၁. ဝိဘင်္ဂဝါရော

နဟေတုပစ္စယော

၄၆. ဒဿနေန ပဟာတဗ္ဗံ ဓမ္မံ ပစ္စယာ ဒဿနေန ပဟာတဗ္ဗော ဓမ္မော ဥပ္ပဇ္ဇတိ နဟေတုပစ္စယာ – ဝိစိကိစ္ဆာသဟဂတေ ခန္ဓေ ပစ္စယာ ဝိစိကိစ္ဆာသဟဂတော မောဟော. (၁)

ဘာဝနာယ ပဟာတဗ္ဗံ ဓမ္မံ ပစ္စယာ ဘာဝနာယ ပဟာတဗ္ဗော ဓမ္မော ဥပ္ပဇ္ဇတိ နဟေတုပစ္စယာ – ဥဒ္ဓစ္စသဟဂတေ ခန္ဓေ ပစ္စယာ ဥဒ္ဓစ္စသဟဂတော မောဟော. (၁)

နေဝဒဿနေန နဘာဝနာယ ပဟာတဗ္ဗံ ဓမ္မံ ပစ္စယာ နေဝဒဿနေန နဘာဝနာယ ပဟာတဗ္ဗော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ နေဝဒဿနေန နဘာဝနာယ ပဟာတဗ္ဗံ ဧကံ ခန္ဓံ ပစ္စယာ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။ အဟေတုကပဋိသန္ဓိက္ခဏေ။ပေ။ ခန္ဓေ ပစ္စယာ ဝတ္ထု၊ ဝတ္ထုံ ပစ္စယာ ခန္ဓာ၊ ဧကံ မဟာဘူတံ။ပေ။ ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ။ အသညသတ္တာနံ။ပေ။ စက္ခာယတနံ ပစ္စယာ စက္ခုဝိညာဏံ။ပေ။ ကာယာယတနံ ပစ္စယာ ကာယဝိညာဏံ၊ ဝတ္ထုံ ပစ္စယာ အဟေတုကာ နေဝဒဿနေန နဘာဝနာယ ပဟာတဗ္ဗာ ခန္ဓာ. (၁)

နေဝဒဿနေန နဘာဝနာယ ပဟာတဗ္ဗံ ဓမ္မံ ပစ္စယာ ဒဿနေန ပဟာတဗ္ဗော ဓမ္မော ဥပ္ပဇ္ဇတိ နဟေတုပစ္စယာ – ဝတ္ထုံ ပစ္စယာ ဝိစိကိစ္ဆာသဟဂတော မောဟော. (၂)

နေဝဒဿနေန နဘာဝနာယ ပဟာတဗ္ဗံ ဓမ္မံ ပစ္စယာ ဘာဝနာယ ပဟာတဗ္ဗော ဓမ္မော ဥပ္ပဇ္ဇတိ နဟေတုပစ္စယာ – ဝတ္ထုံ ပစ္စယာ ဥဒ္ဓစ္စသဟဂတော မောဟော. (၃)

၄၇. ဒဿနေန ပဟာတဗ္ဗဉ္စ နေဝဒဿနေန နဘာဝနာယ ပဟာတဗ္ဗဉ္စ ဓမ္မံ ပစ္စယာ ဒဿနေန ပဟာတဗ္ဗော ဓမ္မော ဥပ္ပဇ္ဇတိ နဟေတုပစ္စယာ – ဝိစိကိစ္ဆာသဟဂတေ ခန္ဓေ စ ဝတ္ထုဉ္စ ပစ္စယာ ဝိစိကိစ္ဆာသဟဂတော မောဟော. (၁)

ဘာဝနာယ ပဟာတဗ္ဗဉ္စ နေဝဒဿနေန နဘာဝနာယ ပဟာတဗ္ဗဉ္စ ဓမ္မံ ပစ္စယာ ဘာဝနာယ ပဟာတဗ္ဗော ဓမ္မော ဥပ္ပဇ္ဇတိ နဟေတုပစ္စယာ – ဥဒ္ဓစ္စသဟဂတေ ခန္ဓေ စ ဝတ္ထုဉ္စ ပစ္စယာ ဥဒ္ဓစ္စသဟဂတော မောဟော. (၁)

နအာရမ္မဏပစ္စယော

၄၈. ဒဿနေန ပဟာတဗ္ဗံ ဓမ္မံ ပစ္စယာ နေဝဒဿနေန နဘာဝနာယ ပဟာတဗ္ဗော ဓမ္မော ဥပ္ပဇ္ဇတိ နအာရမ္မဏပစ္စယာ – ဒဿနေန ပဟာတဗ္ဗေ ခန္ဓေ ပစ္စယာ စိတ္တသမုဋ္ဌာနံ ရူပံ. (၁)

ဘာဝနာယ ပဟာတဗ္ဗံ ဓမ္မံ ပစ္စယာ နေဝဒဿနေန နဘာဝနာယ ပဟာတဗ္ဗော ဓမ္မော ဥပ္ပဇ္ဇတိ နအာရမ္မဏပစ္စယာ – ဘာဝနာယ ပဟာတဗ္ဗေ ခန္ဓေ ပစ္စယာ စိတ္တသမုဋ္ဌာနံ ရူပံ. (၁)

နေဝဒဿနေန နဘာဝနာယ ပဟာတဗ္ဗံ ဓမ္မံ ပစ္စယာ နေဝဒဿနေန နဘာဝနာယ ပဟာတဗ္ဗော ဓမ္မော ဥပ္ပဇ္ဇတိ နအာရမ္မဏပစ္စယာ – နေဝဒဿနေန နဘာဝနာယ ပဟာတဗ္ဗေ ခန္ဓေ ပစ္စယာ စိတ္တသမုဋ္ဌာနံ ရူပံ. ပဋိသန္ဓိက္ခဏေ နေဝဒဿနေန နဘာဝနာယ ပဟာတဗ္ဗေ ခန္ဓေ ပစ္စယာ ကဋတ္တာရူပံ၊ ခန္ဓေ ပစ္စယာ ဝတ္ထု၊ ဧကံ မဟာဘူတံ ပစ္စယာ။ပေ။ ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ။ အသညသတ္တာနံ။ပေ။. (၁)

၄၉. ဒဿနေန ပဟာတဗ္ဗဉ္စ နေဝဒဿနေန နဘာဝနာယ ပဟာတဗ္ဗဉ္စ ဓမ္မံ ပစ္စယာ ဒဿနေန ပဟာတဗ္ဗော ဓမ္မော ဥပ္ပဇ္ဇတိ နအာရမ္မဏပစ္စယာ – ဒဿနေန ပဟာတဗ္ဗေ ခန္ဓေ စ မဟာဘူတေ စ ပစ္စယာ စိတ္တသမုဋ္ဌာနံ ရူပံ. (၁)

ဘာဝနာယ ပဟာတဗ္ဗဉ္စ နေဝဒဿနေန နဘာဝနာယ ပဟာတဗ္ဗဉ္စ ဓမ္မံ ပစ္စယာ နေဝဒဿနေန နဘာဝနာယ ပဟာတဗ္ဗော ဓမ္မော ဥပ္ပဇ္ဇတိ နအာရမ္မဏပစ္စယာ – ဘာဝနာယ ပဟာတဗ္ဗေ ခန္ဓေ စ မဟာဘူတေ စ ပစ္စယာ စိတ္တသမုဋ္ဌာနံ ရူပံ. (၁)

နအဓိပတိပစ္စယာဒိ

၅၀. ဒဿနေန ပဟာတဗ္ဗံ ဓမ္မံ ပစ္စယာ ဒဿနေန ပဟာတဗ္ဗော ဓမ္မော ဥပ္ပဇ္ဇတိ နအဓိပတိပစ္စယာ (သဟဇာတသဒိသံ)။ နအနန္တရပစ္စယာ။ နသမနန္တရပစ္စယာ။ နအညမညပစ္စယာ။ နဥပနိဿယပစ္စယာ.

နပုရေဇာတပစ္စယော

၅၁. ဒဿနေန ပဟာတဗ္ဗံ ဓမ္မံ ပစ္စယာ ဒဿနေန ပဟာတဗ္ဗော ဓမ္မော ဥပ္ပဇ္ဇတိ နပုရေဇာတပစ္စယာ – အရူပေ ဒဿနေန ပဟာတဗ္ဗံ ဧကံ ခန္ဓံ ပစ္စယာ။ပေ။. (၁)

ဒဿနေန ပဟာတဗ္ဗံ ဓမ္မံ ပစ္စယာ နေဝဒဿနေန နဘာဝနာယ ပဟာတဗ္ဗော ဓမ္မော ဥပ္ပဇ္ဇတိ နပုရေဇာတပစ္စယာ – ဒဿနေန ပဟာတဗ္ဗေ ခန္ဓေ ပစ္စယာ စိတ္တသမုဋ္ဌာနံ ရူပံ. (၂)

ဘာဝနာယ ပဟာတဗ္ဗံ ဓမ္မံ ပစ္စယာ ဘာဝနာယ ပဟာတဗ္ဗော ဓမ္မော ဥပ္ပဇ္ဇတိ နပုရေဇာတပစ္စယာ – အရူပေ ဘာဝနာယ ပဟာတဗ္ဗံ ဧကံ ခန္ဓံ ပစ္စယာ။ပေ။. (၁)

ဘာဝနာယ ပဟာတဗ္ဗံ ဓမ္မံ ပစ္စယာ နေဝဒဿနေန နဘာဝနာယ ပဟာတဗ္ဗော ဓမ္မော ဥပ္ပဇ္ဇတိ နပုရေဇာတပစ္စယာ – ဘာဝနာယ ပဟာတဗ္ဗေ ခန္ဓေ ပစ္စယာ စိတ္တသမုဋ္ဌာနံ ရူပံ. (၂)

၅၂. နေဝဒဿနေန နဘာဝနာယ ပဟာတဗ္ဗံ ဓမ္မံ ပစ္စယာ နေဝဒဿနေန နဘာဝနာယ ပဟာတဗ္ဗော ဓမ္မော ဥပ္ပဇ္ဇတိ နပုရေဇာတပစ္စယာ – အရူပေ နေဝဒဿနေန နဘာဝနာယ ပဟာတဗ္ဗံ ဧကံ ခန္ဓံ ပစ္စယာ တယော ခန္ဓာ။ပေ။ နေဝဒဿနေန နဘာဝနာယ ပဟာတဗ္ဗေ ခန္ဓေ ပစ္စယာ စိတ္တသမုဋ္ဌာနံ ရူပံ. ပဋိသန္ဓိက္ခဏေ။ပေ။ ခန္ဓေ ပစ္စယာ ကဋတ္တာရူပံ၊ ခန္ဓေ ပစ္စယာ ဝတ္ထု၊ ဝတ္ထုံ ပစ္စယာ ခန္ဓာ၊ ဧကံ မဟာဘူတံ။ပေ။ ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ၊ အသညသတ္တာနံ။ပေ။. (၁)

ဒဿနေန ပဟာတဗ္ဗဉ္စ နေဝဒဿနေန နဘာဝနာယ ပဟာတဗ္ဗဉ္စ ဓမ္မံ ပစ္စယာ နေဝဒဿနေန နဘာဝနာယ ပဟာတဗ္ဗော ဓမ္မော ဥပ္ပဇ္ဇတိ နပုရေဇာတပစ္စယာ – ဒဿနေန ပဟာတဗ္ဗေ ခန္ဓေ စ မဟာဘူတေ စ ပစ္စယာ စိတ္တသမုဋ္ဌာနံ ရူပံ. (၁)

ဘာဝနာယ ပဟာတဗ္ဗဉ္စ နေဝဒဿနေန နဘာဝနာယ ပဟာတဗ္ဗဉ္စ ဓမ္မံ ပစ္စယာ နေဝဒဿနေန နဘာဝနာယ ပဟာတဗ္ဗော ဓမ္မော ဥပ္ပဇ္ဇတိ နပုရေဇာတပစ္စယာ – ဘာဝနာယ ပဟာတဗ္ဗေ ခန္ဓေ စ မဟာဘူတေ စ ပစ္စယာ စိတ္တသမုဋ္ဌာနံ ရူပံ. (၁)

နပစ္ဆာဇာတပစ္စယာဒိ

၅၃. ဒဿနေန ပဟာတဗ္ဗံ ဓမ္မံ ပစ္စယာ ဒဿနေန ပဟာတဗ္ဗော ဓမ္မော ဥပ္ပဇ္ဇတိ နပစ္ဆာဇာတပစ္စယာ။ နအာသေဝနပစ္စယာ.

နကမ္မပစ္စယော

၅၄. ဒဿနေန ပဟာတဗ္ဗံ ဓမ္မံ ပစ္စယာ ဒဿနေန ပဟာတဗ္ဗော ဓမ္မော ဥပ္ပဇ္ဇတိ နကမ္မပစ္စယာ – ဒဿနေန ပဟာတဗ္ဗေ ခန္ဓေ ပစ္စယာ ဒဿနေန ပဟာတဗ္ဗာ စေတနာ. (၁)

ဘာဝနာယ ပဟာတဗ္ဗံ ဓမ္မံ။ပေ။ နကမ္မပစ္စယာ – ဘာဝနာယ ပဟာတဗ္ဗေ ခန္ဓေ ပစ္စယာ ဘာဝနာယ ပဟာတဗ္ဗာ စေတနာ. (၁)

နေဝဒဿနေန နဘာဝနာယ ပဟာတဗ္ဗံ ဓမ္မံ။ပေ။ နကမ္မပစ္စယာ – နေဝဒဿနေန နဘာဝနာယ ပဟာတဗ္ဗေ ခန္ဓေ ပစ္စယာ နေဝဒဿနေန နဘာဝနာယ ပဟာတဗ္ဗာ စေတနာ၊ ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ။ပေ။. (၁)

နေဝဒဿနေန နဘာဝနာယ ပဟာတဗ္ဗံ ဓမ္မံ ပစ္စယာ ဒဿနေန ပဟာတဗ္ဗော ဓမ္မော ဥပ္ပဇ္ဇတိ နကမ္မပစ္စယာ – ဝတ္ထုံ ပစ္စယာ ဒဿနေန ပဟာတဗ္ဗာ စေတနာ. (၂)

နေဝဒဿနေန နဘာဝနာယ ပဟာတဗ္ဗံ ဓမ္မံ ပစ္စယာ ဘာဝနာယ ပဟာတဗ္ဗော ဓမ္မော ဥပ္ပဇ္ဇတိ နကမ္မပစ္စယာ – ဝတ္ထုံ ပစ္စယာ ဘာဝနာယ ပဟာတဗ္ဗာ စေတနာ. (၃)

၅၅. ဒဿနေန ပဟာတဗ္ဗဉ္စ နေဝဒဿနေန နဘာဝနာယ ပဟာတဗ္ဗဉ္စ ဓမ္မံ ပစ္စယာ ဒဿနေန ပဟာတဗ္ဗော ဓမ္မော ဥပ္ပဇ္ဇတိ နကမ္မပစ္စယာ – ဒဿနေန ပဟာတဗ္ဗေ ခန္ဓေ စ ဝတ္ထုဉ္စ ပစ္စယာ ဒဿနေန ပဟာတဗ္ဗာ စေတနာ. (၁)

ဘာဝနာယ ပဟာတဗ္ဗဉ္စ နေဝဒဿနေန နဘာဝနာယ ပဟာတဗ္ဗဉ္စ ဓမ္မံ ပစ္စယာ ဘာဝနာယ ပဟာတဗ္ဗော ဓမ္မော ဥပ္ပဇ္ဇတိ နကမ္မပစ္စယာ – ဘာဝနာယ ပဟာတဗ္ဗေ ခန္ဓေ စ ဝတ္ထုဉ္စ ပစ္စယာ ဘာဝနာယ ပဟာတဗ္ဗာ စေတနာ. (၁)

နဝိပါကပစ္စယာဒိ

၅၆. ဒဿနေန ပဟာတဗ္ဗံ ဓမ္မံ ပစ္စယာ ဒဿနေန ပဟာတဗ္ဗော ဓမ္မော ဥပ္ပဇ္ဇတိ နဝိပါကပစ္စယာ (ပရိပုဏ္ဏံ၊ ပဋိသန္ဓိ နတ္ထိ)၊ နအာဟာရပစ္စယာ – ဗာဟိရံ။ ဥတုသမုဋ္ဌာနံ။ အသညသတ္တာနံ။ပေ။ နဣန္ဒြိယပစ္စယာ – ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ။ အသညသတ္တာနံ။ပေ။ မဟာဘူတေ ပစ္စယာ ရူပဇီဝိတိန္ဒြိယံ။ နဈာနပစ္စယာ – ပဉ္စဝိညာဏံ။ပေ။ ဗာဟိရံ။ပေ။ အသညသတ္တာနံ။ပေ။ နမဂ္ဂပစ္စယာ – အဟေတုကံ နေဝဒဿနေန နဘာဝနာယ ပဟာတဗ္ဗံ ဧကံ ခန္ဓံ ပစ္စယာ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ အဟေတုကပဋိသန္ဓိက္ခဏေ။ပေ။ ဧကံ မဟာဘူတံ။ပေ။ အသညသတ္တာနံ။ပေ။ နသမ္ပယုတ္တပစ္စယာ၊ နဝိပ္ပယုတ္တပစ္စယာ – အရူပေ ဒဿနေန ပဟာတဗ္ဗံ ဧကံ ခန္ဓံ ပစ္စယာ။ပေ။ အရူပေ ဘာဝနာယ ပဟာတဗ္ဗံ ဧကံ ခန္ဓံ ပစ္စယာ တယော ခန္ဓာ။ပေ။ နေဝဒဿနေန နဘာဝနာယ ပဟာတဗ္ဗံ ဓမ္မံ ပစ္စယာ နေဝဒဿနေန။ပေ။ အရူပေ နေဝဒဿနေန နဘာဝနာယ ပဟာတဗ္ဗံ ဧကံ ခန္ဓံ ပစ္စယာ တယော ခန္ဓာ။ပေ။ ဒွေ ခန္ဓေ။ပေ။ ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ။ အသညသတ္တာနံ။ပေ။ နောနတ္ထိပစ္စယာ။ နောဝိဂတပစ္စယာ.