၁. ဝိဘင်္ဂဝါရော

နဟေတုပစ္စယော

၆၃. ဒဿနေန ပဟာတဗ္ဗံ ဓမ္မံ သံသဋ္ဌော ဒဿနေန ပဟာတဗ္ဗော ဓမ္မော ဥပ္ပဇ္ဇတိ နဟေတုပစ္စယာ – ဝိစိကိစ္ဆာသဟဂတေ ခန္ဓေ သံသဋ္ဌော ဝိစိကိစ္ဆာသဟဂတော မောဟော. (၁)

ဘာဝနာယ ပဟာတဗ္ဗံ ဓမ္မံ သံသဋ္ဌော ဘာဝနာယ ပဟာတဗ္ဗော ဓမ္မော ဥပ္ပဇ္ဇတိ နဟေတုပစ္စယာ – ဥဒ္ဓစ္စသဟဂတေ ခန္ဓေ သံသဋ္ဌော ဥဒ္ဓစ္စသဟဂတော မောဟော. (၁)

နေဝဒဿနေန နဘာဝနာယ ပဟာတဗ္ဗံ ဓမ္မံ သံသဋ္ဌော နေဝဒဿနေန နဘာဝနာယ ပဟာတဗ္ဗော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ နေဝဒဿနေန နဘာဝနာယ ပဟာတဗ္ဗံ ဧကံ ခန္ဓံ သံသဋ္ဌာ တယော ခန္ဓာ။ပေ။ အဟေတုကပဋိသန္ဓိက္ခဏေ။ပေ။. (၁)

နအဓိပတိပစ္စယာဒိ

၆၄. ဒဿနေန ပဟာတဗ္ဗံ ဓမ္မံ သံသဋ္ဌော ဒဿနေန ပဟာတဗ္ဗော ဓမ္မော ဥပ္ပဇ္ဇတိ နအဓိပတိပစ္စယာ။ နပုရေဇာတပစ္စယာ။ နပစ္ဆာဇာတပစ္စယာ။ နအာသေဝနပစ္စယာ။ နကမ္မပစ္စယာ။ နဝိပါကပစ္စယာ။ – နေဝဒဿနေန နဘာဝနာယ။ပေ။ နဈာနပစ္စယာ – ပဉ္စဝိညာဏံ။ပေ။ နမဂ္ဂပစ္စယာ – အဟေတုကံ။ပေ။ နေဝဒဿနေန နဘာဝနာယ ပဟာတဗ္ဗော။ပေ။ နဝိပ္ပယုတ္တပစ္စယာ။ တီဏိ.