ (အာရမ္မဏပစ္စယသဒိသံ)။ ဝိပ္ပယုတ္တပစ္စယာ (ကုသလတ္တိကေ ဝိပ္ပယုတ္တပစ္စယသဒိသံ)။ အတ္ထိပစ္စယာ (သဟဇာတပစ္စယသဒိသံ)။ နတ္ထိပစ္စယာ။ ဝိဂတပစ္စယာ။ အဝိဂတပစ္စယာ.

၁. ပစ္စယာနုလောမံ

၂. သင်္ချာဝါရော

သုဒ္ဓံ

၁၅. ဟေတုယာ နဝ၊ အာရမ္မဏေ တီဏိ၊ အဓိပတိယာ နဝ၊ အနန္တရေ တီဏိ၊ သမနန္တရေ တီဏိ၊ သဟဇာတေ နဝ၊ အညမညေ တီဏိ၊ နိဿယေ နဝ၊ ဥပနိဿယေ တီဏိ၊ ပုရေဇာတေ တီဏိ၊ အာသေဝနေ တီဏိ၊ ကမ္မေ နဝ၊ ဝိပါကေ ဧကံ၊ အာဟာရေ နဝ၊ ဣန္ဒြိယေ နဝ၊ ဈာနေ နဝ၊ မဂ္ဂေ နဝ၊ သမ္ပယုတ္တေ တီဏိ၊ ဝိပ္ပယုတ္တေ နဝ၊ အတ္ထိယာ နဝ၊ နတ္ထိယာ တီဏိ၊ ဝိဂတေ တီဏိ၊ အဝိဂတေ နဝ (ဣမာနိ ပဒါနိ အနုမဇ္ဇန္တေန အနုလောမံ ဂဏေတဗ္ဗံ).

အနုလောမံ.

၂. ပစ္စယပစ္စနီယံ

၁. ဝိဘင်္ဂဝါရော

နဟေတုပစ္စယော

၁၆. ဒဿနေန ပဟာတဗ္ဗံ ဓမ္မံ ပဋိစ္စ ဒဿနေန ပဟာတဗ္ဗော ဓမ္မော ဥပ္ပဇ္ဇတိ နဟေတုပစ္စယာ – ဝိစိကိစ္ဆာသဟဂတေ ခန္ဓေ ပဋိစ္စ ဝိစိကိစ္ဆာသဟဂတော မောဟော. (၁)

ဘာဝနာယ ပဟာတဗ္ဗံ ဓမ္မံ ပဋိစ္စ ဘာဝနာယ ပဟာတဗ္ဗော ဓမ္မော ဥပ္ပဇ္ဇတိ နဟေတုပစ္စယာ – ဥဒ္ဓစ္စသဟဂတေ ခန္ဓေ ပဋိစ္စ ဥဒ္ဓစ္စသဟဂတော မောဟော. (၁)

နေဝဒဿနေန နဘာဝနာယ ပဟာတဗ္ဗံ ဓမ္မံ ပဋိစ္စ နေဝဒဿနေန နဘာဝနာယ ပဟာတဗ္ဗော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ နေဝဒဿနေန နဘာဝနာယ ပဟာတဗ္ဗံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ ပဋိစ္စ။ပေ။ အဟေတုကပဋိသန္ဓိက္ခဏေ နေဝဒဿနေန နဘာဝနာယ ပဟာတဗ္ဗံ ဧကံ ခန္ဓံ ပဋိစ္စ တယော ခန္ဓာ ကဋတ္တာ စ ရူပံ။ပေ။ ဒွေ ခန္ဓေ ပဋိစ္စ ဒွေ ခန္ဓာ။ပေ။ ခန္ဓေ ပဋိစ္စ ဝတ္ထု၊ ဝတ္ထုံ ပဋိစ္စ ခန္ဓာ၊ ဧကံ မဟာဘူတံ ပဋိစ္စ တယော မဟာဘူတာ။ပေ။ မဟာဘူတေ ပဋိစ္စ စိတ္တသမုဋ္ဌာနံ ရူပံ ကဋတ္တာရူပံ ဥပါဒါရူပံ၊ ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ။ အသညသတ္တာနံ ဧကံ မဟာဘူတံ ပဋိစ္စ တယော မဟာဘူတာ။ပေ။ မဟာဘူတေ ပဋိစ္စ ကဋတ္တာရူပံ ဥပါဒါရူပံ. (၁)

နအာရမ္မဏပစ္စယော

၁၇. ဒဿနေန ပဟာတဗ္ဗံ ဓမ္မံ ပဋိစ္စ နေဝဒဿနေန နဘာဝနာယ ပဟာတဗ္ဗော ဓမ္မော ဥပ္ပဇ္ဇတိ နအာရမ္မဏပစ္စယာ – ဒဿနေန ပဟာတဗ္ဗေ ခန္ဓေ ပဋိစ္စ စိတ္တသမုဋ္ဌာနံ ရူပံ. (၁)

ဘာဝနာယ ပဟာတဗ္ဗံ ဓမ္မံ ပဋိစ္စ နေဝဒဿနေန နဘာဝနာယ ပဟာတဗ္ဗော ဓမ္မော ဥပ္ပဇ္ဇတိ နအာရမ္မဏပစ္စယာ – ဘာဝနာယ ပဟာတဗ္ဗေ ခန္ဓေ ပဋိစ္စ စိတ္တသမုဋ္ဌာနံ ရူပံ. (၁)

နေဝဒဿနေန နဘာဝနာယ ပဟာတဗ္ဗံ ဓမ္မံ ပဋိစ္စ နေဝဒဿနေန နဘာဝနာယ ပဟာတဗ္ဗော ဓမ္မော ဥပ္ပဇ္ဇတိ နအာရမ္မဏပစ္စယာ – နေဝဒဿနေန နဘာဝနာယ ပဟာတဗ္ဗေ ခန္ဓေ ပဋိစ္စ စိတ္တသမုဋ္ဌာနံ ရူပံ. ပဋိသန္ဓိက္ခဏေ နေဝဒဿနေန နဘာဝနာယ ပဟာတဗ္ဗေ ခန္ဓေ ပဋိစ္စ ကဋတ္တာရူပံ၊ ခန္ဓေ ပဋိစ္စ ဝတ္ထု၊ ဧကံ မဟာဘူတံ။ပေ။ ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ။ အသညသတ္တာနံ ဧကံ မဟာဘူတံ။ပေ။. (၁)

၁၈. ဒဿနေန ပဟာတဗ္ဗဉ္စ နေဝဒဿနေန နဘာဝနာယ ပဟာတဗ္ဗဉ္စ ဓမ္မံ ပဋိစ္စ နေဝဒဿနေန နဘာဝနာယ ပဟာတဗ္ဗော ဓမ္မော ဥပ္ပဇ္ဇတိ နအာရမ္မဏပစ္စယာ – ဒဿနေန ပဟာတဗ္ဗေ ခန္ဓေ စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ. (၁)

ဘာဝနာယ ပဟာတဗ္ဗဉ္စ နေဝဒဿနေန နဘာဝနာယ ပဟာတဗ္ဗဉ္စ ဓမ္မံ ပဋိစ္စ နေဝဒဿနေန နဘာဝနာယ ပဟာတဗ္ဗော ဓမ္မော ဥပ္ပဇ္ဇတိ နအာရမ္မဏပစ္စယာ – ဘာဝနာယ ပဟာတဗ္ဗေ ခန္ဓေ စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ. (၁)

နအဓိပတိပစ္စယာဒိ

၁၉. ဒဿနေန ပဟာတဗ္ဗံ ဓမ္မံ ပဋိစ္စ ဒဿနေန ပဟာတဗ္ဗော ဓမ္မော ဥပ္ပဇ္ဇတိ နအဓိပတိပစ္စယာ။ (ပရိပုဏ္ဏံ ဟေတုပစ္စယသဒိသံ) နအနန္တရပစ္စယာ။ နသမနန္တရပစ္စယာ။ နအညမညပစ္စယာ။ နဥပနိဿယပစ္စယာ.

နပုရေဇာတပစ္စယော

၂၀. ဒဿနေန ပဟာတဗ္ဗံ ဓမ္မံ ပဋိစ္စ ဒဿနေန ပဟာတဗ္ဗော ဓမ္မော ဥပ္ပဇ္ဇတိ နပုရေဇာတပစ္စယာ – အရူပေ ဒဿနေန ပဟာတဗ္ဗံ ဧကံ ခန္ဓံ ပဋိစ္စ တယော ခန္ဓာ။ပေ။. (၁)

ဒဿနေန ပဟာတဗ္ဗံ ဓမ္မံ ပဋိစ္စ နေဝဒဿနေန နဘာဝနာယ ပဟာတဗ္ဗော ဓမ္မော ဥပ္ပဇ္ဇတိ နပုရေဇာတပစ္စယာ – ဒဿနေန ပဟာတဗ္ဗေ ခန္ဓေ ပဋိစ္စ စိတ္တသမုဋ္ဌာနံ ရူပံ. (၂)

ဘာဝနာယ ပဟာတဗ္ဗံ ဓမ္မံ ပဋိစ္စ ဘာဝနာယ ပဟာတဗ္ဗော။ပေ။ အရူပေ ဘာဝနာယ ပဟာတဗ္ဗံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓေ ပဋိစ္စ ဒွေ ခန္ဓာ. (၁)

ဘာဝနာယ ပဟာတဗ္ဗံ ဓမ္မံ ပဋိစ္စ နေဝဒဿနေန နဘာဝနာယ ပဟာတဗ္ဗော။ပေ။ ဘာဝနာယ ပဟာတဗ္ဗေ ခန္ဓေ ပဋိစ္စ စိတ္တသမုဋ္ဌာနံ ရူပံ. (၂)

၂၁. နေဝဒဿနေန နဘာဝနာယ ပဟာတဗ္ဗံ ဓမ္မံ ပဋိစ္စ နေဝဒဿနေန နဘာဝနာယ ပဟာတဗ္ဗော ဓမ္မော ဥပ္ပဇ္ဇတိ နပုရေဇာတပစ္စယာ – အရူပေ နေဝဒဿနေန နဘာဝနာယ ပဟာတဗ္ဗံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓေ ပဋိစ္စ ဒွေ ခန္ဓာ၊ နေဝဒဿနေန နဘာဝနာယ ပဟာတဗ္ဗေ ခန္ဓေ ပဋိစ္စ စိတ္တသမုဋ္ဌာနံ ရူပံ. ပဋိသန္ဓိက္ခဏေ နေဝဒဿနေန နဘာဝနာယ ပဟာတဗ္ဗံ ဧကံ ခန္ဓံ ပဋိစ္စ တယော ခန္ဓာ ကဋတ္တာ စ ရူပံ။ပေ။ ဒွေ ခန္ဓေ ပဋိစ္စ ဒွေ ခန္ဓာ ကဋတ္တာ စ ရူပံ၊ ခန္ဓေ ပဋိစ္စ ဝတ္ထု၊ ဝတ္ထုံ ပဋိစ္စ ခန္ဓာ၊ ဧကံ မဟာဘူတံ ပဋိစ္စ တယော မဟာဘူတာ။ပေ။ ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ။ အသညသတ္တာနံ ဧကံ မဟာဘူတံ။ပေ။. (၁)

ဒဿနေန ပဟာတဗ္ဗဉ္စ နေဝဒဿနေန နဘာဝနာယ ပဟာတဗ္ဗဉ္စ ဓမ္မံ ပဋိစ္စ နေဝဒဿနေန နဘာဝနာယ ပဟာတဗ္ဗော ဓမ္မော။ပေ။ ဒဿနေန ပဟာတဗ္ဗေ ခန္ဓေ စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ. (၁)

ဘာဝနာယ ပဟာတဗ္ဗဉ္စ နေဝဒဿနေန နဘာဝနာယ ပဟာတဗ္ဗဉ္စ ဓမ္မံ ပဋိစ္စ နေဝဒဿနေန နဘာဝနာယ ပဟာတဗ္ဗော ဓမ္မော ဥပ္ပဇ္ဇတိ နပုရေဇာတပစ္စယာ – ဘာဝနာယ ပဟာတဗ္ဗေ ခန္ဓေ စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ. (၁)

နပစ္ဆာဇာတပစ္စယာဒိ

၂၂. ဒဿနေန ပဟာတဗ္ဗံ ဓမ္မံ ပဋိစ္စ ဒဿနေန ပဟာတဗ္ဗော ဓမ္မော ဥပ္ပဇ္ဇတိ နပစ္ဆာဇာတပစ္စယာ။ နအာသေဝနပစ္စယာ.

နကမ္မပစ္စယော

၂၃. ဒဿနေန ပဟာတဗ္ဗံ ဓမ္မံ ပဋိစ္စ ဒဿနေန ပဟာတဗ္ဗော ဓမ္မော ဥပ္ပဇ္ဇတိ နကမ္မပစ္စယာ – ဒဿနေန ပဟာတဗ္ဗေ ခန္ဓေ ပဋိစ္စ ဒဿနေန ပဟာတဗ္ဗာ စေတနာ. (၁)

ဘာဝနာယ ပဟာတဗ္ဗံ ဓမ္မံ ပဋိစ္စ ဘာဝနာယ ပဟာတဗ္ဗော ဓမ္မော ဥပ္ပဇ္ဇတိ နကမ္မပစ္စယာ – ဘာဝနာယ ပဟာတဗ္ဗေ ခန္ဓေ ပဋိစ္စ ဘာဝနာယ ပဟာတဗ္ဗာ စေတနာ. (၁)

နေဝဒဿနေန နဘာဝနာယ ပဟာတဗ္ဗံ ဓမ္မံ ပဋိစ္စ နေဝဒဿနေန နဘာဝနာယ ပဟာတဗ္ဗော ဓမ္မော ဥပ္ပဇ္ဇတိ နကမ္မပစ္စယာ – နေဝဒဿနေန နဘာဝနာယ ပဟာတဗ္ဗေ ခန္ဓေ ပဋိစ္စ နေဝဒဿနေန နဘာဝနာယ ပဟာတဗ္ဗာ စေတနာ၊ ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ။ အသညသတ္တာနံ ဧကံ မဟာဘူတံ။ပေ။. (၁)

နဝိပါကပစ္စယော

၂၄. ဒဿနေန ပဟာတဗ္ဗံ ဓမ္မံ ပဋိစ္စ ဒဿနေန ပဟာတဗ္ဗော ဓမ္မော ဥပ္ပဇ္ဇတိ နဝိပါကပစ္စယာ (နအဓိပတိပစ္စယသဒိသံ၊ ပဋိသန္ဓိ နတ္ထိ).

နအာဟာရပစ္စယော

၂၅. နေဝဒဿနေန နဘာဝနာယ ပဟာတဗ္ဗံ ဓမ္မံ ပဋိစ္စ နေဝဒဿနေန နဘာဝနာယ ပဟာတဗ္ဗော ဓမ္မော ဥပ္ပဇ္ဇတိ နအာဟာရပစ္စယာ – ဗာဟိရံ။ ဥတုသမုဋ္ဌာနံ။ အသညသတ္တာနံ ဧကံ မဟာဘူတံ။ပေ။.

နဣန္ဒြိယပစ္စယော

၂၆. နေဝဒဿနေန နဘာဝနာယ ပဟာတဗ္ဗံ။ပေ။ နဣန္ဒြိယပစ္စယာ – ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာန။ ဧကံ မဟာဘူတံ။ပေ။ အသညသတ္တာနံ မဟာဘူတေ ပဋိစ္စ ရူပဇီဝိတိန္ဒြိယံ.

နဈာနပစ္စယော

၂၇. နေဝဒဿနေန နဘာဝနာယ ပဟာတဗ္ဗံ ဓမ္မံ။ပေ။ နဈာနပစ္စယာ – ပဉ္စဝိညာဏသဟဂတံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓေ။ပေ။ ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ။ အသညသတ္တာနံ ဧကံ မဟာဘူတံ။ပေ။. ဥတုသမုဋ္ဌာနံ၊ အသညသတ္တာနံ ဧကံ မဟာဘူတံ။ပေ။.

နမဂ္ဂပစ္စယော

၂၈. နေဝဒဿနေန နဘာဝနာယ ပဟာတဗ္ဗံ။ပေ။ နမဂ္ဂပစ္စယာ – အဟေတုကံ နေဝဒဿနေန နဘာဝနာယ ပဟာတဗ္ဗံ။ပေ။ အဟေတုကပဋိသန္ဓိက္ခဏေ။ပေ။ ဧကံ မဟာဘူတံ။ပေ။ ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ။ အသညသတ္တာနံ ဧကံ မဟာဘူတံ။ပေ။.

နသမ္ပယုတ္တပစ္စယော

၂၉. ဒဿနေန ပဟာတဗ္ဗံ ဓမ္မံ ပဋိစ္စ နေဝဒဿနေန နဘာဝနာယ ပဟာတဗ္ဗော ဓမ္မော ဥပ္ပဇ္ဇတိ နသမ္ပယုတ္တပစ္စယာ (နအာရမ္မဏသဒိသံ).

နဝိပ္ပယုတ္တပစ္စယော

၃၀. ဒဿနေန ပဟာတဗ္ဗံ။ပေ။ နဝိပ္ပယုတ္တပစ္စယာ – အရူပေ ဒဿနေန ပဟာတဗ္ဗံ ဧကံ ခန္ဓံ ပဋိစ္စ။ပေ။. (၁)

ဘာဝနာယ ပဟာတဗ္ဗံ။ပေ။ နဝိပ္ပယုတ္တပစ္စယာ – အရူပေ ဘာဝနာယ ပဟာတဗ္ဗံ ဧကံ ခန္ဓံ။ပေ။. (၁)

နေဝဒဿနေန နဘာဝနာယ ပဟာတဗ္ဗံ။ပေ။ နဝိပ္ပယုတ္တပစ္စယာ – အရူပေ နေဝဒဿနေန နဘာဝနာယ ပဟာတဗ္ဗံ ဧကံ ခန္ဓံ ပဋိစ္စ။ပေ။ ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ။ အသညသတ္တာနံ။ပေ။. (၁)

နောနတ္ထိ-နောဝိဂတပစ္စယာ

၃၁. ဒဿနေန ပဟာတဗ္ဗံ ဓမ္မံ ပဋိစ္စ နေဝဒဿနေန နဘာဝနာယ။ပေ။ နောနတ္ထိပစ္စယာ။ နောဝိဂတပစ္စယာ (နအာရမ္မဏသဒိသံ).

၂. ပစ္စယပစ္စနီယံ

၂. သင်္ချာဝါရော

၃၂. နဟေတုယာ တီဏိ၊ နအာရမ္မဏေ ပဉ္စ၊ နအဓိပတိယာ နဝ၊ နအနန္တရေ ပဉ္စ၊ နသမနန္တရေ ပဉ္စ၊ နအညမညေ ပဉ္စ၊ နဥပနိဿယေ ပဉ္စ၊ နပုရေဇာတေ သတ္တ၊ နပစ္ဆာဇာတေ နဝ၊ နအာသေဝနေ နဝ၊ နကမ္မေ တီဏိ၊ နဝိပါကေ နဝ၊ နအာဟာရေ ဧကံ၊ နဣန္ဒြိယေ ဧကံ၊ နဈာနေ ဧကံ၊ နမဂ္ဂေ ဧကံ၊ နသမ္ပယုတ္တေ ပဉ္စ၊ နဝိပ္ပယုတ္တေ တီဏိ၊ နောနတ္ထိယာ ပဉ္စ၊ နောဝိဂတေ ပဉ္စ.

(ဉတွာ ဂဏေတဗ္ဗံ.)

ပစ္စနီယံ.

၃. ပစ္စယာနုလောမပစ္စနီယံ

ဟေတုဒုကံ

၃၃. ဟေတုပစ္စယာ နအာရမ္မဏေ ပဉ္စ၊ နအဓိပတိယာ နဝ၊ နအနန္တရေ ပဉ္စ၊ နသမနန္တရေ ပဉ္စ၊ နအညမညေ ပဉ္စ၊ နဥပနိဿယေ ပဉ္စ၊ နပုရေဇာတေ သတ္တ၊ နပစ္ဆာဇာတေ နဝ၊ နအာသေဝနေ နဝ၊ နကမ္မေ တီဏိ၊ နဝိပါကေ နဝ၊ နသမ္ပယုတ္တေ ပဉ္စ၊ နဝိပ္ပယုတ္တေ တီဏိ၊ နောနတ္ထိယာ ပဉ္စ၊ နောဝိဂတေ ပဉ္စ.

(ဧဝံ အနုမဇ္ဇန္တေန ဂဏေတဗ္ဗံ.)

အနုလောမပစ္စနီယံ.

၄. ပစ္စယပစ္စနီယာနုလောမံ

နဟေတုဒုကံ

၃၄. နဟေတုပစ္စယာ အာရမ္မဏေ တီဏိ၊ အနန္တရေ တီဏိ၊ သမနန္တရေ တီဏိ၊ သဟဇာတေ တီဏိ၊ အညမညေ တီဏိ၊ နိဿယေ တီဏိ၊ ဥပနိဿယေ တီဏိ၊ ပုရေဇာတေ တီဏိ၊ အာသေဝနေ တီဏိ၊ ကမ္မေ တီဏိ၊ ဝိပါကေ ဧကံ၊ အာဟာရေ တီဏိ၊ ဣန္ဒြိယေ တီဏိ၊ ဈာနေ တီဏိ၊ မဂ္ဂေ ဒွေ၊ သမ္ပယုတ္တေ တီဏိ၊ ဝိပ္ပယုတ္တေ တီဏိ၊ အတ္ထိယာ တီဏိ၊ နတ္ထိယာ တီဏိ၊ ဝိဂတေ တီဏိ၊ အဝိဂတေ တီဏိ.

(ဧဝံ အနုမဇ္ဇန္တေန ဂဏေတဗ္ဗံ.)

ပစ္စနီယာနုလောမံ.

ပဋိစ္စဝါရော.

၂. သဟဇာတဝါရော

၁-၄. ပစ္စယာနုလောမာဒိ

၃၅. ဒဿနေန ပဟာတဗ္ဗံ ဓမ္မံ သဟဇာတော ဒဿနေန ပဟာတဗ္ဗော ဓမ္မော ဥပ္ပဇ္ဇတိ ဟေတုပစ္စယာ – ဒဿနေန ပဟာတဗ္ဗံ ဧကံ ခန္ဓံ သဟဇာတာ တယော ခန္ဓာ။ပေ။ ဒွေ ခန္ဓေ သဟဇာတာ။ပေ။.

(သဟဇာတဝါရော ပဋိစ္စဝါရသဒိသော.)

၃. ပစ္စယဝါရော

၁. ပစ္စယာနုလောမံ

၁. ဝိဘင်္ဂဝါရော

ဟေတုပစ္စယော

၃၆. ဒဿနေန ပဟာတဗ္ဗံ ဓမ္မံ ပစ္စယာ ဒဿနေန ပဟာတဗ္ဗော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

ဘာဝနာယ ပဟာတဗ္ဗံ ဓမ္မံ ပစ္စယာ ဘာဝနာယ။ တီဏိ.

၃၇. နေဝဒဿနေန နဘာဝနာယ ပဟာတဗ္ဗံ ဓမ္မံ ပစ္စယာ နေဝဒဿနေန နဘာဝနာယ ပဟာတဗ္ဗော ဓမ္မော ဥပ္ပဇ္ဇတိ ဟေတုပစ္စယာ – နေဝဒဿနေန နဘာဝနာယ ပဟာတဗ္ဗံ ဧကံ ခန္ဓံ ပစ္စယာ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။ ပဋိသန္ဓိက္ခဏေ နေဝဒဿနေန နဘာဝနာယ ပဟာတဗ္ဗံ ဧကံ ခန္ဓံ ပစ္စယာ တယော ခန္ဓာ ကဋတ္တာ စ ရူပံ။ပေ။ ဒွေ ခန္ဓေ ပစ္စယာ ဒွေ ခန္ဓာ။ပေ။ ခန္ဓေ ပစ္စယာ ဝတ္ထု၊ ဝတ္ထုံ ပစ္စယာ ခန္ဓာ. ဧကံ မဟာဘူတံ ပစ္စယာ တယော မဟာဘူတာ။ပေ။ မဟာဘူတေ ပစ္စယာ စိတ္တသမုဋ္ဌာနံ ရူပံ ကဋတ္တာရူပံ ဥပါဒါရူပံ. ဝတ္ထုံ ပစ္စယာ နေဝဒဿနေန နဘာဝနာယ ပဟာတဗ္ဗာ ခန္ဓာ. (၁)

နေဝဒဿနေန နဘာဝနာယ ပဟာတဗ္ဗံ ဓမ္မံ ပစ္စယာ ဒဿနေန ပဟာတဗ္ဗော ဓမ္မော ဥပ္ပဇ္ဇတိ ဟေတုပစ္စယာ – ဝတ္ထုံ ပစ္စယာ ဒဿနေန ပဟာတဗ္ဗာ ခန္ဓာ. (၂)

နေဝဒဿနေန နဘာဝနာယ ပဟာတဗ္ဗံ ဓမ္မံ ပစ္စယာ ဘာဝနာယ ပဟာတဗ္ဗော ဓမ္မော ဥပ္ပဇ္ဇတိ ဟေတုပစ္စယာ – ဝတ္ထုံ ပစ္စယာ ဘာဝနာယ ပဟာတဗ္ဗာ ခန္ဓာ. (၃)

နေဝဒဿနေန နဘာဝနာယ ပဟာတဗ္ဗံ ဓမ္မံ ပစ္စယာ ဒဿနေန ပဟာတဗ္ဗော စ နေဝဒဿနေန နဘာဝနာယ ပဟာတဗ္ဗော စ ဓမ္မာ ဥပ္ပဇ္ဇန္တိ ဟေတုပစ္စယာ – ဝတ္ထုံ ပစ္စယာ ဒဿနေန ပဟာတဗ္ဗာ ခန္ဓာ၊ မဟာဘူတေ ပစ္စယာ စိတ္တသမုဋ္ဌာနံ ရူပံ. (၄)

နေဝဒဿနေန နဘာဝနာယ ပဟာတဗ္ဗံ ဓမ္မံ ပစ္စယာ ဘာဝနာယ ပဟာတဗ္ဗော စ နေဝဒဿနေန နဘာဝနာယ ပဟာတဗ္ဗော စ ဓမ္မာ ဥပ္ပဇ္ဇန္တိ ဟေတုပစ္စယာ – ဝတ္ထုံ ပစ္စယာ ဘာဝနာယ ပဟာတဗ္ဗာ ခန္ဓာ၊ မဟာဘူတေ ပစ္စယာ စိတ္တသမုဋ္ဌာနံ ရူပံ. (၅)

၃၈. ဒဿနေန ပဟာတဗ္ဗဉ္စ နေဝဒဿနေန နဘာဝနာယ ပဟာတဗ္ဗဉ္စ ဓမ္မံ ပစ္စယာ ဒဿနေန ပဟာတဗ္ဗော ဓမ္မော ဥပ္ပဇ္ဇတိ ဟေတုပစ္စယာ – ဒဿနေန ပဟာတဗ္ဗံ ဧကံ ခန္ဓဉ္စ ဝတ္ထုဉ္စ ပစ္စယာ တယော ခန္ဓာ။ပေ။ ဒွေ ခန္ဓေ စ ဝတ္ထုဉ္စ ပစ္စယာ ဒွေ ခန္ဓာ. (၁)

ဒဿနေန ပဟာတဗ္ဗဉ္စ နေဝဒဿနေန နဘာဝနာယ ပဟာတဗ္ဗဉ္စ ဓမ္မံ ပစ္စယာ နေဝဒဿနေန နဘာဝနာယ ပဟာတဗ္ဗော ဓမ္မော ဥပ္ပဇ္ဇတိ ဟေတုပစ္စယာ – ဒဿနေန ပဟာတဗ္ဗေ ခန္ဓေ စ မဟာဘူတေ စ ပစ္စယာ စိတ္တသမုဋ္ဌာနံ ရူပံ. (၂)

ဒဿနေန ပဟာတဗ္ဗဉ္စ နေဝဒဿနေန နဘာဝနာယ ပဟာတဗ္ဗဉ္စ ဓမ္မံ ပစ္စယာ ဒဿနေန ပဟာတဗ္ဗော စ နေဝဒဿနေန နဘာဝနာယ ပဟာတဗ္ဗော စ ဓမ္မာ ဥပ္ပဇ္ဇန္တိ ဟေတုပစ္စယာ – ဒဿနေန ပဟာတဗ္ဗံ ဧကံ ခန္ဓဉ္စ ဝတ္ထုဉ္စ ပစ္စယာ တယော ခန္ဓာ။ပေ။ ဒွေ ခန္ဓေ စ ဝတ္ထုဉ္စ ပစ္စယာ ဒွေ ခန္ဓာ၊ ဒဿနေန ပဟာတဗ္ဗေ ခန္ဓေ စ မဟာဘူတေ စ ပစ္စယာ စိတ္တသမုဋ္ဌာနံ ရူပံ. (၃)

၃၉. ဘာဝနာယ ပဟာတဗ္ဗဉ္စ နေဝဒဿနေန နဘာဝနာယ ပဟာတဗ္ဗဉ္စ ဓမ္မံ ပစ္စယာ ဘာဝနာယ ပဟာတဗ္ဗော ဓမ္မော ဥပ္ပဇ္ဇတိ ဟေတုပစ္စယာ – ဘာဝနာယ ပဟာတဗ္ဗံ ဧကံ ခန္ဓဉ္စ ဝတ္ထုဉ္စ ပစ္စယာ တယော ခန္ဓာ။ပေ။ ဒွေ ခန္ဓေ စ ဝတ္ထုဉ္စ။ပေ။. (၁)

ဘာဝနာယ ပဟာတဗ္ဗဉ္စ နေဝဒဿနေန နဘာဝနာယ ပဟာတဗ္ဗဉ္စ ဓမ္မံ ပစ္စယာ နေဝဒဿနေန နဘာဝနာယ ပဟာတဗ္ဗော ဓမ္မော ဥပ္ပဇ္ဇတိ ဟေတုပစ္စယာ – ဘာဝနာယ ပဟာတဗ္ဗေ ခန္ဓေ စ မဟာဘူတေ စ ပစ္စယာ စိတ္တသမုဋ္ဌာနံ ရူပံ. (၂)

ဘာဝနာယ ပဟာတဗ္ဗဉ္စ နေဝဒဿနေန နဘာဝနာယ ပဟာတဗ္ဗဉ္စ ဓမ္မံ ပစ္စယာ ဘာဝနာယ ပဟာတဗ္ဗော စ နေဝဒဿနေန နဘာဝနာယ ပဟာတဗ္ဗော စ ဓမ္မာ ဥပ္ပဇ္ဇန္တိ ဟေတုပစ္စယာ – ဘာဝနာယ ပဟာတဗ္ဗံ ဧကံ ခန္ဓဉ္စ ဝတ္ထုဉ္စ ပစ္စယာ တယော ခန္ဓာ။ပေ။ ဒွေ ခန္ဓေ စ ဝတ္ထုဉ္စ။ပေ။ ဘာဝနာယ ပဟာတဗ္ဗေ ခန္ဓေ စ မဟာဘူတေ စ ပစ္စယာ စိတ္တသမုဋ္ဌာနံ ရူပံ. (၃)

အာရမ္မဏပစ္စယော

၄၀. ဒဿနေန ပဟာတဗ္ဗံ ဓမ္မံ ပစ္စယာ ဒဿနေန ပဟာတဗ္ဗော ဓမ္မော ဥပ္ပဇ္ဇတိ အာရမ္မဏပစ္စယာ – ဒဿနေန ပဟာတဗ္ဗံ ဧကံ ခန္ဓံ ပစ္စယာ တယော ခန္ဓာ။ပေ။ ဒွေ ခန္ဓေ။ပေ။. (၁)

ဘာဝနာယ ပဟာတဗ္ဗံ ဓမ္မံ ပစ္စယာ ဘာဝနာယ ပဟာတဗ္ဗော ဓမ္မော ဥပ္ပဇ္ဇတိ အာရမ္မဏပစ္စယာ – ဘာဝနာယ ပဟာတဗ္ဗံ ဧကံ ခန္ဓံ ပစ္စယာ တယော ခန္ဓာ။ပေ။. (၁)

နေဝဒဿနေန နဘာဝနာယ ပဟာတဗ္ဗံ ဓမ္မံ ပစ္စယာ နေဝဒဿနေန နဘာဝနာယ ပဟာတဗ္ဗော ဓမ္မော ဥပ္ပဇ္ဇတိ အာရမ္မဏပစ္စယာ – နေဝဒဿနေန နဘာဝနာယ ပဟာတဗ္ဗံ ဧကံ ခန္ဓံ ပစ္စယာ တယော ခန္ဓာ။ပေ။ ဒွေ ခန္ဓေ။ပေ။. ပဋိသန္ဓိက္ခဏေ နေဝဒဿနေန နဘာဝနာယ ပဟာတဗ္ဗံ ဧကံ ခန္ဓံ ပစ္စယာ တယော ခန္ဓာ။ပေ။ ဒွေ ခန္ဓေ။ပေ။ ဝတ္ထုံ ပစ္စယာ ခန္ဓာ၊ စက္ခာယတနံ ပစ္စယာ စက္ခုဝိညာဏံ။ပေ။ ကာယာယတနံ ပစ္စယာ ကာယဝိညာဏံ၊ ဝတ္ထုံ ပစ္စယာ နေဝဒဿနေန နဘာဝနာယ ပဟာတဗ္ဗာ ခန္ဓာ. (၁)

နေဝဒဿနေန နဘာဝနာယ ပဟာတဗ္ဗံ ဓမ္မံ ပစ္စယာ ဒဿနေန ပဟာတဗ္ဗော ဓမ္မော ဥပ္ပဇ္ဇတိ အာရမ္မဏပစ္စယာ – ဝတ္ထုံ ပစ္စယာ ဒဿနေန ပဟာတဗ္ဗာ ခန္ဓာ. (၂)

နေဝဒဿနေန နဘာဝနာယ ပဟာတဗ္ဗံ ဓမ္မံ ပစ္စယာ ဘာဝနာယ ပဟာတဗ္ဗော ဓမ္မော ဥပ္ပဇ္ဇတိ အာရမ္မဏပစ္စယာ – ဝတ္ထုံ ပစ္စယာ ဘာဝနာယ ပဟာတဗ္ဗာ ခန္ဓာ. (၃)

၄၁. ဒဿနေန ပဟာတဗ္ဗဉ္စ နေဝဒဿနေန နဘာဝနာယ ပဟာတဗ္ဗဉ္စ ဓမ္မံ ပစ္စယာ ဒဿနေန ပဟာတဗ္ဗော ဓမ္မော ဥပ္ပဇ္ဇတိ အာရမ္မဏပစ္စယာ – ဒဿနေန ပဟာတဗ္ဗံ ဧကံ ခန္ဓဉ္စ ဝတ္ထုဉ္စ ပစ္စယာ တယော ခန္ဓာ။ပေ။ ဒွေ ခန္ဓေ စ ဝတ္ထုဉ္စ ပစ္စယာ။ပေ။. (၁)

ဘာဝနာယ ပဟာတဗ္ဗဉ္စ နေဝဒဿနေန နဘာဝနာယ ပဟာတဗ္ဗဉ္စ ဓမ္မံ ပစ္စယာ ဘာဝနာယ ပဟာတဗ္ဗော ဓမ္မော ဥပ္ပဇ္ဇတိ အာရမ္မဏပစ္စယာ – ဘာဝနာယ ပဟာတဗ္ဗံ ဧကံ ခန္ဓဉ္စ ဝတ္ထုဉ္စ ပစ္စယာ တယော ခန္ဓာ။ပေ။ ဒွေ ခန္ဓေ စ ဝတ္ထုဉ္စ ပစ္စယာ ဒွေ ခန္ဓာ. (၁)

အဓိပတိပစ္စယာဒိ

၄၂. ဒဿနေန ပဟာတဗ္ဗံ ဓမ္မံ ပစ္စယာ ဒဿနေန ပဟာတဗ္ဗော ဓမ္မော ဥပ္ပဇ္ဇတိ အဓိပတိပစ္စယာ။ (ပရိပုဏ္ဏံ၊ ပဋိသန္ဓိ နတ္ထိ) အနန္တရပစ္စယာ။ သမနန္တရပစ္စယာ (အာရမ္မဏသဒိသံ).

သဟဇာတပစ္စယော

ဒဿနေန ပဟာတဗ္ဗံ ဓမ္မံ ပစ္စယာ ဒဿနေန ပဟာတဗ္ဗော ဓမ္မော ဥပ္ပဇ္ဇတိ သဟဇာတပစ္စယာ – ဒဿနေန ပဟာတဗ္ဗံ ဧကံ ခန္ဓံ။ တီဏိ.

ဘာဝနာယ ပဟာတဗ္ဗံ ဓမ္မံ ပစ္စယာ။ တီဏိ.

၄၃. နေဝဒဿနေန နဘာဝနာယ ပဟာတဗ္ဗံ ဓမ္မံ ပစ္စယာ နေဝဒဿနေန နဘာဝနာယ ပဟာတဗ္ဗော ဓမ္မော ဥပ္ပဇ္ဇတိ သဟဇာတပစ္စယာ – နေဝဒဿနေန နဘာဝနာယ ပဟာတဗ္ဗံ ဧကံ ခန္ဓံ ပစ္စယာ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ ပစ္စယာ ဒွေ ခန္ဓာ။ပေ။ ပဋိသန္ဓိက္ခဏေ။ပေ။ ခန္ဓေ ပစ္စယာ ဝတ္ထု၊ ဝတ္ထုံ ပစ္စယာ ခန္ဓာ၊ ဧကံ မဟာဘူတံ ပစ္စယာ တယော မဟာဘူတာ။ပေ။ မဟာဘူတေ ပစ္စယာ။ပေ။ ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ။ အသညသတ္တာနံ ဧကံ။ပေ။ စက္ခာယတနံ ပစ္စယာ စက္ခုဝိညာဏံ။ပေ။ ကာယာယတနံ ပစ္စယာ ကာယဝိညာဏံ၊ ဝတ္ထုံ ပစ္စယာ နေဝဒဿနေန နဘာဝနာယ ပဟာတဗ္ဗာ ခန္ဓာ.

နေဝဒဿနေန နဘာဝနာယ ပဟာတဗ္ဗံ ဓမ္မံ ပစ္စယာ ဒဿနေန ပဟာတဗ္ဗော ဓမ္မော ဥပ္ပဇ္ဇတိ သဟဇာတပစ္စယာ (အဝသေသာ ဟေတုပစ္စယသဒိသာ).

အညမညပစ္စယာဒိ

၄၄. ဒဿနေန ပဟာတဗ္ဗံ ဓမ္မံ ပစ္စယာ ဒဿနေန ပဟာတဗ္ဗော ဓမ္မော ဥပ္ပဇ္ဇတိ အညမညပစ္စယာ။ နိဿယပစ္စယာ။ ဥပနိဿယပစ္စယာ။ ပုရေဇာတပစ္စယာ (ပဋိသန္ဓိ နတ္ထိ)။ အာသေဝနပစ္စယာ။ (ပဋိသန္ဓိ နတ္ထိ၊ ဝိပါကဉ္စ) ကမ္မပစ္စယာ။ ဝိပါကပစ္စယာ။ အာဟာရပစ္စယာ။ ဣန္ဒြိယပစ္စယာ။ ဈာနပစ္စယာ။ မဂ္ဂပစ္စယာ။ သမ္ပယုတ္တပစ္စယာ။ ဝိပ္ပယုတ္တပစ္စယာ။ အတ္ထိပစ္စယာ။ နတ္ထိပစ္စယာ။ ဝိဂတပစ္စယာ။ အဝိဂတပစ္စယာ.

၁. ပစ္စယာနုလောမံ

၂. သင်္ချာဝါရော

၄၅. ဟေတုယာ သတ္တရသ၊ အာရမ္မဏေ သတ္တ၊ အဓိပတိယာ သတ္တရသ၊ အနန္တရေ သတ္တ၊ သမနန္တရေ သတ္တ၊ သဟဇာတေ သတ္တရသ၊ အညမညေ သတ္တ၊ နိဿယေ သတ္တရသ၊ ဥပနိဿယေ သတ္တ၊ ပုရေဇာတေ သတ္တ၊ အာသေဝနေ သတ္တ၊ ကမ္မေ သတ္တရသ၊ ဝိပါကေ ဧကံ၊ အာဟာရေ သတ္တရသ၊ ဣန္ဒြိယေ သတ္တရသ၊ ဈာနေ သတ္တရသ၊ မဂ္ဂေ သတ္တရသ၊ သမ္ပယုတ္တေ သတ္တ၊ ဝိပ္ပယုတ္တေ သတ္တရသ၊ အတ္ထိယာ သတ္တရသ၊ နတ္ထိယာ သတ္တ၊ ဝိဂတေ သတ္တ၊ အဝိဂတေ သတ္တရသ (ဧဝံ ဂဏေတဗ္ဗံ).